Гелип чыкыш 50

50‑нҗи бап

1Юсуп өзүни какасының үстүне оклап, аглап, оны огшады.

2Ол өз хызматындакы лукманлара какасының җеседини мумыяламагы буюрды. Лукманлар Ысрайылың җеседини мумыяладылар. 3Бу иш кырк гүне чекди, чүнки мумыяламак шонча вагты талап эдйәрди. Мүсүрлилер етмиш гүнләп Ысрайылың ясыны тутдулар.

4-5Яс гүнлери геченден соң, Юсуп фараоның көшгүндәкилере шейле дийди: «Эгер мен сизиң гөвнүңизден туран болсам, онда фараона шейле дийиң: „Какам өлмезинден өң: ‘Мениң санаглым долуп баряр. Мени Кенганда өзүм үчин газан габрымда җайлаң’ дийип ант ичирди. Инди, гой, ол маңа гидип, какамы җайламага ругсат берсин; онсоң мен ызыма доланарын“». 6Фараон: «Гит-де, какаңы ант ичишиң ялы җайла» дийди.

7Шейдип, Юсуп какасының җеседини алып ёла дүшди. Фараоның әхли эмелдарлары, көшгүң ве тутуш Мүсүриң белент мертебели адамлары, 8Юсубың тутуш хоҗалыгы, онуң доганларыдыр какасының хоҗалыгындакыларың хеммеси-де онуң янындадылар. Гошен велаятында диңе чагалар, овнуклы-ирили маллар галды. 9Сөвеш арабалары ве оларың үстүндәки эсгерлер-де Юсуп билен гитди. Бу әгирт улы мәхелледи. 10Иордан дерясының гүндогарындакы Атат харманы диен ере етенлеринде, олар сес эдип аглашдылар. Юсуп какасы үчин еди гүнләп яс тутды. 11Атат харманы диен ердәки ясы гөрүп, Кенганың ерли илаты: «Мүсүрлилериң яс тутушы, гөр, нәхили агыр!» дийишдилер. Шоңа гөрә-де, Иордан дерясының гүндогар тарапындакы бу ере Абелмисрайым#50:11 Абелмисрайым – бу сөз мүсүрлилериң ясы диймеги аңладяр. диен ат берилди. 12Шейдип, Ысрайылың огуллары какаларының берен табшырыгыны айдышы ялы берҗай этдилер. 13Олар Ысрайылы Кенган топрагына гетирип, Мамрәниң гүндогарындакы Макпела мүлкүндәки говакда җайладылар. Ыбрайым бу говагы гонамчылык этмек үчин ери билен биле Эпрон хетден сатын алыпды. 14Какасыны җайландан соң, Юсуп доганлары хем-де олар билен какасыны җайламага геленлериң хеммеси билен билеликде Мүсүре гайдып гелди.

Юсуп доганларына гөвүнлик берйәр

15Какалары өленден соң, Юсубың доганлары «Эден яманлыгымыз үчин Юсуп кине саклап, бизден ар алса нәме?» дийип гүман этдилер. 16-17Шунлукда, олар Юсуба: «Какамыз бизе өлмезиниң өң янында Юсуба шейле дийиң: „Доганларыңың җенаят ишини ве эден гүнәлерини багышла, чүнки олар саңа яманлык этдилер“ дийип табшырды. Инди өз атаңың Худайының гуллары болан бизиң гүнәмизи өт!» диен хабар ёлладылар. Бу хабары эшидип, Юсуп аглады. 18Доганларының өзлери-де гелип, Юсубың өңүнде йүзин дүшүп: «Биз сениң гулларыңдырыс» дийдилер. 19Юсуп олара: «Горкмаң, мен Худаймы нәме?! 20Сиз маңа яманлык этмек иследиңиз, эмма гөршүңиз ялы, биртопар адамлары дири галдырмак үчин Худай ол яманлыгы ягшылыга өвүрди. 21Сиз горкмаң. Мен сизиң-де, сизиң чагаларыңызың-да аладасыны эдерин» дийип, Юсуп олара мәхирли сөзлер билен гөвүнлик берди.

Юсубың өлүми

22Шейдип, Юсуп какасының хоҗалыгы билен биле Мүсүрде орнашды. Ол йүз он йыл яшады. 23Юсуп Эфрайымың үсти билен човлуклар гөрди. Манашаның оглы Макырың чагалары Юсубың чагалары хасапланды. 24Юсуп доганларына: «Мениң санаглым долуп баряр, йөне Худай хөкман сизиң дадыңыза етишер. Худай сизи Мүсүрден чыкарып, Ыбрайыма, Ысхага ве Якуба вада эден топрагына элтер» дийди. 25Соңра Юсуп Ысрайылың огулларына ант ичирип, шейле дийди: «Худай сизе назар саланда, сиз мениң сүңклерими-де өз яныңыз билен алып гидиң». 26Шейдип, Юсуп йүз он яшында дүнйәден өтди. Онуң җеседи Мүсүрде мумыяланып, табыда салнып гоюлды.

Actualmente seleccionado:

Гелип чыкыш 50: TukCyr16

Destacar

Copiar