Yaɓooda 3

De so kam majalt

1Li i ngegool kɨ tɔi dãg kɨmut tube'n Bɨraɓe Luwah ɗad. El dekɨdẽ an: Rota, Luwah el an: A i san kand kagg tube kɨ kam ndɔɔt al, el titbe je e? 2Dekɨdẽ el li an: J'asɨ sa kand kagg tube kɨ kam ndɔɔt, 3na kand kag'n ɗà dan ndɔɔt ye, Luwah el an: A i san al, a ɔdɨn al tɔ, na ɓeta oin 4Li el dekɨdẽ an: Ã ã, ĩla i san a ne, a oin al. 5Kɨtɔ Luwah ger, ndɔt'n a i san a ne, kumsɨ a tee, a i telɨn tit luwahg, a i gerɨn maj kɨ majal. 6Dekɨdẽ oo kand kag ta ne, i kɨmaj sa, i nya kɨ tokumnda, i kag kɨ ndaa i ngãi kad de telɨn ngeterrkam. Dekɨdẽ j'a kanda sa, na telɨn ad ngawɨn'n ɗa kadat. Ĩ tɔ taa jiat sa. 7Lon san woi ye, ĩn tujoo kumd tee, ad gerɨn kad rod i kari, ad ɔsɨn mbikam mbaiɓood ndan gugɨn dɔ girrd.

8Dɔj losɔlt, kam nélt kɨ to peh la. Bɨraɓe Luwah a ndia kam ndɔɔt. Dekɨdɨngã kɨ nẽn oon dɔ ndia, ad yan rod kam kaggt kɨ kam ndɔɔt. 9Na Bɨraɓe Luwah kun dekɨdɨngã, ela an: Ĩ ɗah a? 10De tura an: M'oo dɔ ndii kam ndɔɔt, na m'ɓool kɨtɔ rom i kari la m'yan rom ye. 11Bɨraɓe ela an: Nõ eli kad ĩ roi kari a? Kand kag'n m'ndai mbera kad i sa al nõ ye, i sa a? 12Dekɨdɨngã el an: Dekɨdẽ kan adɨm kad ndɨ sem, nõ la adɨm kand kag la m'sa ye. 13Bɨraɓe Luwah el dekɨdẽ an: Ɗi kɨbe i ɗa a? Dekɨdẽ el an: Li la goolɨm ad m'sa ye. 14Bɨraɓe Luwah el li an:

Kɨtɔ nya'n i ɗa ten,

ĩ kɨ ndɔl tɔi nyakulg tube

ku dãg kɨmut tube.

A ɔrr kɔdi ber,

a i sa buning

kɨ ndɔig tube'n a ĩn kumkajir.

15M'a m'nda ndoor mbɨnait kɨ dekɨdẽ

kɨ mbɨna kohit kɨ koha tɔ.

Ĩ la a rigɨj dɔi ye, na ĩ tɔ, a i dõ gida.

16Bɨraɓe el dekɨdẽ an:

M'a mad roto loi lo ndan ngont bɨla kɨdɔt.

Kɨ tokooj kɨ ngãi la a oojɨn ngang ye.

Nyandɨg loi a i ko ro ngawit,

ĩ tɔ a õɓe dɔit.

17Bɨraɓe el Adam an:

Kɨtɔ i nel mbii kɨdɔ nẽit

i sa kand kag'n m'ndai mbera m'an:

A i sa al ye, dɔning i kɨ ndɔl kɨtatɔi.

A i ngah nyasait kɨ kɨla kɨ kɔrr rɔkɨ

kɨ ndɔ ndii kɨ dɔi dõ tube.

18Dɔning a ɓa kong kɨ ngarg kɨtɔi.

A i sa mbikamg kɨmut.

19Kɨ tuto takumit la a i san nya ye,

mbã a i telɨn gog kɨ ningt,

kɨtɔ ɔrrɨn ko tit, ĩ buning,

a i tel kɨ gog buningt.

20Dekɨdɨngã ndah tɔ nẽn Hawa, girr tɔa i kumkajir, kɨtɔ ĩ la i kõ ngékumkajɨrg kɨɗen. 21Bɨraɓe Luwah ɗa kub ngɨra ad Adam kɨ nẽa na la rodt.

22Bɨraɓe Luwah el an: Oon, de tel tit kɨkɨɗa loj be kɨtakul ger nya'n i kɨmaj ke majal. Tajigla ad kɨ j'ɔga kad la jin jan kand kag kumkajir sa ho, na ɓeta ndɨ kɨ kumkajir kɨ mbãkɨnõt. 23Bɨraɓe Luwah tuɓaa kam ndɔɔ Edent kɨtɨga kɨtɔkad ndɔɔ ning'n ɔrra kɔ tit. 24Titbe la Luwah tuɓan de kɔ, na nda Kerubg ko loɓakàd ndɔɔ Edent, na nda kiyaɗɔɔ kɨ tee ndõhorr tɔ, kɨtɔkad ngomɨn ne ta ɗob kaw kag kumkajirt.

Actualmente seleccionado:

Yaɓooda 3: MlL

Destacar

Copiar