San Lucas 10

Misión de los setenta

1Hué daj síj ni̱ nacui Señor yaꞌnij xia chiꞌ ranꞌ tsínj nicoꞌ sij. Ni̱ gaꞌníj sij hui̱j hui̱j ranꞌ ni síꞌ guita̱j dian sini ya̱n ga̱nꞌanj ni síꞌ go̱ꞌngo ni xumanꞌ daj nej. 2Ni̱ gataj sij gunun ni tsínj daj:

―Rúnꞌ huin strigo huin ni ngüi̱ achin gu̱nun si-nu̱guanꞌ Yanꞌanj. Ni̱ rúnꞌ huin tsínj aꞌninꞌ strigo huin ni tsínj aꞌmi si-nu̱guanꞌ Yanꞌanj. Nico ni̱nꞌ ruhua strigo ngaj achin ga̱ꞌninꞌ ni sij. Ngaa ni̱ ga̱chinj jniꞌyaj á re̱ꞌ rian Yanꞌanj sisi̱ ga̱ꞌnij manꞌan síꞌ ni tsínj gui̱ꞌyaj sun ga̱nꞌanj ga̱ꞌninꞌ ni sij si-strigo síꞌ. 3Ni̱ aꞌnī ga̱nꞌanj ni é re̱ꞌ rúnꞌ ga̱nꞌanj ni xachij ꞌni̱j scanij ni stuj huee. 4Ni̱ si̱ nicaj á re̱ꞌ nnánj nga̱ nnij nu̱n sanꞌanj nej, canj nej, ga̱nꞌanj án re̱ꞌ mánj. Ni̱ si̱ guiniquinꞌ a ni é re̱ꞌ ga̱ꞌmi a ni é re̱ꞌ nga̱ ni tsínj na̱riꞌ a ni é re̱ꞌ chrej nej mánj.

5’Ni̱ ngaa ga̱tu a ni é re̱ꞌ ꞌngo̱ hueꞌ, ni̱ ga̱taj sini ya̱n ni é re̱ꞌ rian ni ngüi̱ nne chruhua hueꞌ daj: “Ga̱huin dinꞌinj ruhua ni é re̱ꞌ.” Daj ga̱taj ni é re̱ꞌ. 6Ni̱ sisi̱ yuꞌuj daj nne ꞌngo̱ tsínj aꞌmi sa̱ꞌaj, ngaa ni̱ ga̱huin dinꞌinj ruhua sij da̱j huin ruhua ni é re̱ꞌ. Sani̱ sisi̱ nitaj ꞌngo̱ tsínj aꞌmi sa̱ꞌaj yuꞌuj daj, ngaa ni̱ na̱nicaj nuguanꞌ sa̱ꞌ gaꞌmi ni é re̱ꞌ rian án re̱ꞌ. 7Gu̱nan án re̱ꞌ hueꞌ nne tsínj sa̱ꞌ daj. Ni̱ xa̱ á re̱ꞌ go̱ꞌo a ni é re̱ꞌ si ri̱qui ni ngüi̱ daj. Daj si ni tsínj ꞌyaj sun, ni̱ hua si-chrej ni sij si ga̱ duꞌue ni sij. Si̱ ganꞌanj án re̱ꞌ go̱ꞌngo ni hueꞌ mánj. 8Ni̱ ngaa huaj gui̱sij a ni é re̱ꞌ ꞌngo̱ xumanꞌ rian ráj xina̱ ni ngüi̱ niꞌi ni sij a ni é re̱ꞌ, ni̱ xa̱ á re̱ꞌ si ri̱qui ni sij aj. 9Jna̱huin a ni é re̱ꞌ ni ngüi̱ aꞌnanꞌ si guima̱n ni sij yuꞌuj daj. Ni̱ ga̱taj á re̱ꞌ gu̱nun ni sij: “Hua gahuin ni̱chrunꞌ ga̱ꞌnaꞌ ni̱caj sun Yanꞌanj rian ni é re̱ꞌ.” Daj ga̱taj ni é re̱ꞌ.

10’Sani̱ sisi̱ huaj gui̱sij a ni é re̱ꞌ ꞌngo̱ xumanꞌ, ni̱ nun ráj xina̱ ni ngüi̱ niꞌyaj ni sij a ni é re̱ꞌ, ngaa ni̱ ga̱hui a ni é re̱ꞌ chruhua cayu, ni̱ ga̱taj á re̱ꞌ gu̱nun ni ngüi̱ mán xumanꞌ daj: 11“Nagunanꞌ ni únj yoꞌój yaj ma̱n xánj án re̱ꞌ guta dacój ni únj. Ni̱ daꞌngaꞌ daj ꞌyaj ni únj xiꞌí si naꞌue gu̱nun a ni é re̱ꞌ si-nu̱guanꞌ ni únj. Sani̱ gu̱nun sa̱ꞌ ni é re̱ꞌ sisi̱ hua gahuin ni̱chrunꞌ ga̱ꞌnaꞌ rian nicaj sun Yanꞌanj rian ni é re̱ꞌ.” Hué daj ga̱taj á re̱ꞌ gu̱nun ni ngüi̱ ma̱n xumanꞌ daj. 12Ataj snanꞌān gu̱nun a ni é re̱ꞌ sisi̱ güi na̱guiꞌyaj yya Yanꞌanj si-ga̱quinꞌ ni ngüi̱, ngaa ni̱ huaj ga̱huin ni ngüi̱ xumanꞌ daj castigo si gui̱ranꞌ ni ngüi̱ xi̱ꞌi guimán xumanꞌ Sodoma asi̱j ná. ―Daj gataj Jesús gunun ni tsínj nicoꞌ sij.

Ayes sobre las ciudades impenitentes

13Ngaa ni̱ gataj Jesús:

―Ducu niqui niman ni é re̱ꞌ ni ngüi̱ mán xumanꞌ Corazín nga̱ xumanꞌ Betsaida. Ni̱ nun guiꞌyā si sa̱ꞌ xumanꞌ Tiro nga̱ xumanꞌ Sidón rúnꞌ guiꞌyā xumanꞌ Corazín nga̱ xumanꞌ Betsaida. Sani̱ sisi̱ hua guiꞌyā si sa̱ꞌ daj, ni̱ hua nani ruhua ni ngüi̱ ma̱n Tiro nga̱ Sidón xiꞌí si-ga̱quinꞌ ni sij ná. Ni̱ hua gunun ni sij atsij nayaꞌ. Ni̱ hua gane ni sij rian yaj digyán ni sij sisi̱ hua yya nanica̱j ruhua ni sij xiꞌí si-ga̱quinꞌ ni sij. 14Hué dan ni̱ güi na̱guiꞌyaj yya Yanꞌanj si-ga̱quinꞌ ni ngüi̱, ngaa ni̱ huaj gui̱ranꞌ ni é re̱ꞌ castigo si gui̱ranꞌ ni ngüi̱ xi̱ꞌi guimán xumanꞌ Tiro nga̱ xumanꞌ Sidón asi̱j ná. 15Ni̱ atā gu̱nun a ni é re̱ꞌ huin a ni é re̱ꞌ ni ngüi̱ ma̱n xumanꞌ Capernaum sisi̱ nne̱ ni̱nꞌ ruhua ni é re̱ꞌ. Xiꞌí daj ani ruhua ni é re̱ꞌ sisi̱ hua ꞌueé ni̱nꞌ ruhua xánj án re̱ꞌ rúnꞌ hua xataꞌ hua xánj án re̱ꞌ, ruhua á re̱ꞌ. Sani̱ ga̱nꞌanj án re̱ꞌ rian ma̱n ni ngüi̱ gahuiꞌ, gui̱ꞌyā. ―Daj gataj Jesús.

16Ngaa ni̱ gataj Jesús gunun ni tsínj nicoꞌ sij:

―Ni ngüi̱ unun si ataj á re̱ꞌ, ni̱ hué daj gu̱nun ni sij si-nu̱guanꞌānj nej. Sani̱ sisi̱ da̱nicaj ni ngüi̱ ni é re̱ꞌ, ni̱ hué daj da̱nicaj ni sij manꞌānj nej. Ni̱ ni ngüi̱ da̱nicaj manꞌānj, ni̱ hué daj da̱nicaj ni sij Yanꞌanj nej. ―Daj gataj Jesús.

Regreso de los setenta

17Hué dan ni̱ nanica̱j hua̱ꞌnij xia chiꞌ ni tsínj ganꞌanj daj. Ni̱ hua nia̱ꞌ ruhua ni sij. Ni̱ gataj ni sij gunun Jesús:

―Señor, ni̱ daꞌ ni nane̱ xi̱ꞌi dagahuin rian ni únj ngaa aꞌmi únj si-xugüi manꞌán re̱ꞌ. ―Daj gataj ni sij.

18Ngaa ni̱ gataj Jesús:

―Da̱j rúnꞌ yoo̱ ahui duꞌui xataꞌ, ni̱ daꞌngaꞌ daj guiniꞌīnj ꞌna̱ꞌ guinij sichre Satanás xataꞌ aj. 19Hua riquīj si gahuin nucuaj á re̱ꞌ si gu̱run a ni é re̱ꞌ rian xucuáj nga̱ xiquin nej. Ni̱ si̱ guiꞌyaj xi̱ꞌi xúꞌ rian án re̱ꞌ mánj. Ni̱ ga̱ꞌue gui̱ꞌyaj gana ni é re̱ꞌ rian si-fuerza sichre Satanás. Ni̱ nitaj si gui̱ranꞌ a ni é re̱ꞌ, gui̱ꞌyaj a̱ ꞌngo̱ ni nuguanꞌ quij nan mánj. 20Ni̱ hua yya dagahuin ni nane̱ xi̱ꞌi si ataj á re̱ꞌ. Sani̱ si̱ gahuin nia̱ꞌ ruhua ni é re̱ꞌ xiꞌí si unun ni nane̱ xi̱ꞌi si ataj á re̱ꞌ mánj. Sani̱ ga̱huin nia̱ꞌ ruhua á re̱ꞌ si hua ni̱ca si-xugüi a ni é re̱ꞌ ta rian yanj xataꞌ, ꞌyaj Yanꞌanj. ―Daj gataj Jesús rian hua̱ꞌnij xia chiꞌ ni tsínj daj.

Jesús se regocija

21Hué hora daj ni̱ gahuin nia̱ꞌ ruhua Jesús, guiꞌyaj Espíritu Santo. Ni̱ gataj sij gunun Yanꞌanj:

―Aꞌmi sa̱ꞌāj rián re̱ꞌ huín re̱ꞌ chrē nne xataꞌ. Ni̱ nicáj re̱ꞌ ni̱nꞌ sun xataꞌ nga̱ rian xungüi̱ ni̱caꞌ nej. Ni̱ aꞌmi sa̱ꞌāj rián re̱ꞌ xiꞌí si digyán re̱ꞌ nuguanꞌ sa̱ꞌ nan rian ni tsínj nitaj si huin achij. Ni̱ garij hui̱ re̱ꞌ nuguanꞌ sa̱ꞌ nan rian ni tsínj niꞌi sa̱ꞌ nga̱ ni tsínj chru̱n gaꞌi̱ nuguanꞌ nej. Ni̱ daꞌngaꞌ daj garanꞌ ruhuá re̱ꞌ guiꞌyáj re̱ꞌ huín re̱ꞌ chrē nne xataꞌ. ―Daj gataj Jesús gunun Yanꞌanj.

22Ngaa ni̱ gataj Jesús gunun ni ngüi̱:

―Riqui chrē daranꞌ ni rasu̱n riānj. Ni̱ a̱ ꞌngo̱ ni ngüi̱ nun niꞌi da̱j hua manꞌānj huīnj daꞌníj Yanꞌanj. Sani̱ urin chrē niꞌi aj. Ni̱ ni̱ a̱ ꞌngo̱ ni ngüi̱ nun niꞌi da̱j hua chrē. Sani̱ urīnj niꞌi da̱j hua chrē si huīnj daꞌníj Yanꞌanj. Ni̱ u̱n ngüi̱ ri̱an ga̱ranꞌ ruhuāj digyānj, ni̱ ga̱ꞌue di̱gyānj rian ni sij da̱j hua chrē. ―Daj gataj Jesús.

23Ngaa ni̱ niꞌyaj Jesús rian urin ni tsínj nicoꞌ sij. Ni̱ gataj sij:

―Hua ꞌueé rian ni tsínj acaj cuenta da̱j hua manꞌānj da̱j rúnꞌ acaj cuenta á re̱ꞌ niꞌyaj á re̱ꞌ rian xiꞌīj. 24Daj si asi̱j ná, ni̱ gahuin nico ni tsínj gaꞌmi si-nu̱guanꞌ Yanꞌanj nga̱ nico ni rey gahuin ruhua gui̱niꞌi ni síꞌ si niꞌi ni é re̱ꞌ acuanꞌ. Sani̱ nun gui̱niꞌi ni sij. Ni̱ gahuin ruhua ni sij gu̱nun ni sij si unun ni é re̱ꞌ. Sani̱ nun gunun ni sij mánj. ―Daj gataj Jesús gunun ni sij.

El buen samaritano

25Ngaa ni̱ naxu̱man ꞌngo̱ tsínj digyán ley gaꞌmi sij nga̱ Jesús. Ni̱ gahuin ruhua sij xa̱caj sij cuenta xiꞌí si-nu̱guanꞌ Jesús. Ni̱ nachínj snanꞌanj sij Jesús. Ni̱ gataj sij:

―Maestro, da̱j gui̱ꞌyā, ni̱ ga̱ne ni̱gān nga̱ Yanꞌanj únj. ―Daj gataj sij gunun Jesús.

26Ngaa ni̱ gataj Jesús:

―Da̱j ataj si-ley Yanꞌanj ayá re̱ꞌ únj. ―Daj gataj Jesús.

27Ni̱ gataj tsínj daj:

―“Ga̱huin ꞌi̱ ruhua néꞌ ni̱ꞌyaj néꞌ Señor huin Danꞌanj néꞌ nga̱ ni̱nꞌ niman néꞌ. Ni̱ ga̱huin ꞌi̱ ruhua néꞌ ni̱ꞌyaj néꞌ Yanꞌanj nga̱ daranꞌ si-fuerza néꞌ. Ni̱ ga̱huin ꞌi̱ ruhua néꞌ ni̱ꞌyaj néꞌ Yanꞌanj nga̱ ni̱nꞌ staꞌngaꞌ néꞌ. Ni̱ da̱j rúnꞌ ꞌi̱ ruhua néꞌ niꞌyaj néꞌ manꞌan néꞌ, ni̱ daꞌngaꞌ daj ga̱huin ꞌi̱ ruhua néꞌ ni̱ꞌyaj néꞌ ni dugüiꞌ néꞌ nej.” ―Daj gataj tsínj daj gunun Jesús.

28Ngaa ni̱ gataj Jesús:

―Duguꞌna̱j huaj atáj re̱ꞌ. Sisi̱ daꞌngaꞌ daj gui̱ꞌyáj re̱ꞌ, ni̱ ga̱ne ni̱ganj re̱ꞌ nga̱ Yanꞌanj nánj. ―Daj gataj Jesús.

29Sani̱ manꞌan tsínj daj, ni̱ gahuin ruhua sij sisi̱ gui̱niꞌi Jesús sisi̱ tsínj sa̱ꞌ huin sij. Xiꞌí daj ni̱ nachínj snanꞌanj sij Jesús. Ni̱ gataj sij:

―Ni̱ u̱n tsínj huin dugüiꞌīj únj. ―Daj gataj sij.

30Ngaa ni̱ nani Jesús ꞌngo̱ cuento gunun síꞌ. Ni̱ gataj sij:

―Gahui ꞌngo̱ tsínj daj xumanꞌ Jerusalén huaj sij chrej xumanꞌ Jericó. Ni̱ gahui ni tsínj tu̱. Ni̱ gaꞌnej ni síꞌ si-ganꞌ tsínj huaj daj. Ni̱ gaꞌuiꞌ ni síꞌ sij. Ni̱ guiranꞌ xi̱ꞌi sij, guiꞌyaj ni síꞌ. Ni̱ do̱j ni̱ gahuiꞌ sij ngaa ganꞌanj ni síꞌ. 31Ngaa ni̱ huaj ꞌngo̱ chrej niquinꞌ rian ni tsínj israelita chrej daj. Sani̱ ngaa guiniꞌi sij ngaj tsínj guiranꞌ xi̱ꞌi daj, ni̱ gachin anéj sij rian síꞌ ganꞌanj sij. 32Ni̱ huaj ꞌngo̱ tsínj levita chrej daj nej. Ni̱ ngaa guiniꞌi sij tsínj daj, ni̱ gachin anéj sij ganꞌanj sij nej.

33’Sani̱ huaj ꞌngo̱ tsínj samaritano hué gue̱ chrej daj. Ni̱ tsínj ꞌna̱ꞌ anéj chrej huin síꞌ. Ni̱ ngaa guiniꞌi síꞌ tsínj ngaj daj, ni̱ gahuin ꞌi̱ ruhua síꞌ niꞌyaj síꞌ sij. 34Ni̱ gahuin ni̱chrunꞌ tsínj samaritano daj. Ni̱ guiꞌyaj go̱noꞌo sij gasiti nga̱ nnee vino tsínj guiranꞌ xi̱ꞌi daj. Ni̱ gumi sij atsij rian guiranꞌ xi̱ꞌi síꞌ. Ni̱ dagahui sij síꞌ xiráj dánj sij xucu. Ni̱ nicaj sij ganꞌanj sij mesón. Ni̱ dugumi sij manꞌan síꞌ. 35Ngaa ni̱ ango güi ngaa huin ruhua sij ga̱nꞌanj sij, ni̱ guiri sij hui̱j sanꞌanj huin denario gaꞌuiꞌ sij raꞌa tsínj du̱cua huin mesón. Ni̱ gataj sij: “Du̱gumi re̱ꞌ tsínj nan. Ni̱ sisi̱ gu̱tinꞌ re̱ꞌ huaj, ni̱ manꞌānj na̱ruꞌue rián re̱ꞌ ngaa na̱nicā ru̱huaꞌ yún ga̱ꞌnāj.” ―Daj nani Jesús cuento rian tsínj digyán ley daj.

36Ngaa ni̱ nachínj snanꞌanj Jesús síꞌ. Ni̱ gataj sij:

―Ngaa ni̱ da̱j hua yya ni hua̱ꞌnij tsínj gachin daj gahuin tsínj nicaj dugüiꞌ rian tsínj guiranꞌ xi̱ꞌi daj, ruhua manꞌán re̱ꞌ únj. ―Daj gataj Jesús.

37Ngaa ni̱ gataj tsínj daj:

―Hué tsínj gahuin ꞌi̱ ruhua niꞌya tsínj guiranꞌ xi̱ꞌi, ruhuāj aj. ―Daj gataj tsínj digyán ley daj.

Ngaa ni:

―Güi̱j re̱ꞌ ni̱ daꞌngaꞌ daj gui̱ꞌyaj manꞌán re̱ꞌ nej. ―Daj gataj Jesús.

Jesús visita a Marta y María

38Ni̱ ngaa huaj Jesús chrej, ni̱ guisíj síꞌ ꞌngo̱ xumanꞌ rian nu̱n ꞌngo̱ yunꞌunj xa̱na gu̱ꞌnaj Marta. Ni̱ gunáj Jesús ducuá únꞌ, guiꞌyaj únꞌ. 39Ni̱ hua ꞌngo̱ xugüiꞌij Marta gu̱ꞌnaj María. Ni̱ ganꞌanj ga̱ne María dacój Jesús unun únꞌ si ataj Jesús. 40Ni̱ da nahuij ruhua Marta ꞌyaj sun únꞌ. Ngaa ni̱ gahuin ni̱chrunꞌ únꞌ rian Jesús, ni̱ nachínj snanꞌanj únꞌ:

―Señor, u̱n sin huin ni̱ nitaj si nahuij ruhuá re̱ꞌ sisi̱ urīnj duna xugüiꞌīj rian daranꞌ ni rasu̱n ꞌyā nan únj. Ga̱taj re̱ꞌ gu̱nun unj si chra̱cuij unj yūnj anj. ―Daj gataj Marta gunun Jesús.

41Ngaa ni̱ gataj Jesús:

―Marta, Marta, nahuij ruhuá re̱ꞌ nga̱ daranꞌ ni sun ꞌyáj re̱ꞌ. Ni̱ naꞌue ga̱huin dinꞌinj ruhuá re̱ꞌ mánj. 42Sani̱ hua urin nuguanꞌ sa̱ꞌ huin si níꞌyanj. Ni̱ hua nacui María nuguanꞌ sa̱ꞌ daj. Ni̱ ni̱ a̱ ꞌngo̱ ni ngüi̱ si̱ gaꞌue ga̱taj sisi̱ si̱ gunun María si-nu̱guanꞌānj mánj. ―Daj gataj Jesús.

Actualmente seleccionado:

San Lucas 10: trqNT

Destacar

Copiar