Эвел 11

Вавилондин чӀвурд

1Вари дюньяйиин алиб саб чӀал ва садар гафар вуйи. 2Инсанар ригъ гьудубчӀвру терефнаан Шинар уьлкейин дюзенариз гъюру ва гьадушвʼин бина ккебгъру.

3– Кирпчар апӀидихьа ва цӀигъ ургидихьа, – гъапи дурари чиб-чпиз.

Дурари гъванарин ерина кирпчар, кьуршин ерина жилин къир ишлетмиш апӀури гъаши.

4– Ихь ччвур машгьур апӀуз ва ухьу вари дюнʼя вуйибси дарарагъуз, ухьуз шагьур ва завариккна рубкьру чӀвурд дивдихьа, – гъапи дурари.

5Инсанди тикмиш апӀурайи шагьриз ва чӀвурдаз лигуз, РАББИ исина ктучӀвуру.

6– Саб халкь – саб чӀал. Сабан дурар ляхнихъ хъюгънутӀан адар, хъа гьапӀур дурари! – кӀуру РАББИЙИ. – АпӀуз ккун гъабхьиб – дурарихьан вари апӀуз хьибди! 7Дурарихьна исина ктучӀвидихьа ва, сарин тмунур гъавриъ адрахъруси, дурарин чӀал гъибикьидихьа!

8РАББИЙИ дурар, чпи диврайи шагьур ккудубкӀайиз, вари жил вуйибси гъарагънийи. 9Гьаддиз му шагьриз Вавилон («гъидикьуб») кӀури гъаши, фицики РАББИЙИ душваъ дюньяйин вари инсанарин чӀал гъибикьнийи ва гьадушвʼан дурар вари жил вуйибси рагъуз гъитнийи.

Симдилан Ибрагьимдиинакьан вуйи наслар

10Магьа Симдин тухмикан ихтилат: дюнья шту ккапӀбалан кьяляхъ кьюд йислан, Симдин варж йис вуйиган, дугъаз Арфакшад шулу. 11Арфакшад бабкан гъахьихъанмина Сим хьудварж йисансана яшамиш шулу. Дугъаз хъана баяр-шубар айи. 12Арфакшаддикан сумчӀурна хьуд йисаъди Шелах шулу. 13Шелах бабкан гъахьихъанмина Арфакшад юкьудваржна шубуд йисансана яшамиш шулу. Дугъаз хъана баяр-шубар айи. 14Шелахдин сумчӀур йис вуйиган, дугъаз Эвер кӀуру бай шулу. 15Эвер гъахьихъанмина Шелах юкьудваржна шубуд йисансана яшамиш шулу. Дугъаз хъана баяр-шубар айи. 16Эверин сумчӀурна юкьуд йис вуйиган, Пелег кӀуру бай шулу. 17Пелег гъахьихъанмина Эвер юкьудваржна сумчӀур йисансана яшамиш шулу. Дугъаз хъана баяр-шубар айи. 18Пелегдин сумчӀур йис вуйиган, дугъаз Реу кӀуру бай шулу. 19Реу гъахьихъанмина, Пелег кьюдваржна урчӀвуд йисансана яшамиш шулу. Дугъаз хъана баяр-шубар айи. 20Реуйин сумчӀурна кьюд йис вуйиган, дугъаз Серук кӀуру бай шулу. 21Серук гъахьихъанмина Реу кьюдваржна ургуд йисансана яшамиш шулу. Дугъаз хъана баяр-шубар айи. 22Серукдин сумчӀур йис вуйиган, дугъаз Нагьор кӀуру бай шулу. 23Нагьор гъахьихъанмина Серук кьюдварж йисансана яшамиш шулу. Дугъаз хъана баяр-шубар айи. 24Нагьорин къадна урчӀвуд йис вуйиган, дугъаз Терагь кӀуру бай шулу. 25Терагь гъахьихъанмина Нагьор варжна йицӀиурчӀвуд йисансана яшамиш шулу. Дугъаз хъана баяр-шубар айи. 26Терагьдин ургцӀур йис вуйиган, дугъаз Ибрам (яни Ибрагьим), Нагьор ва Аран кӀуру баяр шулу.

Терагьдикан гъахьидар

27Магьа Терагьдин тухмикан ихтилат: Терагьдиз Ибрам, Нагьор ва Аран кӀуру баяр шулу. Арандиз Лут кӀуру бай шулу. 28Хъа Аран, чпин адаш Терагь чӀивиди имиди, чав бабкан гъахьи Халдея уьлкейин Ур шагьриъ йикӀуру. 29Ибрамдина Нагьори чпиз хпар гъадагъуру. Ибрамдин хпирин ччвур Сарай вуйи. Нагьорин хпирин ччвур Милка вуйи. Милкана Иска Арандин шубар вуйи. 30Сарай бицӀидар шлур дайи.

31Терагь, чан бай Ибрам, Ибрамдин хпир Сарай, Терагьдин гъакӀи бай Арандин бай Лутра гъадагъну, Халдея уьлкейин Ур шагьриан Ханаан ругариина гъягъюз рякъюъ учӀвру. Аммаки дурар, Харрандихьна гъафиган, гьадушваъ дийигъуру. 32Кьюдваржна хьуд йис гъабхьиган, Терагь Харрандиъ йикӀуру.

Actualmente seleccionado:

Эвел 11: ТабГК

Destacar

Copiar