Mateusi 3
3
Juwão poromojãmorĩ mã'ẽ rewarà
(Maku 1.1-8; Rukasi 3.1-9,15-17; Juwão 1.19-28)
1Ãmẽ Jesu poromo'e ypytà remẽ, kwaima'e mõ Janejare'e ayvukwerà mojenuarà rõmõ ekoi rã'ĩ. Juwão poromojãmorĩ mã'ẽ eu ijupe. Tekoe'ãma rupi tè ekoi, Juteja yvy pè. 2Ma'e e'i imojenu ipi:
– Ke'ĩ Janejare'e ojikuwaokatà Jõvijã wasu rõmõ ky'y! e'i. [Ajawyi tapejipy'amogeta ikõ amãtejẽ peneko rè age'e nẽ.] Tapejimosĩoka peaiwererà rè. Tapejimome'u amãtejẽ Janejare'e pè peaiwererà reitypypyipaoka, e'i ijupe kõ.#Mat. 4.17; Mak. 1.15
3Karamoe remẽ Janejare'e ayvu mojenuarà Isajasi kee e'i amãtejẽ imomewa Juwão pewarà mõ:
“Tekoe'ãma rupi ava mõ Janerõvijã ywete rewarà omojenutà erokwa.
Wayvo tesõ omojenutà. Kee e'ità:
‘Janerõvijã ywete ovãerĩ!’ e'ità.
‘Peaiwererà tapeitypypyipa amãtejẽ enoneve!’ e'ità.
‘Ãwitõ pee nikatui remẽ, jamokatu amãtejẽ imoterẽ gatu janeremiãrõ renoneve.
Ãwĩvo ve tapejipy'amokatu amãtejẽ Janerõvijã ywete renone’, e'ità”, e'i amãtejẽ maekwerà.#Isa. 40.3
Aekwerà rupi katu tè Juwão ekoi.
4A'e Juwão teima raawerà jimõjãgwerà tè opypy oyru rã'ãga rõmõ ipi, kameru raawerà. Oku'ayru rõmõ teima pirerà sikãgwerà opypy teve. Taparara tè Juwão o'u ipi. Ãmõ, eirà ryapirà o'u ipi. A'e kõ kõrijõ o'u ipi.#3.4 Janejare'e ayvu mojenuarà Eriasi a'evo karamoe remẽ ekoi. Aekwerà rupi katu Juwão ekoi. 2To. 1.8; Mat. 11.14
5Ãmẽ jane kõ mõa'ãrõwã oo oo tekoe'ãma kyty ojimoaty ipyri ijayvu rè ojapyaka. Jerusarẽ taa wãnà kõ oo. Ãmõ, Juteja yvy wãnà kõ oo. Ãmõ, yy Jotão reme rupiwarà kõ. Wãisõ oo ojimoaty ipyri kupa. 6Kee e'i e'i ijayvu renu kupa:
– Orojimosĩoka oreaiwererà rè oroiko, e'i kupa.
Ojimome'u waiwererà kõ reitypypyipaoka Janejare'e pè ãmẽ kupa. A'evo ekoi mãe kõ Juwão omojãmorĩ ky'y. Yy Jotão pè omojãmorĩ kõ upa.
7Ãmẽ uve aty wasu pytery pè ijatyray jõvijã kõ mõ. Pariseu kõ. Ãmõ, Satuseu kõ. A'e kõ uu uu ipe ojimojãmorĩokatà Juwão pè mijã. Ajamã'ẽ kee e'i Juwão ijupe kõ:
– Pejẽ! Moe voay wete peiko, pepojy ai ywete rewarà mõ. Poromoripe tesõ petekokuwavaya rã'ãga rupi peiko ipi! “Janejare'e tijanemokatu jimomorijaua rã wyi”, pejẽ ywe'e tite peupe. Ava aepo ne'i pejẽ. Janejare'e napenereko katu'ãi, nivoi peiko jẽ remẽ.#Mat. 12.34; 23.33 8Ajawyi peaiwererà rè pejipy'amogeta rã'ĩ esa. Tapejimosĩoka peaiwererà rè. Tapejimome'u Janejare'e pè peaiwererà reitypypyipaoka. Awyje Janejare'e koty rewarà kõ rõmõ tapeiko ky'y. Ãmẽ tè pejikuwatà aje ywete Janejare'e kyty pejirova mãe kõ rõmõ peiko. 9Tapejimoe'e ywe'e tite e'ã. Kee tapejẽ e'ã: “Janejare'e nijanemomorijau'ãi, tãmõ Aparão jeapyrerà tè jane rewarà mõ. Ory teãmã janere,” tapejẽ ywe'e tite e'ã. Wayvu rupi ekoi mãe kõ rè tè Janejare'e ory ipi. Ajawyi tapejimoe'e tite e'ã tãmõ Aparão jeapyrerà kõ rõmõ, a'e pejẽ. Pemã'ẽ aã takuru kõ rè. Janejare'e opota sõ Aparão jeapyrerà rã kõ oinõ remẽ, takuru wyive oinõ kuwa, e'i. Nomowaype'ãi kuwa ijupe, e'i.#Juw. 8.33
10E'i jẽ Juwão:
– Janejare'e tè janemoe'yità. Ãmõgwerà weraatà opyri toiko karuaru. Ãmõ kõ ãmẽ jimomorijaua kyty tè omonotà, awyje tojimomorijau. Koo jarà vo tè Janejare'e. Ãwitõ moma'eyva'y ni'ai mã'ẽ ijarà weta jyy pupe imopopo tokaipa, ãwĩvo tary ve penereko peaiwererà wyi napepoi sõ remẽ, e'i.#Mat. 7.19
11E'i jẽ Juwão:
– Janejare'e Remimuu ywe'e uutà erakypy rupi, e'i. A'e sõsi e'arà kytywarà rõmõ ekoità ky'y. Ije ãmẽ emĩgwai rõmõgà tè ije aiko, e'i. Ije, yy pè kõrijõ tè poromojãmorĩ penereko, peaiwererà reitypypyia jikuwaparà rõmõ, e'i. A'e rè sõ penako'i remẽ, Janejare'e 'Ãg tẽ tesõ pepy'a pupe omoigeokatà. Ajamã'ẽ naeako'i ee mãe kõ omomorijauokatà kõrijõ tata pè, e'i. 12Ãwitõ avasi jarà mõ omowaite ã'ãigwerà ipirerà wyi ipi. Ipirerà kõ jamowaite ijapy ipi. Ã'ãigwerà ãmẽ jamoaty imokatu ipi. A'evo tary ve Janejare'e poroereko. Jane kõ ãmõgwerà wejatà opyri toiko karuaru. Ãmõgwerà omokuipe'età owyi, awyje tojimomorijau kõrijõ tata noei mã'ẽ pè tokai upa, e'i Juwão imojenu.
Jesu ojimojãmorĩoka Juwão pè remẽwarà
(Maku 1.9-11; Rukasi 3.21-22; Juwão 1.31-34)
13Jesu oposiko ypytà Janejare'e ayvu rè remẽ, Karireja yvy kyty wyi uu, yy Jotão kyty. A'e pè Juwão poromojãmorĩ upa. Jesu e'i ijupe:
– Emojãmorĩ rejupa, e'i.
14Ãmẽ Juwão e'i:
– Ene kuwasi emojãmorĩ rejupa! e'i. Manyvore põ nejo nejimojãmorĩoka ije jẽ? e'i ijupe.
15Ãmẽ Jesu e'i:
– Emojãmorĩ jẽsi rejupa. Janejare'e remimota rupi tè a'evo tijaiko, e'i.
“Hoõ” e'i ãmẽ Juwão ky'y. Omojãmorĩ ãmẽ. 16Ãmẽ sõsi yy pupe wyi Jesu oẽ remeve, yvag ojiovapyjavo. Ãmẽ Janejare'e 'Ãg rè omã'ẽ, owyjy uu Jesu apyte 'aryvo wapy remẽ. Ãwitõ pykau owyjy uu, a'evo 'ejẽ. 17Ãmẽ yva pe wyi Janejare'e oporegeta imuu. Kee e'i imuu:
– Era'yry tè aã, e'i. Eremiau tè. Eroryvay ee mã'ẽ tè, e'i mã'ẽ ojenu.#Jinõ. 22.2; Jĩg. 2.7; Mat. 12.18; 17.5; Ruk. 9.35
Actualmente seleccionado:
Mateusi 3: oymNT
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2013, Wycliffe Bible Translators, Inc. All rights reserved.
