Yaɓooda 8
8
Dɔboi mankõ kɨbo
1Luwah ga kamɨn dɔ Noet kɨ dãg tube kɨ nyakulg tube'n ĩn nat sia kam too kɨbot. Na Luwah ad nél la kɨdɔ dɔningt ad man tel. 2Mang kɨɓa ko kam holɓet kɨko kɨɓing kɨ burrolog kɨ dɔrãt utɨn tad, ndii nya ta ked. 3Man kɨ dɔ dɔningt tel jan jan, na ii go ndɔgt kɨ ɓu kɨdɔmi. 4Kam naht kɨkõtanãimɨta kɨ ndɔ kɨkɨlah gidaitanaimɨta lo nah'n non ye, too kɨbo dɨɓa dɔ mbalbot kɨ Ararat. 5Man ndii ii mbã nah kɨkõkɨlah. Kam naht kɨkõkɨlah, kɨ ndɔ kɨdasa bang lo nah'n non ye, tasom mbalbog kɨ ngal puwuw teen. 6Go ndɔt kɨ dɔsɔɔ Noe tee ta burrolo'n ɗa kad too kɨbot. 7La kagã ada aw, a lago log aw ho tel ho mbã man ii ad dɔning tut. 8Kamla la derr ad aw kɨtɔkad oo ke man ii dɔningt a? 9Na derr ngah lo mad kɨ nda njant al, ad tel kɨ roat gog kam too kɨbot, kɨtɔ man ut dɔ dɔningt kɨtaagbe. Noe la jin hɔn derr kɨront kam too kɨbot. 10Ngoo ndɔ tanãimɨta ɓaitɔ, kamla la derr ada tee kam too kɨbot gog tɔ. 11Derr tel kɨ roat gog lokɨsɔle, na hɔ mbi kag olib kɨmbool tant. Titbe la Noe ger ta kad man ii dɔ dɔningt. 12Ngoo ndɔ tanãimɨta ɓaitɔ kamla la derr ada tee, na tel kɨ roat gog al ta. 13Ɓalt kɨ ɓukɨbojidet gidaikɨɗa, kam ndɔt kɨdasa lo nah kɨdasa, man ii ad dɔning tut. Noe ɔrr nyakutdɔ too kɨbo kɔ, na nɔl lo. Na oo dɔning tube tut. 14Kam naht kɨkõjoo, kɨ ndɔ kɨkõdɔjoo gidaitanaimɨta lo nah'n non ye, dɔning tube tut kurum woi.
15Luwah el Noe an: 16I tee kam too kɨbot, ĩ kɨ nẽi kɨ ngani kɨdɨngã kɨ nẽ ngani nat sei. 17Ad nya kɨ kumkajir kɨɗen kɨ dã kɨɗen kɨ i nat sei tee, kɨ yelg kɨ nyakulg kɨ kɔd ron dɔningt kɨɗen, kad kɨ bãɨn dɔningt, kɨ oojɨn na, kɨ bɨlan kɨdɔtdɔt dɔningt. 18Noe tee kɨ nganɨn kɨdɨngã kɨ nẽn kɨ nẽ nganɨn nat sen. 19Dãg tube, kɨ dã kɨdug tube, yel tube kɨ nya kɨɗen kɨ ɔd ron dɔningt tube, teen kam too kɨbot kɨ girr koojd koojd.
20Noe ɗa dɨngɨr kadkari ad Bɨraɓe, na hɔ kɨmadg ku danggt kɨkar tube, kɨ kɨmadg ku yelgt kɨkar tube, na lad kadkari kɨlahorrt dɔ dɨngɨr kadkarit. 21Bɨraɓe ũn sé kɨkootmbĩ kɨ sɔlkam takõnɨnt na el kamɨnt an: M'a m'ndɔl dɔning gog kɨtatɔ de al ta, kɨtɔ rota tagah kɨngarkam det majal lon ĩn kɨ Basan nu. Na m'a m'nuj nya kɨ kumkajirg tube, tit'n m'ɗan kete nõ al ta. 22Kaglot dɔning ton lotont, kaglo duw nya, kɨ tet nya, dɔnah kul kɨ lokɨtɨnga, ɓar kɨkud kɨ ɓal kɨndɔ, lokɨkàda kɨ lokɨndɔ a dɨban al bat.
Actualmente seleccionado:
Yaɓooda 8: MlL
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Mbai Bible Revision © Bible Society of Chad, 2015.
