Salmos 5
5
1Ruzë́ naguʼ didzaʼ ruáʼa, Xan.
Buyú ca rinnëdaʼ ládxaʼa lu yöl-laʼ ruhuíʼini quiaʼ.
2Dios quiaʼ, Nu rinná beʼe nedaʼ, ruzë́ naguʼ cateʼ rinábidaʼ Liʼ
gácalenuʼ nedaʼ, naʼ güíʼilenaʼ Liʼ didzaʼ.
3Yuguʼ zila yönnuʼ chiʼa.
Zíladoʼ idxinaʼ loʼ, en cözaʼ didzaʼ ubiʼu.
4Nacuʼ Liʼ Dios bitiʼ raza ládxuʼu le cabí naca,
en bitiʼ ruʼu lataj ibigaʼ ga zuʼ nu ruáʼ döʼ.
5Bitiʼ ruʼu lataj nupa tun ba rahui ilaʼdxín loʼ,
en bitiʼ riléʼenuʼ dxiʼa nupa nácagaca xihuiʼ.
6Rusunítiuʼ dërö nupa taʼzíʼ yeʼe luzë́ʼeguequi,
en bitiʼ riléʼenuʼ dxiʼa nupa tuti bönachi, en taʼzíʼ yëʼ.
7Gaca tsuʼa nedaʼ lu yuʼu lidxuʼ, tuʼ nadxíʼideʼenuʼ nedaʼ.
Lu yöl-laʼ baʼa ladxiʼ quiaʼ tsuʼa ga naca yudoʼ láʼayi quiuʼ, en tseaj ládxaʼa Liʼ.
8Tuʼ nacuáʼ zián nupa taʼlé nedaʼ, buluíʼi nedaʼ le naca dxiʼa rë́ʼënuʼ gunaʼ, Xan.
Busëdi nedaʼ para gaca gunaʼ ca rë́ʼënuʼ Liʼ.
9Bitiʼ gaca nu tseajlë́ʼ didzaʼ tuíʼi nupa naʼ taʼlé nedaʼ.
Nácagaca xihuiʼ icja ládxiʼdoʼguequi.
Naca ruáʼagaca ca tu yeru ba nayalaj,
en lu yöl-laʼ rizíʼ yëʼ quéguequi tuíʼi yulaj didzaʼ.
10Ben léguequi xiguiaʼ, Dios.
Ben ga bitiʼ udxín xtídzaʼguequi.
Gurúʼuna léguequi tuʼ túnticaʼsö dul-laʼ,
en tuʼ taʼdáʼbagaʼ xtídzuʼu.
11Uluʼdzeja nupa tuʼzxöni ladxiʼ Liʼ.
Lu yöl-laʼ rudzeja quéguequi gúl-lagaca quiuʼ tuʼ rácalenuʼ léguequi.
Tuʼzíʼ xibóʼ nupa nadxíʼigaca Liʼ.
12Run cazuʼ Liʼ ga raca dxiʼa quégaca nupa tun ca rnna xtídzuʼu, Xan.
Lu yöl-laʼ dxiʼi ladxiʼ quiuʼ run chiʼu léguequi.
Actualmente seleccionado:
Salmos 5: zar
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2009, Wycliffe Bible Translators, Inc. All rights reserved.