रोमि 2
2
निनाम्हाङ्ओ अ़चुछ़ङ्छेन्मा
1खोन्ओसा नि छ़ङ्काछेन म़ना, खाना साङ्नुछाङ, अ़ऩङ मुमा त़तोक्नान, देकिनालो खाना नि छ़ङ्त़छेन्तुहिदा दिदा खाना छ़ङ्त़छेन्तु, मो य़ङ्दा खाना छ़ङ्ऩछेन, देकिनालो खाना छ़ङ्काछेन्छाङ मो काचि त़मु। 2ओवाको काचिचि कामुचिएदा निनाम्हाङ्आ अ़छ़ङ अ़चुछ़ङ म़छेन्तुचि निकिना आन्कान सिन्तुम्योम। 3खोन्ओसा ओवाको काचिचि कामुचि छ़ङ्त़छेन्तुचि, खोन्कि खाना मोवाको काचिचिङा त़मुचिनालो दि खाना म़ना, निनाम्हाङ्ओ अ़चुछ़ङ्छेन्मादाङ्का फुङ्ङानि त़मिन्याङ? 4माङ्लो निनाम्हाङ्ओ अ़चुसोम्तुक्माआ खाना खोक्कोएदा लामान्चिन ऩतित्नि त़सिन्तुन कि, दि खोक्कोसोओ तोक्पो अ़चुसोम्तुक्मा, अ़चुआङ्मा खोन्कि अ़चुहुङ्मा त़सुङ्तुङु?
5मेन खानानिन ऱक्भाक त़मुन्येन खोन्कि फान्मान्चिन त़छुन्तिन। खोन्ओसा निनाम्हाङ्आ अ़चुओ माइसुङ खाङ्अ़मुओ लेन्दा खोक्कोसाआ खानानिन अ़न्नुनु चाअ़त्लो दन्दा ऩप़न। मो लेन झारासाआ निनाम्हाङ्ओ अ़चुछ़ङ्छेन्मा नुलोक अ़खाङ। 6देकिनालो निनाम्हाङ्आ “झारा म़ना खोसाआ मुओ अ़काचिवा छ़ङ म़छेन्तुचि।”#साम्ऱङ्भुङ ६२:१२; अ़नुयायोक २४:१२ 7हुङ्याङ्सा अ़नुवाक काचि मुयाङ्सा साऩङ्वा, साया खोन्कि अ़स़निन्दानिन्ओ ह़ङ्म़ङ कालाम्चि निनाम्हाङ्आ अ़लुक्निन्ओ ह़ङ्म़ङ म़प़चि। 8मेन आप्पि खाङ्मान्चिन मिन्मा म़मुयाङ्ओचि, अ़छ़ङ य़ङ मान्काङ्कादा खोन्कि अ़अ़त्पादा काकोन्चिएदा अ़चुच़ऱपा खोन्कि अ़चुमाइसुङ छुक। 9अ़अ़त्पा काचि कामु झारा म़नाएदा दुखा खोन्कि अ़चाअ़त्मा ता, बुया यहुदिचिएदा खोन्किना ग्रिक्चिएदा। 10मेन साङ अ़नुवाक काचि मु, बुया झारा यहुदिचि खोन्कि ग्रिक्चिआछाङ साऩङ्वा, साया खोन्कि सेवाङ्नि अ़तोक। 11देकिनालो निनाम्हाङ्आ लिप्पा खाङ्ऩमुसुन।
12देम्साआ मोसाओ अ़य़ङ्हुप मात्द़ङ हेवा म़मुवायुङ्सा, मोचि य़ङ्हुप मात्द़ङ्ङा म़लुक्खात। खोन्कि देम्साआ य़ङ्हुप्दा म़युङ्कि हेवा म़मु, मोचिओ य़ङ्हुप्लाम्पाङा अ़चुछ़ङ्छेन। 13देकिनालो य़ङ्हुप काएन्चि निनाम्हाङ्ओ अ़चुबुदा साम्योक्मि ऩकान्निन, मेन य़ङ्हुप्वा काच़चि अ़चुओ लिप्पादा साम्योक्मि म़काइसुचि। 14देकिनालो य़ङ्हुप मान्तोक्कादा निरावाचि अ़चुच़माथाङ्मालाम्पा अ़नुवाक खोन्कि अ़अ़त्पा अ़सिन्कि य़ङ्हुप्वात्नि काचि म़मुनालो मोचिओ अ़चुय़ङ्हुप मात्द़ङ्नुछाङ मो मुमाय़ङ य़ङ्चिआङा मोचिओ अ़चुओ साकोङ्वादा य़ङ्हुप याक्याङ निकिना खाङ्मुसु। 15मोचिओ अ़चुसाकोङ्वादा य़ङ्हुप्आ लामुचिओ य़ङ छाप्तायुङ्सा निकिना मोचिओ अ़चुच़माथाङ्माआ खाङ्मुसु, खोन्कि मोचिओ अ़चुछेन्खातायाचिआछाङ सालुम्स़ङ प़चि, खोन्कि मोचिओ अ़चुमिन्माचिआ अ़क्वावाक मोचि लाहि पाक्तुचि खोन्कि अ़क्वावाक मोचि रात्तुचि। 16ओ य़ङ निनाम्हाङ्आ येसु ख्रिस्तलाम्पा म़नाचिओ अ़चुसाकोङ्वादा याक्याङ्ओ सुकुलादाओ य़ङ छ़ङ्छेन्माओ लेन्दा लि। ओ निनाम्हाङ्ओ अ़चुनुय़ङ्खान अ़ङ्का खालुसुङ्वाको ओ।
यहुदिचि खोन्कि य़ङ्हुप
17मेन खानानिन यहुदिचिओनि य़ङ्सा य़ङ्हुप्दा सोम्कुवा त़मुन, खोन्कि निनाम्हाङ्एनान्ओ आम्नुओ तुम्मादा ऱक्भाक त़मुन्येन, 18खानानिन निनाम्हाङ्ओ अ़चुमित्चिऩङ त़सिन्तुम्योम, दि अ़नुवाक मुयाङ मो छेन्मा खानानिन य़ङ्हुप्दाङ्का त़चिन्तिन्चिन। 19खानानिन अ़नुछ्या साकोङ्छ़ङ त़मुन, खानानिन दोप्म़क्ओ अ़चुबुसुवा खोन्कि झारा कुइयामादा कायुङ्चिओ निम्पाङ साम्चि ओ। 20खोन्कि खामान्सिन्कादाचि यायोक त़प़म्च़म, खोन्कि मोचि छाचिवा त़मित्तुम्च़म्कि त़चिन्तुम्च़म, देकिनालो खानानिन त़सिन्तुम्योम निनाम्हाङ्ओ अ़चुय़ङ्हुप्आ झारा ताया खोन्कि अ़छ़ङ खानानिन त़प़न। 21ओवात्नि निचि त़चिन्तुम्योम्च़म्नालो देकि खानानिन आप्पि त़चिन्तिमिन्येन्चिन? ख़माओ अ़देङ्सालाप्पादा खात़लुसिन, मेन दि खानानिन्ङा त़ख़सिन? 22खाना ताङ्लान मान्मुदानिन्नि त़य़ङ, मेन दि खानाङा ताङ्लान त़मु? खाना सेम्पोक आम्चिप्मा त़कात्तु, मेन दि खानाङा माङ्खिम्चिदाङ्का सेम्पोक्चि त़ख़सुङुचि? 23खाना य़ङ्हुप्दा तोक्पो त़लि, मेन दि खानाङा य़ङ्हुप त़काक्तुकि निनाम्हाङ्ओ अ़चुसाया त़पेप्तुङु? 24देकिनालो ओवात्नि साम्कालिन्दा छाप्याङ, “आम्नुओ तुक्वाआ निरावाचिओ अ़चुरादा निनाम्हाङ्ओ अ़चुऩङ सुङ्तायुङ्सा।”#यसैया ५२:५
25निनाम्हाङ्ओ अ़चुय़ङ्हुप य़ङ्याङ्वात्नि त़च़न्नालो सिप्मायाम्बुन्दाङ्का नुलोक लि, मेन य़ङ्हुप य़ङ्याङ्वात्नि त़च़न्मिन्नालो सिप्मायाम्बुन मान्मुकादा निरावाचिवा त़लिसिन। 26मोवात्नि अ़चुपोक्दा सिप्मायाम्बुन मान्मुदाकाचि य़ङ्हुप य़ङ्याङ्वात्नि म़च़नालो मोचि सिप्मायाम्बुन पाक्तिन्वात्नि म़लि। 27खोन्किना पोक्दा सिप्मायाम्बुन मान्पाक्कादानुछाङ य़ङ्हुप य़ङ्याङ्वात्नि काच़चिआ छाप्माय़ङ य़ङ्हुप कातोक्चि खोन्कि सिप्मायाम्बुन पाक्माय़ङ खानानिन लाहि ऩपाक्तिन, देकिनालो खानानिन्आ य़ङ्हुप त़काक्तुम। 28देकिनालो अ़क्छा बुङ्खालिप्पा ओन्ङा यहुदि कालि अ़नुछ्या निनाम्हाङ कात़ङ यहुदि माआङ, मोवात्निङा अ़नुछ्याओ सिप्मायाम्बुन्छाङ बुङ्खालिप्पाओ खोन्कि पोक्ओ माआङ, 29मेन साङ अ़कोङ्याङ्काओ यहुदि ओ, मोङा यहुदि ओ। खोन्कि साङ अ़साकोङ्वादा सेङ्लावालाम्पा मुवाओ सिप्मायाम्बुन्ङा अ़नुछ्याओ सिप्मायाम्बुन ओ, छाप्माय़ङ य़ङ्हुप त़ङ्तुम्कि अ़नुनिन, ओवाको म़नाओ अ़चोन्माय़ङ म़नाचिदाङ्का माआङ, मेन निनाम्हाङ्दाङ्का लि।
Actualmente seleccionado:
रोमि 2: bap
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© Wycliffe Bible Translators, Inc. All rights reserved.
