Meerelo a Arumiwi 1

Ogwelihiwa odhulu wa Yesu

1Mmudhi aaga Tiyofilu, muniivuru naaga nowambeela gihilebamo dhaatedhene Yesu dhambeeliiye wiirana ni osuuziha, 2ofiyedha nlabo nathukuleliwiiye odhulu. Nda eera agaavahile magano mwa Muneba Woweela arumiwi yaasakuliliiye. 3Wa aliwa ahiyooneyiha agarabule wi mugumi dila dhijinjidhene moohaanganyedha. Yesu owasuuziha dha Omwene wa Mulugu mwa malabo makumi mannayi. 4Egali vamohi oliye ahaalamula wi ehivenyewo oZheruzalemi mbwenye ejejihege yoororomeliha ya Ababe, yawogiliiye wi: <<Miyo guwaaddelani 5ebaribareene Zhuwawu abathiza ni mahinje, mwa malabo ooyeva nyo munaabathiziwege ni Muneba Woweela>>.

6Vano ale yatugumanege yahimukohaga, wiira: <<Nabwiya, bu mudhidhi oyene munaawelihedhiinyu a Ezarayeli omwene weewa?>>

7Oliye ahaakulaga, wiira: <<Kadhuufwaneeleni onona mudhidhi, naari wora dhineereye dhego dhedho ababa ekaraatihiliiwa ni owodha weewa. 8Mbwenye munoodha mwaakele owodha wookitelani Muneba Woweela, muneere okala anamoona aaga mu Zheruzalemi, oZhudeya waatewene ni oSamariya waatewene, ofiyedha omagomelo wa elabo>>.

9Vano agawaaddele dhego dhaatedhene dhedhi, Yesu ahithukuliwa odhowiwana odhulu, emoonaga. Murabo omukuneela. 10Vano aliwa yoosugwaga odhulu oliye agwelaga, mowaaguva alobwana abiili yawarilege dhoweela, yahikumelelaga vameentoni veewa, 11wiira: <<Nyo aGalileya, mwaha bwaddi mwiimeliliinyu musugwaga odhulu? Yesu oyene othukuleliwe odhulu vaari veenyu, onowela ni mukalelo mmohive wona mmooneliinyu adhowaga odhulu>>.

Osakuliwa wa Matiya

12Dhigeereye ndo, aliwa yahiwelelaga oZheruzalemi, ekumaga omwaangoni weethaniwa Olivera, oli waaddamela nluwa, olapela wa kilomeeturu nimohi. 13Vafiyiligiiwa yahivolowaga, ogwelela osuubini a odhulu wakaliiwa. Yaaligi Peduru, Zhuwawu, Tiyago, Andire, Filipi, Tome, Baritolomeyo, Matewuzhi, Tiyago, mwaana a Alifiyu ni Simawu muZeloti#1.13 AZeloti Aliwa yaali a nikuru na aZhudewu yeethukulela oPalextina wona anamurala. Aliwa yoofuna wiinyuwela mwa pwere wi yaagonjihe ni wawiigara aRoma. ni Zhudasi, mwaana a Tiyago. 14Aatene yootugumanesa mmalobeloni, vamohi ni ahiyana teto ni Mariya, maaye Yesu ni addibila a Yesu.

15Malabo alene Peduru ahiimelaga vaari va ale yaaligivo, wiinjiva weewa waaligi zana ni makumi meenddi (120). Oliye ahiiraga: 16<<Amudhaaga, yaali yoofuneya wi Maleba, yawogile Muneba Woweela odheela mwa Davidi, yaakwanelihiwe yawoga dha Zhudasi, oyene ampelekile Yesu. 17Oliye aali mmohi mwa hiyo asakuleliwe wi akalena epaddi yoohidda mabasa ala yinniihuna>>. 18(Zhudasi ahigula mudda ni korowa yooliviwa ya yoothega yeeriliiye, vevale ahimorela muddibani, opuduwa, marubo okuma twii. 19Athu aatene oZheruzalemi yahinona eyene, ofiyedha wi mu ewogelo yeewa#1.19 Ewogelo yeewa yaali ewogelo ya Aramayiku. yahithwa ndina na mudda ole Akeledama, eyo enatapulela mudda wa mwazi.) 20Peduru aheenjedhedhaga, wiira: <<Vowi dhihilebiwa muniivuru na Masaalimu: <Vaade vaaye vikale vaddebe ahikalevo onaamagevo;>#1.20 Masaalimu 69.25. teto: <Mabasa aaye evahiwe muthu mmohiwa>.#1.20 Masaalimu 109.8. 21Mowindo enofuneya wi nimusakule mmohi mwa athu ala yaali ni hiyo mudhidhi waatene oyene waaliihu ni Nabwiya Yesu, 22wambeela obathiziwa waaye ni Zhuwawu, ofiyedha nlabo nathukuliwiiye vaari veehu, adhowaga odhulu. Enofuneya mmohi mwa aliwa akale ni hiyo namoona a ovenyihiwa wa Yesu>>.

23Yahaathomaga alobwana abiili, Zhuuze, oononeya ni mandina Barasaba, naari wi Zhuxtu, mmohiwa Matiya. 24Nuwindo, yahilobelaga, wiira: <<Nabwiya, nyo muhunona mirima dha athu aatene. Munoonihe mwa ala abiili duuvi mmusakuliinyu 25wi ahiddege mabasa ala a orumiwi, Zhudasi yaahiyiliiye, adhowaga omburoni waaye-waaye>>. 26Vevale yahaweehaga aabiileene, asakuliwe di Matiya; oliye aheenjedhedhiwa wa arumiwi kumi ni mmohi.

Actualmente seleccionado:

Meerelo a Arumiwi 1: tke

Destacar

Copiar