Surgujia -WBT (NT) Drama

Surgujia -WBT (NT) Non Drama

तेकर पबितर आत्मा हर, ईसू ला सुनसान जघा में जाए कर डगर देखाईस कि सैतान कर द्वारा ओकर परीछा होए। ईसू हर चालीस दिन अऊ चालीस राएत उपास रहीस, तेकर पाछू ओके भूख लागीस। तब परीछा लेवईया सैतान हर ओकर ठांवें आए के कहीस, “अगर तंए परमेस्वर कर बेटा लागस, त हूकुम दे कि ए पखना मन रोटी बएन जाए।”
बकिन ईसू हर जवाब देहीस, “परमेस्वर कर किताब में लिखल हवे,
मईनसे हर सिरीप रोटीच खाए के नई जीए,
बकिन ओ सबेच बचन ले जीथे, जेहर परमेस्वर कर मूंह ले निकलथे।”
तेकर सैतान हर ईसू ला पबितर सहर यरूसलेम में ले गईस अऊ ओके मंदिर कर सबले उपरे टीप में ठढ़वाईस, अऊ ओके ला कहीस, “अगर तंए परमेस्वर कर बेटा लागस, त इहां ले खालहे तरेक दे, काबरकि परमेस्वर कर किताब में लिखल हवे:
‘परमेस्वर हर तोर बारे में अपन
दूत मन ला हुकुम देही,
अऊ ओमन तोके ला अपन हाथ में उठाए लेहीं,
तेमेकि तोर गोड़ ला पखना ले ठोकर झईन लागे।’”
त ईसू हर ओके कहीस, “एहूच कस लिखल हवे कि तंए परभू, अपन परमेस्वर कर परीछा झईन कर।”
फेर सैतान हर ओके एगोट ढेरेच ऊंच पहार में ले गईस अऊ ओके संसार कर सबेच राएज पाठ अऊ ओकर सोभा ला देखाए के कहीस, “अगर तंए गोड़े गिर के मोर पांव परबे, त मंए तोके ला ए सब जाएत ला दे देहूं।” तेकर ईसू हर ओके ला कहीस, “ए सैतान मोर जग ले दुरीहां भाएग जा, काबरकि लिखल हवे,
तंए परभू अपन परमेस्वर कर अराधना कर
अऊ सिरीप ओकरे सेवा कर।”
तेकर सैतान हर ओकर जग ले भाएग गईस अऊ सरगदूत मन आए के ओकर सेवा करे लागीन।


जब ईसू हर ए गोएठ ला सुनीस कि यूहन्ना ला जेहल में डाएल देहीन हवें, त ओहर गलील जिला में चएल देहीस। ओहर नासरत ला छोंएड़ देहिस अऊ कफरनहूम सहर में जाए के रहे लागीस, ए सहर हर जबूलून अऊ नपताली देस कर इलाका में बड़खा दह कर धरी में हवे। एहर एकर बर होईस, तेमेकि यसायाह अगमजानी कर द्वारा, कहल बात हर पूरा होए जाए:
“जबूलून कर इलाका अऊ नपताली कर इलाका,
बड़खा दह कती जाए कर डगर में,
एरदन नदी कर ओ पार,
गैर यहूदी मन कर गलील जिला
जे मईनसे मन अंधार में रहत रहीन,
ओमन ढेरेच बड़खा इंजोर ला देखीन,
अऊ जेमन मिरतु कर छांए कर देस में रहत रहीन,
ओमन कर उपरे इंजोर चमकीस।”
ओही घनी ले ईसू एकस परचार करे लागीस, “तुमन अपन पाप ले पछताप करा, काबरकि सरग कर राएज हर ढेरेच ठांवे आए गईसे।”


जब ईसू हर गलील कर बड़खा दह कर धरी में रेंगत रहीस, त ओहर दुई झन भाई मन ला देखीस, ओमन कर नांव समोन जेला पतरस कहल जाथे अऊ ओकर भाई अंदरियास रहीस। ए दुनों भाई मन बड़खा दह में जाल डालत रहीन, काबरकि ओमन मछुवारा रहीन। ईसू हर ओमन ला कहीस, “मोर पाछू आवा, मंए तुमन ला मछरी ला नहीं, बकिन मईनसे मन ला मोर जग लनोईया बनाहूं।” त ओमन तुरतेंच जाल मन ला छोंएड़ के, ओकर पाछू होए लेहीन।
उहां ले आगू जाए कर पाछू, ईसू हर दुई झन अऊ भाई मन ला देखीस; याकूब अऊ ओकर भाई यूहन्ना ला, जेमन जबदी कर बेटा रहीन। ओमन अपन दाऊ जबदी कर संगे डोंगा में अपन जाल मन ला सुधारत रहीन। ईसू हर ओमन ला बलाईस। त ओमन तुरतेंच डोंगा अऊ अपन दाऊ ला छोंएड़ के, ओकर पाछू होए लेहीन।


ईसू हर सबेच गलील जिला में जाए के, यहूदी मन कर धरम सभा कर घर मन में उपदेस देहीस अऊ परमेस्वर कर राएज कर सुघर खभेर कर परचार करीस अऊ मईनसे मन कर सब मधे कर रोग अऊ बेमारी ला चंगा करीस। तेकर ले ईसू कर खभेर हर सबेच सीरिया देस में फईल गईस अऊ मईनसे मन रोगीया मन ला, जेमन कईयो मधे कर बेमारी अऊ दुख में परे रहीन अऊ जेमन ला दूस्ट आत्मा धरे रहीस अऊ मिरगी मारत रहीस अऊ लकवा कर बेमारी रहीस, ओ सब झन ला ओकर जग लानीन अऊ ओमन ला ईसू हर चंगा करीस। गलील जिला कर दस सहर (दिकापुलीस), यरूसलेम, एहूदिया अऊ एरदन नदी कर ओ पार कर मईनसे मन कर, एगोट बड़खा भीड़ हर ओकर पाछू होए लेहीस।

Escuchar मत्ती 4