1 Tesəloniki 3

1Rə̀myɛ́ ce, nə́ wàr nə́ bʼâ yẽ̌ kɔn dɛnɛ yé. Nə́ jʼâ pwírí kɔn mə̂ bʼàmyɛ́ ǹdə́ Shəlvɛ̃ mɛ̃ Atɛnnɛ nɛ́. 2Wɔ́ rə̀myɛ́ è ce nə́ twĩ̀ Timote á sõ. Ń wɔ́ nə́ da-byǐ ń nə́ ń tó nə́ba ń bwə̀l Kristə yò-ècɔ̀nɔ̀ nyí rí Yi yilə. Nə́ twĩ̀ mù á sõ mùnì ga n sɛ̃ ába á kwɛrhɛ á zhí Yi ní kẽkẽ, sə n súlí á wu-jɔ̀. 3Èta, á mə̀dù ga bə̀ká n tə̀ lũ w kɔ̀bɔ́ nɔ̀nɔ̀ w yil n gə ń wu yé. Á cìcì yě bə̀ nɔ̀nɔ̀ w òmyɛ́ wɔ́ Yi pùbùlə̀. 4Nə́ gə́ yʼâ ŋwɛ́nɛ́ á sõ yi ní, nə́ yʼâ nʼé byili ába bə̀ nyǐ nə́ bʼâ nwɛ̀nɛ̀, sʼá yě bə̀ kɔn yàl ǹdə nə́ gə́ byili ní. 5À yʼà kʼâ wàr à bʼa dɛ̃̀ yé. Wɔ́ rə̀myɛ́ è ce a twĩ̀ Timote á sõ, mùnì ga a lwar á gə́ zhí Yi ni ní. Ywẽ zhe ne. Dɛ̀ga Shətana swèlè ába, sə è gə swèlè ába, sə́ nyǐ nə́ tum dí nə́ twĩ̀ á sõ mó bə kùr zhe yé.

6Sə èlâsɛ̃´, Timote ká n shí á sõ n bà. Ń byili nə́ba á gə́ zhí Kristə ne né, ǹdʼá gə́ só dwã nɛ́. Rə̀myɛ́ ce nə́ wun nyɛ̀. Ń byili nə́ba bʼâ yə̀ nə́ yò swě yé, sə á nʼá yâl á nə nə́ba, nə́myɛ jʼâ nʼé yâl nə́ nə ába. 7Da-byâ, á gə́ zhí Kristə ne èta mɔ́ nʼê zal nə́ wun ni nə́ wu-zhìlù w ǹdə́ nə́ nɔ̀nɔ̀ w wẽ́. 8Èlâsɛ̃´, nə́ wun kʼâ jě, á gə́ gwẽ̌ zhí Cinu ni kẽkẽ mó yilə. 9Nə́ yə̀l nə́ gə́ mʼâ ce Yi nə̀bán nɛ́ á yil yé, bʼâ nʼá pɛ nə́ba wu-nyɔ̃̀ nánfɔ̀lɔ̀ rə̀ yé né. 10Cəcɛ̃ ǹdə́ nə̀nyɔ́nɔ́ ga, nə́ rʼé lwə̀l Yi ǹdə́ nə́ wun gakó bə̀ rə̀ ce nə́ kʼá nə ába, sə nə́ sɛ̃ ába á lwar kɔn dɛ̀bɛ́ á yə̀ ŋwɛ̀nɛ́ á lwar á Yi-ni-zhú mú shò-kwã nɛ́ mɔ́.

11Nə́ Da Yi cìcì ǹdə́ nə́ Cinu Yezu bʼa kwɛrhɛ nə́ sɔ́má y mùnì ga nə́ ŋwɛ̀nɛ́ nə́ bʼâ sõ! 12Cinu mà n ce á kwɛrhɛ á swéné dwã, sʼá kwɛrhɛ á swéné lyì bí gakó twéé twéé, ǹdə nə́ gə́ só ába né mó. 13Èta, ń mà n súlí á wu-jɔ̀. Nə́ Cinu Yezu gə tú ǹdə́ ń lyì bí gakó yùwə̀, á mʼâ yə̀ nə́ Da Yi lyì námpúm, dóó tʼâ la á yó w jǒm yé.

Actualmente seleccionado:

1 Tesəloniki 3: lee

Destacar

Copiar