Mateo 1
1
Sadat Ginnapuwan Jesu Kristu
(Lucas 3:23-28)
1Satu dit matuntunan dat ginnapuwan Jesu Kristu un kaganakan didit Ali David un ganak didit Abraham.
2Sadit Abraham, aman dit Isaac. Sadit Isaac, aman dit Jacob un aman Juda kan sadadit sunud na. 3Sadit Juda, aman dadit Fares kan Zara ot sadit Tamar dit ina da. Sadit Fares, aman dit Esron un aman Aram. 4Sadit Aram, aman dit Aminadab. Sadit Aminadab, aman dit Naason un aman Salmon. 5Sadit Salmon, aman dit Boaz un sadit Rahab dit ina na. Sadit Boaz, aman dit Obed ot sadit Ruth dit ina na. Sadit Obed, aman dit Jesse. 6Sadit Jesse, aman dit Ali David.
Sadit David, aman dit Solomon un imputut na utdit siguda asawan dit Urias.#1:6 Ilan yu utdin 2 Samuel 11 7Sadit Solomon, aman dit Roboam. Sadit Roboam, aman dit Abias un aman Asa. 8Sadit Asa, aman dit Josafat. Sadit Josafat, aman dit Joram. Sadit Joram dit kapuunan Ozias.#1:8 Sadit Ozias umapu kan Joram. 1 Cronicas 3:11-12 9Sadit Ozias, aman dit Joatam. Sadit Joatam, aman dit Acaz un aman Hezekias. 10Sadit Hezekias, aman dit Manases. Sadit Manases, aman dit Amon un aman Josias. 11Sadit Josias, kapuunan dit Jeconias kan sadadit susunud na. Siyatu dit timpu un namapilitan dat iBabilonia un nangaḻ-an sidat iyIsrael un pinambalin da dida’n baba-unon.
12Utdit inggawan da ud Babilonia, naiyanak si Salatiel ot si Jeconias dit amana. Sadit Salatiel, apun didit Zorobabel.#1:12 Sat Salatiel, apun didit Zorobabel. 1 Cronicas 17-19. 13Sadit Zorobabel, aman dit Abiud. Sadit Abiud, aman dit Eliakim un aman Azor. 14Sadit Azor, aman dit Sadoc. Sadit Sadoc, aman dit Akim un aman Eliud. 15Sadit Eliud, aman dit Eleazar. Sadit Eleazar, aman dit Matan un aman Jacob. 16Ot sadit Jacob, aman ud Jose un asawan Maria un nangiyanak kan Jesus un mauguda Kristu.
17Ot manipud kan Abraham inggana kan David awad da ud kagwampuḻu’t opata lonap. Kagwampuḻu’t opata lonap uman manipud kan David inggana’t dit naidallayan da ud Babilonia ot kagwampuḻu’t opata lonap payyan manipud sit naidallayan da ud Babilonia ingganaon sit naiyabengan Kristu.
Sat Naiyabengan Jesu Kristu
(Lucas 2:1-7)
18Kama’t tu dit kaugudan dit naiyabengan Jesu Kristu. Si Maria un inana naipaad kan Jose, yoong utdit daan da payyan man-asawa natigammuwan Maria un nabugiyon maipagapu’t dit pannakabalin Ispiritu Santu. 19Ot gaputa nalintoga tagu si Jose un naipaadana, adina piyaona maibabbain si Maria ot pinanggop na un isina si nalimod. 20Kama’t di dit simsimmok na yoong nilumtaw ud anghel Apudyus kan siya si in-inop un kanana’n, “Jose un kaganakan Ali David, adika umogyata mangasawa kan Maria ta nabugi utdit pannakabalin Ispiritu Santu. 21Mangiyanak si laḻaki ot ngadanon yu kan Jesus ta taguwona dan tagu utdan basuḻ da.”
22Nakwa’n losan datu daḻapnu matungpal dit ugud Apudyus un paimbagana’t dit propeta na utdit un kanana’n, 23“Mabugi’d osa’n babai’n daan payyan di laḻaki’n aduḻon ot mangiyanak si laḻaki’n mangadanan si Immanuel, un piyaona’n ugudon, ‘Awad si Apudyus kan ditaku.’ ”
24Utdit lumikna si Jose, tinungpal na dit imbagan dit anghel Apudyus un koona, ot inasawa na si Maria. 25Yoong adina yan inaduḻ inggana’t inyanak Maria dit bugi na un ningadan Jose kan Jesus.
Actualmente seleccionado:
Mateo 1: kmk
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2003, Wycliffe Bible Translators, Inc. All rights reserved.