Manu - WBT (Mark,John) Non Drama

Manu - WBT (Mark,John) Drama

“Pô̤̌khô sî gǔ wîkè sî ta̤yṳ̌ta̤nǎ̤ tô̤̌nu, he shôbǐǐlṳ̌ bòbǎ hto sî ta̤nutokhlǒ hǒ. Kòyò gǔ wṳ̂̌hǎhtò̌kè sî dǒ ta̤cabahǐ tokhlǒ akhlo pě. Kòyò dǒ a ma̤si sî tokhlǒnu a gènè̤ tûû̌ anǎ̤ kû̌, ‘pa ma̤ Cǒmara ata̤ma̤ hǒ,’ shěkhǎ pô̤̌onu, a gǔ hètǒ̤ pě. A cû̌ ma̤tǒ̤ lô̌khô pô̤̌o ma̤titèhî̌dě asî sî̌ganǎ̤bǎnô̌ pha tôkhò̌꤮ tô̤̌, htodě a sî̌ganǎ̤bǎnô̌ he tôkhò̌꤮ tô̤̌. Htû̌꤮ ta̤shěta̤khǎ hètǒ̤ pě akhanu, sî gǔ khòbǎ ta̤jî̌ta̤jû̌ tokhlǒ pě. Pô̤̌khô sî gǔ gènè̤htò̌sô̌ ta̤ dǒ he dǔlè̌lṳ̌ nǎ sî ta̤hǒotokhlǒ ayanudě, he shôbǐǐlṳ̌ nǎ bǎ sî khònò̤̌ hǒ. Dǒ akòshî̌kha numî̌ he ô̌cu kû̌ sî akhû̌akhî, he shôbǐǐlṳ̌bǎ sî tô̤̌.”

“Khònò̤̌dě, he gǔ ge dǒ kòyò nohè he nutôpwa̤ a ô̌ hǒ. ‘Na glè̌ cû̌bǎtè tôkûya pěnu,’ sî gwè̌ he tôpwǎ̤꤮ tô̤̌. He hî̌lṳ̌ bǎ sî pô̤̌o dě sî sǎplǎ̤nǎ̤bǎ bò. Kè̌ hî̌ bò̌꤮ bò yô̤̌sǎ mî̌, he cû̌kè sîlǎ̤ mî̌ awô̌ khlo dǒ sîya, ma̤titèhî̌dě he kè̌ cû̌ tô̤̌ hî̌nu, pwa̤ma̤jè̌ a mè̤̌mî̌ca kû̌ Yôla Plò̌shǐ Běcǎ tôpwa̤ hè dǒ sîô̌ tô̤̌. Bǎbǎkǎlè he kè̌ cû̌ hî̌nu, he gǔ nohèlò̤ a dǒ sîô̌ pě. Bǎ Yôla Plò̌shǐ Běcǎ hètǒ̤ pě akhanu, a gǔ dǐsî̌ganǎ̤ bǎ kòyò hǎkhû̌phû̌ tokhlǒ kû̌ asî ma̤ ta̤sǔ pě, htodě a gǔ dǐsî̌ganǎ̤ bǎ pô̤̌ asî kû̌ ta̤tě̤ta̤mè̤̌ aklè̌ pě. Htokhôtô̤̌, a gǔ dǐsî̌ganǎ̤ bǎpô̤̌ asî kû̌ Cǒmara gǔ cî̌htò̌ asî pě. Dǒ asî yṳ̌ǎ he tô̤̌ akhû̌akhî, a dǐsî̌ganǎ̤hto asî kû̌ asî ta̤sǔ ô̌ hǒ. Ma̤titèhî̌dě, he gǔ ge dǒ pha a ô̌ pě dě sî kè̌shǐ pe he tô̤̌ akhû̌akhî, Yôla Plò̌shǐ Běcǎ gǔ dǐsî̌ganǎ̤phlô bǎ asî kû̌ ta̤tě̤ta̤mè̤̌ aklè̌aklò pě. Cǒmara cî̌htò̌hto hǎkhû̌tana Setò̤ dǒ a pǒ hǎkhû̌ nutôdo hǒ akhû̌akhî, a dǐ sî̌yaphlô hto kòyò hǎkhû̌phû̌ tokhlǒ kû̌ Cǒmara gǔ cî̌htò̌ asî pě hǒ.
“Ta̤ dǒ he sǎyṳ hî̌ bǎ pô̤̌ sî tokhlǒnu a ô̌ dû̌wî̤pe, bǎbǎkǎlè sî sî̌yaphlô bò̌bò nò̌khôtô̤̌. Bǎ Yôla Plò̌shǐ Běcǎ dǒ a dǔlè̌lṳ̌ ta̤tě̤ta̤mè̤̌ hèlò̤pě akhanu, a gǔ nè̌klè̌nè̌klò bǎ sî kû̌ lǒ̤bò ta̤tě̤ta̤mè̤̌ nutokhlǒ pě. A gǔ shôbǐǐlṳ̌ bǎ sî kû̌ a ta̤gènè̤ tûû̌nu mè̤̌tô̤̌. A gǔ shôbǐǐlṳ̌ bǎ sî pô̤̌ a ganǎ̤de hè dǒ Cǒmara a ô̌ nutokhlǒ pě. A gǔ dǔlè̌lṳ̌ bǎ sî kû̌ ta̤ dǒ a htûhtò̌ khôtô̤̌ nutokhlǒ pě. Dǒ a hè shôbǐǐlṳ̌ bǎ sî kû̌ lǒ̤bò a ganǎ̤de ta̤ dǒ heô̌ nutokhlǒ akhû̌akhî, a gǔ ma̤bwǐdû̌ma̤sîrîhtû he pě. Lǒ̤꤮ bò ta̤ dǒ a ô̌ kû̌ pha tokhlǒ numî̌ heta lǒ̤bò hǒ. Htodě he hî̌ bǎ sî kû̌ Yôla Plò̌shǐ Běcǎ gǔ hè shôbǐǐlṳ̌ bǎ sî lǒ̤bò a ganǎ̤de ta̤ dǒ heô̌ nutokhlǒ pě, pô̤̌nu.”

“Yî̤khôtô̤̌ hî̌pě sî kè̌shǐnô̌ pe he tô̤̌, Bǎbǎkǎlè yî̤khôtô̤̌ hî̌pě sî kè̌shǐ sô̌ he pě.”
A khôphijǎ tokhlǒkhlǒnu, a gwè̌ kè̌khî lû̌û tôpwa̤ kû̌ tôpwa̤ dě a hî̌ lô̌khô kû̌, “A cû̌ hî̌ tǒ̤ kû̌, ‘yî̤khôtô̤̌ hî̌pě sî kè̌shǐnô̌ pe he tô̤̌, bǎbǎkǎlè yî̤khôtô̤̌ hî̌pě sî kè̌shǐ sô̌ he pě’ a hî̌ pô̤̌numî̌ a sǎyṳhî̌ yô̤̌mûyô̤̌sǎ hî̌tè?” Htodě asî hî̌ lô̌khô kû̌, “‘Ma̤titèhî̌dě he glè̌ cû̌ dǒ pha a ô̌,’ a hî̌ pô̤̌numî̌ a sǎyṳ hî̌ yô̤̌mûyô̤̌sǎ hî̌tè?” Dě asî gwè̌ kè̌khî pe lû̌û kû̌, “‘Yî̤khôtô̤̌ hî̌pě,’ a hî̌ nutômû mî̌ a sǎyṳhî̌ mî̌titè? A sǎyṳ hî̌ ma̤hî̌tènu, pa sî̌yaphlô htûpetô̤̌.”
Běcǎ Yeshǔ sî̌ganǎ̤ dǒ asî sǎyṳ gwè̌ lû̌û ta̤we̤ta̤kè hǒo akhû̌akhî, dě a hî̌ asî kû̌, “He hî̌ bǎ sî kû̌, ‘Yî̤khôtô̤̌ hî̌pě sî kè̌shǐnô̌ pe he tô̤̌, bǎbǎkǎlè yî̤khôtô̤̌ hî̌pě sî kè̌shǐ sô̌ he pě,’ nu he sǎyṳ hî̌ yô̤̌mûyô̤̌sǎ titènu sî gwè̌ kè̌khîlû̌û tôpwa̤ kû̌ tôpwa̤ yahě? He hî̌cǒcǒ sî, bǎ kòyòhǎkhû̌phû̌ tokhlǒ gǔ sǎlě̤sǎlò̤ mè̤̌mè̤̌pě akhanu, sî gǔhǎgǔwô lô̌khô pě. Dǒ he khòbǎ ta̤jî̌ta̤jû̌ akhû̌akhî, sî gǔ sǎplǎ̤ jî̌ pě, bǎbǎkǎlè sî nǐ̤bǎ ta̤sǎplǎ̤nu a gǔ htûhtò̌ tèplè̌ bǎ sî kû̌ sî sǎlě̤sǎlò̤ mè̤̌mè̤̌pě. Asô̌sô̌kû̌ pwa̤mǒ̤ phû̌ô̌ hǐphusha nupě. Bǎ a hǐphusha akha, a khòbǎ ta̤pò̤̌ta̤sha bǎbǎkǎlè bǎ aphû̌ô̌hto akhanu, a shôpe̤nǎkè a ta̤pò̤̌ta̤sha tokhlǒ, ma̤titèhî̌dě aphû̌ô̌htò̌ phijǎphû̌ tôpwa̤ dǒ hǎkhû̌nu akhû̌akhî, a sǎlě̤sǎlò̤ hèpě. Ta̤ gǔ htûhtò̌ sô̌sô̌ kû̌ sî pô̤̌o nupě. Khònò̤̌dě sî gǔ sǎplǎ̤ pě, bǎbǎkǎlè he gǔ kè̌shǐ sô̌ sî pě dě sî gǔ sǎlě̤sǎlò̤ pě. Htokhôtô̤̌ kòyò phî̌ge jò pe sî ta̤sǎlě̤sǎlò̤ tôpwǎ̤꤮ tô̤̌ pě. Bǎnutini̤ pěnu, sî gwè̌ pe he tôcǒ tô̤̌ pě. He hî̌cǒcǒ sî, sî gǔ kwi hepha titètè̌꤮ bǎbǎ, sî kè̌ kwi kû̌ hemi̤ hî̌nu, hepha gǔ ǐ sî pě. Tǒ̤lò̤khònò̤̌nu, sî kwi kû̌ hemi̤ tôcǒ tô̤̌. Kwi mò̌ lô̌khô, sî gǔ nǐ̤bǎ pě. Dě sî gǔ nǐ̤bǎ lǒbe ta̤sǎlě̤sǎlò̤ pě.

“He pwe̤ǐ bǎ sî ta̤hǒo tokhlǒ kû̌ yô̤̌sǎkhěkhô̌ tokhlǒ. Bǎbǎkǎlè shěkhǎ dǒ he lǎ̤lṳ̂ hî̌bǎ pe kû̌ yô̤̌sǎkhěkhô̌ tô̤̌nu, a gǔ hètǒ̤ pě. He gǔ pwe̤ǐlṳ̌ bǎ bò sî kû̌ hepha awe̤akè pě. Bǎnutini̤ pěnu, sî kwicabahtò̌ lô̌khô kû̌ hemi̤ pě. Dě he lǎ̤lṳ̂kwi bǎ pe dǒ sîya tô̤̌. Ma̤titèhî̌dě hepha mô̤nṳ̌ sî kû̌ anǎ̤ sanǎ̤. Dǒ sî mô̤nṳ̌ he, sî yṳ̌ǎ he kû̌ he ô̌ dǒ pha ô̌ dě hehè akhû̌akhî, a mô̤nṳ̌ sî hǒ. He ô̌ dǒ pha hè dě he hèlò̤ dǒ hǎkhû̌ hǒo. Khònò̤̌dě he gǔ hǎhtò̌gekè dǒ hǎkhû̌ hǒo dě he gǔ getîkhî sô̌ dǒ hepha a ô̌.”
Hǒtôplǎdě akhôphijǎ tokhlǒ hî̌ lû̌û kû̌, “Khònò̤̌ dě na hî̌bǎ pe kû̌ yô̤̌sǎkhěkhô̌ tô̤̌ dě a phlôwô̌kèhǒ. Pa gwè̌ na tôcǒ nò̌khôtô̤̌, bǎbǎkǎlè na sî̌ganǎ̤ bòwǐhto tûû̌ ta̤ dǒ pa glè̌ gwè̌ na nutokhlǒ hǒ. Pô̤̌nudě khònò̤̌ pa sî̌ganǎ̤ kû̌ na sî̌ganǎ̤ bò ta̤pṳ̂̌꤮ tocǒ. Dǒ na sî̌ganǎ̤ pô̤̌o akhû̌akhî, pa yṳ̌ǎ kû̌ na ô̌ dǒ Cǒmara a ô̌ hèlò̤ mè̤̌caca hǒ.”
Dě Běcǎ Yeshǔ gwè̌ asî kû̌, “Khònò̤̌dě sî yṳ̌ǎ mè̤̌mî̌ca kǎ hǒ? Bǎbǎkǎlè shěkhǎ dǒ sî gǔ khlè̌cû̌peshe bò pě, dě sî gǔ gekè lô̌khô dǒ sîhǐ pṳ̂̌dǐpṳ̂̌pwa̤nu, a gǔ hètǒ̤ pě. Hî̌tě̤tě̤ mî̌ a hètǒ̤ kèhtohǒ. Sî pṳ̂̌꤮ tôpwa̤ gǔ dǐô̌kè tûû̌ he pě. Bǎbǎkǎlè he ô̌ tûû̌ mè̤̌tô̤̌, ma̤titèhî̌dě hepha ô̌cu kû̌ he.
“Pô̤̌khô sî gǔ nǐ̤bǎ ta̤sǎphlǒ gûjû̌kabǎ ayanu, he hî̌ hto bò sî lǒ̤꤮ bò tokhlǒ hǒ. Dǒ sî htûhtò̌kè kû̌ he tôcǒnô̤̌ akhû̌akhî, sî nǐ̤bǎ sǎphlǒ a ta̤gûjû̌kabǎ hǒ. Dǒ hǎkhû̌nu, sî gǔ kè̌shǐbǎ kû̌ ta̤pò̤̌ta̤sha ta̤jî̌ta̤jû̌ pě, bǎbǎkǎlè bè̌shû̌bè̌sho lô̌khô sî sǎphlǒ nî̌꤮. He ma̤pè̤̌ hto hǎkhû̌běkhû̌ a ta̤siwi̤sòwò̤ nutokhlǒ hǒ.”

Escuchar a Yṳ̂ha 16