छाम्माय़ङ 11
11
पत्रुस्आ यरुसलेम्ओ साम्भुङ्दा खालुसुओ
1यहुदियादा कायुङ छाम्माय़ङ्चि खोन्कि नि साकोङ्छ़ङ कामुचिआ निरावाचिआछाङ निनाम्हाङ्ओ अ़चुय़ङ्दा साकोङ्छ़ङ म़मुवाओ अ़एना। 2खोन्किना पत्रुस यरुसलेम्दा तालाकि सिप्मायाम्बुन कापाक यहुदि साकोङ्छ़ङ कामुचिआ खो याअ़सान्ता। 3खोन्कि मोचिआ अ़लोवा, “खाना सिप्मायाम्बुन मान्मुकादा निरावाचिओ अ़चुखिम्दा त़खाराकि मोचिएनान देकि त़चा?”
4पत्रुस्आ दे-दे म़लिसाओ, अ़स़वा मोचि खाएत्मा पुक्तुचि। 5“अ़क लेन अ़ङ्का योप्पा सहरादा यामाराङ्याङ्हिदा इम्सिन्दान्वा लिसाङ्ओ ग़रि अ़ङ्का सेन्चि खाङ। निनाम्मादुङ्का अ़क्तात अ़धिवाङ तित्वाको चारकाचोम्दा अ़लावाकि ह्युत्नि अ़धान्ताङाओ खाङ, खोन्कि मो अ़ङ्च़क्दातारि अ़धान्ता। 6अ़ङ्का मो तित्दा नुलोक खाङ्हिदा बाखादाओ चारकालाङ्ओ साक्स़ङ्चि खोक्लिदाओ साक्स़ङ्चि, बाखादा कासात्नान्चिन्चि खोन्कि नाम्छ़ऱदुओ छोङ्वाचि खाङ्च़ङ। 7खोन्किना अ़ङ्का ओवात्नि अ़लोवाङ्याङ्ओ अ़क्तात य़ङ एनुङ, ‘पत्रुस, पुवालोन्ता, खोन्कि मोचि सेरुचिकि चोचि!’
8मेन अ़ङ्का लासुङ्लोङ, ‘नुमाइ अ़नुनिन, हाङ्पो! अ़सेङ्निनिन्ओ खोन्कि पोप्ताओ अ़ङ्का देम्खाछाङ मान्चायुक्ङा।’
9मेन मो य़ङ निनाम्मादुङ्का ह्वादुओदु अ़ङ्का अ़लासाङ्लोवाङ, ‘दि निनाम्हाङ्आ अ़सेङ्सायुङ्सा, मो खाना पोप्ताओनि मान्लोदो।’ 10सुम्कादुओदुतारि मोवात्निङा लिसा, खोन्कि झारा निनाम्मादुत्नि अ़लासाखात्ता।
11खोन्कि मोन्ग़रिङा कैसरियादाङ्का अ़ङ्काएदा म़बाइसुचिओ सुम्कापाङ म़नाचि अ़ङ्का युङाङ्याङ्ओ खिम्दा म़तादिसा। 12खोन्कि ‘आम्ऩङ्मान्छुन्माङ मोचिएनान अ़क्नि खारा’नि सेङ्लावाआ अ़ङ्का ऩलोवाङ। ओ छकापाङ साकोङ्छ़ङ कामु निछाचिछाङ अ़ङ्काएनान म़खारा, खोन्कि आन्कान्का कर्नेलियस्निओ म़नाओ अ़खिम्दा वाङिन्का। 13खोन्कि खोसोओ अ़खिम्दा देत्नि अ़क्छा निनाम्हाङ काफा खाङ्मुसान्चिन्ओ खाओ अ़तुक्वादा कर्नेलियस्आ आन्कान्का खाअ़एत्तिन्का। खोन्किना मो निनाम्हाङ काफाआ, ‘योप्पादा सिमोन अ़ऩङ मुवाङाओ पत्रुस बुत्सि म़ना छुत्ता। 14खोसाआ खाना य़ङ्खान खात़एत, खोलाम्पा खाना खोन्कि झारा आम्खिम्दाओचि त़लेरिन’नि य़ङाओछाङ आन्कान्का खाअ़एत्तिन्का।
15खोन्किना अ़ङ्का नुय़ङ्खान चेप्मा पुङ्सुङ्छाङ बुया आन्कान्काएदा म़धान्ताचिन्वात्निङा खोचिएदा सेङ्लावा म़धान्तान्चिन। 16खोन्किना हाङ्पा म़य़ङाओ य़ङ अ़ङ्का मित्तुङ, ‘युहन्नाआ ना चाक्वाआ बप्तिस्मा प़चि, मेन अ़ङ्का खानानिन सेङ्लावाआ बप्तिस्मा प़नानिन।’ 17खोन्ओसा आन्कान हाङ्पा येसु ख्रिस्तएदा साकोङ्छ़ङ मुन्हिदा निनाम्हाङ्आ दियाको आसिखा आन्कान म़पुवा, मोवाको आसिखाङा निरावाचिछाङ म़प़चिनालो अ़ङ्का साङ ओ कि निनाम्हाङ्ओ अ़चुदेङ्सालाप्पादा पुक्मालोन्मा काऱ?”
18ओ य़ङ अ़एनाकि मोचि वाइवेत म़लिसा, खोन्कि निनाम्हाङ्ओ अ़चुऩङ लोङ्याङ्सा, “हान निरावाचिछाङ अ़चुहेवादाङ्का लामाकिना म़ह़ङ्ने निम्पाङ अ़वाखाम निनाम्हाङ्आ म़प़युङ्सुचि”नि म़य़ङा।
एन्तिओखिया सहरादाओ ख्रिस्तिय साम्भुङ
19स्तिफनस अ़सेराकि दुखा प़मा म़पुक्तुचिओ ग़रि साकोङ्छ़ङ कामुचि झारादात्नि म़रिसाखाराओचिआ यहुदिचिओ अ़चुरादा ओन्ङा नुय़ङ्खान खाएत्याङ्सा फोनिके, साइप्रस खोन्कि एन्तिओखियातारि म़कोला। 20मेन मोचिएदा खा-खाक्को साइप्रस खोन्कि कुरेनिदाओ साकोङ्छ़ङ कामुचि एन्तिओखियादा म़खाराकि ग्रिक्चिछाङ हाङ्पा येसुओ अ़चुनुय़ङ्खान खाम़एत्तुचि। 21खोन्कि हाङ्पाओ अ़सावा मोचिएदा याआङाओसा ब़द्धेकापाङ म़नाचि साकोङ्छ़ङ म़मुवाकि हाङ्पाएदात्नि म़लासा।
22ओ य़ङ्खान यरुसलेम्दाओ साम्भुङ्दा म़नाचिआ अ़एना, खोन्कि मोचिआ बारनाबास एन्तिओखियादा अ़छुत्ताखाइसा। 23खो मोदा तालाकि निनाम्हाङ्आ मोचि आसिखा प़चिओ खाकिना ब़द्धे अ़ऩङानुवा। खोन्कि खोसाआ झारा अ़चुमिन्माआ हाङ्पाएदा सोम्कुवा म़मुयुङ्ने निकिना मोचि झारा राक प़चि। 24बारनाबास सेङ्लावा खोन्कि साकोङ्छ़ङ्आ भेप्तुओ अ़नुवाक म़ना मुवाङा, खोन्ओसा ब़द्धेकापाङ म़नाचि हाङ्पाएदा साकोङ्छ़ङ म़मुवा।
25खोन्किना बारनाबास सावल लाम्सि तार्सस सहराह्यात्नि खारा। 26खोन्कि खोसाआ सावल धिरुकि एन्तिओखिया सहरादा लासुतारु। खोन्किना अ़क दोङ्तारि साम्भुङ्दाओ म़नाचिएनान मोचि यावायोक म़मुवायुङ्सा, खोन्कि अ़धिवाङ म़ना रुहुप्चि अ़चिन्ताचुचिन। खोन्कि एन्तिओखियादाओ म़नाचिआ काखेङ्चि बुयाओदु ख्रिस्तियान्चिनि म़लोचि।
27मोन्ग़रि खा-खाक्को निनाम्हाङ्य़ङ खाकालुचि यरुसलेम्दाङ्का एन्तिओखियायु म़धा। 28खोन्कि मोचिएदाओ अगाबस अ़ऩङ मुवाङाओ अ़क्छा पुवालोन्ताकि “झारा हेन्खामादा चाअ़त्लो स़ङ्साक्वा लुमा मुयाङ”नि सेङ्लावालाम्पा खालुसु। मो स़ङ्साक्वा रोमि तोक्पोहाङ क्लौदियस हाङ मुवाङाओ ग़रिदा छुक्ता। 29खोन्किना एन्तिओखियादाओ झारा काखेङ्चिआ अ़चुतोक्मावा यहुदियादा कायुङ साकोङ्छ़ङ कामुचि फामा निकिना छेन्बि खान्मा अ़छ़ङ अ़मुवा। 30खोन्कि मोचिआ छेन्बि अ़दुसाकि बारनाबास खोन्कि सावल्ओ अ़चुछुक्लाम्पा यरुसलेम्दाओ ताङ्पाचि म़हान्तुचि।
Actualmente seleccionado:
छाम्माय़ङ 11: bap
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© Wycliffe Bible Translators, Inc. All rights reserved.
