S. Juan 2
2
U ch'eik u bʌjo' ix Caná
1Mʌni oxp'e k'in, yʌn moko' tʌn u ch'eik u bʌjo' ix Caná u meje kʌjta Galilea, y tiʌ tita u nʌ' a Jesús, 2y bexi' pʌya tu jʌnʌ a Jesús y yete u kʌ'sa winiko' a tuku ch'eik u bʌjo' a winik. 3Y xu'pi u yʌki a menʌ' u ya'ri a nukuch ts'us (uva) y u nʌ' a Jesús tu ya'ti' a Jesús:
—Ya xu'pi tio' u ya'ri a nukuch ts'us.
4Jesús tu nuka ti':
—¿Biken ti' ten ka wei'k? Ka wirik mo' k'uchuk u p'is in we'sik moken.
5Chen u nʌ' tu ya'ti' a mok tʌn u mʌsik a o'chi:
—Laj mete'x tu woro a ba' ku bin u ya'te'x a metke'x.
6Y tita tiʌ seis nukuch chuj a menʌ' yete k'at a tuku t'ʌja' ja', bex ku naj kukintiko' u winki a judíos a bex nʌj t'ʌro' u metko' ti' u ki p'o'iko' tu woro a ba' ku bin u k'ʌno' ti K'uj, a lay a nukuch chuj jeu' yoko setenta o cien litro ti' ja'. 7Y Jesús tu ya'ti' a moko' ku mʌsik a o'chi:
—Ture'x yete ja' a je' a nukuch chuj.
Y tu jach ki turo'. 8Y Jesús tu ka a'tio':
—Jare'x chichin y bise'x tia mok u ts'uri a mok ku laj irik tuku meta' a o'chi.
Y bex tu meto'. 9Tuk'in tu tunta' a ja' aj metchʌ u ya'ri nukuch ts'us a mok u ts'uri a mok ku laj irik tuku meta' a o'chi, ti' mix u yue tuba u tar a lay u ya'ri, to jai' a mok ku mʌsik u o'chi u yue, y a ku yirik a lay u jʌno' tu pʌya a xi'ra a tʌn u ch'eik u lak', 10y tu ya'ti':
—Tu woro a mok ku metik u yo'ch, lʌji' ku yʌj jarik a to'o ne ki a u ya'ri a nukuch ts'us y pachi ka laj uk'ak a ne ki, ya ku jarik a jump'e mo' ne ki', chen tech pachi ta jara a ne ki' ya ti' u ts'oko.
11A je' a ba' tu ye'sa u metik a Jesús ix Caná u meje kʌjta Galilea, lʌji' u yʌj chuni u ye'sik jach yʌn u muk', y u kʌ'sa winik tu ki akso' tu yor ti Jesús.
12Pachi chen ts'o'ki u jʌno', Jesús, y u nʌ', y u yits'ino' y yete u kʌ'sa winiko' bino' ix Capernaum y tij p'ato' mo' ne ya'p k'in.
Jesús ku jarik u pich'inte a mok tiʌ u kane u bao' ix u yatoch K'uj
(Mt. 21.12-13; Mr. 11.15-18; Lc. 19.45-46)
13Tu ne xok'o u k'uchu u k'ini u metko' u yo'cho' a judíos a lʌji' u k'ini pascua, Jesús bini ix Jerusalén. 14Y Jesús tu yira ix u yatoch K'uj ne pim a ku kanik u bao', tʌn u kanko' u meje yar a wakʌx, aj me' y aj uk y bexi' ti' kuro' a mok ku k'axik u tak'in u bojo'. 15Y Jesús tu meta jump'e sum ti' u ji'x, y chu'mpʌ u laj pich'intik tu woro a mok tiʌ u kane u bao' ix u yatoch K'uj, tu la' jara tu woro aj me', u meje aro' a wakʌx y u tak'in a mok ku k'axik yete u bojo' tu la' wejch'inta ix lu'm y tu laj tech'inta tu woro aj pojche', 16y tu ya'ti' a mok tʌn u kanik aj uk:
—¡Laj jare'x a je' tiʌ way! ¡Ma' metke'x u nʌji tuku kana' ba' u yatoch in Tet!
17Ka tu yiro' bex u kʌ'sa winiko' a Jesús, k'ajitio' a tu ts'ibʌ' a ku yei'k: «Chok in wor tuk'in muj ki kʌnʌnta a watoch.» 18Y u ts'uro' a judíos tu ka'to' ti' a Jesús:
—¿Bay ka bin a we'sik ti' to' ti' in wirko' jach t'ojech ti' a metik a je' a ba'?
19Jesús tu nuka tio':
—Jube'x a je' u yatoch K'uj y oxp'e k'in je'e in ka' laj metik tu woro.
20U ts'urio' a judíos tu yao':
—Cuarenta seis yaxk'in xʌni ti u ts'osa' u meta' u yatoch K'uj, ¿Y tech ka wei'k jai' oxp'e k'in ti' a ka' laj metik?
21Chen a Jesús tʌn u yei'k a lay u yatoch K'uj lʌji' yok'o u bʌk'e u bʌji'. 22Ben ka ka' lik'i tu ka kuxta Jesús, u kʌ'sa winik k'ajitio' a bay tu toj a'a, y tu ch'ao' u t'ʌn a ts'ibʌ' yok'o u t'ʌn K'uj y a baij tu ya'a Jesús.
Jesús u k'omʌ tu woro a winik
23Tuk'in a Jesús tiʌ ix Jerusalén, tuk'in tʌn u metko' u yo'cho' a judíos a u k'ini Pascua, ne pim tu yakso' tu yoro' ti Jesús a tu tu yiro' u ye'sik ba' a Jesús yete u muk' K'uj. 24Chen a Jesús mo' tu laj ch'a u t'ʌno', a ti' toj u k'omʌ tu woro u tuko', 25chen mo' sik u ya'ba ti' baij ku yei'ko' a winik ti', toj u k'omʌ bay yʌn tu pixʌn a winiko'.
Actualmente seleccionado:
S. Juan 2: PLacNaha
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Sociedad Biblica de México AC
