Mata 20

Ndah maŋga mezlər te ler zlam

1Wunam ta bay da baymaləvaŋ hay sə, aŋga ara bay ta way masa e zleftek ta slamɓal kad a vəda ka ta yah ndah te mezlərey ka ta ŋgan mezlər de ley te wudez te rezeŋ tata. 2Ac ka cacala ma teceŋ ava ndah maŋga mezlərey e te pəlecen meyəv teceŋ sə, ava yam ta səlay amta masa mak ta mapal meyəv ta ndana ta pas amta. Ke zləreɗec pe ley te wudez te rezeŋ tata. 3Fe ler cuɗ te pərek sə, ke də kad a vəda saya, ka wala ndah mekele, ac manjaha taambəla dapa slam ta macam yaŋ. 4Ke gweɗec, gege: «Akwar may, madaɗay ma ta ŋgaɓa mezlər de ley aɗaw, ya da pəlakwaɗ meyəv takwar eve cəvey ana.» 5Ndah sə, ec ke dec e ley ana. Bay te ley sə, ke də kad avəda saya te ler kuraw dapa yaŋ ana ecew, ava dəɓa ana, fe ler mahkar ta fakwaɗ, ka ŋgaw ara nesey ana. 6Fe ler zlam ta fakwaɗ, ke də kad a vəda saya, ke ŋgetefec ndah mekele manjaha saya, gege: «Akwar manjaha fana pas tatap taambəla, akwa ŋgə mezlər aabay sə, mafay te mey?» 7Ac ka vahan, gege: «Ndana ka kəsandaw kad pe mezlər aabay.» Ara nesey, gege: «Akwar may, madaɗay, e ley aɗaw, me te ŋgə mezlər dapa.» 8Mehusek ta fakwaɗ, ka zala nda mapana ndey fa ndah maŋga mezlər tata, ka gwaɗa, gege: «Zelekec ndah maŋga mezlərey, pəlan meyəv ta kwa waawa. Zlaraw fa ndah medek metekweɗ ana ka ra maɗaw fa ndah medek teeməle.» 9Ndah medek fe ler zlam ta fakwaɗ, ec ke dekey, kwa waawa ka ŋgat yam ta səlay amta masa mak ta mapal meyəv ta ndana ta pas amta. 10Masa mehusek ta ndah medek teeməle sə, aca wulakiya, ac ta ŋgatiya ka fəna ta ndah medek ta fakwaɗ. Amaa kwa waawa teceŋ ka ŋgat yam ta səlay amta masa mak ta mapal meyəv ta ndana ta pas amta jaŋgata. 11Dapa masa aca kəs səlay ana sə, ec ke hwehwer da yaŋ nda te ley ana. 12Aca gwaɗa, gege: «Ndah masa ece dek ta fakwaɗ nesey, ac ke ŋgə mezlər da hwaɗ te ler amta, amaa ke te pəlecen meyəv tec ara taciya masa anda vərendə te meŋgə mezlər ava marga va eve mewreɓey sə, meemey!» 13Amaa bay ta way sə, ka vahan kad nda amta deveŋ eceŋ, gege: «Guula aɗaw, ya ka ŋgafakaa jə masa e teh bay sə, aabay. Andə ka cacala ma ava kaa da yaŋ mapal meyəv takaa fa yam ta səlay amta masa mak ta mapal meyəv ta ndana ta pas amta sə, aabay geyey? 14Kaa sə, kəsaɓa meyəv takaa ara masa andə ta kər maɗay, daɓa. Yey sə, ya ta pəlan ta nda medek ava dəɓa sə, ara takaa. 15Yey sə, ya ava gədaŋ te meŋgə mezlər ava səlay aɗaw ara ya ta waya sə, aabay geyey? Ke ŋgə səlek mafay ta masa ya nda mambəla ana geyey?»

16Yesu a ndəvda ma tata ava megweɗ, gege: «Ara nesey, ndah metekweɗ ana, ac te tərec ka ndah macaaca ana, ndah macaaca ana, ac te tərec ka ndah metekweɗ ana.»

Yesu a slaf maməcay va mepərekek tata dapa maməcay mamahkar ana

(Mar 10.32-34; Luk 18.31-34)

17Yesu aŋga dapa cəv te medə kad Zeruzelem. Dapa cəvey ana, ke wekec ndah masasəraka jene tata kuraw dapa yaŋ ana ecew ava zlalav, gege: 18Macak zləmay, anda ŋgə na anda tapakwa kad Zeruzelem. Dərŋga sə, ac ta təhaza Wut ta Nda avəda, ac ta paɗ pa ha ta bay ta ndaakwas hay va ndah mesesərekecen ma majawa kad ndana hay. Ac ta jawiya ava ma hay te mekəɗ ka macəhwandaw. 19Asaya, ac ta paɗ pa ha ta ndah masa aca sən Zlav bay, ac ta sasarafa, ac ta kəlapiya ava laway, ac ta daraɗ fa hap mazləlawa. Amaa manah mamahkar ana sə, a ta pərakata dapa maməcay.

Mahwar slam ta manjah ka mazlakava va mezlərey

(Mar 10.35-45; Luk 22.25-27)

20Ara nesey, mamaŋ te wudeh te Zebede, ka ŋgucafa vaw Yesu ava wudeh tata. Ke kekəred fəma tata ka ta nəkafa jene. 21Yesu ka gwaɗa, gege: «Ka wal mey.» Ŋgwaz ana ka vahan, gege: «Gwaɗawa ha, ya wal wude hey aɗaw ecew nesey dapa Wunam ta bay takaa sə, aca ra njah nda amta jaka ha ta zam takaa, nda amta jaka ha ta gula takaa.» 22Yesu ka vahan, gege: «Jə masa akwa nəkiya nesey sə, akwa səniya bay. Akwar ta zlafa masə marga hay masa ya ta siya na geyey?» Aca vahan, gege: «Aŋga, anda zlafa.» 23Yesu ke vehecen, gege: «Aŋga, akwar ta zlafa masə marga aɗaw hay. Amaa ta manjahaɗ ndana a ha ta zam taaɗaw daha aabay a ha ta gula taaɗaw sə, ma ta vana cəvey ana yey bay. Slam ana hay nesey, ac mapa kad ndah masa Papa ta ləmadiya kad eceŋ.» 24Ava dəɓa ana, masa ndah masasəraka jene tata hay kuraw dərziya ac ta cəna sə, ke zəmec fa rav da yaŋ ndah va malamaŋ hay ecew. 25Amaa Yesu ke zeleceŋ, gege: «Akwa sən jə masa e ŋgə dapa vavara, bay hay ta vavara hay ece ŋgə bay da yaŋ ndana hay va ndah mazlakava hay aca ŋguzad matimaazlaɓ teceŋ da yaŋ ndana hay. 26E de ŋgə ara na dapa taɓa takwar bay, amaa sesəker daha ndana a wal manjah ka mazlakava deveŋ akwar sə, da njah ka nda maŋga mezlər takwar. 27Asaya, daha ndana a wal manjah ka nda mama deveŋ akwar sə, a lada da njah ke ɓel takwar. 28Ara aŋga ana, Wut ta nda e dek kad pa vavara sə, ndana hay aca ra ŋgana mezlər bay, amaa ke te ŋgec mezlər kad ndana hay va mavə mesfeney tata ke te pəlekec ndana hay gaa.»

Mahazlaw hay ecew de Zeriku

(Mar 10.46-52; Luk 18.35-43)

29Masa Yesu va ndah masasəraka jene tata aca daɓa dapa vavara te Zeriku sə, miya ta ndana hay gaa ac ka cəpaw. 30Mahazlaw hay ecew ɓa ac manjaha da ma te cəvey. Aca cəna masa Yesu e dey jaka pe cəvey ana, aca cə lalaw, gege: «Bay Mazlakava, Wut te Deevet, ŋgafandaw metekweney.» 31Ndah macəpa Yesu sə, ece peyefeceŋ, aca ra njah teete. Amaa mahazlaw hay sə, aca cə lalaw ava gədaŋ saya, gege: «Bay Mazlakava, wut te Deevet, ŋgafandaw metekweney.» 32Yesu ke zlecey, ke zeleceŋ, gege: «Akwa wal ya da ŋgakwar sə, mey?» 33Ac ka vahan, gege: «Bay Mazlakava, wunandan ndey taciya.» 34Yesu ke ŋgefec metekweney, ka pə ha fe ndey teceŋ. Faŋga faŋga ana, ec ke wele ndey mambəla ana, ac ka cəpaw.

Actualmente seleccionado:

Mata 20: CUVnt

Destacar

Copiar