Yohane 8

Serongac

1-2Yesungo oliwatikiu emma taru ama wereckembeso ammanu mama monggoc Anutuac womonnu enec. Enu ngicngac yearu hadacgec tacma miti kpouyemmeec. 3Ifi amma tacmanu mitiac negen negengngic nga farisaio yeneng ngac mong serofaka anu hemma Yesuaru mehama kicnginau faigec nanec.

4Nanu Yesu kpesimigec, “Kpoukpou, ngac yomocngo serofaka kicninau anu hending. 5#Sese 20:10; Dser 22:22-24Nga dedeseriyoacfu Mosengo ngac ifianoc hocngo yenerehomenideac deserinemmeec. Geng yaguc dafi denec?” 6Yeni Yesungo yoac mong dafi deu negemma yoacfu faini dema faitobang ammigec.

Ifi ammigec Yesungo ngonducnema gbongango bangecfu kibi ohoec. 7#Dser 17:7Ohoma nammanu kpesima kpesi anggec kpehengaima yofi edeyunuec, “Ngenearunac ngic mong kopocsiha kpac kecde, yeng waraima hoc ukuu ukubisia.” 8Ifi dema monggoc ngonducnema bangecfu kibi ohoec. 9Anu yeni Yesuac yoac imoc negemma kifanginaac sirihau yadango waraima Yesu wama kendacgec ngac ye botucnginau tembuha nanec.

10Ifi nanu Yesungo kpehengai hemma yofi kpesimiec, “Ngac, ngic yeni dahai kendau? Ge manganaac areng, imoc mong dedau me?” 11#Yoh 5:14Kpesimiu deec, “Kebuna, kpac.” Ifi deu Yesungo yofi edeec, “Neng ifingoc ge mangana areng mi debade. Ge kemma kopocsic monggoc mi meficgebesena.”

Yesu yengenaoc dekperagiemeec

12 # Yes 49:6; Yoh 1:4-9; 9:5; 12:46 Yesungo monggoc torokpema yoac yofi edeyunuec, “Ni bangectoa bangec imocac ngicngac ngeneac kperagi. Mong ye ni modacnude, yeng kundunggac sing mong mi modarude. Amma ye kekecac kperagi mekefude.” 13Ifi deu farisaio yeneng merenggec, “Ge geanggaocngoc dekperagiemenec, imoc singngo mi dedeac yoacga fora mi ande.”

14 # Yoh 5:31-32; 7:28 Yesungo meremma yofi edeyunuec, “Ni neannaocngoc haniana dekperagiemeduae, imoc fora. Ni dahacnac hayai nga dahai kembade, imoc neannaoc negenduae. Ngeni ine dahacnac hayai nga dahai kembade, imoc mi negendae. 15#Yoh 12:47Ngeni bangecngic siricnginau ngicngac fakangina isinggema haniangina deandae. Neng ngic mong isinggema hania dede ua mi mebade. 16#Yoh 5:30; 8:29Ni tembucna ua imoc mi mekecduae. Manggac suenuec, yegoc ua mekecdipe. Imocac neng desi desiua meduaeu imocngo foragoc ande. 17#Dser 19:15Dedeseriyoacnginau yoac yofi oho ohoya fede, ‘Ngic yohockang dedengira mocgu anu yoacngira fora anude.’ 18#1Yoh 5:9Imocac amma neannaocngoc dekperagiemeba Manna suenuec, yeng ifingoc hepucna amma dekperaginuude.”

19Ifi deu farisaio yeneng kpesimigec, “Geac Mangga dahai kecde?” degec Yesungo meremma yofi edeyunuec, “Ngeni ni mi negennudae nga Manna ifingoc mi negemmidae. Ngeni ni negennubau debac Manna ifingoc negemmibau.” 20#Yoh 7:30Yoac imoc, womonggac mana monnu soikia katapa tarecfu, imohai ngic edekpou ayemmeec. Nga ngic mongngo mendanggema witicamau mi faigec nocac ye ifi ammigecdeac naso mi anec.

21 # Yoh 7:34; 13:33 Amma Yesungo monggoc yofi edeyunuec, “Ni kemba ngeni hofocnuma kopocsicnginagoc kecma homegecde. Nga ni kembade, imohai ngeneng naric mi hagecde.” 22Ifi deu yudangic yeneng degec, “Ni kembade, imohai ngeni naric mi hagecde. Ye nocac ifi dede? Yengena sebia eweude me?” 23#Yoh 3:31Ifi degec yofi edeyunuec, “Ngeneng emu bangecfunac nga ni bangecfunac kpac, ni wihacnac. 24Imocacnoc edengunuduae, ngeni kopocsicnginagoc kecma homegecde. Ngeni ‘ni kecduaengoc,’ imoc mi negensinggedaeu kopocsicngina fekefu homegecde.”

25Ifi deu kpesimigec, “Anu ge merac?” degec yeng yofi edeyunuec, “Ni haniana bic edengunudua. 26Ni ngeneac haifakangina homac hennegeng amma isinggema desibadeac fede. Anu suenuec, ye yoac foraac mingina nga wiac yearunac negenduae, imoc bangecfu dekperagibade.”

27Yesungo Mamaac negemma edeyunuu yeni obohogec. 28#Yoh 3:14Obohogec Yesungo yofi edeyunuec, “Ngeni Ngicac Medac nanggegec nanude, ngeni naso imohai ‘ni kecduaengoc,’ imoc negentegecgecde. Ni wiac mong neannaoc mi angkecduae, Mannango kpounenec, imoc debade. 29Suenuec, yeng nigoc kecde. Ni yeac songo modacma ua mekecduae. Imocac amma ye wanuu tembucna mi kecbade.” 30Yesungo yoac ifi deu ngicngac homacngo ye negensinggegec.

Abrahanggarunac fingecsahe

31Yesungo yudangic ye negensinggegec, yeni yofi edeyunuec, “Ngeni neac yoac hoanggema kecgecdeu neac medacfocna fora anggecde. 32Ifi amma yoac fora negentegecgecde nga yoac forango witicfunac yungecngunuude.” 33#Mat 3:9Ifi deu meremmigec, “Neni Abrahanggac kisicfunac, mongngo wanac mi menunuec. Nga merang wanac menunuecac geng yungecnununadeac denec?”

34 # Rom 6:16, 20 Ifi degec Yesungo yofi deec, “Ni fora yombong edengunuba, mongngo kopocsic meande, ye kopocsicngo wanac meu wanacngiha kecde. 35Wanac meu kecande, ye ama imocac manau hombonanga naric mi kefude. Nga Medacngo ama imocac manau hombonanga kefude. 36Imocac Medacngo yungecngunuudeu ngeni witicngina kpac kecgecde. 37Ngeni Abrahanggac kisicfora, imoc negenduae. Neac yoacac titinga mong ine ngeneac ubahereu mi nandeac nuhomebeso efaidae. 38Ni Mannaac hoannu kecma wiac hennegeng anai, imocnoc edengunuduae. Nga ngeni ine mangnginaarunac wiac nga faka negengandae, imocnoc amma kecdae.”

39 # Mat 3:9 Ifi deu degec, “Neneac mannina Abrahang.” degec Yesungo yofi merengyemmeec, “Ngeni Abrahanggac nambaracfora ambau debac yeac kekec nga faka modacbau. 40Ni ngic mongngo Anutuarunac yoac fora negemma edengunubare ngeni nocac nuhomebeso andae? Abrahang ye faka ifia mong mi angkefec. 41#Yes 63:16Ngeni ine mangnginaac kekec nga faka modacandae.” Ifi deu yeneng degec, “Neni sicsaucfunac mong mi fingering, kpac yombong. Mannina mocgu Anutu.”

Satanggac fingecsahe

42Ifi degec Yesungo yofi deec, “Ni Anutuarunac fingecma neanna ubanaac mi mayai. Yennoc suenuec, imocac ngeni Anutu mangngina ambac dede heregoc neac songo negemma hoannubau. 43Nga ngeni ine yoacnaac kedzac kpegecdeacsoc mi ande, imocac amma ngeni yoac deanduae, imoc mi negentegecdae.

44 # 1Yoh 3:8 Nga mangana mingina, yennoc ngeneac mangngina nga faka yeac songou fede, ngeni imoc megecdeac angemmeude. Ye hanahemangoc ngic yunuhomeande nocac yeac ubahereau faka fora mi feu faka fora mi mema nangkecde. Ye ikocngic nga ye ikocac mama kecdenoc. Imocac amma ye yoac ikoc dema yengenaoc nanggeeme kefude. 45Nga ni yoac fora deduaeac ngeni neac yoacna mi negensinggegecde. 46#2Kor 5:21; 1Pe 2:22Ngenearunac mongngo neac kopocsic mong negendaeu naric mi heficgebac. Nga ni yoac fora deduae isoc ngeni nocac mi negensinnudae? 47#1Yoh 4:6Anutuac arengfora yenennoc yoara negenggecde. Ngeni ine Anutuac arengfora kpac, imocac yeac yoac mi negenggecde.”

Abrahanggac warac warac

48 # Mrk 3:21-22 Anu yudangic yeneng meremmigec, “Ge samariangicnoc amma ge hadehadegagoc, ifi deandimbe nga imoc yoac fora.” 49Ifi degec Yesungo meremma yofi edeyunuec, “Ni hadehadena kpac. Ni Manna eweheihei ammiba ngeneng ine eweheihei mong mi anengandae. 50Ni neanna kpac kuneng mebadeac ua mi meanduae nga mongngo neac kpac miacma desiude. 51#Yoh 5:24Foracngoc, ngic mong ye neac yoac mekefudeu, ye naric mi homeude nga homebesande, ni edengunuduae.”

52Ifi deu yudangic yeneng degec, “Ge hadehadegagoc, neni yaguc negenggudimbe. Abrahang ye homeec nga profete yeni ifingoc homegec. Geng ine denec, ‘Mong ye neac yoac mekefude, yeng mi homeude nga homebesande.’ 53Anu ge kisicnina Abrahanggac engena mi annec. Ye homeec nga profete yeni ifingoc homegec. Amma ge geanggaac negenna engena ande, imocngo naric mi ande.”

54Ifi degec Yesungo yofi edeyunuec, “Ni neannaoc dengereemebadeu imocngo fora mi ambac. Nga Manna ngeneac Anutungina kecde, yeac ifi deandae, yeng eweheihei anende. 55Ngeneng mi negemmidae, neannaoc ine ye negemmiduae. Neng ye mi negemmiduae debadeu, ngic ikoha amma ngeni isoc ambade. Ni negemmiduaengo yoara mekecduae. 56Bangecngina Abrahang ye neac naso fingeru imoc hembeso negemma songotoa femiec. Femiu hemma songo negenec.”

57Ifi deu yudangic yeneng degec, “Ge kifaga 50 mi andacngoc nga ge Abrahang hennec, imoc naric mi heide.” 58#Yoh 1:1Ifi degec Yesungo yofi deec, “Foracngoc, Abrahang mi fingecmanu ‘ni kecduaengoc,’ imoc edengunuduae.” 59Ifi deu yeni hoc mema heibeso anggec yeng sufu sufuu womong ngadeau kemeec.

Actualmente seleccionado:

Yohane 8: Ded

Destacar

Copiar