Shilipu 3

Pwəə nə́ ń byili bə̀ wɔ́ ń gə zhí Yezu Kristə ne è ce n kə́ n bə dóó zhe yé

1Da-byâ, nyǐnə kɔn dɛ̀bɛ́ à la ába byilu èlâsɛ̃´ mɔ́: cenə á wun yə̀ nyɛ̀n á gə́ zù Cinu mú yilə. À tʼâ lyɛ̀ɛ̀ gaga ǹdʼába rə̀myɛ́ byilu yé. Rə̀myɛ́ wɔ̌ rə̀ bʼa sɛ̃ ába mùnì ga á zhì kẽkẽ.

2Dɛ̃̌na á cìn ǹdə́ tùntùnnə̀ námməlwâlsɛ́. Bə̀ wɔ́ kǔlsi. Wɔ́ bə̀myɛ́ bə̀ nʼê cìrh ába bə̀ ce né, á ce bə̀ nʼê gòm ába, e jʼà wɔ́ kɔn dɛ̀bɛ́ rə̀ bə kùr zhe yé. 3Wɔ́ nə́myɛ̌ nə́ wɔ́ góm mó páá mɔ́ cìnə́, bə̀ nə́myɛ̌ nʼé tó Yi Eshirhə y dɛnnɛ nə́ cèrhé re. Nə́ yə̀ nə́ cìn nì yẽ̌ nə́ ce wẽ̀ dɛ̀bɛ́ numbyínsi nʼê wɛ̀rhɛ́ jɔ̃̀ w yé. Nə́ kwè nə́ cìn nə́ ce Yezu Kristə jɔ̃̀ wà. 4Àmyɛ jʼà yʼà wɔ̌ à mʼa kwè à cìn a ce wẽ̀ dɛ́ rə̀myɛ́ mɔ́ jɔ̃̀ wà. Sə lò gə nə́ ń bùl bə̀ ń nɔ ń cìn ń gə́ co ń cìn wẽ̀ dé rə̀myɛ́ jɔ̃̀ w mɔ́ yilə, àmyɛ́ yʼà wɔ̌ à bùl rə̀myɛ́ du, 5bə̀ wɔ́ Esərayɛl lyì bí dwí rí wẽ́ bə̀ lùl nè né; à dwã nyàlpyɛ̀ yù w bə̀ gõ nè; à wɔ́ Bɛ̃zhamɛ kwálá y lò; à wɔ́ Ebərə páá. È gə wɔ́ Muyiisi nyə́ né zõ yilə, à yʼà wɔ́ Farɛzhɛ̃ɛ̃. 6À yʼà nʼâ zwẽ ne náàcɛ̀nɛ́; rə̀myɛ́ ce, à yʼà nʼâ nwɛ̀nɛ̀ Kristə-lyì bí. Nyə́ né zõ gə yʼà nʼê ce lò cẽ dóó zal Yi yé né, à yʼà bə dóó dwí-byǐ zhe yé.

7À yʼà nʼâ nyǐ wẽ̀ dé rə̀myɛ́ gakó ǹdə kɔn dɛ̀bɛ́ rə̀ zhe kùr ta. Sə èlâsɛ̃´, à gə́ zù Kristə mó ce, à nʼá nyǐ ri ǹdə kɔn nánfò ta. 8À gə́ lwar à Cinu Yezu Kristə pár mɔ́ wɔ́ kɔn dɛ̀bɛ́ rə̀ zhe kùr du kɔn gakó; rə̀myɛ́ ce à nʼâ nyǐ kɔn dɛ̀bɛ́ gakó à zhe mó ǹdə kɔn nánfò ta. Wɔ́ Kristə yil à yẽ̌ kɔn gakó ne, à nʼâ nyǐ ri ǹdə pùlú yó ywə̀ə̀rhè ta, mùnì ga n yə̀ kɔn dɛ̀bɛ́ rə̀ zhe kùr à yilə, 9sə n cìní ni námpúm. À kʼâ tʼâ bùl bə̀ wɔ́ Muyiisi nyə́ zõ mó è ce à kʼâ bə dóó zhe Yi yé né yé. Wɔ́ Kristə ne zhú mú è ce. Sə rə̀myɛ́ wɔ́ Yi rə̀ nʼê pɛ rɛ byɛ̀bɛ́ bə̀ zù Kristə mó ne. 10Kɔn dɛ̀bɛ́ à nʼâ yàlá, wɔ́ a lwar Kristə párá, sʼa lwar jàn dɛ́ tɛ̀bɛ́ rə̀ ce n bwìrhì mú myɛ gə́ wɔ́ nɛ́, sʼa tó mo a nwɛ̀nɛ̀, a tó mo a cì. 11Èta, à nʼâ bùl bə̀ Yi mʼa bwìrhì àmyɛ a dù cùùrì wẽ́.

12Zhə̀nà, à tʼâ yâl a byili bʼà gwẽ̌ nɔ dɛ̀bɛ́ à nʼâ pyà mɔ́ yé; à cɛ̀nɛ̀ rɛ́ gwẽ̌ yə̀ pyìrh kókó yé. Sə à nʼâ ce jàn nɛ́ mùnì ga a zə rə̀myɛ́ gakó à jɔ̃̀ wà, ǹdə Yezu Kristə gə́ zhe àmyɛ́ ń jɔ̃̀ w nɛ́.

13Da-byâ, à tʼâ bùl bʼà gwẽ̌ nɔ rɛ yé. Sə kɔn dɛ́ dɛ̀bɛ́ à nʼâ wɛ̀rhɛ́ mɔ́, wɔ́ a swě tɛ̀bɛ́ rə̀ lyɛ̃ mɔ́, sʼa ce jàn nɛ́ a nə tɛ̀bɛ́ rə̀ ŋwɛ́nɛ́ yé né mó. 14À nʼâ ce jàn nɛ́ ǹdə́ ywə́l, mùnì ga a nə kwândɛ́ tɛ̀bɛ́ Yi nʼê byẽ̀ nə́ba rə̀ la pɔ dɛ̃̌ Arəzana w Yezu Kristə jàn yil mó.

15Nə́myɛ̌ byɛ̀bɛ́ gakó nə́ zù Yezu Kristə kɔn dɛnɛ mɔ́, wɔ́ bùlə̀ né nə̀myɛ́ nə̀ mə̂ sə nə yə̀ nə́ wẽ́. Sə ámyɛ̌ jàlà gə nʼá bùl kɔn dõ, Yi bʼa pul á surhə. 16Sə sɔ́má y kɛ̀bɛ́ nə́ gakó kwè kɔn mʼe yí zà mɔ́, bànà nə́ jʼá cə̀ə̀lè nə́ yə̀ èmyɛ́ yó.

17Da-byâ, wɛ̀rhɛ́na ǹdə àmyɛ́ ta; nyǐnə lyì bí byɛ̀bɛ́ bə̀ tùntwə̃̀ə̃̀ né nʼê tó kɔn dɛ̀bɛ́ nə́ cèrhè ába mó ne mó, sʼá kwè bə̀myɛ́ nà yá. 18À yʼà jɛ̀rɛ̀ a byili ába twər nánzhəzhɔ̌, sə à kʼâ nʼâ bwérhé à byili ába ǹdə́ yə́-nàná, bə̀ lyì nánzhəzhɔ̌ ŋwɛ́nɛ́ bə̀ tùntwə̃̀ə̃̀ né nʼê byili bə̀ bə̀ wɔ́ Yezu Kristə də̀-jɔrhɔ́ w zwə̀. 19Sə bə̀ yésé gə́ zâ mə̀gã̌ mɔ́, wɔ́ jó jàà w bə̀ la nɛ́, bə̀ bə̀myɛ́ wɔ́ bə̀ pwǐsí sə̀ wɔ́ bə̀ yi. Kɔn dɛ̀bɛ́ rə̀ wɔ́ cìzhìl kɔn mɔ́, wɔ́ rə̀myɛ́ bə̀ mʼê yàl bə̀ wu-nyɔ̃̀ kɔna. Bə̀ tʼâ bùl kaka dõ yò, e súlí lũ w kɔ̀bɔ́ nyə̀ná nɛ́ dúdú ni yé.

20Sə è gə wɔ́ nə́myɛ̌ yilə, wɔ́ Arəzana è wɔ́ nə́ da-dǒ. Wɔ́ gàà nə́ rʼé dɛ̃̀ nə́ Cinu Yezu Kristə ǹdə́ nə́ wun gakó ń la nɛ́ shú n bə̀ n zwẽ nə́ba. 21Ń mà n zə jàn dɛ́ tɛ̀bɛ́ rə̀ ce ń wɔ̌ ń mà n ce kɔn gakó shɛ̀nɛ́ ń nyí ni mú, n mə n ce nə́ yala nɛ́ nyɛ̀bɛ́ nə̀ bə kùr zhe mó jǐrh ǹdə ń nyə̀ná nɛ́ nə̀ zhe zùwə́ mó ta.

Actualmente seleccionado:

Shilipu 3: lee

Destacar

Copiar