Yohanes 4

Yesusap Samaria kelap yubu lelamdeka

1-2Farisi nimiri ka'elamekpa, nimiri yubu lelamekti, “Yesusti yubu ka'ero neleptop nimi pololamsildi, maghag pelengelamsil nimi taneko Yohanesag neleptop nimi phelekto maikno sirik talamang,” alameka Farisi nimi tanekori ka'ebaek. Wene alamek nena, Yesus eldamneri nimi maghag pelengelamsiog kom aghana, eldi yubu ka'ero neleptop nimiri maghag pelengelamsiek nimi sembe yubu lelamek.

Wene aro lelamek yubu Farisi nimiri ka'ebaekpa, Yesus el taogti, 3Yudea so'oag laplobi agha Galilea so'oag nen samoro piog.

4Samoro palamogne ora ina panne olog sunsunum kom wamogpa, “Ot Samaria so'o toman pinepneog wamla,” sembaog.

5Wene sembaogti, yalamogha as soro kalurop as Samaria so'oag wamog as nhon Sikhar yaog. Sikhar yaoghag aneko samenag Yakubti elme Ishak ambarog so'o eneko peramag yaog. 6Yaoghag aneko samenag Yakubti so'oag wailbaog mag nhon wamog. Yesus ina yalamogneri pesa uaogpa, yingkina so'oag waliro longorop mag peramag aneko pukamog. Ina yalamogha aneko yingkina pukamog nena, ae siro heng ik mol-mol alamog abeneko yingkina pukamog.

7-8Yingkina pukamogpa, Yesusti yubu ka'ero neleptop nang, “Kwaneng kamna kapto tol pukap,” aro as soro kalurop asag aneko piek. Piekpa Samaria kel nhon, “Mag temnun,” aro so'o lomag waliro longorop maghag aneko yaog. Yaogpa Yesusti kel enekoag yubu lelamogti, “Na mag yori, mag tebatnululam te?” seog.

9Wene seogpa, kel enekori, “Nu Samaria nimiap Yahudi nimiap nimi pali nenep tangka urop kom,” senelamekne sembaog. Ane sembe yubu lelamogti, “Anna Yahudinge, na Samaria kel wamna. Welaro sembalamdi nanag, ‘Mag tebatne,’ aro molbanelam?” aro haibaog.

10Wene aro haibaogpa, Yesusti kel enekoag samoro yubu lelamogti, “Wene aro leplam aghana, Allahri nimiag mo tarelamsilne sembeap, nari anag moloro, ‘Mag tebatnululam,’ aro wamnange sembeap el wamsom tanena, anna nanag mag molbanohom andarina, kamag nenehirop mag tebatkehene,” seog.

11Wene seogpa, kel enekori, “Nai, andinge mag tero lina poamlam kom. Mag waliroba ane we sirik apna, mag ane weag tau wamla. Kamag nenehirop mag selamne nene talaba tel pululam? 12Yakub nunisa nubunge ponekori mag ane nu sembe so'oag walilobatsiog. Eldamne babe mag ene agha tero telamog. Elmabo babe, sikiniri pham sapi mo'olamsiekne babe mag ene agha tero telamek. Andi senelamlamdi, ‘Yakub wamogne phelekandi nanagha nubunge,’ sembalamdi leplam te?” seog.

13Wene seogpa Yesusti, “Nimi etneri mag ene telamle tanena, nen mag yo ualul. 14Aghana mag nari tebatsinenge tele tanena, nimi eneko ya'ag sop-sop mag yo ualul kom. Nari mag tebatneba, tele nimi eneko sembe nimi enekoag siriro la'anirop mag saog mag lu elag talul. Siriro la'anilamleri, kamag nenehirop mag nubunge talamle andarina, mag nene tele nimi teban koma ya'ag kamag uro wali wamlul,” seog.

15Yesusti wene seogpa, kel enekori, “Nai, na nen mag yo uanenba, samoro telananne weri, na karong. Ane sembe kamag nenehirop mag ane tebatnemenba telamnun,” seog.

16Kel enekori wene seogpa Yesusti, “Pimendi ana'ange yopto enero ane payalulam,” seog.

17Yesusti wene seogpa, kel enekori, “Na nana'ange orog,” seog.

Wene seogpa Yesusti, “Sikne agha andi wene, ‘Nana'ange orog,’ aro leplam. 18Ana'ange yabo lambare tobi lebi up talum. Wene babe an pelepto toangkelne pone ana'ange kom. Wene selamne sikne agha leplam,” seog.

19Wene seogpa, kel enekori, “Nai, an Allah yubu silimu tiptopne wamlamne wene na el tan. 20Nu Samaria nimi nunisa yabori samen main kongten aneag Allah omeklamek aghana, a'un Yahudi nimiri, ‘Allah omekanebag as Yerusalem aghabog omekanepneog wamla,’ alamlom,” seog.

21Wene seogpa Yesusti, “Nanin, nari yubu lemnunne sik sembalulam. Ik nhon sum uro yabileba, Nuni Allah omekanebagna, main kongten aneag babe kom. Yerusalem babe kom aghana, Nuni Allah omeklamlulom. 22A'un Samaria nimiri ekonne agha Allah omeklamlom. Allahri nimi talulamsilne Yahudi nimi pere talulamsil, ane sembe nu Yahudi nimiri el wamsilne agha Allah omeklamap. 23Aghana ik nhon sum uro yabileba, nimiri sikne agha yame seneragnaap nong ningkiri Allah omeklamik tanena, sindi omeklamikne sembe Nuni Allahri wana awi sembahilul. Uro yabilul senne neneko wene babe uro yabil. Nuni Allahri, ‘Undo omekaneheng,’ senelamla ane sembe, nimiri sikne agha yame seneragnaap nong ningkiri Allah omektop tanena, Nuni Allahri, ‘Sik uro omeklamneang,’ aro awi senelamla. 24Allah eldamne wamlangena, yame seneragnaap wamla. Ane sembe nimi etneri Allah omektop tanena, yame seneragnaap nong ningkiri sikne agha Allah omektop taneogna, Allahri wali sembanep,” seog.

25Yesusti wene seogpa, kel enekori el “Kristus” aro engeropne poneko sembe yubu lelamogti, “El Allahri, ‘Saelbahilul,’ aro wepto pognepne poneko amik yalula sembe na el wamna. El poneko yaleri, nia mangkina tibin nenero nu ambatsilul,” seog.

26Wene seogpa, Yesusti elag yubu lelamogti, “Na wene ane wamna. Anap yubu lelamnam ane,” seog.

27Yubu lelamdek abeneko, Yesusti yubu ka'ero neleptop nang samoro yaekti ibek. Ibekti, “Yesus kelabo nhonap yubu lelamdang,” aro lo'om seek. Lo'om seek aghana, sin nhondi babe kel enekoag, “Sa'a ero lelamlam?” aro haibaek kom. Yesusag babe, “Anna sa'a sembe kel eneap yubu lelamdom?” aro haibaek kom.

28Yesusap yubu leptekti, kel enekori mag tero lina payalamogne eneko laploa as soro kalurop asag samoro piog. Piogti as anekoag wamek nimiag ambarelamsiogti, 29“Yahutti kemel phut! Nimi nhondi nari sa'a-sa'a ulamsiri, ulamnonge sembe ni el wamlari ambatnel. Elna Kristus poneko agha wene yal to, kom to?” aro ambatsiog.

30Wene aro ambatsiogpa, as aneko wamek nimi lambaekti, Yesusag palamek. 31Palamek abeneko Yesusti yubu ka'ero neleptop nang tanekori Yesusag, “Nai, yubu amohinne nubunge, wene kwaneng telamlulam te?” aro ambarek.

32Aghana Yesusti samoro sinag yubu lelamogti, “Tena tenaba nanag wamlange a'undi ekonne agha nari terop,” seog.

33Wene seogne sembe eldi yubu ka'ero neleptop nimi taneko mamun yubu hail dalamekti, “Nimiri el sembe kwaneng tenepne poa yaangba, lepla te?” seek.

34Wene sembaekpa, Yesusti el yubu ka'ero neleptop nimi ambarelamsiogti, “Kwaneng teroba naringena, ‘Na pogneogne ponekori seneropne uahaneri, eldi awe komopto topsene,’ senenne yo ulamnelba, eldinge awe toro ul palamnange na sembe kwaneng teroba saog wamla. 35A'undi yubu lelamlomdi, ‘Wal tombare wamebeba, wana whi talenge poloro wimbaukap,’ alamlom te? Ot nari a'unag yubu lelamnange ka'eamsut. A'undi haing kwelekto mog so'o eneag tiboglapmundi, wana whi tangtopne wene poloro wimbahinepne tibogahilulom. 36Wene babe wana whinge poloro winirop nimi eneko eldinge kamna tolamlari, wana mauropne neneko, ‘Ya'ag kamag uro wamlul,’ aro poloro winilamla. Poloro winilamla andarina, el wana togtop nimi enekoap, wana mauropne polorop nimi enekoap nikag wana awi sembarukang. 37Undo uro yabilneag agha nimiri yubu lelamang nena, ‘Nimi nhondi wana togtopba, nenneri wana mauropne polorop,’ alamangne sik uro yabil. 38Nari a'unag arukto poghamsinonge, ‘A'undi awe wero melamlom komne poloro winilamlulom,’ aro pogsino. Nimi orangeri wero merobag a'un wa'ina sikindinge wana mauropne poloro wimbanualom,” aro eldi yubu ka'ero neleptop nangag ambatsiog.

39Samaria kel enekori sikne lag nenero, “Nari sa'a-sa'a ulamsiri ulamnonge sembe ni el wamlari ambatnel,” aro ambatsiogne sembe, Samaria nimi as soro kalurop as aneko wamek nimi maiknori Yesusag sik senelamek. 40Ane sembe Samaria nimi Yesusag yaekti, haiptaekti elag mololamekti, “An nunap wamlulam,” aro molbaek. Wene aro molbaekpa, Yesus aneko ik phende wamog. 41Aneko wamogti, ambarelamsiog yubu ka'elamekneag agha nen ma'aro nimi maiknori elag sikne aro wana palilamek. 42Elag wana palilamek nimi tanekori kel enekoag yubu lelamekti, “Nuri wene elag sikne aro wana palilamap nena, andi ambatsiomne ka'ebabonge sembe mo kom. Wenena nundam nimiri eldi ambatsirop yubu ka'ebapti, elna sik uro mog so'oag nimi taulba uhiropne poneko wamlange el wamap,” aro kel enekoag ambarek.

Yesusti nimi nubunge elme wali nembaogha

43Yesus ik phende as anekoag wamogha Galilea so'oag sip piog. 44Piog nena, Yesus eldamneri samenag sik yubu lag nenero, “Allahri yubu silimu tiptopne elenge asag nimiri ka'ero kiptop kom,” aro ambatsiog. 45Wene aro ambatsiogti, amik sum el Galilea so'oag piogpa, Galilea nimi ni tanekori wana awiag agha el toro kiplamek. El toro kiplamek nena, samenag nubu sum Paskah seneragto ul palamekne sembe sin Galilea nimi as Yerusalem piekti wamek. As Yerusalem wameka abeneko Yesusti maiknoro ulamogne sin Galilea nimiri ibek ane sembe, wene Yesus sinag yaogne toro kibek.

46Anekoa Yesus nen samoro Galilea so'oag as Kana aneko yaog. As anekoagna, samenag Yesusti whi urop mag agha mag anggur nembaog. As Kana anekoag yubu sia leropneri yubu eptopne nhon wamog aghana, elme as Kapernaum wamogne naiklamog. 47Yubu sia leropne yubu eptopne ponekori ka'elamogpa, “Yesus Yudea so'o agha Galilea sip yao,” alameka ka'ebaog. Ka'ebaogti Yesusag piogti, “Nari me naiklamlange ikindi wene loba tanep. An kulukul amendi, el wali nembalulam,” aro Yesusag molol piog.

48Wene aro molbaogpa, Yesusti el ponekoag yubu lelamogti, “Nari kekneba, ‘Yaghe, Allahri mikipne pere agha ual,’ senenne kekneba ulamnenge a'un nimi tanekori haingdi imna komag, a'undi ik nhon babe nanag sikne aro wana pimnep kom,” seog.

49Wene seogpa, yubu sia leropne yubu eptopne ponekori, “Nai, nanenge me naiklamlaba, el loba tan komag kulukul alulam,” aro ambarog.

50Wene seogpa Yesusti, “Anenge me loba tan koma kamag wamlul. Hae pululam,” seog.

Yesusti wene seogne nimi enekori sik sembaogti piog. 51Inaag kulukul palamogpa, nimi enekori arukna yingkina elap haiptaekti, “Nai, andi me loba tan koma kamag wamla,” aro ambarek.

52Wene aro ambarekpa, eldi nen samoro eldi arukna tanekoag hailamsiogti, “Heng ko'ona wela saog uloglaba, wali tal?” aro haibahiog.

Wene aro haibahiogpa, sindi samoro ambarelamekti, “Andi me wali taongena, ambuhum heng talologhoba, bobo naikna wamonge orog taoba, wali tao,” aro ambarek.

53Wene aro ambarekpa, elme naiklamogne ili ponekori seneraglamogti, “Yesusti ambuhum ambatneoba, ‘Andi me loba tan koma kamag wamlul,’ seo heng ko'o enekoag agha wali tao,” aro seneraghog. Wene aro seneraghogti, elap eldi ae lom nimi ni tanekoapti Yesusag sikne aro wana palilamek.

54Yesusti undo uaog nena, Yudea so'oag agha Galilea sip yaogti, “Allahri el pere agha ual,” senenne kekneba phendepne uaog.

Actualmente seleccionado:

Yohanes 4: kklKOS

Destacar

Copiar