Tourat 1: Foeda Nama 9
9
Hozrot Nuh (a:)or loge oada
1Allae Nuh ar tan fuaintore borkot dia ḳoila, “Tumitain folala oia baṛia duniai bori zao. 2Duniair zanuar, asmanor faki, maṭir maze buke solra zandar ar doriar mas, hoḳole-u tumrare ḍor-boy ḳori solbo. Itare tumrar ato deoa oilo. 3Zela tumrare ḳetor fol-foshol ar tori-torḳari dislam, oula oḳon zita zandar hoḳolre-o tumrar ḳanir lagi dilam. 4Ḳali lou shoho gust tumra ḳaio na, lou oilogi zan. 5Ḳeu zudi manshore kun ḳore te ami oboshsho-u tar kunor bodla loimu. He zanuar ouk ba manush ouk, manshor zan ze ney, tar zan-o deon lagbo. 6Manshor lou ze bar ḳore, manshe-o tar lou bar ḳorbo, ḳaron Allae manshore nizor surote banaisoin. 7Tumitain besh ḳori folala oia baṛo ar duniait sitria zao.”
8Bade Allae Nuh ar tan fuaintore ḳoila, 9“Huno, ami zoban diar, tumra ar tumrar bador hoḳol manshore, 10ar faki, fala heman ar duniair zoto zanuar tumrar loge zaz taki bar oise, tarare-o. 11Zobanṭa oilo, banor fani dia ar kunu shomoy-u hokkol zandarre mara oito nae, ar tamam duniai saf ḳorar lagi ila kunu ban-o oito nae.” 12Allae aro ḳoila, “Ze zoban ami tumrare ar tumrar logor zandar oḳolre dilam, ikṭa kiamot forzonto boail roibo. 13Ar megor ḳalnir maze amar rongdenu dilam, ikṭa oilo duniait amar zobanor nishana. 14Zebla ami duniair ufre ḳalni dimu, i shomoy ou rongdenu deḳbae. 15Ar ou shomoy-u ami tumrar ar hoḳol zandaror loge amar zobanor ḳota iad ḳormu. Ar kunu shomoy-u boinna oia hoḳol zandarre fani dia doia nito nae. 16Ḳalnir maze zebla hi rongdenu deḳa zaibo ou shomoy ami duniair hoḳol zandaror loge amar i hameshakur zobanor ḳota iad ḳormu.” 17Heshe Allae Nuhre ḳoila, “Duniair hoḳol zandaror loge ami ze zoban disi, ikṭa oilo tar nishana.”
Hozrot Nuh (a:) ar tan fuain
18Zaz tone Nuhor ze fuain bar oisla, tarar nam oilo Sham, Ham ar Iafet. Ou Ham oilo Kenanor baf. 19Nuhor ou tino fuar ḳandan oḳol hara duniait sitri gela.
20Nuhe ḳet-ḳamar shuru ḳoria eḳ angur-ḳet ḳorla. 21Ar anguror shorab ḳaia ṭal oia tambur bitre udam oia foṛi roila. 22Kenanor baf Hame aia tar bafor ou hal dekia bare gia tar duio bair gese ḳoilo. 23Oile Sham ar Iafete ḳando ḳori ekḳan ḳafoṛ loia fise aṭia bafre ou ḳafoṛdi guria dila, tarar souk ulṭabae taḳae bafre be-abru halote deḳla na. 24Nisha ḳomi zaoar bade Nuhe tan fuar ḳanḍo hunia 25ḳoila, “Kenanor ufre lannot foṛouk, he tar baiaintor gese gulamor gulam oibo.” 26Tain aro ḳoila, “Hoḳol tarif Shamor Mabud Allar, Kenan Shamor gulam ouk. 27Allae Iafetre boutta deukka, he Shamor tambut taḳouk, ar Kenan tar gulam ouk.”
28Banor bade Nuh aro shaṛe tin-sho boros basla. 29Muṭ shaṛe noy-sho boros boyosho tain mara gela.
Actualmente seleccionado:
Tourat 1: Foeda Nama 9: sylL
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© Ahle Kitab Society. All rights reserved.
