Muria, Far Western: Muria Far Western (NT)

Muria Far Western

अब्रहामना मरि दावुदना मरि येसु मसिना वारसान इदाम मन्ता।
अब्रहामना मरि इसहाक मतोर,
इसहाकना मरि याकुब मतोर,
याकुबना मरक यहुदा अनि ओनोर तमोलोरक मतोरक,
तामारनिकेडाल यहुदाल फिरिस अनि जोरहिन उपजेह कितुर,
फिरिसना मरि हिस्रोन मतोर,
अनि हिस्तोरना मरि एराम मतोर,
एरामना मरि अम्मीनादाब मतोर,
अम्मीनादाबना मरि नहशोन मतोर,
अनि नहसोना मरि सलमोन मतोर,
राहबनिकेडाल सलमोन बोवसिन उपजेह कितुर,
रुतनिकेडाल बोवस ओबेदिन उपजेह कितुर,
अनि ओबेदिना मरि यिशेन मतोर,
अनि यिशेना मरि दावुद राजाल मतोर।
अनि उरिय्याहना मुत्ते मता ओद आळदाल दावुद राजाल सुलेयमानिन उपजेह कितुर,
सुलेयमाना मरि रहबाम मतोर,
रहबामना मरि अबिय्याह मतोर,
अनि अबिय्याहना मरि आसान मतोर,
आसाना मरि यहोशाफात मतोर,
यहोशाफातना मरि योराम मतोर,
अनि योरामना मरि उस्सियाह मतोर,
अनि उस्सियाहना मरि योथाम मतोर,
योथामना मरि आहास मतोर,
अनि आहासना मरि हिसकिय्याह मतोर,
हिसकिय्याहना मरि मनश्शिह मतोर,
मनश्शिहना मरि आमोन मतोर,
अनि आमोनना मरि योशिय्याह मतोर,
अनि यहुदिलोकुरकुन बन्दि किस बाबिलोन देश ओयाना काळते
योशिय्याहना मरक यकुन्याह अनि ओनोर तमोलोरक जनम आतुरक।
यहुदिलोकुरक बन्दि आस बाबिलोन देशतिगा अविहचिता पजा
यकुन्याहना मरि शालतियेल जनम आतुर,
अनि शालतियेलना मरि जरुब्बाबेल मतोर,
जरुब्बाबेलना मरि अबिहुद मतोर,
अबिहुदना मरि इल्याकिम मतोर,
अनि इल्याकिमना मरि असोर मतोर,
असोरना मरि सदोक मतोर,
सदोकना मरि अखिम मतोर
अनि अखिमना मरि इलिहुद मतोर,
इलिहुदना मरि इलियासर मतोर,
इलियासरना मरि मत्तान मतोर,
अनि मत्तानना मरि याकुब मतोर,
याकुबना मरि यूसुफ मतोर,
ओर मरियमना मुजो मतोर,
अनि मरियमनिकेडाल मसिहा पोरोयतोर येसु जनम आतुर।
इद प्रकारते अब्रहामताल दावुदवनाह चवदा पिळि आतुंग, अनि दावुदनिकेडाल बाबिलोन देशतिगा यहुदिलोकुरक बन्दि आस हन्दानावनाह चवदा पिळि आतुंग, अनि यहुदिलोकुरक बन्दि आस बाबिलोन देशतिगा अवहाना बेराताल मसि वनाह चवदा पिळि आतुंग।


येसु मसिना जनम इद प्रकारते आता। येसुना अवहारि मरियम युसेफनासंग हेनांग-मंगळिंग आतपा ओरक उन्दि आयानाता मुनेय ओद पवित्र आत्माता लावते मेन्दुलते आतु इन्जोर हुळतुर। अदेनोर मुजो यूसुफ परमेस्वरना नियमतुन सोबाय मानेमायवाल मतोर अनि अदेना बदनामि कियाना इच्चा केवोर इन्जोर अदेन कमेक तासियाना विचार कितुर। ओर इव पोल्लोनांग विचार किन्दुर असके प्रबुनोर स्वरगदूत ओन कनिष्कान बेरा दिस इतुर, “हे दावुदनोर मरि यूसुफ, निमा मरियमिन आपुना मुत्ते कियाला वरियमा, बाक्याकि अदेना पोटालोपा मन्तोर नोनाल पवित्र आत्माता लावते उत्पन्न आतोर। ओद वरोर पेकान जनम हियार अनि ओर आपुना लोकुरकुन ओरा पापताल पिसहानुर इन्जोर निमा ओना पोरोय येसु इरकि।”
“उन्दि कुवारि लया मेन्दुलते आस वरोर पेकान जनम हियार,
ओना पोरोय इम्मानुवेल इरानुर, अदेना अर्थ परमेस्वर मावासंग मन्तोर।”
इदाम प्रबु आपुना पोल्लो वेहवालना द्वारा इन्ज मतोर ओद पोल्लो पुरा आयि इन्जोर इद सबोय आत। असके यूसुफ हुन्जताल तेदस प्रबुनोर दूत आग्या हितोर लेहका मरियमिन मरमिंग किस, आपुना मुत्ते आस ओना लोन ततुर। अनि ओद पेकान जनम हेवो अचोन वनाह अदेन इटोर आतुर, ओद पेकान जनमा हितु असके ओना पोरोय येसु इरतुरक।

Escuchar मत्ति 1