ဒေါ ဂုဝ် 14
14
လွင် အာဘြာမ် စွယ် အာလူတ်
1န့ ဘော မိုဝ်း ခုန်ဒီခမ် အာရာမ်ဖေန် အီ အိုပ် မိူင် စှီနာ ဘော ခုန်ဒီခမ် အာရီအုဝ် အီ အိုပ် မိူင် အေလာဆာ ဘော ခုန်ဒီခမ် အာခီရာလူမ် အီ အိုပ် မိူင် အေလမ် ဘော ခုန်ဒီခမ် အာထီဒါ အီ အိုပ် မိူင် ဂုဝ်ယိမ်။ 2ဂေ ခုန်ဒီခမ် ဖွုန် ကာဒင် တီ၊ ဂေ ဝီ ကာဖြူမ် ဒီ ကာဂုဝ်း ဒီ ခုန်ဒီခမ် ပေါ ဖန် ကာဒင်။ ဖန် ကာဒင် တီ မုး ခုန်ဒီခမ် အာဘေန်လာ အီ အိုပ် မိူင် ဆုဝ်ဒူမ်၊ ခုန်ဒီခမ် အာဘီရာတ် အီ အိုပ် မိူင် ဂုဝ်မုဝ်၊ ခုန်ဒီခမ် အာဆီနာတ် အီ အိုပ် မိူင် ဒါမာ၊ ခုန်ဒီခမ် အာဆေမေပ် အီ အိုပ် မိူင် ဇေဘုဝ်ယိမ် ဘော ခုန်ဒီခမ် အီ အိုပ် မိူင် ဘေန်လာ။ မိူင် တီ ဘော စိူဝ် မိူင် ဇုဝ်အာန် 3ခုန်ဒီခမ် တီ ဟဲ့ တး ကာဇု ဒူင် စိူဝ် ငွတ်။ ဒေါ တီ နီ ဒူင် တီ ဟဲ့ ဝီ ဘဲန် အိုမ် ဒိုင် ဆယ့် ဆွင့်။ 4အာဒါ ဂိုဝ် ဒီ အာ ဆီနမ် ခုန်ဒီခမ် တီ ဟဲ့ တဲး ခုန်ဒီခမ် အာခီရာလူမ် တွိုန် အိုပ် ဂေ။ ဘော ဇမ် ဆီနမ် ဂိုဝ် ဒီ ဟာအူယ်၊ ဂေ ဝီ ကာဘး ဒီ အန်၊ ကွဲ့ တဲး အန် ဝီ အိုပ် ဂေ။
5ဘော ဇမ် ဆီနမ် ဂိုဝ် ဒီ မ့ဖွုန်၊ ခုန်ဒီခမ် အာခီရာလူမ် တွိုန် ဘော ဂေ ခုန်ဒီခမ် အီ ကွယ် ရိုမ် ဒူပ် အန်၊ ဂေ ဝီ ဟာဝ် ကာဂုဝ်း ပဲ ခုန်ဒီခမ် ဘဲန် ကာဒင် ဘဲန် ကာဒင်။ ဘော ဒူအီ အာမျုဝ် ရာဖာတ် ခဲင် မိူင် အာထေရူတ်ကာနာအိမ်၊ ဘော ဂေ ဒူအီ အာမျုဝ် ဆူဆိတ် ခဲင် မိူင် ဟာမ်၊ ဘော ဂေ ဒူအီ အာမျုဝ် အေမိတ် အီ ကွယ် ခဲင် ငွတ် ဒီ မိူင် ဆာဝေတ်ကီရီယာဆိမ်၊ 6ဘော ဂေ ဒူအီ ဟုဝ်ရိတ် အီ ကွယ် ဒဲင် နွန် ဆေအီ၊ အီ ကော ဇမ် မိူင် အေန်ဖာရာန် အီ ကွယ် ခဲင် ပြဲ ကာဟဝ်း၊ ဂေ ဟဲ့ ပဲ တူတ့် ခုန်ဒီခမ် ဂေ တီ။ 7ခုန်ဒီခမ် အီ ကွယ် ရိုမ် ဒူပ် အာခီရာလူမ် တွိုန်၊ ဂေ ဟဲ့ ဟွတ့် ပဲ ခုန်ဒီခမ် ဂေ တီ၊ ဘော အန် ဘော ဂေ ဒူအီ အီ ဒူပ် အန်၊ ဂေ ဝီ ဟာဝ် ဇမ် ကာတတ် မိူင် အေန်မီဖာတ်။ ဒေါ တီ နီ န့ စိူဝ် မိူင် ဆာဒေတ် ဂေ ဝီ ပဲ ဂေ ဒူအီ အာမာလေက် ဒွန် ပ့လုဝ့် ဘော ဂေ ဒူအီ အာမုဝ်ရိတ် အီ ကွယ် ခဲင် မိူင် ဟာဆေဆူန်ထာမာ။
8ဒေါ အန် တီ ဂေ ခုန်ဒီခမ် အီ အိုပ် မိူင် ဆုဝ်ဒူမ်၊ မိူင် ဂုဝ်မုဝ်၊ မိူင် ဒါမာ၊ မိူင် ဇေဘုဝ်ယိမ် ဘော မိူင် ဘေန်လာ၊ ဂေ ဖန် ကာဒင် တီ ဝီ ဟာဝ် ဇမ် ခဲင် ဒူင် စိူဝ် ဆီဒိမ် အီ မုး အိုမ် ဒိုင် ဆယ့် ဆွင့်။ 9ဂေ ဝီ ကာဂုဝ်း ဒီ ခုန်ဒီခမ် အာခီရာလူမ် အီ အိုပ် မိူင် အေလမ်၊ ဘော ဒီ ဂေ ခုန်ဒီခမ် အီ ဒူပ် အန် ဘော အူယ် ကာဒင် အီ မုး ခုန်ဒီခမ် အာထီဒါ အီ အိုပ် မိူင် ဂုဝ်ယိမ်၊ ခုန်ဒီခမ် အာရာမ်ဖေန် အီ အိုပ် မိူင် စှီနာ ဘော ခုန်ဒီခမ် အာရီအုဝ် အီ အိုပ် မိူင် အေလာဆာ။ ဂေ ဖန် ကာဒင် တွိုန်၊ ဂေ ဝီ လာယ် ကာဂုဝ်း ဒီ ဖွုန် ကာဒင် တီ။ 10ဒူင် စိူဝ် ဆီဒိမ် တွိုန် ယီ မိုဝ်း ကာဒဝ် ကာညန် ကာပိတ်။ န့ မိုဝ်း ကိူန် ဘော လိုက်။ ဒေါ လာယ် ကာဂုဝ်း ဂေ၊ ခုန်ဒီခမ် အီ အိုပ် မိူင် ဆုဝ်ဒူမ် ဘော မိူင် ဂုဝ်မုဝ်၊ ဂါယ် လုဝ် တဝ်။ ဒေါ အန် တီ ဒါ ဆိုက် မင် အီ ဝီ စုဝ်း ခဲင် ကာဒဝ် ကာညန် ကာပိတ် တွိုန်။ ဂေ အီ ဟဝ် ဝီ တဝ် ဟာဝ် ကော ဇမ် ဒူင် မိုဝ်း နွန်။ 11ဂေ အီ ဟဲ့ ပဲ တွိုန် ယီ ဒိုဝ်း တူတ့် ကြုဝ်ကြာမ် ဂေ အီ ကွယ် မိူင် ဆုဝ်ဒူမ် ဂါယ် မိူင် ဂုဝ်မုဝ်။ ဘော ပီ ဒီ ဟူမ် ဂေ၊ ဂေ ဒိုဝ်း တူတ့်၊ ဝီ ဝေန့် မိူင် ဂေ။ 12ဒေါ ဝေန့် ဂေ၊ ဂေ ဝီ မှေတ့် အာလူတ် အီ မုး လှာန် အာဘြာမ် တွိုန်။ ဂေ ဒိုဝ်း အန် ဘော ခဲ့ မိုဝ်း အန် ကြုဝ်ကြာမ် တူတ့် ဒွန် မျုဝ်၊ ဟာဝ် ဝေန့် ခဲင် မိူင် ဂေ။ ခုဝ်၊ အာလူတ် ဟဲ့ ကွယ် ခဲင် မိူင် ဆုဝ်ဒူမ် တီ။
13ပန် တီ န့ မိုဝ်း ဒါ အူ ဝီ၊ အန် ဟဲ့ လေး တဝ် ခဲင် ဖိုင် အာလူတ် တွိုန်၊ တဝ် ဟာဝ် ဒူင် ကွယ် အာဘြာမ် အီ မုး အာမျုဝ် ဟဲဘြဲ။ ဒေါ အန် တီ အာဘြာမ် တွိုန် ဟဲ့ ကွယ် ဒီ ဟေ ထေရေပ်၊ ဒူင် စိူဝ် မမ်ရေ။ ဒူင် တီ ယီ မုး ဒူင် ကွယ် ဘော ဒူအီ အာမျုဝ် အာမုဝ်ရိတ် အီ မုး အီကတ် အာအေခူန် ဂါယ် အာနေရာ။ ဂေ ဒူအီ တီ ဟဲ့ ဘဲန် ဂိုက် အာဘြာမ် တွိုန်။ 14အာဘြာမ် ဘော နပ် လွင် ဂေ ဟဲ့ မှေတ့် ဝေါဝဲ အန်၊ အန် ဝီ ဒဲ့ အီမာယ် ခဲင် ဖိုင် အန် ဒွန် ဝီ။ ဟဲ့ ဟွတ့်၊ အန် ဘော မိုဝ်း ဒါ ဆိုက် အူယ် မာယဝ်း ဒီ ဂိုဝ် ဒီ ဒါ ဝီ။ အန် ဝီ ဒဲ့ ဂေ ဘောကာဂ့လျီတ်၊ ခုင်ခြး ဒူပ် ဂေ အီ ဟဲ့ မှေတ့် အာလူတ် တွိုန်၊ တဲး ဂေ ကော ဇမ် ခူပ် မိူင် ဒါန်။ 15ဒူင် ကွယ် ဂေ တီ၊ အာဘြာမ် တွိုန် ဝီ ကာယဝ်း ဒါ ဆိုက် အန်၊ တဲး ဂေ ကွယ် ဘဲန် ဖိုင် ဘဲန် ဖိုင်။ ဟဲ့ ဟွတ့်၊ ခဲင် မှိုဝ် ဂေ ဝီ ကာဂုဝ်း ဒီ ဂေ အီ မှေတ့် အာလူတ် တွိုန် ဘော ပဲ ဂေ။ ဟဲ့ ဟွတ့်၊ အန် ဝီ ခုင်ခြး ဂေ၊ ဂေ ဘော တဝ် ဟာဝ် ကော ဇမ် ကာတတ် မိူင် ဟုဝ်ဘာ အီ ကွယ် နာ ကွာ မိူင် ဒါမာခူ။ 16ပါယ် တီ အန် ဟဲ့ ဝီ ပွိုန် တူတ့် ကြုဝ်ကြာမ် အာလူတ်၊ ဘော အာလူတ် အီ မုး ဝေါဝဲ အန် ဘော ခဲ့ ပီ မိုဝ်း အန်၊ ဘော အီဘိုန့် အန် ဘော ဂေ အီ ဒူပ် အန်၊ ဂေ ဟဲ့ ဝီ လွတ် တ အီ ဟဝ်။
17ဝါယ် ဟဲ့ ပဲ အာဘြာမ် ဂေ ခုန်ဒီခမ် အာခီရာလူမ် တွိုန် ဘော ဂေ ခုန်ဒီခမ် အီ ဒူပ် အန်၊ ဒေါ ဝေန့် အန် ဒူင် ကွယ် အန်၊ ခုန်ဒီခမ် ခဲင် မိူင် ဆုဝ်ဒူမ် ဝီ လေး ရွုး အန် ခဲင် ဒူင် အီ စိူဝ် ငွတ် စှာဝေန်။ န့ ဘော မုး ငွတ် ဒူင် ကွယ် ခုန်ဒီခမ်။
18န့ ယီ မုး ခုန်ဒီခမ် ခဲင် မိူင် ဆာလေမ်၊ အန် စိူဝ် အာမေခေဒေက်။ အန် ဘော မုး ဒါ အီ လှူ ဒီ ဇဝ်ဖြာ အီ အိုပ် တူတ့် ဒွန် မျုဝ်။ အာမေခေဒေက် တီ၊ အန် ဘော လေး တိုယ် ခါမုန် ဘော အိုမ် မာငုန်၊ ဒွါ ဒီ အာဘြာမ်။ 19အန် မိူဝ် မွင့်ကာရာ တဲး ဒီ အာဘြာမ်။ အန် တဝ်း၊ “ဇဝ်ဖြာ အီ အိုပ် တူတ့် ဒွန် မျုဝ်၊ အီ မုး အန် ဇဝ် အီ ဖာန် ဘ့လေး ဘော ဂါင်ဟြာဝ် ဘော ကာဒါယ်၊ အန် ဒီ မွင့်ကာရာ တဲး ဒီ မဲ အာဘြာမ်။ 20အုဝ် ဘော အိူပ် ဇဝ်ဖြာ အီ အိုပ် တူတ့် ဒွန် မျုဝ်။ အန် ဟဲ့ တဲး မဲ ပဲ ရန်ဆူ မဲ။”
ခဲ့ ပီ ပွိုန် အာဘြာမ် ဒီ ရန်ဆူ အန်၊ အန် ဝီ ဒွါ ဂိုဝ် ဘုန် အူ ဘုန် ဒီ အာမေခေဒေက် တွိုန်။
21ခုန်ဒီခမ် အီ အိုပ် မိူင် ဆုဝ်ဒူမ် တွိုန်၊ အန် ယီ တဝ်း ဒီ အာဘြာမ်၊ “မှာန့်၊ တဲး မဲ ဝီ ဒွါ ဝိဝ် မီ ဂေ ဒူအီ အုဝ် ပဲ့ ဟဲ့ မှေတ့် ဟာဝ် ရန်ဆူ။ အီ မုး ကြုဝ်ကြာမ် တဲး မဲ ဒိုဝ်း ဒီ မဲ။”
22အာဘြာမ် ဝီ ဝျီ့ ဂြုဝ်း ခုန်ဒီခမ် အီ အိုပ် မိူင် ဆုဝ်ဒူမ် တွိုန် တဝ်း၊ “အုဝ် ဒွါ ကာဒိက် ဆတ်ဇာ၊ တဲး ဘော ဇဝ်ဖြာ ထူမ် အီ အိုပ် တူတ့် ဒွန် မျုဝ်။ 23ခဲ့ ဆေန့် အူ ညွင့်၊ အုဝ် မိူဝ် တူ ဒိုဝ်း။ ဘော ဝန် ခူဒိန့် အာဒါ အူ ညွင့် အုဝ် တူ ဒိုဝ်း။ ကြုဝ် မဲ ပီ ဒိုဝ်း ရန်ဆူ ဂေ တွိုန်၊ အုဝ် တူ ဒိုဝ်း မာဆေ။ ကွဲ့ တဲး မဲ ပွိုန် ဒီ ကာလာင်၊ မဲ ဟဲ့ ဘူင် တဲး အုဝ် ခြမ်။ 24အုဝ် တူ ဒိုဝ်း မာဆေ။ အုဝ် ယီ မှာန့်၊ တဲး မဲ ဒွါ ခဲ့ ဟဲ့ ဟွတ့် ဟူမ် ဂေ ဒါ ဆိုက် အုဝ်။ ဘော ခဲ့ ကာအာပ် ပွိုန် ဂေ အီ ဒူပ် အုဝ်၊ တဲး မဲ ဒွါ။ အာနေရာ၊ အာအေခူန် ဘော အာမမ်ရေ၊ တဲး ဂေ ဒိုဝ်း အာဒါ ဂေ။”
Actualmente seleccionado:
ဒေါ ဂုဝ် 14: pce
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2023, Wycliffe Bible Translators, Inc. All rights reserved.
