1 Tesalonaika 5
5
An Ko Ntimpramp Yupulp Jisas Na Yoel
1Sank keielel ka sank arank, an korokn nimpil nikimp yipm sank irpm yupulp arikel kona Jisas na yoel. 2Ka apulp yipm ankil ka ntinkirai ampulp. Kil kako yo eik nintipmel nuarep nti omoule wornketeel ka etn wunoumpel. 3Aninkel kilelel nti ementitmuaken ko nek na, “Yemp keiye ka niuluknunimp, an keiye ar sepmelimp. Nti nak sopilelel aser, wankepm kona ninink nti eik nintipmelel sop yakop ka nti muaken nkamp apulp ninkilapm nti na raelel. Aser yakop kako nti semp yer onto Wulapm Weinkelel kako soplekekn, nti kakorokn serkemp. 4Aser yipm ntitmuaken Wulapm Weinkel, yipm ka yatel. 5Yapmonemp yipm karokn nimpiemp nako yipm nkis eik kukokukoel, et ko yipm serk eik utnumpulel yupulp Jisas kona kil na yo eik nintipmel nuarep omoule wornketeel. Karokn. Yapmonemp aiyipmel ka mpilil, ka ntinkirai ampulp. 6An ka ar yemp yapelel nako yekei yapmonemp mpililel yer nkis, et an kakorokn yupul sop nti yatel. 7An ka nimpiriepm apulp nti, yapmonemp antuol karokn akuorp nako nti nekerpm Wulapm Weinkel. Nti omoule sopilelel, yapmonemp antuol karokn mpilil apulp sankminamp sepmel, ka nuarep nti ka etn yemp nimpiempel. Nti omoule ka akei nimpiemp nkuwur, nti ka al mpep koret apul amamp kukoel, nti ka nuarep omoule ka ar niumpu wuntuelel. 8-10Et yipm kako yetn wonemp, yep wule aiyipmel. Yapmonemp antarkoel ka ar mpilil, et kakilpe Wulapm Weink karokn yuwak an na semp yakop yer onto ankilel yupulp sankminamp koretel. Karokn. Kil wul an na yer onto ankilel. Krais Jisas ka nkamp yemp antelel wuntu ar lonkuntonkel apulp yapmonemp koretel antelel. Et sopilelel kil ka nantip mo arkomp an, apul an na yer onto ankilel yetn yemp yapelel yentemp yapmonemp mpililel. Kakilpe minamp sepmel an ko sopel ka sopeiye. An ko yupulp Wulapm Weink sitel, yekei kil nkael nako an yekei yapmonemp mintenkel niampepmitneipil nako kil sempop anel. Et an ko yekei onto niupuknel nkrawomp nti eikusukn. Kona an yupul sopilelel, ka nuarep an ka ontonkamp lontumpua nimimpiepm, kako ntunkuorp an aipopelel. Et an ko wamiyimp yapmonemp ntinkiliempel Wulapm Weinkel kile na yentempil yer sepmel yopmoiel. An kona yuwurel, arokn an kona nkis ekeipmelel, et an kako yentempil yer sepmel soplekekn. 11Kona ntokilelel, yipmarko ementitmuaken Wulapm Weinkel lekekn lekekn kako yekei sank keielel na mintenkitneip yipm aiyipm sop karep yipm apulel.
Wulapm Weink Kileko Yikiwat Nti Kristen
12Nti omoule ka Wulapm Weink wul nti na yuwulmp yipmel, et yipm ko yep nti waleiel eipm sank antuol. Nti ka awor sank ntontomp tikiremp yipm aiyapel Wulapm Weinkel, et ko yipm nekerpmel. 13Niokn ka nti apulel ka ntinkiliemp, et yipm ko yiki nio antuol yumpulp. Yapmonemp yapel aiyipmel ko yer yentemp nti nako yipm nkis niuluknun yentemp yipm aiyipm. 14Et keiye an na yiki yipm yapmonempel et yipm ko sankyentemp nti omoule likipel ka nkarkemp nioknelmpel. Aser nti omoule ka nkarkemp muatiel, ko yipm mintenkitneip nti, ko nti nimpil yer niuluknun. Aser nti minimini ka awup ntinkiliempel ko yipm yikiwat nti. Kona yipm yupul ntokilelel, et yipm ko yekei yapmonemp eperiepmel yentemp nti eikusukn. 15Kona emelel na yupul yipm koretel, yipm korokn nimpil yupul kil koret ware. Karokn. Aninkanink et yipm ko yekei yapmonemp sepmel yentemp yipm aiyipm nompueip nti ntitmuaken eikrieknel eikusuknel. 16-18Aninkanink yapmonemp aiyipmel ko yer yentemp mpuaimpuai sitel, nako yipm yimp Wulapm Weink nikimpil sank ntenktenkel. Kona sinsi mimi sepm koret ninkemp yipmel, et yipm ko nek tukuaremp Wulapm Weink yumpulp. Kona Krais Jisas yer yopmoi nilmpniumpuaipm aiyipmelel, et yapmonemp Wulapm Weinkel nak na yipm ko yupul sopilpe. 19Kona Pirpm Wulapm Weinkel na yupul niokn ntoka yete ka kakirp noel, yipm korokn yukur. 20Et kona emel kana nek yoworp yapmonemp Wulapm Weinkel, et yipm korokn mpuar opmoump yer kil. 21Et yipm ko wonempwaiyimp walei yuwup weink ka ar kipmin. Et sank ko sepm ko wat yo ntunk sop yapmonemp Wulapm Weinkelel, ko yipm yump yo yapmonemp ko yupul nsop. 22Oroknel, ko yipm eik ontonisepel. 23Yapmonemp musukorel ka nkarp ar Wulapm Weink sitel, kakilpe apm aiyimpil nako kil yupul yapmonemp nilmpniumpuaipm aiyipmel sukurel na yer onto ankilel sitel yupulp ko kil yuwulmp yipmel. Et kona Jisas Krais na nimpil yoelel, kipminkiriekn aiyipmel kako yer ntinkirai sitel. 24Et Wulapm Weink ankil ka aiyimpukuap yipm na sop kil, et kakilpe mintenk ankilel ko yupulp yipm. 25Mamuntoump antelel nti, yipmarko ko yimp Wulapm Weink nako kil ko nuworpm an. 26Et ko yipm ninkemp nti mamuntoump Kristenel aiyipmel, et yipm ko neremp nti, ontoyer nti. 27An akei nio Sepmel Antelel Jisasel nakimp yipm na wupm keielel ko yipm yetn yapel yimp na nikimp nti ntitmuaken Wulapm Weinkel eikusuknel. 28An aiyimp Sepmel Antelel Jisas Krais, kil kako wonempyupulp yipm yopmoi yopmoiel. Kakilpe. Sank apmelel ka kipe, ka miniat.
Actualmente seleccionado:
1 Tesalonaika 5: xbiW
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2000, Wycliffe Bible Translators, Inc. All rights reserved.