Эвел 9
9
Заанурин Нюгьдихъди вуйи йикьрар
1Заанури Нюгьна дугъан баяр ужувлакк ккаъру хъа кӀуру:
– Бегьерлу ва артухъ йихьай ва жил алабцӀай. 2Гъит гучӀ ибшри, гъит гукӀниди юкӀв утӀубччвури ишбри учвхьан жилин вари гьяйванатариз, завун вари ничхрариз, жилин вари чӀивишнариз, гьюлерин вари балугъариз – мурар вари ичв хилариз тувна. 3Вари гьяйванатар учвуз хурагди, муганайиз вари чрушин тувганси, тувразачвуз. 4Аммаки ифи удудубзди йикк мипӀанай, фицики ифи уьмур ву. 5Ичв ифи удубзурикан (яни уьмур кьатӀ гъапӀурикан) Узу жаваб ккун апӀидиза: гьяйванатди удубзиш – гьяйванатдикан, адмийи чавсирин удубзиш – адмийикан. 6Шли адмийин ифи удубзиш, гъит гъадгъан ифира жарари удубзри, фицики адми Заануриз ухшар вуди дапӀнайир ву. 7Бегьерлу ва артухъ йихьай, дюнʼя алабцӀай ва артмиш йихьай.
8Заанури Нюгьдизна дугъан баяриз гьамци кӀуру:
9– Узу Йиз йикьрар учвухъди, учвлантина шлу ичв насларихъди, 10гимийиан учвухъди удучӀву вари жан алибдихъди: ничхрарихъди, мал-къарайихъди ва гьяйванатарихъди – жилиин али варибдихъди, йитӀураза. 11Узу учвухъди йикьрар йитӀураза: сарун шту вари чӀивиб пуч апӀидар. Сарун шту жил ичӀи апӀидар.
12Заанури гъапи:
– Узу гьаргандиз, насларилан наслариз учвухъди ва вари чӀивибдихъди гъийитӀу му йикьрарнан лишан магьа: 13Узу дюньяйин агьларихъди гъийитӀу йикьрарнан лишан вуди, дифариин Йиз гъяд – деккучӀимир дебккраза. 14Узу дифар жилин зиина уч гъапӀган, дифарин арайиъ деккучӀимир арайиз гъибди. 15Хъа гьадмуган Узу, учвухъдина вари чӀивибдихъди гъийитӀу Йиз йикьрар кӀваин апӀидиза – вари чӀивиб пуч апӀру шид улубчӀвувал сарун хьибдар. 16ДеккучӀимир дифарин арайиъ ачмиш хьибди – думу Узуз рябкъидизуз ва, дюньяйин вари агьларихъди гъахьи Йиз гьаргандиз вуйи йикьрар кӀваин апӀидиза.
17Заанури Нюгьдиз гъапи:
– Му жилиин яшамиш шулайи гьарсарихъди Узу гъийитӀу йикьрарнан лишан ву.
Нюгьдин баяр
18Сим, Хам ва Яфет – мурар гимийиан удучӀву Нюгьдин баяр ву. Хам Ханаандин адаш вуйи. 19Мурар шубридра Нюгьдин баяр вуйи, гьадрариланмина дюнʼяйин вари халкьар арайиз гъафну.
20Нюгьди жил тартиб апӀуру ва сарпирди тӀумутӀ кивуз хъюгъру. 21Чяхир дубгъну, пиян духьну, Нюгь гъяцӀалди чан чадрикк дахънайи. 22Хъа Ханаандин адаш вуйи Хамдиз чпин адашдин гъяцӀливал рябкъюру ва удучӀвури чан кьюрид гъардшариз ктибтуру. 23Хъа Симдина Яфетди, палтар гъадагъну, чпин гъюнариин илирчну, кьяляхъ-кьяляхъди душну, чпин адашдин гъяцӀливал ккебкру. Чпин адашдин гъяцӀливал дярябкъюз, дурар жара терефназди гъилигнийи. 24Пиянвал ктубчӀвган, Нюгь уягъ шулу ва чан бицӀину бали гъапӀубдикан аьгъю шулу. 25Хъа кӀуру:
– Ханаан балайикк ккахъри учв! Чан гъардшарин лукӀтӀан лукӀ хьуз ужур!
26Хъа кӀуру:
– Симди икрам апӀурайи Заануриз, РАББИЙИЗ, шюкюр ибшри! Хъа Ханаан гъардшариз лукӀ ишри! 27Гъит Заанури Яфетдин уьлке яркьу апӀри! Гъит Симдин чадрарикк Яфет яшамиш ишри! Хъа Ханаан гъардшариз лукӀ ишри!
28Хъа Нюгь, жил шту ккапӀбалан кьяляхъ, шубудваржна хьцӀур йисансана яшамиш шулу. 29Нюгьдин вари урчӀвудваржна хьцӀур йис шулу, хъа думу йикӀуру.
Actualmente seleccionado:
Эвел 9: ТабГК
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© Институт перевода Библии, 2010, 2013, 2016, 2018, 2023
