Rukasi 20

“Ava ayvu rupi põ moko ere neiko?” e'i Jesu pè kupa remẽwarà

(Mateusi 21.23-27; Maku 11.27-33)

1Ãmẽ ãmõ 'ary pè Janejare'e moe'ea retã ypy pè Jesu poromo'e upa. Janejare'e ayvu e'eay omovyvy upa. Ãmẽ jõvijãgwerà kõ ovãe ojimo'eai Jesu rè. Kejõ a'evo mãe kõ: Janejare'e pè oporegeta mãe kõ rõvijã kõ mõ. Ãmõ, tãmõ Moisesi remikusiwarerà rè poromo'e mãe kõ. Ãmõ, Juteu rõvijãgwerà kõ. A'e kõ ovãe Jesu mogeta kupa. 2Kee e'i kupa:

– Ava ayvu rupi põ moko ere neiko ipi? Ava põ neayvumokasi moko tere ipi, poromo'e rõmõ ipi? e'i kupa.

3Ãmẽ Jesu e'i:

– Ije ve aporanutà peupe rã'ĩ. Pejẽ ypy pemome'u ije awi. 4Ava ayvu rupi põ Juwão amyry poromojãmorĩ ipi? Janejare'e ayvu rupi põ? Mirà kõ ayvu rupi põ ma'e remẽ? e'i Jesu oporanu ijupe kõ.

5Ãmẽ jõvijã kõ ojimogeta rã'ĩ.

– Manyvo ja'età põ? e'i ojiupe kupa. “Janejare'e ayvu rupi Juwão uu”, ja'e sõ remẽ, ma'e, “‘Aje’ pejẽ kuwasi ijayvukwerà pè ãmẽ mijã”, e'ità ãmẽ janeupe janemogweroka. Ajawyi aepo nija'e'ãi, e'i ojiupe kupa. 6Ãmõ, “Mirà kõ ayvu rupi tè uu Juwão”, nija'e'ãi teve, aty wasu kõ rewarà mõ. Takuru pupe janejapi japi kuwa janejuka kupa, aepo ja'e remẽ. Ma'e, “Janejare'e ayvu mojenuarà rõmõ tè Juwão”, e'i kupa ipi rewarà mõ, e'i ojiupe kupa.

7Ajawyi kee e'i kupa:

– Norokuwai ava ayvu rupi põ uu, e'i rã'ãga Jesu pè kupa.

8Ãmẽ kee e'i jẽ Jesu ijupe kõ:

– Ãwijã wyi ije ve namome'u'ãi pejẽ ava ayvu rupi põ ãwĩvo aiko ipi mã'ẽ, e'i Jesu imogwe kõ.

Koo jarà ra'yry rè tè Jesu ojimosã'ãga remẽwarà

(Mateusi 21.33-41; Maku 12.1-9)

9Ãmẽ Jesu poromo'e remẽ, koo jarà ra'yry rè tè ojimosã'ãga poromo'e rõmõ. Kee e'i ijupe kõ:

– Kwaima'e mõ uvaty oõtã okoo pè, e'i. Ajaire ãmõ kõ pè kee e'i: “Ajisyrytà rã'ĩ aa. Ekoo aitytà rã'ĩ”, e'i. “Ajawyi ekoo rè peposiko kuwa. Tapeja'a ee erapykyre kyty. I'akwerà peme'ẽ kuwa epy rõmõ. Ãmẽ temitã'a po'oa 'arà mẽ a'e mõ peme'ẽtà ije ipi. I'ete põ?” e'i ijupe kõ. “Õ'õ, i'ete”, e'i kupa. Ajaire koo jarà ojisyry oo ãmõ yvy kyty. A'e pè oiko puku sa'u iko. 10Ãmẽ kãramõ uva otãrõma ky'y remẽ, ijarà omono ipe wemĩgwai mõ okoo kyty temitã'akwerà pẽgwerà pijarà mõ mijã. Ovãe remẽ, koo rè oja'a mãe kõ nome'ẽ'ãi ijupe ajamã'ẽ. Opyy inõpã nõpã kupa. Agyvotè omojivy imono kupa. 11Ajawyi e'i mijẽ koo jarà ãmõ pè: “Ene jẽsi ekwa age'e”, e'i. “Hoõ” e'i ãmẽ. Oo ipe mijẽ emĩgwai mõ ãmẽ. A'e ve koo rè oja'a mãe kõ onõpã nõpã mijẽ rõnõ. Ojimorarai ywete ee imojivy imuu. Agyvotè omojivy imuu kupa. 12Ajaire koo jarà e'i jẽ ãmõ pè: “Ene jẽsi ekwa age'e”, e'i ijupe. A'e oo ipe mijẽ rõnõ. Wapijuka mijẽ kupa imojivy imono ikoty. Agyvo te'e tè ovãe.

13– Ãmẽ e'i koo jarà oupe: “Manyvotà sipõ areko ky'y? Era'yry eremiau amonotà ky'y. A'e omomojytà erovija kupa ky'y”, e'i tite wa'yry mono. 14Ajaire oo ovãe uu koo pè ta'yry. Ãmẽ koo rè oja'a mãe kõ omã'ẽ ee, uu iko remẽ. Kee e'i ojiupe ãmẽ kupa: “Koo jarà ra'yry tè ovãe ky'y”, e'i kupa. “Ejo sijuka”, e'i kupa. “Emã'ẽ. Ãwĩ tè koo rè ojimojõvijãtà uu rekovijarerà rõmõ”, e'i kupa. “Ãmẽ ãwĩ sijuka amãtejẽ remẽ, janekoo rõmõtà tè ky'y”, e'i tite kupa. 15Weraa koo jarà ra'yry koo kupe kyty ijuka ãmẽ kupa ky'y. Manyvo e'ità põ koo jarà ajaire wa'yry jukaa renu? 16Uutà ijapisi kõ. Ãmẽ ãmõ kõ tè omoposikookatà okoo rè ky'y, e'i Jesu.

Ãmẽ kee e'i jane kõ aepo renu:

– Eeee! Ta'evo e'ã orepõ'õ mè! e'i kupa.

Takuru e'eay rè tè Jesu ojimosã'ãga remẽwarà

(Mateusi 21.42-46; Maku 12.10-12)

17Ajaire Jesu a'e kõ rè omã'ẽ rã'ĩ erokwa. Takuru rè tè ojimosã'ãgatà ky'y, tetã reinõa rewarà rè tè. Aepo jaa rè kee e'i Jesu:

– Janejare'e kareta rè kee e'i ojikusiwa: “Oiko takuru mõ, a'e pè ‘nikatui’ e'i tite tetã reinõgarà kõ mã'ẽ. Ajamã'ẽ a'e pè ajaire ‘takuru e'ekweray’ eutà. Tetã yke pè tè oinõtà imõ'ã kupa, a'e ywesõ sikaepo ikatuay rewarà mõ”, e'i maekwerà.#20.17 Juteu kõ takuru 'aryvo omõ'ã tetã kupa ipi. Takuru e'ekweray omowaite tetã yke mã'ẽ rõmõ. Ãwitõ Wajãpi kõ opyteporo wakapu, ma'e remẽ wakari'y kytaypy rõmõ ipi. Ãwĩvo ve takuru tetã reinõgarà kõ wereko ipi. Jĩg. 118.22; J.K.R. 4.11; 1Pe. 2.7 A'e takuru vo 'ejẽ Janejare'e Remimuurerà. Napekuwaive põ ajaa maekwerà? e'i Jesu.

18E'i jẽ Jesu:

– Ãwitõ ava mõ ãwĩ takuru rè ojipyãkãmota remẽ, imarama. Ãmõ, ava mõ 'aryvo takuru o'a uu remẽ, omomarama ve, e'i.

Wee tè sikaepo aepo Jesu oporegeta upa. “Nererovijai mãe kõ ojimomorijautà”, jaa tè aepo e'i.

Jõvijãgwerà kõ wayvumoopaoka tarepe Jesu remẽwarà

(Mateusi 22.15-22; Maku 12.13-17)

19Ãmẽ tãmõ Moisesi remikusiwarerà rè poromo'e mãe kõ aepo wenu remẽ, ojikõ'õ Jesu rè kupa. Janejare'e pè oporegeta mãe kõ rõvijã kõ ve ojikõ'õ ee. Kee e'i ãmẽ ojiupe kupa:

– Haa! Janere rõwã sipõkõ aepo Jesu oporegeta! Emã'ẽ, ojisu'u katu janereko rè, e'i kupa.

Ajawyi Jesu opyytà kupa. Ajamã'ẽ okyje jane kõ wyi kupa.

20Ãmẽ jõvijãgwerà kõ a'e pè Jesu omoa'u kupa ipi. Ajaire, jane kõ mõ omogeta vija too Jesu rã'ã kupa. Ãmõ, karakuri ome'ẽ vija teve a'e kõ pè.

Kee e'i kupa:

– Pekwa rã'ĩ Jesu rã'ã. Ivo maevo sõ tite peiko ovake, “aje” te'i tite pejẽ. Peã'ãtà ayvu rè. Ãmẽ janerovakeve ojavy tite ayvu mõ remẽ, sipokwatà eraa ãmẽ jõvijã wasu pè ime'ẽ, e'i kupa.

– Hoõ, orootà, e'i kupa.

21Ãmẽ uu Jesu pè oporanu kupa. Kee e'i rã'ãga kupa:

– Poromo'earà, ikatuay poromo'e rejupa ipi. Nerejavyi jane kõ rekoa rè ipi. Ivo maevo sõ tite mã'ẽ pè “ivo” nerei tite ipi. Ãwĩvo ve nivoi maevo sõ tite mã'ẽ pè “nivoi” nerei tite ipi. Nerejimoripeokai a'evoa rè neiko ipi. Janejare'e ayvu aje ywete mã'ẽ rupi katu tè poromosã'ãga neiko ipi, e'i rã'ãga kupa.

22– Ajawyi kee jaa rè oremo'e rejupa. I'ete põ Romã pewarà rõvijã wasu Sesa pè tekoua repykwerà jame'ẽ ipi? Ãnĩ põ ma'e remẽ? e'i rã'ãga Jesu pè kupa.

23Ajamã'ẽ omoripea okuwavĩ Jesu remẽ, kee e'i ijupe kõ:

24– Age'e moma'e ma'e aporanutà peupe. Peeru rã'ĩ karakuri moeta mõ tamã'ẽ ee, e'i.

Weru ãmẽ kupa. Ajaire kee e'i Jesu ijupe kõ imojisaoka:

– Moeta rè pemã'ẽ esa. Ava rã'ãgawerà põ aã? Ãmõ, ava rerà ojikusiwa ee? e'i Jesu ijupe kõ.

25– Jõvijã Sesa, e'i kupa. Ãmõ, a'e rerà teve ojikusiwa ee, e'i kupa.

Ãmẽ aepo rè kee e'i Jesu:

– Õ'õ, i'ete. Ajawyi kee a'e pejẽ. Jõvijã wasu Sesa pewarà jame'ẽ jõvijã wasu Sesa pè ipi. Ãwĩvo ve Janejare'e pewarà jame'ẽ Janejare'e pè ipi, e'i Jesu ijupe kõ imogwe kõ ky'y.

26Ajawyi manyvo ne'i'ãi Jesu pokou kupa. Ajawyi nipu'ãi rã'ĩ kupa ky'y.

– Haa! Aepo e'i si Jesu! e'i kõrijõ kupa.

Satuseu kõ wayvumoopaoka tarepe Jesu remẽwarà

(Mateusi 22.23-33; Maku 12.18-27)

27Ajaire Satuseu kõ mõ ovãe. A'e kõ kee e'i tite ipi: “Jakãjã maire, nijapoera mijẽ'ãi ipi”, e'i kupa ipi.#J.K.R. 23.8 28Ãmẽ kee e'i Jesu pè kupa:

– Poromo'earà, tãmõ Moisesi kee e'i itõkõ janeupe ikusiwa: “Kwaima'e mõ erekwapa mã'ẽ okãjã sõ nijãkarãive remeve, erekwarerà wereko kuwa imõmirĩgwerà ãmẽ ipi. A'e tè ijãkarãtà ipupe weke'yry amyry rekovijarerà mõ”, e'i itõkõ ikusiwa, e'i kupa.#T.M. 25.5

29E'i jẽ Jesu pè kupa:

– Ma'e remẽ oiko kwaima'e mõ mijã, ijatyray imõmirĩgwerà mã'ẽ. 7 rõmõ imõmirĩgwerà kõ, weke'yry reve. Ajaire teke'yry ypykwerà wãivĩ mõ wereko mijã. Ajaire nijãkarãive ipupe remeve okãjã werekwarà wyi. 30Ajaire ivo jẽ imõmirĩ akypyporà. 31Ajaire ivo mijẽ imẽnà okãjã iwyi. Ajaire imõmirĩ ekovijarerà wereko mijẽ rõnõ. A'evo 'evo ajaate 7 rõmõ wereko ipe wãivĩ. Wereko reko ity kupa. Okãjã kãjãma iwyi kupa. Nijãkarãive remeve opa kupa. 32Ajaate wãivĩ terekwarerà tè okãjã ky'y, e'i kupa.

33Aepo jaa rè kee e'i oporanu Jesu pè kupa:

– Kãramõ Janejare'e poromomoera remẽ, ava rerekwarà rõmõ ekoità? Emã'ẽ, 7 rõmõ werekopa mijã. Ava reve põ ekoità ãmẽ, opoera opõ'ã mijẽ remẽ? Emome'u ore awi, e'i Jesu pè ijã'ã esa kupa.

34[Ajamã'ẽ Jesu okuwapa Satuseu kõ, “Janejare'e nomomoera'ãi okãjã maekwerà kõ ipi”, e'i kupa ipi.] Ajawyi kee e'i ijupe kõ:

– Age'e remẽ ike rupi tekou remẽ tè jane kõ ojireko ipi. 35Na'evo'ãi ãmẽ kãramõ remẽ, e'i. Janejare'e opota omomoera eraa opyri mãe kõ nojireko'ãi ãmẽ ky'y. Ovo rupi tevetà a'evo remẽ. 36Awyje tè oiko karuarutà a'e pè. Mã jẽ rõwã okãjãtà a'e pè ky'y. Ãwitõ Janejare'e remĩgwai yvapewarà kõ nokãjãi. Ãwĩvotà jane kõ ky'y. Janejare'e ãkarãgwerà kõ rõmõtà ekoi kupa, emimomoera kõ, e'i Jesu.

37E'i jẽ Jesu:

– Pekuwa ipe tãmõ Moisesi remikusiwarerà. A'e ve omojikuwa teve jane kõ jimomoeraa mã'ẽ rewarà. Kõi tãmõ Moisesi ka'a mitigà nokai'ãi maevo sõ tite mã'ẽ pyryvo tui remẽ, kee e'i itõkõ Janejare'e ijupe: “Ije tè nerãmõi kõ Rõvijã wasu rõmõ aiko. Aparão Rõvijã wasu. Ãmõ, Isaki Rõvijã wasu. Ãmõ, Jako Rõvijã wasu teve ije”, e'i itõkõ Janejare'e tãmõ Moisesi pè.#Jisyry. 3.6 A'evo remẽ karamoeve Aparão kõ okãjãma. 38Ajamã'ẽ omãnõ mãe kõ rõvijã rõmõ rõwã Janejare'e ekoi ipi. Uve jẽ mãe kõ rõvijã rõmõ tè ekoi. Uve jẽ mã'ẽ vo 'ejẽ Aparão kõ ekoi ijupe, kãramõ omomoera kõ tarà mijẽ rewarà mõ. Ajawyi “nerãmõi Aparão amyry” ne'i tãmõ Aparão pewarà mõ. “Nerãmõi Aparão” e'i tè. Ajaa rupi kee jakuwa: Uvetà omãnõ maekwerà kõ jimomoeraa. Aje ywete a'e pejẽ, e'i Jesu Satuseu kõ pè.

39Ãmẽ aepo renu mẽ ãmõgwerà tãmõ Moisesi remikusiwarerà rè poromo'e mãe kõ kee e'i Jesu pè kupa:

– I'eay wete neporegeta, oremo'earà, e'i kupa.

40Aja paire ava, “Jesu taayvumoopa”, ne'i'ãi ky'y. Ojirokyje kupa ky'y. “Kãramõ ajimogweroka ijupe ne”, e'i kupa ajawyi.

Jõvijã Tavi Jeapyry rewarà

(Mateusi 22.41-46; Maku 12.35-37)

41Kee e'i Jesu ajaire ijupe kõ:

– Tãmõ Moisesi remikusiwarerà rè poromo'e mãe kõ poromo'e remẽ, kee e'i kupa ipi: “Jõvijã Tavi jeapyrerà rõmõtà tè Janejare'e Remimuuarà rã”, e'i kupa ipi. Manyvore põ aepo e'i kupa? 42-43Emã'ẽ. Jõvijã Tavi kee e'i itõkõ ojĩgarà rupi:

“Janejare'e e'i Erõvijã ywete pè:

‘Ejo e'ekatu kytyre tereapy rejupa aja puku pè,

newyry kyty tè neãpã kõ tamoigooka ãmẽ’, e'i Janejare'e ijupe maekwerà”, e'i itõkõ tãmõ Tavi ojĩgarà rupi.#Jĩg. 110.1

44Ajawyi kee a'e pejẽ: “Erõvijã ywete” e'i tãmõ Tavi Janejare'e Remimuuarà rã pè, ãwisõ ijeapyry rã teipe remẽ. Manyvo pejẽ põkõ aepo jaa renu ijupe kõ? e'i.

[Nipui ãmẽ kupa.]

“Moisesi remikusiwarerà rè poromo'e mãe kõ rekoa rupi tapeiko e'ã”, e'i Jesu mã'ẽ

(Mateusi 23.1-36; Maku 12.38-40)

45Ãmẽ jane kõ Jesu ayvu wenu enu remẽ, e'i Jesu wemimo'ekwerà kõ pè:

46– Mokoi. Pemãrãmoa'u ikõ peiko tãmõ Moisesi remikusiwarerà rè poromo'e rã'ãga mãe kõ rekoa rè ipi nẽ. Wee ywesõ oja'a kupa ipi. “Temoe'e ekojẽ ãmõ kõ”, e'i oupe kupa ipi. Ajawyi tyru e'ekwerà epy wete mã'ẽ opypy takatu erojivy jivy ojikuwa rõmõ kupa ipi. Ajawyi rõwã sikõ, Janejare'e ayvu rè jimo'ea retã kõ wyry pè oike kupa remẽ upi upi, jõvijã apyka kõ pè wapy kupa jane kõ rovake ipi. Ãmõ, jimiwa wasu pè oo mõropãrà kõ rõmõ remẽ, kee e'i oupe kupa ipi: “Poromojimi'uarà kee e'i kuwa ije: ‘Ene ypy ejo aã ike epyri eapy’, e'i kuwa ije”, e'i oupe kupa ipi. 47Mãi põ terekwarerà kõ rè oja'atà kupa ajamã'ẽ? Niĩ! Kee e'i kõrijõ tè kupa: “Eeru ekojẽ moma'e mõ”, e'i kupa ijupe kõ ipi. Ajawyi imona terekwarerà kõ moma'e rè kupa ipi. Ajaire Janejare'e pè oporegeta puku rã'ãga ãmõ kõ rovake tomoe'e kupa ipi. Moko wereko ojipijarĩ tarepe kupa ipi. Ajamã'ẽ Janejare'e okuwa katu ekoa aiwerà kõ. Omomorijauoka kõ ywetetà kãramõ. Ãwĩ kõ ywesõ omomorijautà ãmõ kõ wyi, e'i Jesu.

Actualmente seleccionado:

Rukasi 20: oymNT

Destacar

Copiar