Genesis 3

Оԓәӈ кӑрэк

1Турәм Куща тыйәԓтәм ут войәт эԓты ŏхты вой мет ŏщмарәӈ ус. Ԓўв нэ пеԓа йастәс: «Турәм мўй йӑна йастәс: ‘Тӑм ŏйәӈ-щўԋәӈ тӑхайән нэмәԓты йўх эԓты аԓ ԓэватән?’»

2Ŏхты войа нэ йастәс: «Мин йўхәтән энмәм ԓэвпәсәт ԓэты верәтԓәмән,

3туп Турәм щиты йастәс: ‘Ŏйәӈ-щўԋәӈ тӑха кўтәпән энәмты йўх эԓты ԓэвпәсәт аԓ ԓэватән пӑ аԓ кетмаԓән, нынана ӑт пӑрты урәӈән’».

4Ŏхты вой нэӈа йастәс: «Ӑнта, ӑт пӑрԓәтән,

5Турәм уйәтԓәԓы, щи хӑтәԓән, хун нын щиԓта ԓэԓтән, нын ŏшән йŏхәтԓайтән, щӑԓта Турәм иты йӑм пӑ атәм уйәтты питԓәтән».

6Щитәԓән нэ шийаԓәсԓы, щи йўх сэмән ватты умәщ пӑ ԓэвпәсәԓ йӑм хŏрпи, пӑ щӑԓта йўхәԓ мосәԓ, ŏшәӈ нŏмәс мӑԓ, щишән; щикәԋща, энмәм ԓэвпәс ԓўв ўс пӑ ԓэс; пӑ ԓэвпәс икеԓа па мӑсԓы, ԓўв па ԓэс.

7Щӑԓта ԓын ŏшән йŏхәтсайтән, пӑ ԋарԓŏмәԓты уԓты верән веԓщи мŏштәсԓән, пӑ смоква йўх лыптәт эԓты эԓ сайԓәты ӑнтәпӈән версәтән.

8Щӑԓта Турәм Куща сый хуԓтмәстән, хŏты Ԓўв щи ŏйәӈ-щўԋәӈ тӑхайән хӑтәԓ йоләх сӑмән шушиԓыйәс; Адам нэӈәԓ пиԓән Турәм Куща эԓты йўхәт кўтән хӑԋэмәстән.

9Турәм Куща пӑ Адам ўваԓсәԓы пӑ йастәс: «Нӑӈ хŏта?»

10Ԓўв йастәс: «Ŏйәӈ-щўԋәӈ тӑхайән Нӑӈ шушиԓыты сыйэн ма хуԓтсэм, пӑ пӑԓтамәсәм ԋарԓŏмәԓты уԓмем урәӈән, щишән хӑԋэмәсәм».

11Турәм иԋщәссәԓы: «Хŏй нӑӈена йастәс нӑӈ ԋарԓŏмәԓты уԓты верэн? Аԓт пӑ нӑӈ щи йўх эԓты ԓэсән, хŏԓща Ма нӑӈена ԓэты ӑт эсәԓсэм?»

12Адам йŏхԓы йастәс: «Нэӈән, Нӑӈ мӑнэма мийәм нэӈенән, щи йўх эԓты мӑсайәм, пӑ ма ԓэсәм».

13Щӑԓта Турәм Куща нэӈа йастәс: «Мўйа нӑӈ щиты версэн?» Нэ йастәс: «Ŏхты вой мӑнэм ԓэпәԓсәԓы, щишән ма ԓэсәм».

14Щӑԓта Турәм Куща ŏхты войа йастәс:

«Щит вермен урәӈән, мўԓман уԓты питԓән

йош войәт пӑ ут войәт кўтән,

тӑԓта йэԓԓы хŏн пӑтэнән хӑтыԓыты нӑӈ питԓән

пӑ уԓтэн хўват мўв хиш ԓэты питԓән;

15пӑ щӑԓта нӑӈ пӑ нэ,

нын кўтәнән атмащ уԓты щир верԓәм,

нӑӈ энмәԓты ŏтԓан пӑ ԓўв энмәԓты ŏтԓаԓ кўтән

йэԓԓы ищи атмащ уԓты щир пŏнԓәм;

хŏйат нӑӈен ŏхен эԓты веԓты питԓәԓы,

нӑӈ пӑ ԓўвеԓ кўр йŏтԓаӈ эԓты пŏрэмәԓэн».

16Нэӈа йастәс:

«Ԓавәртат уԓтэнән кӑшиԓан шек ара верԓәԓам;

муш пиԓән ԋаврэм тӑйты питԓән;

нӑӈ икен нӑӈен мосты питәԓ,

ԓўв пӑ нӑӈ кущайэн питәԓ».

17Адама пӑ йастәс:

«Нэӈен йасӈа хуԓәтмен урәӈән

пӑ щи йўх эԓты ԓэвмен урәӈән,

хŏԓща Ма нӑӈена ԓэты ӑт эсәԓсэм,

щи йастыԓысәм: ‘Щиԓта аԓ ԓэва’,

тӑԓта йэԓԓы нӑӈ урӈенән

мўв мўԓман уԓты питәԓ;

уԓтэн хўват шукащман

мўв эԓты ԓэтŏт мŏщатты питԓән;

18пеԓантыты тŏрнәт нӑӈена мўв энмәԓтәԓ,

мўв хӑрән энәмты тŏрнәт эԓты ԓэты питԓән;

19шӑк йик кўтән ԋаԋэн ԓэты питԓэн,

мўва иԓ питтэн унты,

хŏԓща нӑӈ ўйман уԓԓән,

нӑӈ мўв хиш пӑ мўв хиша па йиԓән».

20Адам#3:20 Адам – «хŏйат»; имеԓ нэмән мӑсԓы: Ева#3:20 Ева – «хŏԓ уԓты хŏйатәт аԋԏи»;, ԓўв хŏԓ уԓты хŏйатәт аԋԏийа йис.

21Турәм Куща Адама пӑ ԓўв имеԓа ԓумәтты сŏхәт ԋўки эԓты верәс пӑ ԓынан ԓумәттәсԓы.

22Турәм Куща йастәс: «Тӑта щи, хŏйат Мўӈ итэва йис, йӑм пӑ атәм уйәтты питәс, щишән, ӑт рӑхәԓ ԓўвеԓ щиты йэԓ эсәԓты, хŏԓна уԓәпса йўх эԓты ԓэвпәс ўты верәтәԓ, щиԓта ԓэԓ ки, веккеша уԓты питәԓ».

23Щишән, Турәм Кущайән Едэм ŏйәӈ-щўԋәӈ тӑха эԓты ԓўв воштәса, мўвән ат рупитәԓ, хŏԓща ԓўв тыйәԓтса.

24Щиты хŏйат воштәсԓы, пӑ Едэм ŏйәӈ-щўԋәӈ тӑха пўӈәԓән хӑтәԓ этты пеләк сӑхат херувим#3:24 херувим – ангеләт кўтән вŏԓаӈ ŏт; ŏт пӑ щӑԓта ԓӑрыты тўтәӈ аԓтты кеши, уԓәпса йўх хŏща мӑнты йуш шавиты урәӈән ԓощәԓтәс.

Actualmente seleccionado:

Genesis 3: ХБ

Destacar

Copiar