Kɔlɔɔsɛ 1

Pwəə nə́ ń ce Kɔlɔɔsɛ Kristə-lyì bí

1-2Àmyɛ́ Pwəə, Yi ce à wɔ́ Yezu Kristə tùntúm ǹdə rə̀ gə́ nʼê yâl nɛ́. Àmyɛ́ ǹdə́ nə́ da-byǐ Timote nʼé kɛ̃ sɛ́bɛ́ rɛ́ tɛ̀bɛ́ nə́ la ámyɛ̌ byɛ̀bɛ́ á wɔ́ nə́ da-byâ á ŋwɛ́nɛ́ Kɔlɔɔsɛ nɛ́, á zù Kristə á jǐrh Yi lyì mú ni pɔ. Nə́ Da Yi mà n cĩ́ bwəl á yó, sə n pə ába yə̀-zùlə́!

Pwəə nə́ ń ce Yi nə̀bán Kɔlɔɔsɛ Kristə-lyì bí yilə

3Nə́ gə nʼé lwə̀l Yi, nə́ Cinu Yezu Kristə Da mɔ́, á yil gakó, nə́ rʼé ce ń nə̀báná. 4Nə́ nyɛ̀ɛ̀ bʼâ zhí Yezu Kristə ne, á jʼâ só byɛ̀bɛ́ gakó bə̀ wɔ́ Yi lyì mú. 5Á nʼá dɛ̃̀ kɔn dɛ́ dɛ̀bɛ́ Yi tɛnɛ rə cĩ́ Arəzana w á yil mó, sə wɔ́ yò-ècɔ̀nɔ̀ nyí rí rə̀ wɔ́ zhə̀n zɔ̀mɛ̀ rɛ́ bə̀ bwə̀l bə byili ába mó rə̀ ce á lwar rə̀myɛ́. 6Bə̀ nʼê bwə̀l yò-ècɔ̀nɔ̀ nyí rí rə̀myɛ́ mɔ́ lũ w púlə́púlə́ wə, sə byɛ̀bɛ́ bə̀ nʼê zwẽ de mó jʼâ nʼê súlí twéé twéé. Wɔ́ èta kɔn wɔ́ nɛ́ ámyɛ sõ, á gə́ ju kùr á nyɛ̀ɛ̀ Yi sónó zɔ̀mɛ̀ rɛ́, á sú rə̀ kùr zhə̀n zhə̀n mɔ́ yi ní ga. 7Wɔ́ nə́ tó-dõ nántwə̂ Epafəraasɛ ń byili ába rə̀myɛ́. Wɔ́ ńmyɛ̌ ń nə́ ń twĩ̀ Kristə tum dí ǹdə kɔn gə́ mə̂ nɛ́ á sõ nə́ yilə. 8Ńmyɛ̌ ń byili nə́ba sónó w Eshirhə náàcɛ̀nɛ́ co á wun ní wẽ́ mó yò.

Pwəə nə́ ń ce Yi Kɔlɔɔsɛ Kristə-lyì bí yilə

9Wɔ́ rə̀myɛ́ è ce, nə́ gə́ nyɛ̀ɛ̀ á Yi-ni-zhú mú yò w yi ní ga, nə́ rʼé ce Yi á yil twéé gakó. Nə́ rʼé lwə̀l lè bə̀ rə̀ pə ába lárma ǹdə́ surhə nyɛ̀bɛ́ gakó nə̀ shí rə̀ cìcì Eshirhə y sõ mó, mùnì ga á ŋwɛ̀nɛ́ á lwar rə̀ pùbùlə̀ né námpúm. 10Èta, á tùntwə̃̀ə̃̀ né bʼa tó Cinu pùbùlə̀ nè, sə á bʼâ ŋwɛ̀nɛ́ á wɛ̀rhɛ́ kɔn dɛ̀bɛ́ ń nə́ ń yàlá, sʼá wɛ̀rhɛ́ tùm-ècɛ̀nà dwí gakó, á kwɛrhɛ á lwar Yi párá. 11Nə́ rʼé lwə̀l Yi mùnì rə̀ jàn dɛ́ rə̀ du kɔn gakó mó pə ába jàn, mùnì ga á ŋwɛ̀nɛ́ á zhì ǹdə́ wu-jɔ̀, sʼá zə á cìnə̀. 12Cenə nə́ Da Yi nə̀bán ǹdə́ wu-nyɔ̃̀, bə̀ ń ce ámyɛ wɔ̌ á nɛ cəl kɔn dɛ́ tɛ̀bɛ́ ń tɛnɛ n cĩ́ ń lyì bí ni pwẽ̀ jàà w mɔ́ wẽ́. 13Ń vùr nə́ba cə-byín wə, cə-byín dí kʼê bə ŋwɔ̀nɔ́ zhe nə́ yó yé, ń ce nə́ zù ń Byì-sónó w tənà y wa. 14Wɔ́ Byǐ mú ńmyɛ̌ dɛnnɛ nə́ tó né nə́ nə nə́ cìnə̀, nə́ nə nə́ yə̀-bəlwàálɛ́ sǔbri.

Wɔ́ Yezu Kristə ń cǐ kɔn gakó

15Lò lò wàr Yi ń la nɔ ǹdə́ ń yírhə́ yé. Wɔ́ Kristə ń nə́ ń byili rə̀ gə́ wɔ́ nɛ́ ma cìcì. Ńmyɛ̌ ń wɔ́ Byì-cɛ, ń cǐ dɛ̀bɛ́ gakó Yi wɛ̀rhɛ́ mɔ́, 16bə̀ wɔ́ ńmyɛ̌ dɛnnɛ Yi tó né rə wɛ̀rhɛ́ kɔn dɛ̀bɛ́ gakó rə̀ ŋwɛ́nɛ́ dɛ̃̌ ǹdə́ cɛ yó, tɛ̀bɛ́ yírhə́ wɔ̌ nə̀ nɛ, ǹdə́ tɛ̀bɛ́ yírhə́ wàr nə̀ nɛ, jàn cìnə́ byɛ̀bɛ́ bə̀ ŋwɛ́nɛ́ dɛ̃̌ bə̀ zhe ŋwɔ̀nɔ́, bə̀ nʼê jí pyɛ̀lɛ̀ mɔ́ dwí gakó. Wɔ́ ńmyɛ̌ dɛnnɛ Yi tó né rə wɛ̀rhɛ́ kɔn gakó, e jʼà wɔ́ ńmyɛ̌ yil Yi wɛ̀rhɛ́ rɛ. 17Ń jɛ̀rɛ̀ kɔn gakó ń ŋwɛ́nɛ́. Wɔ́ ńmyɛ̌ jàn yil kɔn gakó zhǐ rə̀ jàà wà. 18Wɔ́ ńmyɛ̌ ń wɔ́ yala nɛ́ yó wə́. Yala nɛ́ nə̀myɛ́ mɔ́ wɔ́ ń lyì bí gùlú wə́. Wɔ́ ńmyɛ̌ ń wɔ́ kɔn gakó kùr-jirə́. Byɛ̀bɛ́ bə̀ cù mú wẽ́, wɔ́ ńmyɛ̌ ń yàl nã́yə́ə́ mó ń bwìrhì, mùnì ga n yə̀ kɔn gakó yé né. 19Kɔn yàl Yi pùbùlə̀ bə̀ rə̀myɛ́ cìcì yál rə̀ Byǐ mú wẽ́ námpúm. 20Bə̀ pəpa rə̀ Byǐ mú də̀-jɔrhɔ́ yó ń jal mɔ́ ló tɛ̃´. Kɔn yàl rə̀ pùbùlə̀ bə̀ rə̀ tó ń jal mɔ́ mə̀myɛ́ dɛnnɛ rə ce yə̀-zùlə́ yə̀ nɛ́. Èta, rə̀ tó ńmyɛ̌ dɛnnɛ rə kwɛrhɛ kɔn dɛ̀bɛ́ gakó rə̀ ŋwɛ́nɛ́ cɛ yó, ǹdə́ tɛ̀bɛ́ gakó rə̀ ŋwɛ́nɛ́ dɛ̃̌ Arəzana w mɔ́ yò ǹdə́ rə̀ cìcì.

21Shãã ga, ámyɛ yʼâ nyɛ ǹdə́ Yi; á bùlə̀ námməlwâlsɛ́ ǹdʼá tumə námməlwâlsɛ́ ce á yʼâ wɔ́ rə̀ zwə̀. 22Sə Yi Byǐ mú jǐrh numbyíní n cì. Èlâsɛ̃´, Yi tó ń cu mú dɛnnɛ rə kʼa kwɛrhɛ á yò ǹdə́ rə̀ cìcì, mùnì á yə̀ rə̀myɛ́ lyì, á yə̀ wárhgáá, dóó bə̀kʼa yə̀ á yó w yé, á bʼá ŋwɛ̀nɛ́ á zhì rə̀ yé né. 23Sə á mə̂ sʼá pə á nà tɛ̃´ á zhì kẽkẽ á Yi-ni-zhú mú wẽ́. Á bə̀kʼá yẽ̌ yò-ècɔ̀nɔ̀ nyí rí bə̀ bwə̀l bə byili ába mó ne yé, bə̀ wɔ́ rə̀myɛ́ rə̀ ce nə́ rʼé dɛ̃̀ kɔn dɛ̀bɛ́ Yi la nə́ba pɔ mɔ́. Bə̀ bwə̀l yò-ècɔ̀nɔ̀ nyí rí rə̀myɛ́ mɔ́ bə byili lũ w púlə́púlə́ ne, sə àmyɛ́ wɔ́ rə̀myɛ́ yil à nʼâ twĩ̀.

Pwəə nə́ ń nwɛ̀nɛ̀ Kristə-lyì gùlú w yilə

24À wu nyɛ̀ èlâsɛ̃´ à gə́ nʼâ nwɛ̀nɛ̀ á yil mó. Wɔ́ nɔ̀nɔ̀ w kɔ̀bɔ́ Kristə nwɛ̀nɛ̀ ń yala nɛ́ yil mó àmyɛ nʼâ tó à nwɛ̀nɛ̀. Yala nɛ́ nə̀myɛ́ wɔ́ ń gùlú wə́. 25Yi twĩ̀ nì bʼà bwə̂l rə̀ zɔ̀mɛ̀ rɛ́ a byili lyì bí ni. Wɔ́ rə̀myɛ́ è ce à jǐrh gùlú w tùntùnnə̀, mùnì a bwə̀l lè námpúm a byili ába. 26Lũ w kùr-ju yi ní ga, Yi yʼà shèè rè lyì dwí gakó yé né. Sə èlâsɛ̃´, rə̀ byili ri rə̀ lyì bí ni pamparɛ̃ɛ̃. 27Zɔ̀mɛ̀ rɛ́ rə̀myɛ́ mɔ́ zhe kùr dɛ̃´dɛ̃´. Wɔ́ rə̀myɛ́ è ce Yi byili rə̀myɛ́ ǹdə́ rə̀ zùwə́ y rə̀ lyì bí ni nunə dwí gakó yilə. Zɔ̀mɛ̀ rɛ́ rə̀myɛ́ nʼê byili bə̀ Kristə ŋwɛ́nɛ́ á wẽ́; wɔ́ ńmyɛ̌ ń ce á nʼá dɛ̃̀ cəl Yi zùwə́ y wẽ́. 28Wɔ́ Kristə mó ńmyɛ̌ mɔ́ yò w nə́ rʼé bwə̀l nə́ byili lyì bí gakó ne. Nə́ rʼé cící bi, nə́ rʼé byili bi ǹdə́ surhə nyɛ̀bɛ́ gakó nə́ zhe, mùnì ga nə́ sɛ̃ bɛ bə ŋwɛ̀nɛ́ bə yə̀ náàcɛ̀nà Yi yé né. 29Wɔ́ rə̀myɛ́ yil à nʼâ ce jàn nɛ́ à twĩ̀ ǹdə́ jàn dɛ́ nánfɔ̀lɔ̀ w Kristə pɔ nɛ mɔ́.

Actualmente seleccionado:

Kɔlɔɔsɛ 1: lee

Destacar

Copiar