छाम्माय़ङ 5
5
हननिया खोन्कि सफिरा
1अ़क्छा हननिया अ़ऩङ मुवाङाओ म़नाआ मोसोओ अ़खिम्हाङ्मा सफिराएनान तोङाचिकि अ़क्चिलोक अ़चुव़क अ़इनाचु। 2खोन्किना अ़खिम्हाङ्माआछाङ सिन्तुङुलो अ़चुव़क अ़इनाचुओ फेक्वादाङ्का अ़क्चिलोक कुम्सुयुङ्सु। खोन्कि हेनाओ फेक्वा खात्तुकि छाम्माय़ङ्चिओ अ़चुबुदा युक्तुचि। 3खोन्किना पत्रुस्आ लो, “हननिया, देकि सैताना आम्साकोङ्वा क़म्मा त़प़? व़क त़इनुओ अ़क्चिलोक फेक्वा त़युक्तान्चिन्कि खाना सेङ्लावा त़म़प्तुयुङ्सु। 4मो व़क इन्मा बुया दि आम्कोङा माआङ ओ कि? खोन्कि त़इनुकिछाङ मो फेक्वा आम्कोङा ओ माआङ? साङ्आ ओवाको काचि खाना आम्मिन्मादा मिन्त़मेत्ता? खाना म़नाचि माआङ, मेन निनाम्हाङ त़म़प्तुयुङ्सु।” 5ओ य़ङ हननियाआ एनुङुवा बाखादा धुवाखाराकि सुवादा। खोन्कि हननिया सुवादाओ य़ङ झारा काएन्चिओ अ़न्नुनु अ़चुक़माकारा। 6खोन्किना थाङाछाचि म़ताकि हननियाओ अ़स़पोक तित्आ अ़रिप्ता, खोन्कि सहराओ बुङ्खाया अ़खुयाखात्ताकि अ़खुम्ता। 7आप्फात सुम्काकोम आदेङ हननियाओ अ़खिम्हाङ्मा खिम्हुत्या वाङा। मेन सफिराआ अ़खिम्हाङ्पा सुवादाओ मान्सिन्युक्तु। 8पत्रुस्आ सफिरा सेनु, “अ़ङ्का लोवाङ्खाङ, खानाचिआ व़क त़इनाचुकि त़तोक्ताचुओ अ़लुङ मोन्ङा ओ?” मोसाआ लासुलो, “उवा, मोन्दाङा ओ।” 9खोन्किना पत्रुस्आ मो लो, “खानाचि देत्नि त़तोङाचिकि सेङ्लावा चिन्माखाङ्मा त़रुवाचु? खाखो! आम्खिम्हाङ्पा काखुम म़नाचि लाप्तिखोप्दा म़युङ्याङ, खोन्कि मोचिआ खानाछाङ बुङ्खाया खुम्सि ऩलोत।” 10मो मोन्ग़रिङा पत्रुस्ओ अ़बुदा धुवाखाराकि सुवादा। खोन्किना थाङाछाचि खिम्हुत्या म़वाङाकि मो सुवादाचिआओ अ़खाकिना बुङ्खाया अ़खुयालोत्ता, खोन्कि अ़खिम्हाङ्पाओ अ़च़क्दा अ़खुम्ता। 11झारा साम्भुङ्दाओ म़नाचि खोन्कि ओ य़ङ्ओ अ़तुक्वादा काएन्चि झारासोओ अ़न्नुनु अ़चुक़माकारा।
छाम्माय़ङ्चिआ ब़द्धे म़नुसुचि
12छाम्माय़ङ्चिआ ब़द्धे बुन्चि खोन्कि म़दोम्दाओ काचिचि म़नाचिओ अ़चुरादा म़मुचि। खोन्कि झारा साकोङ्छ़ङ कामुचि निनाम्हाङ ब़क्खाखिम्ओ सोलोमन्ओ अ़सिकुवादा अ़धुन अ़क्मिन्माआ म़कोवान्यान्चिन। 13येसुएदा साकोङ्छ़ङ मान्मुकादाचि साङ्छाङ मोचिएदा होन्मान्चिन राक मान्मुचि, खोन्नुछाङ म़नाचिआ मो साकोङ्छ़ङ कामुचि च़लोक साया म़मेत्तुङुचि। 14खोन्कि ब़द्धेकापाङ दुवाछा खोन्कि मेत्छाछाचि हाङ्पा येसुएदा साकोङ्छ़ङ म़मुवाकि च़लोक अ़चुखिप्मा तेप्ता। 15छाम्माय़ङ्चिआ म़दोम्दाओ काचिचि म़मुङुचिओसा म़नाचिआ कातुक्चि मुलो लाम्चिदा म़तारुचिकि पत्रुस बान्याङ्हिदा अ़लावाछामित ओन्ङानुछाङ मोचिएदा छुक्कि म़नुने निकिना अ़चुइम्खाचिदा खोन्कि फेङ्लाचिदा म़युङ्सुदोङुचि। 16यरुसलेम च़क्चिदात्निओ तेन्चिदाङ्काछाङ ब़द्धे म़नाचिआ कातुक म़नाचि खोन्कि पोप्ताओ लावाचिआ म़लाउचिओचि म़तारुङुचि, खोन्कि मोचि झारा निनाम्हाङ्आ म़नुसुचि।
छाम्माय़ङ्चिएदा दुखा ताओ
17खोन्किना मुलो काब़क्पा खोन्कि सदुकि रुहुप्दाओ खोसोओ झारा अ़यावाचिआ छाम्माय़ङ्चिओ अ़चुदेङ्सालाप्पादा च़लोक ऩङ्च़ म़मुवा। 18मोचिआ छाम्माय़ङ्चि म़लाउचिकि छेक्खाखिम्दा म़छेक्तुचि। 19मेन मो अ़खाखुत हाङ्पाओ अ़क्छा निनाम्हाङ काफाआ छेक्खाखिम्ओ लाप्तिखोप्चि होत्तुप़चि, खोन्कि मोचि बुङ्खाया लोइसुचि। खोन्किना खोसाआ मोचि लोचि, 20“खारानिन्कि निनाम्हाङ ब़क्खाखिम्दा एवानिन, खोन्कि झारा म़नाचि ओ ह़ङ्म़ङ्ओ अ़तुक्वादा खाएत्तानुम्च़म।” 21खोन्किना ओ अ़एनाकि मोचि अ़वाय़ङ निनाम्हाङ ब़क्खाखिम्दा म़वाङा, खोन्कि म़नाचि चिन्मा म़पुङ्सुचि। मुलो काब़क्पा खोन्कि खोसोओ अ़यावाचि म़तादिसा, खोन्किना धियायोक्खादाओ इस्राएलिचिओ अ़चुबुसुवाचि म़बुत्तुचि। मोचि झारा यहुदिचिओ अ़चुअ़धुवाचि ओ। मोचिआ छाम्माय़ङ्चि छेक्खाखिम्दा लासि रात्खामिचि म़छुत्तुचि। 22मेन निनाम्हाङ ब़क्खाखिम्दाओ रात्खामिचि छेक्खाखिम्दा म़तालाहिदा मोचि मोदा मान्धित्म़दोचि। खोन्ओसा मोचि म़लासाताकि धियायोक्खादाओ म़नाचि खाम़एत्तुचि। 23“आन्कान्का छेक्खाखिम नुलोक छेक्ताङाओ धिरुम्का, खोन्कि रात्खामिचि लाप्तिखोप्दा म़एवाङा, मेन लाप्तिखोप होरुम्काहिदा आन्कान्का मोहुत्या साङ्छाङ मान्धित्दोम्च़म्का!” 24ओ य़ङ निनाम्हाङ ब़क्खाखिम्दाओ अ़चुकप्ताना खोन्कि मुलो काब़क्पाचिआ अ़एनाकि छाम्माय़ङ्चिओ अ़चुतुक्वादा “हान दे लि?”निकिना मोचि ओहा ना मोहा म़लिसा। 25खोन्किना अ़क्छा म़ना ताकि मोचि लोचि, “एनानुम, खानानिन्आ छेक्खाखिम्दा त़छेक्तुम्च़म्ओ म़नाचिआ ना निनाम्हाङ ब़क्खाखिम्दा एप्चिकि म़नाचि अ़चिन्चुङ्चुचिन।” 26खोन्किना रात्खामिचिओ अ़चुकप्ताना अ़रात्खामिचिएनान अ़क्नि खाराकि छाम्माय़ङ्चि बात्तुचि। खोन्नुछाङ राकाङ्थेत्नि मुमा मान्ऱम़दोचि, देकिनालो म़नाचिआ लुङ्आ ऩवेरिन्का निकिना मोचिओ अ़चुक़माकारा। 27खोन्कि खोचिआ छाम्माय़ङ्चि धियायोक्खाओ अ़बुदा म़बात्तुचिकि एप्म़मेत्तुचि, खोन्कि मुलो काब़क्पाआ मोचि सेनुचि, 28“आन्कान्का खानानिन येसुओ अ़ऩङ्दा म़नाचि चिन्माइ मान्चिन्दानुम्च़म्नि खानानिन लोनिओ। मेन खानुम, खानानिन्आ ना झारा यरुसलेम्दा त़चिन्तुम्चिउम्च़म, खोन्कि ओ म़नाओ अ़ह़वा आन्कान्का पाक्मा त़लाप्निङ्नि!” 29मेन पत्रुस खोन्कि नि छाम्माय़ङ्चिआ म़लासुलोचि, “म़नाचिआ लोमाय़ङ माआङ, निनाम्हाङ्आ लोमाय़ङ आन्कान्का काङ्मादोत। 30आन्सुन्तुम्चिओ अ़चुनिनाम्हाङ्आ खानानिन्आ त़लाउम्कि क्रुस्दा त़ख़न्तुम्सेरुम्ओ येसु म़सुवादाओदाङ्का अ़लासाखोन्तालोइसा। 31खोन्किना इस्राएलिचिआ हेवा मुमा अ़छित्कि अ़चुहेवा लेत्मा अ़तोक्ने निकिना निनाम्हाङ्आ खोक्को अ़चुचुप्ताङ्छुक्लिप्पा अ़झोइसाकि हाङ खोन्कि कालेन्पा अ़मुवा। 32आन्कान्का ओ य़ङ्चिओ अ़सालुम्स़ङ युङिन्येन्का, खोन्कि सेङ्लावाछाङ ओ य़ङ्चिओ अ़सालुम्स़ङ म़युङ्याङ। खोन्कि निनाम्हाङ्आ लोचिवा काच़चि सेङ्लावा म़प़युङ्सुचि।” 33ओ य़ङ धियायोक्खादाओ यहुदि बुसुवाचिआ अ़एनाकि मोचिओ चाअ़त्लो अ़चुमाइसुङ कारा, खोन्किना मोचिआ छाम्माय़ङ्चि सेत्मा म़लाप्तुचि। 34मेन झारा म़नाचिआ ब़द्धे साया अ़मेत्ताओ य़ङ्हुप काचिन्पा गमलिएल अ़ऩङ मुवाङाओ अ़क्छा फरिसि #५:३४ धियायोक्खा : धियायोक्खा अ़क्तात मोदाओ मुलो हाङ्काचि मुखा, खोन्कि यावायोक मुखा, खोन्कि म़नाचिन्खा युङाङा। अ़देङ्या य़ङ्सिवा अ़तुक्वाऩङ्दा ‘धियायोक्खा’ लामानुम।धियायोक्खादा पुवालोन्ताकि छाम्माय़ङ्चि धियायोक्खादाङ्का अ़क्दुओ निकि बुङ्खाह्यात्नि रात्खामिचि खात्मेत्तुचि। 35खोन्किना खोसाआ धियायोक्खादाओ म़नाचि लोचि, “इस्राएलिचि अ़ङ्यावाचि ओ, ओ म़नाचि खानानिन्आ दे मुमा त़मुम्योम्च़म्ओ, मोसोओ अ़तुक्वादा चाप्चेत्तानिन्चिन! 36देकिनालो अ़चित्कादोङ बुया थुदास तोक्पो म़नानि लोनान्चिन्सा रोमिचिओ अ़चुदेङ्सालाप्पादा पुवालोन्ता। खोन्कि आप्फात चार सये म़नाचिआ खो अ़त़ङ्ता। खो रात्खामिचिआ अ़सेरा, खोन्कि खो कात़ङ्चि झारा म़रिसाखारा, खोन्कि मो म़नाचि देत्छाङ च़मा मान्ऱचि। 37खोन्किना आदेङ रोमि हाङ्काचि कामुआ म़नाचि खिप्मेतुङुचिओ ग़रिदा गालिल्दाओ यहुदानिओ म़ना खाङ्मुसान्चिन। खोन्कि ब़द्धे म़नाचिआ खो अ़त़ङ्ता, मेन मोछाङ अ़सेरा, खोन्कि खो कात़ङ्चि म़रिसाखारा। 38खोन्ओसा ओन्ग़रि ओ काचिदा अ़ङ्का खानानिन यायोक प़नानिन, ओ म़नाचिदाङ्का अ़थाया युङानिन, खोन्कि मोचि मान्नेत्दानुम्च़म। देकिनालो ओचिओ अ़चुमित्चिऩङ्आ मो काचिचि म़मुङुचिओनालो मो च़क्नि लुक। 39मेन ओ निनाम्हाङ्लाम्पाओनालो ना खानानिन ओ म़नाचि छेक्मा त़ऱन्चिमिन। माङ्नालो ना खानानिन्ङा निनाम्हाङ्ओ अ़चुदेङ्सालाप्पादा फित्चि कामु त़लिसिन।” खोन्किना मो धियायोक्खादाओ म़नाचिआ गमलिएल्ओ अ़यायोक म़काङ्सा। 40मोचिआ छाम्माय़ङ्चि धियायोक्खाहुत्दा म़बुत्तुचिकि य़हुप पाक्म़मेत्तुचि, खोन्किना “येसुओ अ़तुक्वादा म़नाचि खामान्एत्दानुम्च़म!”नि म़लोचिकि मोचि म़लेरुखाइसुचि। 41खोन्किना छाम्माय़ङ्चि येसुओ अ़चुऩङ्दा साया ऩपेप्तिन्काओ आङ्मा अ़खान्तिन्काओ लिसिन्युङ्सिन्का निकिना अ़चुऩङानुयाङ्सा धियायोक्खादाङ्का बुङ्खाया म़लोन्ताखारा। 42खोन्कि मोचि अ़लेन्खिन्तुम निनाम्हाङ ब़क्खाखिम्दा खोन्कि म़नाचिओ अ़चुखिम-खिम्चिदा म़खाराकि येसुङा ख्रिस्त ओ निकिना चिन्मा खोन्कि नुय़ङ्खान खालुमा मान्छित्अ़दा।
Actualmente seleccionado:
छाम्माय़ङ 5: bap
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© Wycliffe Bible Translators, Inc. All rights reserved.
