Ntandiliko 8

Ntululilo wa livambwe

1Nnungu nanga panannuvalidile Nuhu na anyama vammalele va munnyitu, na va kulangwa vanavele chalumo nanang'e nsafina. Bahi Nnungu nkupungiha lipungo pachilambo chammalele, na medi nkutandilika kunywenyelekela. 2Vimbwimbwi vya medi, na medi lachikung'unika kuhaloka kumahunde nkunyalajwa. 3Medi nkuhweneha kunywa kadiki-kadiki nchilambo. Bada ya maduva myamoja na amsini, medi nkunywa namene. 4Nniduva lya kumi na saba lya mwedi wa saba, safina nkunatula kumachinga la Alalati. 5Medi nkuhweneha kupungula kadiki-kadiki, na nniduva litandi lya mwedi wa kumi, visweswe vya machinga nkutandilika kwonekana.

6Bada ya maduva alubaini, Nuhu nkuchimula lidilisha lyanakatapajije nsafina aneyo, 7nkunhumya nankonda pawelu, henga nankonda nanga panauyite, nang'e ápite chihi wanachiuluka-uluka mpaka uhiku aula medi palanywele nchilambo. 8Bahi Nuhu nkunhumya umunda pawelu uchinga apate kumala ikàva medi làninywa. 9Henga kwa kuva medi lávele bado lakànambikunywa, ayula umunda nanga panawene pachinu pakutulila, bahi nkuuya kwanga Nuhu nsafina. Nuhu nkunyoloja nkono wake nkuntwala ayula umunda nkunnyinjija nsafina. 10Nuhu nkulindilila kwa maduva lanji saba, nkunhumya kavila ayula umunda. 11Chinalyulo ayula umunda nkuuya kwanga Nuhu akuno apambìlè pakanya pake lihamba livihi lya nnandi wa nzeituni. Bahi Nuhu nkumala kuva medi lànipungula nchilambo. 12Nuhu nkulindilila kwa maduva lanji saba, nkunhumya kavila ayula umunda, mwanda anewo ayula umunda nanga panauite kavila kwanga Nuhu.

13Nuhu panavele na vyaka myasita na moja, liduva litandi lya mwedi ntandi, medi lávele lanywèlè nchilambo. Anepo Nuhu nkuchihunukula chihuniko cha safina, na palolite pawelu, nkwona medi lanywèlè mwalehu nchilambo. 14Liduva lya ishilini na saba lya mwedi wavili, chilambo chívele chiyumìlè mwalehu.

15Bahi Nnungu nkunnyaulila Nuhu kuchidoni, 16“Huma nsafina, wako pamo na n'jalo na vana vako na ajavao. 17Na vihumye pawelu viumbe vyammalele, yani vyuni na anyama na vakoko vammalele vaônga pachilambo uchinga vapate kuvelekana namene na kuyenjejeka na kuyanjala pachilambo chammalele.” 18Bahi Nuhu nkuhuma nsafina, nang'e pamo na n'jawe na vana vake na ajavao. 19Uchocho, viumbe vyammalele vivêle na umi nkuhumananga kupapatana na aina dyake, yani anyama vammalele na vakoko vammalele vaônga pachilambo na vyuni vyammalele vya pachilambo.

Nuhu ànhumija Nnungu sadaka

20Nuhu nkun'dengela Yahwe chitala, nkuntwala nnyama yumo-yumo kuhaloka nnikuwa lya kila aina ya anyama halali na kuhaloka nnikuwa lya kila aina ya vyuni halali, nkunhumija Nnungu sadaka ya kuipija moto pachitala. 21Liumba lya kunung'ila lya sadaka aneyo nkunkatapalila Yahwe, nkutangola chimunda-munda kuva, “Nikambechilani kavila chilambo ing'anya ya vanu. Nangu ǹnimala kuva mawaso lavo lànihakalanga kutandikila ujoko wavo. Mwiko nikambeuila kavila kuviondonganga viumbe vyammalele malinga chíngutendìlè. 22Bahi mahiku la kupanda na la kuvuna, na mahiku la chipwepwe na la chitukuta, na mahiku la chihuku na la chambu, chilo na muhi, anevyo vyammalele vìmbekuva chihi nkupwawa mpaka ntululilo wa chilambo.”

Actualmente seleccionado:

Ntandiliko 8: Chimakonde

Destacar

Copiar