1 Tesəloniki 5
5
1Da-byâ, kɔn də̀ nyɔ́ɔ́ bə̀ nə́ kɛ̃ sɛ́bɛ́ nə́ mʼé byili ába yi rí ǹdə́ dɛ̃ rɛ́ tɛ̀bɛ́ Cinu bàn mɔ́ yé. 2Á cìcì mú yě pamparɛ̃ɛ̃ bə̀ dɛ̃ rɛ́ tɛ̀bɛ́ ń bàn mɔ́, ń mà n jàr nə́ba ǹdə ŋwɔ̀l-bal gə́ ya n bə̀ cəcɛ̃ nɛ nɛ́. 3Lwarna bə̀ lyì bí gə tú bə̀ nʼê wə̀l bə̀ èlâsɛ̃´ myɛ̌, yə̀-zùlə́ ŋwɛ́nɛ́, bə̀ kaka ywẽ bə bɛ zhe, wɔ́ rə̀myɛ́ yi ní cìcì zwini bʼa zə bɛ ǹdə kɛ̃ pwǐ gə́ yʼa yì ní. Bə̀ tʼâ la lú yé.
4Da-byâ, ámyɛ̌ tɛ̀nɛ́ cə-byín wẽ́ sə dɛ̃ rɛ́ rə̀myɛ́ bʼe jàr ába ǹdə ŋwɔ̀l-bal ta yé. 5Á gakó wɔ́ pwẽ̀ ǹdə́ nə̀nyɔ́nɔ́ lyì. Nə́ də̀ cəcɛ̃ ráá cə-byín lyì yé. 6Rə̀myɛ́ ce, nə́ bə mə̂ sə nə́ dɛ̀ɛ̀ ǹdə lyì bí dwã bɛ́ ta yé. Nə́ mə̂ sə nə́ zə nə́ yírhə́, sə nə́ zə nə́ cìn cɛ̀nɛ̀. 7Lyì bí byɛ̀bɛ́ bə̀ nʼê dɛ̀ɛ̀ mɔ́, wɔ́ cəcɛ̃ nɛ bə̀ nʼê dɛ̀ɛ̀. Byɛ̀bɛ́ bə̀ nʼê nywɛ̀ sɛ̃´ bə̀ tutwi tɛ̃´ mɔ́, wɔ́ cəcɛ̃ nɛ bə̀ nʼê nywɛ̀ mɔ̀. 8Sə nə́myɛ̌ wɔ́ pwẽ̀ lyì; nə́ mə̂ sə nə́ zə nə́ cìnə̀. Nə́ mə̂ sə nə́ zə nə́ Yi-ni-zhú mú ǹdə́ nə́ sónó w rə yə̀ kɔn dɛ̀bɛ́ nə́ la bʼé cə̀r nə́ cìcì yé ne búlə́ jàà wà. Nə́ rʼé dɛ̃̀ nə́ vwârh mɔ́. Bànà nə́ zə rə̀myɛ́ rə yə̀ ǹdə shə̀dáá cɔ̀bɔ́ yə́-pú ta nə́ pú.
9Yi yə̀ nə́ba byẽ̀ rə̀ la còrhò-tum pɔ yé. Rə̀ byẽ̀ nə́ba mùnì ga nə́ tó nə́ Cinu Yezu Kristə dɛnnɛ nə́ nə vwârh. 10Wɔ́ nə́myɛ̌ yil ń cùwə̀, mùnì ga, nə́ yírhə́ gə ŋwɛ́nɛ́, ráá nə́ gə cù myɛ, sə nə́ tó mo nə́ zù nyǔ mə̀ tʼâ la zhɔ̌ wẽ́. 11Rə̀myɛ́ ce, zəna dwã wun ni, sʼá jʼá nʼá sɛ̃ dwã nɛ ǹdə́ cícú ǹdə á gə́ nʼá wɛ̀rhɛ́ nɛ́ dwə́l ga mɔ́.
Pwəə nə́ ń cící Tesəloniki Kristə-lyì bí
12Da-byâ, nə́ rʼé lwə̀l ába bə̀ nyámna byɛ̀bɛ́ bə̀ ŋwɛ́nɛ́ á yé né bə̀ nʼê twĩ̀ mú, bə̀ wɔ́ Cinu ń cír be bə̀ bə̀ yál á yé né bə cící ába. 13Nyámna bɛ, sʼá swéné be dɛ̃´dɛ̃´ tum dí tɛ̀bɛ́ bə nʼê twĩ̀ mú yilə. Jǒmnə ǹdə́ dwã ǹdə́ yə̀-zùlə́.
14Da-byâ, nə́ rʼé lwə̀l ába: cícínə byɛ̀bɛ́ bə̀ nʼê wɛ̀rhɛ́ yààyàà mɔ́, sʼá zə byɛ̀bɛ́ wu-zhìlù zhe mó wun ni. Sɛ̃na byɛ̀bɛ́ bə̀ jàn bə já mɔ́ nɛ, sʼá zə cìn-pyɔ́nɔ́ ǹdə́ lyì bí gakó. 15Dɛ̃̌na á cìnə̀, lò lò bə̀ká càrh lwɛlɛ ǹ dõ ne yé, sʼá pyà cɛ̀nɛ̀ ǹdə́ dwã, ǹdə́ lyì bí gakó. 16Cenə á wun yə̀ nyɛ̀n twéé twéé. 17Lwə̂lnə Yi dɛ̃ gakó. 18Cenə Yi nə̀bán kɔn gakó wẽ́. Wɔ́ èta rə̀ nʼê yâl bʼâmyɛ̌ byɛ̀bɛ́ á mù dwã nɛ ǹdə́ Yezu Kristə mó wɛ̀rhɛ́ nɛ́.
19Á bə̀kʼá cə̀r Eshirhə náàcɛ̀nɛ́ tum dí yé ne yé. 20Á bə̀kʼá fulsi zɔ̀mà nɛ́ nyɛ̀bɛ́ è nʼê tó lyì bí dɛnnɛ è zɔ̀m mɔ́ yé. 21Nyǐnə kɔn gakó náàcɛ̀nɛ́, sʼá cír tɛ̀bɛ́ rə̀ càn mɔ́. 22Dɛ̃̌na á cìn ǹdə́ lwɛlɛ dwí gakó.
23Wɔ́ Yi cìcì rə̀ nʼê pɛ yə̀-zùlə́. Rə̀ bʼa ce á yə̀ rə̀myɛ́ lyì námpúm, sə rə yìlì á ywə́lsé ǹdʼá wun ní ǹdʼá yala nɛ́, á mʼá dɛ̃̀ dɛ̃ rɛ́ tɛ̀bɛ́ nə́ Cinu Yezu Kristə ká ń bàn mɔ́, mùnì ga dóó bə̀kʼa jòm á yó w yé. 24Mɔ̀bɔ́ ń nə́ ń byẽ̀ ába mó wɔ́ zhə̀n-cí. Wɔ́ ńmyɛ̌ ń mà n wɛ̀rhɛ́ rə̀myɛ́ gakó.
25Da-byâ, lwə̂lnə Yi nə́myɛ yilə. 26Cenə Kristə-lyì bí gakó á pə nə́ba, bə̀ nə́ wɔ́ da-byâ. 27À nʼâ lwə̀l ába Cinu yil lé yilə, sʼá kàrmə̀ sɛ́bɛ́ rɛ́ tɛ̀bɛ́ á byili Kristə-lyì bí gakó ne.
28Nə́ Cinu Yezu Kristə mà n cĩ́ bwəl á yó!
Actualmente seleccionado:
1 Tesəloniki 5: lee
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2001, Wycliffe Bible Translators, Inc. All rights reserved.
