San Lucas 22
22
U muk'yaj, kimi y u ka' lik'i tu ka' kuxta
Judas ku katik u yor ti u chuka' Jesús
(Mt. 26.1-5,14-16; Mr. 14.1-2,10-11; Jn. 11.45-53)
1Xok'o u k'uchu tu k'ini u jach ki' jʌno' u winiko' judío, lʌji' u k'ini a Pascua a ku jʌntko' u yo'ch pʌn a mʌnʌ' u ts'aki ti' u si't'i. 2U t'ojio' a moko' ku meajo' yok'o u yatoch K'uj, yete u Ts'uri a ku kʌ'sko' u t'ʌn K'uj a toj u ts'ibtamʌ a Moisés uchik, ku sʌjtiko' a winiko' ben tʌn u kʌxtiko' bik u muku kinsik Jesús.
3Kaj okij kisin a u k'aba' Satanás ti' Judas, lʌiti' u k'aba' Iscariote, lʌji' junturi' ti' yʌn ix doce u apóstoles a Jesús. 4Judas bin ix u t'ojio' a moko' ku meajo' yok'o u yatoch K'uj, yete u Ts'uri aj ba'kʌi, kaj tsikbʌnʌj yete tio', ti u yei'k bik taba ku bin u k'ube a Jesús. 5Jach tsoyji u yoro', la'jen tu yao' je' u bo'ta' tu tu k'uba a Jesús. 6Y tu jach ts'a u t'ʌn ti' u kʌxtik bik u ts'ek ti'o', y mu yetko' a winiko'.
U ts'ok u jʌnʌ a Jesús yete u kʌ'sa winik
(Mt. 26.17-29; Mr. 14.12-25; Jn. 13.21-30; 1 Co. 11.23-26)
7Kaj k'uchi tu k'ini a ku jʌntiko' u yo'ch pʌn a mo' but'a u ts'aki ti' u si't'i, y bexi' lʌji' u k'ini u kinsiko' aj choj me' ti' a u k'ini a Pascua. 8Jesús kaj u tuchi'taj Pedro yete Juan, tu ya'ti':
—Xene'x, y mete'x a o'chi ti' u k'ini a Pascua, ti ʌk jʌntik.
9Ti'o' tu yao':
—¿Tuba a k'at a wik in metko'?
10Jesús tu ya'ti':
—Tuk'in ka ojke'x ix u kʌjta, je' a wike'x junturi' xi'ra u kuchmʌ u chuji u yo'ch ja'. T'ure'x u pach hasta tu ku yoko ix u yatoch. 11A'e ti' u winki a nʌj: “Ak wʌjkʌ'si tu ya'a: ¿Ix a watoch to bay ka bin a mʌjʌnte ti' ʌk jʌno' yete in kʌ'sa winiko' ti' u k'ini a Pascua?” 12A mok yʌn u yatoch, je' u yesi'k teche'x junxot' u yatoch tu ne ch'ikyʌn y tiʌ kʌnʌ, a lʌji' tu ka bin a mete'x a o'chi.
13Bino' u kʌ'sa winiko' a Jesús, y tu yiro' a bex Jesús tu ya'tio', ij chu'mpʌjo' u metko' u yo'cho' ti' u k'ini a Pascua.
14Kaj k'uchi u k'ini u jʌntiko' yo'ch, ti' u k'ini Pascua, Jesús kuraj ix pojche' yete u apóstoles. 15Jesús tu ya'a:
—¡Jach uch nen poch in jʌntik yete teche'x a je' a o'chi lʌji' u k'ini ku ya'bati' Pascua, a mo' yʌ k'uchuk u k'ini in kimi! 16Kin wei'k teche'x, mʌnʌ' y yʌ jʌntik beje', hasta ku nup'u u k'ini yok'o tu ku wesintik K'uj a tiʌ kʌ'.
17Ka tu chuka Jesús tu k'ʌ', a luch y tu ya'a: baij tech K'uj, y pachi tu ya'a:
—Chuke'x a je' y uk'e'x y laj mʌse'x yete a boje'x. 18Kin wei'k teche'x, mʌnʌ' in ya uk'ik a je' u yʌki a menʌ' u ya'ri a nukuch ts'us (uva), hasta tuk'in ku bin k'uchu tu k'ini u tar tu ku wesintik K'uj a tiʌ kʌ'.
19Pachi ka tu chuka aj pʌn, tu ya'a:
—Baij tech K'uj.
Y tu xat'a aj pʌn, y tu ts'atio', ka tu ya'a:
—A je' a pʌn, lʌji' in bʌk'e, ti' teche'x ki ts'ek te'x; mete'x a je' ti' a k'asken.
20Kaj ts'o'k u laj jʌno' ka tu li'sa' jump'e luch, ka tu ya'a:
—A je' a luch yete u ya'ri nukuch ts'us, lʌji' in k'ik'e, a tu ki ka' metik tumen u kataor a lʌji' ku bin jok'o in k'ik'e tu kin kinsa' ti' teche'x.
21Jach taj kin wei'k teche'x a mok ku bin u k'ubiken, toj tiʌ yete ten beje' ix pojche'. 22Chen jax tu jei, u Ti'a Xi'ra ku jach bin mʌn ti' a bex toj aʌ', chen ¡Jach yaj ba' ku bin u yue a xi'ra a ku bin u k'ube!.
23Kaj chu'mpʌjo' u k'atik ti' u yet bojo', mok ku bin k'ubik a Jesús.
¿Moki a más t'o'o?
24U kʌ'sa winiko' tʌn chu'mpʌjo' u ts'iko' yete u bojo' yok'o ti' u yetko' mok más t'o'o. 25Jesús ka tu ya'a: «Tu woro uj wesi a je' a lu'm muj cheik u metik ba' u winik o mu' k'ato' bex tio', y a layo' a weso' ku yei'ko' u k'aba' a ku tus yʌntik winik. 26A teche'x ma' metke'x bex, a mok más t'o'o yok'o teche'x lʌji' a to'o chijʌntʌ y a mok lʌji' t'o'o lʌji' yʌnti' u meaj ti' tu woro' u bojo'. 27Ki' tukre'x a ba' kin wei'k teche'x ¿Moki a t'o'o, a ku kuta tu jʌnʌ ix u pojche', o lʌji' t'o'o a ku meaj u mʌsik o'chi? ¿Mo' lʌji' a mok a ku kuta to' a pojche' tu jʌnʌ, lʌji' jach t'oj? Chen a ten ti' yʌnen tu yʌne'x ti' in meaj ti' teche'x.
28»Chen teche'x p'ate'x yete ten tuk'in tin laj mʌsa a yaj ba'. 29A bik in Tet K'uj kaj u tejten ti' in wesintik, bexi' teche'x in tejtike'x ti' a woke'x ti'a wesie'x. 30Ti' a jʌnex y a wuk'ex tuku wesintik, ka bij kute'x yok'o u k'ʌnche' wes ti' a wei'k o taj tu meto' a ba' a doce kʌjta a lʌji' u winik a Israel.»
Jesús ku yei'k ti a Pedro bik ku bin u ya'e mu' k'omʌ
(Mt. 26.31-35; Mr. 14.27-31; Jn. 13.36-38)
31Jesús tu ya'a:
—Simón, Simón, a kisin a Satanás tu k'ate'x ti' K'uj ti' titke'x bex u tita' a trigo. 32Chen ten tin p'isi in bʌj in t'ʌna K'uj, ti' tech, ti' ma' p'ʌtik a waksik ta wor ten. Tuk'in ka' ka' sutkech ti' ten, ka' ʌnte a bojo' ti' u ki' aksik tu yor ti' ten.
33Pedro tu ya'a:
—Ts'uri, wa ka mʌka ket ki bin yete tech, bexi' wa yʌnti' in kimi yete tech jei kimi.
34Jesús tu ya'ti' a Pedro:
—Taj kin wei'k tech, mo' toj k'ainʌ'k aj t'er beje' ak'bi. Tech oxp'e wʌts' ka bin a wei'k ma' a k'ʌ'omen.
Cho bai, poxa y maska'
35Jesús kaj u k'ata ti' u kʌ'sa winiko':
—Kaj in tuchi'te'x a tsikbʌte'x u jach t'ʌn K'uj, tarak mʌnʌ' a cho ba'y, tarak mʌnʌ' poxaje'x y mʌnʌ' a xʌne'x, ¿yʌn ba' moj chukbʌ teche'x?
U kʌ'sa winiko' kaj u nuko':
—Mʌnʌ'.
36Jesús tu ya'tio':
—Beje', wa mok yʌn u cho bai, u ch'ae, bexi' a mok yʌn a poxa, u ch'ae, y a mok mʌnʌ' u maska', u kane u nukuch tep' y u mʌne jump'eri' a maska'. 37Ki wei'k te'x jach yʌnti' u nup'u u k'ini a bex ti' ts'ibʌ' ix u t'ʌn K'uj uch, ku yei'k: “A winiko' tu yira a lay xi'ra a ku metik k'as ba',” a lay a ts'ibʌ' yok'o ten jach yʌnti' u nup'u.
38Ka tu ya'a:
—Ts'uri, way yʌn ka'p'e maska'.
Jesús kaj ya'ti':
—Xure a t'ʌne'x bex.
Jesús ku t'ʌnik K'uj ix Getsemaní
(Mt. 27.36-46; Mr. 14.32-42)
39Jesús kaj jok' ix u kʌjta, kaj bini a bik naj t'ʌrʌ' u bin ix u witsi u k'aba' Olivos. Yet bin yete u kʌ'sa winiko'. 40Kaj k'uchi tu ku naj k'uchu, kaj ya'ti' u kʌ'sa winiko':
—T'ʌnex K'uj ti' u chixta a muk'e'x ti a muk'tik a baij ku tar ti' teche'x.
41Jesús ka tu jʌnch p'ata u kʌ'sa winik y bini k'ʌs nʌch, tu xonkita u pix, ij chu'mpʌ u t'ʌnik K'uj. 42Jesús kaj ya'a:
«In Tetech K'uj, wa yʌn bik ma' cheik in mʌsik a je' a ba' ne yaj ki wui'k, mete, chen ma' metik a baiki in k'at a ten, lʌji' a metik a to'o a tech a k'at.»
43Kaj u ye'sa u bʌj junturi' ángel a tiʌ kʌ' tu yʌn Jesús ti' u ts'ekti' u muk'. 44Ne jach yaj u pixʌn Jesús, lʌji' tuk'in más ne tu jach chich t'ʌnʌ' K'uj, y u k'ika' ku jutu bex a k'ik'.
45Kaj lik'i tu xanʌ' u pix tu ku t'ʌnik K'uj. Kaj bini tu yʌn u kʌ'sa winiko', tu yiraj tʌn u weno', tu mo' tsoy u yoro'. 46Jesús kaj u ya'ti':
—¿Biken ka wenex? Lik'ene'x ch'ikta, y t'ʌne'x K'uj, ti' u chixta a muk'e'x ti a muk'tik a baij ku tar ti' teche'x.
Kaj chuka' Jesús
(Mt. 26.47-56; Mr. 14.43-50; Jn. 18.2-11)
47Ti' ku tsikba Jesús, kaj k'ucho' ne pim winik, y a Judas, lʌji' jo' xima ku tar y bexi' lʌji' u bʌji' junturi' a doce u apóstoles a Jesús, kaj u xok'i a Judas u ts'uts'e u p'uk' Jesús. 48Jesús kaj u ya'ti' Judas:
—¿Yete jump'eri' u ts'u'ts'a' p'uk ka bin a k'ubik u Ti'a Xi'ra?
49U kʌ'sa winiko' a ti' yʌn tu yiknʌ Jesús kaj tu yiro' a ba' ku mʌn, kaj u ya'ti' a Jesús:
—Ts'uri, ¿kak pʌkek bʌj ti' yete maska'?
50Y junturi' u kʌ'sa winiko' ka tu k'upaj u xikin a mok lʌji' u winik u jach t'oji a mok ku meaj yok'o u yatoch K'uj. 51Jesús kaj u ya'a:
—Xure'x a loxe'x.
Y tu tʌra' u xikin a to'o k'upa' ti', y tu ch'ensa ti'. 52Jesús ka tu ya'ti' u t'ojio' a moko' ku meajo' yok'o u yatoch K'uj yete u ts'uri ba'kʌi a ku kʌnʌntiko' u yaj yatoch K'uj y yete u nuxio' u winiko' judíos aj taro' u chuko' a Jesús, kaj ya'a Jesús:
—¿Biken tare'x a chuken yete a maska' y yete a che' p'is bex a chujke'x a ku yakra ba'? 53Tu woro k'in ti' yʌnen ix u yatoch K'uj, tʌn in ka'sa', y mix ta chukene'x, chen tarech a chukene'x beje' tuj k'uchi tu k'ini ti teche'x, y bexi' k'uchi tu k'ini u meaj a kisin.
Pedro ku yei'k mu k'o'mʌ a Jesús
(Mt. 26.57-58,69-75; Mr. 14.53-54,66-72; Jn. 18.12-18,25-27)
54A mok tu chuko' a Jesús, tu biso' a Jesús ix u yatoch a mok lʌji' u jach t'oji a mok ku meaj yok'o u yatoch K'uj, y a Pedro tʌn u t'urik u pach k'as nʌch. 55Tu chumuki yok'o u xur a palacio t'ʌba k'ak', ij kuro' tu xur, ket yete Pedro. 56Ti' yʌn junturi' ch'upra, a ku meaj ti' u ts'uri a mok ku meaj yok'o u yatoch K'uj, kaj tu' yiraj Pedro ti' ku'ra' tʌn u k'ich chi' k'ak', tu ya'a:
—A je' xi'ra ket tiʌ yete Jesús.
57Pedro tu ya'a:
—Ch'upra, mi' in k'o'mo' a Jesús.
58Sʌnji ka' i'ri yete u jer junturi' xi'ra, y a lay tu ya'a:
—A tech, lʌiti' ti'ech yete Jesús.
Pedro tu ya'a:
—Xi'ra, mo' ten
59Kaj mʌn jump'e hora, u jer ku jach eik:
—Taj kin wei'k tech, a je' xi'ra, lʌji' yet mʌn yete Jesús, ti' u tar ix u lu'mi Galilea.
60Chen Pedro tu ya'a:
—Xi'ra, ma' in we baij ka wei'k.
Ti' toj ku tsikba Pedro, se'p' kaj k'ainʌj aj t'er. 61Y a Jesús ka tu' sutaj u bʌj u pʌkte a Pedro, kaj k'ajiti' ti' Pedro a ba' tu ya'a ak ts'uri: «Beje', mo'tey k'ainʌ'k aj t'er, ka bin a wae oxp'e wʌts' ma' k'o'muen.» 62Y Pedro jok'i tita, kaj yayaj ok'nʌji.
Ku p'asta' a Jesús
(Mt. 26.67-68; Mr. 14.65)
63A xi'ro' a ku kʌnʌntik a Jesús, tʌn u p'astiko' y tʌn u jʌts'ko' 64Tu tap'o' u wich a Jesús, y tu laxo' u wich, y tʌn u k'atko':
—¿A'e to' mok tu laxajech?
65Y a layo' tu jach k'ux ao' ti ba' a Jesús.
Jesús ix u jach ts'urio' u winiko' judío
(Mt. 26.59-66; Mr. 14.55-64; Jn. 18.19-24)
66Kaj sasi, tu much'a u bʌj a tu woro a jak'ʌ u kucho' ti' u winik Judíos y u t'ojio' a moko' ku meajo' yok'o u yatoch K'uj y a ku kʌ'sko' u t'ʌn K'uj a toj u ts'ibtamʌ a Moisés uchik, y tu puro' a Jesús tu ku much'ik u bʌj tu woro u ts'urio' a judíos y tita tu k'ato' ti':
67—A'e teno', ¿jach tech a Cristo?
Chen Jesús tu ya'a:
—Wo kin wei'k ten a Cristo, mʌnʌ' a ch'eike'x in t'ʌn. 68Y si ki k'atik ti' teche'x ba', mʌnʌ' a nujke'x ten. 69A beje' u Ti'a Xi'ra ti' ku bij kuta tu xax K'uj a ne chich u muk'.
70Tu woro tu k'ato':
—¿A'e teno' wo jach tech u Ti'a K'uj?
Jesús tu nuka ti'o':
—A bʌji' teche'x ta wa'ex.
71Y tu ka' ao':
—¿Ba' wi kak kʌxtik más u si'pi ti ak pʌk'ik u pach? Chen toj to' tʌk ua bij ku yei'k.
Actualmente seleccionado:
San Lucas 22: PLacNaha
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Sociedad Biblica de México AC
