Matío 17
17
Yɛɛ́so a á ega ntswīi páʼ yí é épúp, á ntē shʉ́shɔ́k
(Mlk 9.2-9; Lúk 9.28-36)
1Á tɔ́k eleʼé ntokó, Yɛɛ́so á tsɔ́ʼ á Piɛ pɔ́ Jáak, mbɔɔ Jáaŋ ntsiʼnzem Jáak mɛ́t. Pɔ́ a pɔ́p é pe mé mmɔʼ sisia lekwɛ̄t, ŋ́gɔ́ éwú pɔ́plépɔ̄p. 2Pɔ́ jʉ́ɔ, ayiŋ Yɛɛ́so, á pú ŋkúmne á mvhɔ pɔ́p. Eshhʉ̄ yí é sɛt nnɛ̄t ŋŋwāŋne páʼ lezēk nu lā. Menzhó mí é sɛt nnɛ̄t efók, tɛ nnɔ̄ŋ ŋkɛ̄ʼɛ ejʉʼ. 3Pɔ́ lɛ ŋgē ejʉ́ɔ, Mɔɔ́sɛ pɔ́ Eli é ŋwak, pɔ́ a Yɛɛ́so é nɔŋ eshúŋnɛ. 4Piɛ á lɛ ndé á mbū Yɛɛ́so ŋ́gɛ: «Mɔʼɔ́ wek, á mbɔŋ ŋ́gɛ, ḿpɛ a pɔ́p e epú ŋgɔ́ ega. Lɛ mvéŋ, meŋ ekwɛ́t mentap mɛ́ntɛ́t, taʼ a egɔ́ eju, taʼ a egɔ́ ezi Mɔɔ́sɛ, mmɔʼ e egɔ́ ezi Eli. » 5Ńzɛ́t nzhɛ eshúŋnɛ, amɔ̄ʼ aŋwaŋné alɔ á liɛ esóʼo, ḿbúu ŋkáptɛ á wɔ́p. Ŋghi Ndém é fhó á ntē alɔ mɛ́t, ńdé ŋ́gɛ: «Ŋiŋ wuɔ a á Méŋ ga, meŋ kɔ̄ɔŋ á yí tɛʼ. Meŋ á tsɔ́ʼ á yí, a ghʉʉ̄, ntē gá é gáŋte. Pɛ ejúʼ á yí. » 6Nnɔ Yɛɛ́so é júʼ épúp, mmɔʼ mía mía ecɔʼ é pú ŋgɔ̄ á wɔ́p, tɛ pɔ́ whʉ á esī, ŋ́kápte eshhʉ̄ wɔ́p á esī. 7Yɛɛ́so á tshóte nnɛ̄t mé lezēŋ tsɔ́p, ḿpfēŋ á wɔ́p ndé ŋ́gɛ: «Pɛ elūte á esī. Ndɛ́ʼ pɛ ezéŋ mbɔ́k. » 8Pɔ́ lute á esī, ḿbʉ́ʼɛ menēk mɔ́p, ńcʉ́ʼɛ njʉ́ɔ Yɛɛ́so yíléyī mé zɛ́t á ajʉʼ ntshí. 9Pɔ́ ghʉ nnɔ̄ŋ efhɔ́ɔ á ndo lekwɛ̄t esóʼo, Yɛɛ́so á tswɛte á wɔ́p ŋ́gɛ, ndɛ́ʼ pɔ́ zho ŋkím éshúŋ á ŋiŋ, ájū mīi pɔ́ é jʉ́ɔ, tɛ Méŋ‑Ŋiŋnɔŋ a eláʼ nzím ánɛ lewhʉ̄. »
(Mlk 9.11-13)
10Nnɔ Yɛɛ́so é zɛ́tte á yí ŋ́gɛ: «Melaʼ akɔ̄ wɔ kɛ́ʼte‑mbé Ndém, é gɛ ndʉ́ɛ́ ŋ́gɛ, Eli a a fú eté njhʉ̄ eshʉʼ ē?» 11Yɛɛ́so á pwɛt ŋ́gɛ: «Á anuúnē, Eli a a fú eté njhʉ̄ eshʉʼe, éghʉ, akʉ̄ɛ akʉ̄ɛ a ezéŋ ntshí á ajʉʼ yí. 12Táʼ, meŋ ké eshúŋɔ á wɛ́ ŋ́gɛ, Eli a lē ndáʼ eshʉ̄ʼ, epuɔ menɔŋ é piŋ te á yí véŋ, a cʉ́ʼɛ épúp, mbɔ pɔ́ le yá á yí ŋgʉɔ̄ʼ páʼ pɔ́ é kɔŋ. Pɔ́ shʉʼ ezéŋ eyá á Méŋ‑Ŋiŋnɔŋ azí ŋgʉɔ̄ʼ épúp. » 13Ńdé épúp, nnɔ yí é lɛ njúʼ á légɛ, a á páʼā, ńdɔkɔ ndʉ́ɛ́ á Jáaŋ nnoʼ‑epuɔ á ntshi.
Yɛɛ́so a á ega njūŋɔ esī ánɛ mmɔʼ méŋkhʉ̄
(Mlk 9.14-29; Lúk 9.37-43)
14Yɛɛ́so pɔ́ a megaŋ nnɔ pí pwɔ̄ métɛ́t, é gʉɔ tɛ nnɔ̄ŋ mbátɛ alāʼ, mmɔʼ ŋiŋ á tshóte nnɛ̄t mé lezēŋ tsí, ńtswíʼte á mvhɔ yí. 15Ńdé á mbū yí ŋ́gɛ: «Ndi, lɛ ntsá mezeŋɛ méŋ ga. Mmɔʼ esī e lē ŋgɔ á yí, ḿbú ŋgēne á yí tɛʼ, ŋ́gɔ́ efʉʼ metsem, ŋ́ghʉ̄ á whʉ whʉ. E é amɔ̄ʼ afʉʼ, ŋ́ghʉ̄ a ewhʉ̄ á ntē mmók, ŋ́gɔ́ amɔ̄ʼ afʉʼ, ŋ́ghʉ̄, a ewhʉ̄ á ntē ntshi. 16Meŋ á ké ndɔ̄k á yí eshʉ̄ʼ, ŋ́gɛ nnɔ wú e ejūŋ esī mɛ́t, tɛ́ pɔ́ té éwú kuʼ. » 17Yɛɛ́so á júʼ épúp, ŋ́gyɛ́t ndé ŋ́gɛ: «Pɛ epuɔ ŋguʼ puɔ, pɛ é epuɔ tepɔŋ, pɛ te ntē ánɛ Ndém tshí. Meŋ a láʼ esek ánɛ ŋghʉʉ́‑menu mɛ́, tɛ eláʼ etshí eséŋɛ́ ɛ́? Pɛ é kwaŋ ŋ́gɛ, ḿpɛ mé náŋa náŋa lɛ́? Pɛ elɔ̄k á mɔ́ mɛ́t, éshʉʼ ŋgyá mé meŋ. » 18Mɛ́ lɔk á yí eshʉ̄ʼ, Yɛɛ́so á cɔ́k esī mɛ́t, é fhó ánɛ mɔ́ ntó, mɔ́ á lɛ ntē efʉʼ mɛ́t efʉʼ mɛ́t. 19Nnɔ Yɛɛ́so é tshóte nnɛ̄t mé lezēŋ tsí, pɔ́ a pɔ́p é náʼ efwɔ̄ʼ nnɛ̄t, pɔ́ zɛ́tte á yí ŋ́gɛ: «Éshʉ̄ʼ ánɛ pek, mbɔ melaʼ akɔ̄ pek kaá ŋkūʼ á wék azék á lejuŋ esī mɛ́t ɛ̄?» 20Yɛɛ́so á pwɛt á mbū pɔ́p ŋ́gɛ: «É melaʼ mīi, lefɛ̄ nnɛ̄t wɛ ŋgyá á mbū Ndém, a gɔ́ áa méŋ agáʼ lɛ. Kwaʼ anuúnē, meŋ ké eshúŋɔ á wɛ́ ŋ́gɛ, lefɛ̄ nnɛ̄t wɛ ŋgyá á mbū Ndém, a á ŋgwíʼe efáŋ páʼ lesa sésōk, mbɔ pɛ lʉ́ɛ́ á mbū lekwɛ̄t cʉɔ ŋ́gɛ, fhó ega ŋgʉ̄ɔ ntshí ege, mbɔ é gʉɔ etshí éwú. Mbɔ amɔ̄ʼ azō á pú ŋgɔ́ á le wɛ́ tsya. 21Ŋ́gɔ́ mé anu esī, mbɔ mɛ́ lɔɔ̄k áa leswīŋte Ndém, mbɔɔ lekɔŋ nnáŋ nzi mélaʼ yí, tɛ́ njūŋ ejʉɔ ntií esī mɛ́t. »
Yɛɛ́so a á ega nzéŋɛ ŋ́gɛ, yí e shʉʼ ejʉ́ɔ ŋgʉɔ̄ʼ, ékwhʉ́ epiŋ ezím
(Mlk 9.30-32; Lúk 9.43-45)
22Á shʉʼ ŋgɔ́ amɔ̄ʼ aleʼé, Yɛɛ́so pɔ́ a nnɔ yí, é cúʼte á Ŋgaliléa. Yɛɛ́so á lé mé pɔ́p ŋ́gɛ: «Mɛ́ e swiŋ á Méŋ‑Ŋiŋnɔŋ wuɔ á mbū epuɔ menɔŋ, pɔ́ eghʉ̄ ánɛ yí páʼ pɔ́ kɔŋ, 23ńzwhí á yí, a epiŋ ŋgɔ́ eleʼé tɛ́t, a ezím ánɛ lewhʉ̄. » Nnɔ yí é júʼ épúp, ḿbú mmēk tɛʼ.
Yɛɛ́so pɔ́ Piɛ é ega mbíɛ́ ncup
24Yɛɛ́so pɔ́ a nnɔ yí é gʉɔ tɛ ŋkó á Kafaanawum, wɔ tswí‑ncup ŋgyā Ndém é tshóte nnɛ̄t mé lezēŋ Piɛ, ńzɛ́tte á yí ŋ́gɛ: «Mɔʼɔ́ wɛ a te emaʼ ezi ncup ŋgyā Ndém ɛ́ kɛ?» 25Á pwɛt ŋ́gɛ: «A a maʼe. » Piɛ á gʉɔ tɛ ŋkó á mba, Yɛɛ́so mé gɔ́ mvhɔ á lelē mé yí ŋ́gɛ: «O ó kwaŋ ajú ŋ́gɛ akɔ̄ Simɔŋ? Wɔ awɔ́ é pɔŋteé á lemaʼ ncup alāʼ, mbɔɔ emɔ̄ʼ mencup, á mbū mefɔ esī atsetsáʼ puɔ ɔ̄? Epuɔ alāʼ pí kɛɛ mege pīi, é naŋteé á alāʼ é?» 26Piɛ á tsɔ́ʼ ŋ́gɛ: «Mege. » Yɛɛ́so á lé á mbū yí ŋ́gɛ: «Ńdɔkɔ ŋ́gɛ, epuɔ alāʼ é té pɔŋté á lemaʼ ncup ɔ́. 27Táʼ, ndɛ́ʼ mɛ́ ghʉ, anu á záŋ wɔ tswí‑ncup. Gʉɔ á mía, ḿmāʼ lezɔ̄p, mvhɔ esōh zīi e é pfɛ́t, o egɔ̄, ŋ́ŋáʼa nchu yí, ńjʉ́ɔ apak ŋkāp éwú, éfók ndɔk ŋ́gʉ̄ɔ ŋgyá mé pɔ́p, e egɔ́ ezɔkɔ ncup. »
Actualmente seleccionado:
Matío 17: ybb
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© CABTAL
