Matío 10
10
Yɛɛ́so a á ega ntsɔ́ʼɔ meziŋ‑ntō pí ntsɔp pīa mé legēm
(Mlk 3.13-19; Lúk 6.12-16)
1Yɛɛ́so á ghʉ ntɔ́ŋ megaŋ nnɔ pí epuɔ ntsɔp pīa mé legēm, ŋ́gyá á wɔ́p mete á lelɔk njūŋ mesī ánɛ epuɔ, mbɔɔ á lelɔk ŋghʉ̄, tɛ mbɔɔ aziɛ́ agɔ lɛ́, pɔ́ aziɛ́ alɔʼ lɛ́, á te ánɛ epuɔ. 2Menzēŋ meziŋ‑ntō mɛ́t ntsɔp pīa mé legēm e emuɔ: ŋgaŋ mvhɔ a lɛ á Simɔŋ, Yɛɛ́so á zéŋ ntswhī á yí lɛ Piɛ, ŋ́ghʉ̄ á ntsiʼnzem yi Aŋdlɛya, ŋ́ghʉ̄ á Jáak méŋ Zebedé, pɔ́ Jáaŋ ntsiʼnzem yi. 3Ŋ́ghʉ̄ á Fílíio pɔ́ Baatelemi, ŋ́ghʉ̄ á Tomási pɔ́ Matío ntswi‑ncup alāʼ, ŋ́ghʉ̄ á Jáak méŋ Alfe pɔ́ Tadio. 4Ŋ́ghʉ̄ á Simɔŋ Nzɔŋɔ‑alāʼ pɔ́ Yúdas Iskaliɔt, á ŋiŋ yīi, yí mé le shʉ̄ʼ njhʉ́ mezoʼ Yɛɛ́so.
Yɛɛ́so a á ega ntúɔ́ meziŋ‑ntō pí ntsɔp pīa mé legēm
(Mlk 6.7-11; Lúk 9.2-5)
5Yɛɛ́so á ge etó epuɔ ntsɔp pīa mé legēm mɛ́t, ńtswɛ̄te á wɔ́p ŋ́gɛ: «Pɛ epá á wɛ́ á legʉɔ á ntē elāʼ tsīi, epuɔ pīi é té epuɔ Yúda á, é naŋteé éwú. Ḿbá á wɛ́ á lekō á ntē tsɔ taʼ tésɔŋ epuɔ Samalía. 6Pɛ egʉ̄ɔ áa mé alāʼ epuɔ Islaɛl, pɔ́ é si ŋgɔ́ páʼ memvhō Ndém, mbɔ pɔ́ lē mbíte. 7Pɛ egʉ̄ɔ ŋkó á mɛnzhɛ, ésáʼ eshúŋ ŋ́gɛ afʉʼ zīi, Ndém a gɔ esáʼ lefɔ tsí, á tshóne tɛ mbáte. 8Pɛ eghʉ̄, megaŋ agɔ e etē. Ŋ́ghʉ̄, mepfhō e ezím ánɛ lewhʉ̄. Ŋ́ghʉ̄, megaŋ kaʼpáp e etē. Ńjūŋ mesī ánɛ epuɔ. Mɛ́ le yá á mbū pɛ ndémndēm, pɛ́ ezéŋ ndɔk ntswíte epuɔ ndémndēm. 9Pɛ nɔŋ ŋgʉ̄ɔ, ndɛ́ʼ ŋiŋ á pɛ́ á gɔ́ɔl, ndɛ́ʼ ŋiŋ á pɛ́ ŋkāp, ndɛ́ʼ ŋiŋ á néŋ atʉɛ́ ŋkāp á apa yí. 10Ndɛ́ʼ ŋiŋ á pɛ́ apa leziŋ, ndɛ́ʼ ŋiŋ á pɛ́ menzhó mɛ́mbīa, ndɛ́ʼ ŋiŋ á pɛ́ meláŋ, ndɛ́ʼ ŋiŋ á pɛ́ athʉ́ zīi, a gɔ etɛ́te. Á épúp melaʼ mīi, ŋgaŋ afaʼ a pɔŋteé á lewɛ ntsɔʼɔ́ afaʼ yí.
11«Pɛ gʉɔ tɛ ŋkó ánɛ ewiɛ́ tésɔŋ kɛ́ aziɛ́ akap alāʼ lɛ́, pɛ ezɛ́tte tɛ nzhɛ́ á ŋiŋ yīi, a gɔ ekókne á wɛ́, ŋ́gʉɔ nnáŋ éwú. Ńnáŋ éwú tɛ ndáʼ efhó á ajʉʼ mɛ́t ŋgʉ̄ɔ. 12Pɛ nɔŋ ŋkúɔ́ tɛ mbɔɔ ánɛ eziɛ́ ŋgyā lɛ́, pɛ ezīi mvhɔ, ńtsāʼte epuɔ pīi pɔ́ é ŋgyā mɛ́t, ńdé ŋ́gɛ: “Ndém a elɛ nnéŋ apwɛne ánɛ pɛ pīi, é ŋgyā ega.” 13Ŋ́gɔ́ éyi epuɔ ŋgyā mɛ́t, é kókne á wɛ́, Ndém á ghʉ pɔ́ wɛ apwɛne. Ḿbiŋ te á wɛ́ kókne, apwɛne zɛ́ é piŋ, á mbū pɛ. 14Pɛ gʉɔ tɛ ŋkó á ajʉʼ, mɛ́ gɔ́ te á wɛ́ kókne, ŋ́gɔ́ te anu zɛ́ júʼ, pɛ ge efhó á ŋgyā mɛ́t ká á tésɔŋ mɛ́t egʉɔ, ńjɔ̄kte á avɔ́p á mekhu pɛ, ńtsyā éwú, ńdɔk ntswī á légɛ, pɛ a pɔ́p é té wɛ. 15Kwaʼ anuúnē, meŋ shúŋɔ á wɛ́ ŋ́gɛ, a láʼ aleʼé zīi, Ndém a záʼa ntsaŋ epuɔ menɔŋ, anu epuɔ tésɔŋ puɔ mɛ́t, a epék ntɔ́k azi epuɔ tésɔŋ Sodɔm pɔ́ epi Gomɔɔ, tɛ́ mbɔ pɔ́ le ké efʉʼ menu tepɔŋ ezi ntí.
Yɛɛ́so a á ega ntswɛ̄tɛ meziŋ‑ntō ánɛ ŋgʉɔ̄ʼ zīi é si eshʉ̄ʼɛ
(Mlk 13.9-13; Lúk 21.12-19)
16«Awuɔ yīi meŋ túɔ́ á wɛ́ á nnɔ epuɔ menɔŋ, páʼ memvhō mīi é kúɔ́ á nnɔ metsho lāa. Pɛ eké ŋgʉ̄ɔ azɛ́, ŋ́gīkte páʼ menū lā, ŋ́gɔ́ ndendem páʼ ekepēŋ lā. 17Pɛ epá epuɔ menɔŋ. Pɔ́ e shʉʼ eswiŋ á wɛ́, mɛ́ elɔ̄k á wɛ́ ŋgʉ̄ɔ mé mvhɔ asāʼ. Pɔ́ e shʉʼ elɔk ntɛ̄, étswá á wɛ́ á meŋgyā aswiŋte pɔ́p. 18Mɛ́ e shʉʼ eshuŋne á wɛ́ melaʼ mīi, pɛ é epuɔ pá, élɔk egʉɔ mé mvhɔ wɔ sáʼ‑ŋgɔŋ pɔ́ a mefɔ, pɔ́ eŋāk á wɛ́. A egɔ́ épúp, pɛ elɔk eshúŋ á wɔ́p, mbɔɔ á mbū epuɔ pīi é té epuɔ Yúda á, á ajū mīi pɛ́ é si nzhɛ́ɛ ánɛ meŋ. 19Pɔ́ shʉʼɛ ŋgɔ́ tɛ eswīŋ á wɛ́, tɛ mɛ́ nɔ̄ŋ ndɔ̄kɔ á wɛ́ ŋgʉ̄ɔ, ndɛ́ʼ pɛ ezāap nnɛ̄t ánɛ ntií zīi, pɛ e kó elɔk eshúŋne, ndɛ́ʼ pɛ ezāap nnɛ̄t ŋ́gɛ, pɛ e kó elé egɛ akɔ̄ lɛ́. A láʼ ekuʼ ánɛ njhʉ̄ mɛ́t, Ndém a eshúŋ á wɛ́ anu zīi pɛ e lé, 20melaʼ mīi, pɛ mé té ndáʼa ŋgɔ̄ á eshúŋnɛ ɛ́. Azwakne Mɔʼɔ́ wɛ Ndém, mé láʼa ŋgɔ̄ elɔk nchu wɛ́ eshúŋne. 21A láʼ ekuʼ afʉʼ mɛ́t, méŋ mɔ́ a eswīŋ mmɔʼ, ŋ́gɛ mɛ́ ezwhí. Mɔʼɔ́ mɔ́, a ezéŋ ŋghʉ̄ azí épúp, ánɛ méŋ yi. Ewɔŋkhʉ̄ e esɛnne ndʉɔ́ʼ memɔʼɔ́ pɔ́ a memía pɔ́p, ŋ́ghʉ̄ mɛ́ ezwhíte á wɔ́p. 22Epuɔ metsem e shʉʼ epú epa á wɛ́ melaʼ mīi, pɛ é epuɔ pá. Táʼ, ŋiŋ yīi, a á ŋíŋ ánɛ meŋ tɛ ndáʼ nzōko, Ndém a eghʉ̄, a etswɛ́t. 23Pɛ shʉʼɛ ŋgʉ̄ɔ tɛ ŋkó mmɔʼ tésɔŋ, mɛ́ jūŋ á wɛ́, pɛ efhó éwú ŋkʉ̄ ŋgʉ̄ɔ mé mmɔʼ eyi ndɛʼɛ. Kwaʼ anuúnē meŋ shúŋɔ á wɛ́, pɛ te shʉʼ ekɛ́t metésɔŋ epuɔ Islaɛl tɛ e emī, té gɔ́ yīi, Méŋ‑Ŋiŋnɔŋ wuɔ a á piŋ nzem ɛ́.
24«Nziʼnɛ afaʼ, a te zhɛ́ afaʼ ntsyā á mɔʼɔ́ afaʼ yi í. Ŋkwa, e te mɔʼɔ́ yi tsyāa. 25A gɔ́ éyi akɔ̄ á le ghʉ̄ á mɔʼɔ́ afaʼ lɛ́, mbɔ aziɛ́ azō a shʉʼ ezéŋ eghʉ á nziʼnɛ afaʼ. Ŋ́gɔ́ éyi akɔ̄ á le ghʉ̄ á mɔʼɔ́ ŋkwa lɛ́, mbɔ aziɛ́ azō a shʉʼ ezéŋ eghʉ ŋkwa. Páʼ pɔ́ ke zɔtē á ŋgaŋ ŋgyā, ńtɔ́ŋ á yí lɛ Bɛlzebul efɔ mesī lā, pɔ́ e shʉʼ ekó ánɛ wɔ náŋ á ŋgyā ega mɛ́t, ézɔ á wɔ́p etɔ́k épúp.
Ndɛ́ʼ pɛ epɔ́k epuɔ menɔŋ, pɛ epɔ́k áa Ndém
(Mlk 8.38; Lúk 9.26; 12.2-9)
26«Púp, ndɛ́ʼ pɛ epɔ́k epuɔ menɔŋ. Ajū mīi, mɛ́ lē ndʉɔ, Ndém a gɔ le láʼ nnéŋ té ghʉ mɛ́ zhɛ́ ɛ̄. Ajū mīi, mɛ́ le féŋ á ntsem, a á le láʼ nnéŋ té ghʉ mɛ́ jʉ́ɔ ɔ̄. 27Anu zīi, meŋ shúŋɔ á wɛ́ á ntsem, pɛ e shʉʼ eshúŋ á ntentā. Anu zīi, mɛ́ lemtɛ á wɛ́, á letuúŋ pɛ, pɛ ekɔ́ʼ ntshí á ndo esaá tɛ́ esáʼ eshúŋ. 28Ndɛ́ʼ pɛ epɔ́k epuɔ menɔŋ, pɔ́ zhɛɛ́ áa lezwhī á ŋiŋnɔŋ, ḿbiŋ ŋgɔ́ yīi, pɔ́ gɔ le kūʼ á lezwhī agega ŋiŋ ɛ́. Pɛ epɔ́k áa Ndém, a kuūʼ á lezwhī á ŋiŋ, ḿbiŋ nzéŋ ŋ́kūʼ á leghʉ, agega zí á gʉɔ mé alāʼ mmók. 29Pɛ é si nzhɛ́ɛ á mbɔŋɔ́ á légɛ, ŋiŋ a swiŋɛ epɔ̄ meséŋ mémpīa, é pú le azō kó. Táʼ, Mɔʼɔ́ wɛ Ndém a gɔ le cʉ́ʼ tɛ, tsɔ eyi wɔ́mɔʼɔ́ á kwhʉ́, té gɔ́ yīi, yí mé kɔŋ ɔ́. 30Ḿbiŋ eshʉ̄ʼ ánɛ pɛ, mbɔ Ndém a zhɛɛ́ á wɛ́, tɛ mbú nzhɛ́ nzwiŋ menɔŋ ntsɔʼ mɛ́ ntsem. 31Púp, ndɛ́ʼ pɛ ezéŋ mbɔ́k. Nzwiŋ wɛ́ é teē á mbū Ndém, ńtɔ́k eyi meséŋ ntsem.
32«Ŋiŋ a tshíɛ á mvhɔ alāʼ, ḿvéŋ ŋ́gɛ, yí é ŋiŋ ga, mbɔ a láʼ aleʼé zīi, Ndém a záʼa ntsaŋ, meŋ ezéŋ mvéŋ azá, á mvhɔ Mɔʼɔ́ ga yīi, a á lephū, á légɛ ŋgaŋ a á ŋiŋ ga. 33Ŋiŋ a piŋɛ ntshí á mvhɔ alāʼ, ḿbūŋne á gá, mbɔ a láʼ aleʼé zīi, Ndém a záʼa ntsaŋ, meŋ ezéŋ mbūŋne á yí azá, á mvhɔ Mɔʼɔ́ ga yīi, a á lephū.
Anu Yɛɛ́so á maāʼ mefakne á nnɔ epuɔ menɔŋ
(Lúk 12.51-53)
34«Ndɛ́ʼ pɛ ekwāaŋ ŋ́gɛ, meŋ kɛɛ́ eshʉʼɛ á ndo esī atsetsáʼ, éghʉ epuɔ menɔŋ e enáŋ mé apwɛne. Meŋ kɛɛ́ te shʉ̄ʼɛ, éghʉ epuɔ menɔŋ e enáŋ mé apwɛne ɛ́. Meŋ kɛɛ́ eshʉʼɛ, á mbhií mekɔŋ asɔpne. 35Meŋ kɛɛ́ eshʉʼɛ, éghʉ ŋiŋ pɔ́ mɔʼɔ́ yi, e efākne. Éghʉ, mɔ́ menzwí pɔ́ mɛ́ wɔp e efākne. Éghʉ, menzwí pɔ́ mɛ́ ndō yi, e efākne. 36Megaŋ mbo pɛ́, é shʉʼ etó áa á kwaʼ ntē ŋgyā pɛ.
Ntií zīi ŋiŋ a gɔ elɔ̄k ncūŋte nnɛ̄t zi, tɛ́ ntsé á nzem Yɛɛ́so
(Mlk 8.34-35; Lúk 14.26-27; 9.23-24)
37«Ŋiŋ a kɔŋɔ á mɔʼɔ́ yi kɛ́ mɛ́ wɔp, tɛ ntɔ́k á gá, mbɔ ŋgaŋ, a gɔ le kūʼ á yí, á legɔ̄ á ŋiŋ nnɔ ga á. Ŋiŋ a kɔŋɔ á méŋ yi, éyi mbaŋa kɛ́ eyi menzwí, tɛ ntɔ́k á gá, mbɔ ŋgaŋ a gɔ le kūʼ á yí, á legɔ̄ á ŋiŋ nnɔ ga á. 38Ŋiŋ a gɔ te tswíʼ á mbaŋne paŋné yi, ńdɔk ntsé á nzem meŋ ɛ́, mbɔ ŋgaŋ a gɔ le kūʼ á yí, á legɔ̄ ŋiŋ nnɔ ga á. 39Ŋiŋ a nɔŋ ndhʉ̄ɛ athū zí ŋ́gɛ, yí láʼa ŋgɔ́ éwú lɛ́, mbɔ a a láʼ ekwhʉ́, épíi. Ŋiŋ a piŋɛ ŋgwáʼ athū nnɛ̄t zí melaʼ má, mbɔ a a láʼ egɔ́ éwú.
Ndém a taáŋ epuɔ pīi, pɔ́ é megaŋ afaʼ pí
(Mlk 9.37, 41; Lúk 9.48; 10.16; Jáŋ 13.20)
40«Ŋiŋ a kóknɛ á wɛ́, mbɔ a lɔkɔ ŋkóknɛ áa gá. Ŋiŋ a piŋɛ ŋkókne á gá, mbɔ a lɔkɔ ŋkóknɛ á ŋiŋ yīi, a le tó á gá. 41Ŋiŋ a kóknɛ taʼ ntswi‑ŋke Ndém, melaʼ mīi, a á ntswi‑ŋke Ndém, mbɔ Ndém a a láʼ eyá ntaŋá yí, páʼ eyi ntswi‑ŋke Ndém. Ŋiŋ a kóknɛ taʼ njuʼ‑nchu Ndém melaʼ mīi, a á njuʼ‑nchu Ndém, mbɔ Ndém a a láʼ eyá ntaŋá yí, páʼ eyi njuʼ‑nchu Ndém. 42Ŋiŋ a yáa atá ntshi ŋŋwɛne ŋwɛne, á mbū taʼ ŋiŋ á nnɔ pɛ, melaʼ mīi, ŋgaŋ a á ŋiŋ nnɔ ga, kwaʼ anuúnē meŋ shúŋɔ á wɛ́ ŋ́gɛ, mbɔ ŋgaŋ a te e láʼ enéŋ té wɛ ntaŋá yí í. »
Actualmente seleccionado:
Matío 10: ybb
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© CABTAL
