Matius 6

Saeagha orog nimi yepto tatsinepne sembe ambatsiogha

1Yesusti nen tipto yubu ambarelamsiogti, “A'undi walia ulapmunne toman agha a'undi wanaag, ‘Ora nimi whingag uaneba imneikti, na wana porog nimi sembanukang,’ aro ulapmunagti, yae up tangkamlulom. Undo seneragto nimi whingag ulapmun tanena, A'uni Imagne ponekori kamna tatsinepne a'unag tatsilul kom. 2Ane sembe andi nimi saeagha orog nimiag tarelamsimen tanena, andi tarel pihinepne sembe trompet pho aro yubu lilim nubu uro yubu sabo nenelamseng kom. Sin, ‘Wali sembanukang,’ senerop nimiri Allah yubu lero winirop aeag babe, ina panneag babe, ‘Nimiri omeklamnukang,’ aro yubu sabo nenero tarelamsiang. Sin undop nimiri ulamangne sembe nari yubu sikne agha ambatnuahin nena, sindi kamna tomnepne ni komopto tobangpa, orog talamla. 3Aghana andi yareag senehiropne agha nimiag tarelamsimen tanena, andi sae sirikneri tatsimenne sembe an sae wanengneri, ‘El tanep kom,’ aro yubu lemna koma ulamlulam. 4Yubu lemna koma ulapmen andarina, andi tatsimenne mo tognoro wamnep. Amik sum Ani Allahri tognorobag ililamlange ponekori anag lunuro kamna tatkelul,” aro ambatsiog.

Allahag molona moloropne sembe Yesusti ambatsiogha

(Lukas 11:2-4)

5Yesusti tipto amoro ambarelamsiogti, “A'undi Allahag molona mololapmun tanena, ‘Wali sembanukang,’ senerop nimiri Allahag moloro ulamang saog uro ulamseng kom. Sin undop nimiri ulamang nena, Yahudi nimiri Allah yubu lero winirop aeag babe, nimi maikno ina wandanemnag babe seka ulamangdi, ‘Nimiri imnukang,’ senenag agha Allahag lero mololamang. Sin undop nimiri ulamangne sembe nari yubu sikne agha ambatnuahin nena, sindi kamna tomnepne ni komopto tobangpa, orog talamla. 6Aghana a'undi agha, Allahag molona mololapmen tanena, an mo ae lomag wa'imendi, ae ina sereki agha lag uro koma Ani Allah tognorobag wamlange ponekoag molona mololamlulam. Undo elag mololapmen tanena, Ani Allahri tognorobag ililamlange ponekori anag lunuro kamna tatkelul. 7A'undi Allahag molona mololapmun tanena, Allah ekon nimiri we uro yubu kiliro lero ulamang saog uro lero ulamseng kom. Sindi seneraglamang nena, ‘Nuri yubu maikno uro lelamebenge neneko Memneri nu ka'ebahilul,’ senelamang. 8Aghana kwema a'unag uahinepne neneko sembe a'undi anam molban komag A'uni ponekori samenag el uro wamla. Ane sembe sindi we uro yubu kiliro lelamang saog uro lero ulamseng kom. 9A'undi Allahag molona mololapmun tanena, undo mololamlulom.

‘Nuni imag wamlamne,

an sembenga orogha wamlamne si o'omne nenero kiplangkeap.

10Andi nu yubu sia lero saelbamsilama lag nembatsululam.

Andi, “Undo ulamseng,” senelamlamne imagnangdi nelepto ulamang saog uro

nu mog so'oag nimiri babe, “Nelepto ulamsebe,” senelamap.

11Nuri sop-sop kwaneng telamnepne sunsunum uro sumene tatsululam.

12Nimiri malia ulamangne sembe nunag lumbanepneog wamlange nuri sae lilobi agha tam wailag nenelamsiap saog uro,

nuri malia uropne sembe anag lunuro tatkenepneog wamlange babe tam wailag nembatsululam.

13Nu menangaro poa palamsimendi, nu mipsinebag poa pihiseng kom aghana, malinge ponekori saelbahinebag agha nu taulbahilulam.

[Wene aro lebap nena, an mo mog so'oag nimi saelba uhiropne wamlamba,

mikipneap imang wareroba abenekoap andinge mo wamlange wamle paghabog wamlul. Sikne agha lebap],’

aro Allahag molona mololamlulom.#6:13 Ayat aneag kekneba ane [...] nusamag mome wamlange, Matius eldamneri mome toro pibog kom. Ora nimiri amik sum Matiusti yubu tipto mome toro palilamekti, kekneba ane nusamag mome wamlange ma'aro mome toro pibek.

14A'undi undo Allahag molona mololapmunne sembe, ora nimiri irikna phibanepne a'undi tam wailag nenelapmun tanena, A'uni Imagne ponekori babe a'undi irikna phibamunne wailag nembarelamsilul. 15Aghana ora nimiri irikna phibanepne tam wailag nenelapmun kom tanena, A'uni Imagne ponekori babe a'undi irikna phibamunne wailag nembarelamsilul kom,” aro ambatsiog.

Kwaneng mag tero koma Allah omektopne sembe ambatsiogha

16Nen tipto yubu lelamogti, “Sin nimi tanekori nimi whingag whing haloa ulamangdi, ‘Nimiri wali sembanukang,’ aro Allah omekto kwaneng mag tero koma whing wandukloa saog ulamang. Sin undop nimiri ulamangne sembe nari yubu sikne agha ambatnuahin nena, sindi kamna tomnepne ni komopto tobangpa, orog talamla. Ane sembe sindi undo unulamang saog uro ulamseng kom. 17Aghana a'un nimi nhondi Allah omekto kwaneng mag tero koma ulapmendi, andi usog hong lelekapmendi, whing maghag a'elbalulam, 18andarina an kwaneng mag tero koma ulapmenne nimiri imnep kom. Nimiri imnep kom aghana, Ani Allah tognorobag wamlange ponekori agha, ‘Kemelamnel,’ aro ulamlulam. Undo ulapmen tanena, Ani Allahri tognorobag ililamlange ponekori anag lunuro kamna tatkelul,” aro ambatsiog.

Tup taneba poloro winiropne sembe ambatsiogha

(Lukas 12:33-36)

19Nen tipto yubu ambarelamsiogti, “A'un mog so'oag tup nenep taneba poloro winilapmunag aneko, nhon mut kulupto loba tanepba, nhon nabolongdi wa'ina tero uanepba, nhon haogha nimiri ae kwerekto haogha tomnep. Ane sembe a'undam nimi mog so'oag tup nenep taneba poloro winilamseng kom. 20-21Ot a'undam nimi imag wamnepne sembe tup nenep taneba poloro winilamlulom. A'un imag wamnepne sembe poloro winilapmunne neneko mut kulap tanep komne, nabolongdi babe wa'ina tenep komne, haogha nimiri babe ae kwerekto haogha tomnep komne agha poloro winilamlulom. A'undi tup nenep taneba poloro palilamlomne ni pipmunag taneko sembe sop-sop wanaag, ‘Wela wamla?’ aro seneragtop. Ane sembe, ‘Imagneag poloro winilamlulom,’ aro lelamna.

22Haing wana wamlange aneko wana nong ningki kemel tananne sembe whea auk pog saogne wamla. Andi haing wali tanena, andi wana nong ningki anekoag tibin wareropne wamnep. 23Aghana andi haing mali tanena, a'un wana nong ningki aneko inibin sogmondo mo wamnep. Andi wanaag tibinne neneko orog wamna tanena, andi wanaagna inibin sogmondo aropne agha wamnep,” aro ambatsiog.

Yesusti, “Wana ophag sen koma Nuni Allahag wana paliro seneraglamlulom,” aro ambatsiogha

(Lukas 16:13; 12:22-34)

24Nen tipto yubu lelamogti, “Nimi nhondi iliri awe tolamna tanena, eldi nik sum ili phendepneri yubu babe nelebahinep kom. Ili yabo ni phenderi yubu nik sum neleplamsiso tanena, nimi enekori, ‘Etne agha yepnun,’ aro ili nhon wanaag o'ona sembanepti, nhon karong sembanep. Awe nhondinge teba'en sembandi, awe nhondinge sol wali uro tomnep. Ane saog uro, a'undi mog so'oag tup nenep tangtoba sarekerepto neleplapmun tanena, Allahri awe tomnep kom.

25Ane sembe, a'undi kwanengap maghap tenaba sembe to, nong konag wanganne sembe to a'undi, ‘Sa'a agha tero wameberi, sa'a agha enekto aukap?’ aro wana ophag aro seneraglamseng kom. Nu nimi kamag wamnep nena, nuri kwaneng teneba aghabog kom. Nu nimi nong wali wamnep nena, nu nong konag enektoba aghabog kom. 26A'undi winang im toman yabalamangne tiwalengkamsululom. Winang anikori tenaba mero yongol torop kom. Sindi babe menekto togto palirop aeag pail torop kom. Aghana A'uni Imagne ponekori sin babe kemero teneba tatsirop. Winang sembe nimiri, ‘O'omne,’ senelamlong kom aghana, Imagneri sin paiamsil. Undop agha tanena, Imagneri a'un sembe, ‘O'omne,’ sembamsil tanena, a'un sembe huatsilul? 27A'un nimi nhondi wana ophag aro, ‘Welaro wamukap,’ seneropne toman agha kamag unne nen tipto heng ko'o nhonog babe ma'aro we nembanep te?

28Apna sa'a sembe a'undi wana ophag aro, ‘Sa'a agha enekto aukap,’ aro seneraglamlom? A'undi tilapmundi, es aba paiag pongka ulamangne sembe el talamlulom. Es abari awe weroan koma ag enekto aneba sembe babe wet purum ol torop kom aghana, 29es aba aneko kembi agha kemerop sirik. Nari sik uro a'unag lelamnange, nimi yubu sia lerop nang ni anabiag agha, Salomo el agha tupne wamog. El ponekori babe ag nongag eneknange walinge nhon es aba kemerop sirik wamla saogne nhon babe enekamog kom. 30Pongoroba paiag pongka ulamlange sumene pongkanep aghana, ambuhum nimiri karebandi, aukag tamnep. Nimiri pongoroba ane, ‘O'omne,’ senerop kom aghana, Allahri pongoroba tanekoag, ‘Wali uro pongkahengdi, es maubaheng,’ aro eleklamsil. Undop pagha Allahri a'un sembe, ‘O'omne,’ senelamsil tanena, a'un nongag enekatsilul kom te? Sa'a sembe a'undi elag wana palilamlom kom? 31Ane sembe a'undi wanaag, ‘Kwanengap maghap welaro tukapti, ag wangal tonne sa'a agha wangaro aukap?’ aro wana ophag agha hail dalamseng kom. 32Allah ekon urop nimiri wana ophag agha ni aneko undo ero sarekereplamang aghana, a'unna undo kom. A'uni Imagne ponekori a'un kwema uahinepne sembe ni el wamlari, tatsinepne poneko wamla. 33A'undi sarekerepto elamlulom nena, nu Saelba Uhiropne ponekori senenne ul palamnepneap, wana porog uro unneap o'om nenelapmundi, sarekerepto elamlulom. Undo unulapmunba, a'un kwema uahinepne ni aneko babe a'un tatsilul. 34Ane sembe, a'undi wana ophag agha, ‘Ambuhum welaro wamukap?’ aro seneraglamseng kom. Ambuhum uro yabalamlengeri mo o'op tanep. Sumene a'un kwema wamsilne sunuropti, nen ambuhumneap ma'al peheng kom,” aro Yesusti ambatsiog.

Actualmente seleccionado:

Matius 6: kklKOS

Destacar

Copiar