Jon 1

Jisas nong di ga kilam ie bia no Nianga ga hanuat wara hapalaine dahat uta God.

1Nalua tano haburen ta ira linge bakut, no Nianga gate kis. Ma no Nianga ga kis tika ma God, ma aie at mon mah God. 2Ga kis tika ma God menalua at tano haburen ta ira linge bakut.

3Ma iakan ra Nianga, God ga hakisi ira linge bakut mei. Ma taie tiga linge pa ga hanuat, bia God pa ga gil ie mei. 4Ma aie at mon no burena tano nilon tutun. Ma iakan ra nilon, aie no lulungo nong i hapalaine ira tunotuno uta ira tutun ta God. 5No lulungo i hamadaraas no kankado, iesen no kankado pai le burung ie.

6Tiga tunotuno, nong God ga tulei, no hinsana ne Jon. 7Ga hanuat wara hinhinawas uta iakano lulungo. Ga gil huo bia ira tunotuno bakut ing diet na hadade ie, diet naga nurnur tano lulungo. 8Pai aie at iakano lulungo, iesen ga hanuat mon wara hinhinawas utano lulungo. 9Iakana baak no lulungo tutun nong te hanuat ukai tano ula hanuo ma i hapalai ira tunotuno bakut.

10No Nianga ga kis kai ta iakan ra ula hanuo. Ma a tutun bia God ga hakisi no ula hanuo mei, iesen ira tunotuno balik ta iakan ra ula hanuo diet pa ga nes kilam ie. 11Ga hanuat tano uno katon, iesen ira uno matanaiabar diet pa ga bale halaka leh ie. 12Sen bia diet ing diet ga bale halaka leh ie, ga haut se tar diet bia diet naga nati God. Diet at kaike ing diet ga nurnur tana. 13Pa di ga kaha diet hoira tinahuat ta ira tunotuno, bia ta ira sinisip gar na tunaan mon. Iesen taie. Diet tahuat laah ta God.

14Ma no Nianga ga tunotuno um, ma ga lon nalamin ta mehet. Ma mehet ga nas no uno minamar, a minamar gar na halhaliana bulukasa meram ta nana Sus. Ma ga hung ma no harmarsai ma ga hapuasne bakut mah ira tutun ta God.

15Io, Jon ga hinhinawas palai utana ma ra dadas hoken: “Iakan iau ga hinhinawase muat utana. Iau ga tangtange, ‘A tutun bia i hanuat menamur tagu iesen i tamat at tagu kanong pa di ga kaha baak iau, ma iakana iaat.’” 16Ma i hung taar ma no harmarsai, kaik gi la tamtabar haitne dahat bakut me. 17Io, God ga tar ira harkurai uta dahat tane Moses, iesen ga tar no harmarsai ma no palpalai ta ira tutun utana at ukai ho dahat tane Jisas Krais. 18Taie tikai pai nas baak God. Iesen God no bulukasa i la kis pirap taar at nana Sus. Ma aie at gate hinawas hapalaine dahat utana.

Jon no ut na baptais ga harus bia aie pai no Mesaia.

(Matiu 3.1-12; Mak 1.1-8; Luk 3.1-18)

19Io, no hinhinawas palai tane Jon utane Jisas hoken. Ira tamat ta ira Iudeia kaia Ierusalem, diet ga tule ari a ut na pakila lotu ma ari tano hun tane Lewi ing diet la harharahut ta ira pinapalim na lotu ukaia hone Jon. Ma diet ga me tiri ie bia a mangana tunotuno sa ie. 20Jon pa ga malok bia na balu diet, iesen ga hinawase hapalaine at mon diet, gaam tange bia, “Taie bia iau no Mesaia.”

21Diet ga tiri habalin ie, “Ma sige um ugu? Ne Elaija ugu?”

Jon ga balu diet, “Taie, iau pai Elaija.”

Diet ga tiri habalin ie, “Augu no tangesot?”

Ga balu habalin at diet ma ga tange, “Taie.”

22Io, diet ga tange tana, “Kaia, nu hinawase um mehet bia sige tun at ugu, waing mehet naga hinawase diet ing diet tule mehet ukai. Nu tange hohe wara utaam?”

23Jon ga balu diet ma ira nianga tano tangesot Aisaia hoken:

“Iau no ingana i taatau meram ra hanuo bia,

‘Gil hatakodasne no ngaas tano Watong wara uno hinanhuat.’”

24-25Io, ari Parisi ing di ga tule, diet ga tiri Jon hoken: “Bia pai no Mesaia ugu, ma taie bia ne Elaija ugu ma taie bia no Tangesot ugu, u la baptais wara biha?”

26Ma Jon ga balu diet bia, “Iau la baptais muat tano taah, iesen tiga nong kana nalamin ta muat, muat pai nes kilam ie. 27Aie nong na hanuat menamur tagu. Ma iau pai haruat bia ni lapus ira hinau ta ira pupunaak na kakine.”#1.27 Jon ga hirhir bia na gil iakan ra magingin ing tiga maris gaar gil tar tiga watong kanong Jisas i manga tamat sakit.

28Kaiken ra linge bakut ga hanuat tano taman Betani, arau tiga palpal tano taah Ioridaan, ing ne Jon git baptais kaia.

Jisas aie nong na suge se ira ronga ma na baptais ma no Halhaliana Tanuo.

29Tano mes na bung um bia Jon ga nas leh Jisas ma ga hananuat ukaia ho ie, ga tange, “Muat nes baak! Iakan no nat na sipsip na hartabar nong God ga tulei ukai wara kapkap se ira ronga ta ira tunotuno. 30Iakanin mon no tunotuno nong iau ga hinhinawase muat utana. Iau ga tange hoken: ‘A tutun bia iakan ra tunotuno i hanuat menamur tagu, iesen i tamat at tagu, kanong pa di ga kaha baak iau, ma iakana at.’ 31Ma iau at, iau pa ga nunure bia sige iakanong na hanuat. Ma sen bia iau hanuat iau baptais muat ma ra taah bia ni hapalaine muat ira Israel utana.”

32Io, Jon ga hinawas palai ta diet hoken: “Iau te nas no Tanuo ga hansur meram ra ula mawe hoing tiga bun, gaam a kis um tana. 33Ma iau pa ga nas kilam baak bia aie at mon iakanong na hanuat. Iesen God, nong ga tule iau wara baptais ma ra taah, gate tange tar tagu hoken: ‘Nu nas no Tanuo na hansur ma na kis um ta tiga tunaan. Io, iakanong at mon nong na baptais ma no Halhaliana Tanuo.’” 34Ma Jon ga tange, “Iau te nas tar ie, kaik iau gi hinawase muat bia aie at mon no Natine God.”

Ari a bulu na harausur tane Jon diet ga nas kilam Jisas bia aie no Mesaia.

35Io, tano bung menamur Jon ma airuo ta ira uno bulu na harausur dal ga tur balin taar kaia. 36Ma bia ga nas Jisas ga hanan sakit, ga tange ta dir, “Mur nas baak! Iakanan no nat na sipsip na hartabar nong God ga tulei!”

37Bia ira airuo bulu na harausur dir ga hadade hokaike, dir ga mur leh Jisas. 38Jisas ga talingane dir ma kana dir ga murmur hanii, io ga tiri dir, “Mur sip sa?”

Dir ga balui, dir gaam tange, “Rabai, u kiskis he?” (Ma no kukuraina ta Rabai bia ‘tena harausur.’)

39Io, Jisas ga tange ta dir, “Mur mai, mur naga nas.” (Ma gate hutet bia na aihat na pakana bung tuai um ra matarahien.) Io, dir ga sakate leh Jisas, dir gaam a nas no katon ga kiskis tana, dal gaam kis tano matarahien bakut kaia.

40Io, Andru no tasine Saimon Pita, tikai ta dir kaike ing dir ga hadade no nianga tane Jon, kaik dir gom mur leh Jisas. 41A luena linge, Andru ga nas leh no tasine Saimon, gaam hinawasei bia, “Mir te silihe leh no Mesaia.” (Ma bia da pukusanei na haruat mon bia ‘Krais’.) 42Io, ga lamus tar Saimon tane Jisas.

Jisas ga nas ie ma ga tange tana, “Augu ne Saimon no natine tikai di kilam ie bia Jon. Iesen da kilam ugu bia ne Kepas.” (Da pukusane bia ‘Pita’.)

Pilip ma ne Nataniel dir mah, dir ga nas kilam Jisas bia aie no Mesaia.

43Io, tano mes na bung menamur Jisas ga sip bia na haan uram Galili. Bia ga nas leh Pilip ga tange tana, “Mur iau.” 44Ma Pilip nong me Betsaida, no taman mah tane Andru ma ne Pita. 45Pilip ga nas leh Nataniel, gaam a hinawasei bia, “Mehet te silihe leh no tunaan nong Moses ga pakpakat utana narako ta ira nianga na harkurai. Ma aie at mah nong ira tangesot diet ga pakpakat utana. Aie mon ne Jisas meras Nasaret, no nati Iosep.”

46Ma Nataniel ga tange balik tana, “Taie ta tahut na linge pa na hanuat meras Nasaret!”

Io, Pilip ga tange, “Mai, nugu nes.”

47Ma bia Jisas ga nas leh Nataniel ma ga hananuat, gaam tange bia, “A tutun sakit, iakanin tiga tunotuno me Israel. Pai nunure at ra harabota.”

48Nataniel ga tiri, “U nunure habibihane iau?”

Jisas ga balui, gaam tange, “Bia Pilip baak pai tatau ugu, iau nes tar ugu arau ra hena no ina papus kaia.”

49Io, Nataniel ga tange, “Tena harausur, augu no Nati God! Augu no tamat na lualua na gil harkurai gar na Israel!”

50Ma Jisas balik ga tange tana, “U nurnur kanong iau tange taam bia iau nas tar ugu ra hena no ina papus.#1.50 Jisas ga hapalaine ie huo bia ga huna nunure ie. Iesen nu nas baak tari a linge ing diet tamat ta iakan.” 51Io, ga tange habalin tana, “Hadade baak! Muat na palai utagu. Na ngan hoing bia no mawe na tapapos ma ira angelo ta God diet na hanansur taar ta Nong a Tunotunoi ma diet na hananut baling tana.”

Actualmente seleccionado:

Jon 1: gfkNTP

Destacar

Copiar