Nyiha, Tanzania: ULufingwi uLupwa (New Testament+)

ULufingwi uLupwa

Isiku limo ilya Sabaato, uYeesu na vhasundikwa vhaakwe vhahatuuhaga mu magunda aga ngana. Lwe vhakujendeelela nu vhulendo, avhasundikwa vhaakwe vhahavwanulaga amatwe aga ngana nu kupukusa nu kulya.
Pe aVhafalisaayi vhamo vhahamuvhuziilizya uYeesu vhahati, “Indajizyo izya Moose zitakwitishila kuvhomba imbombo pi isiku ilya Sabaato! Shooni she imwe mukuvhomba?” UYeesu ahavhaamula ahati, “Mutahavhaazya mu Vhusimbe uVhufinjile vwe uDaavhudi ávhomvile lwe inzala yamuluma pooka na vhamwavho? Áyinjiiye mwi Iheema ilya Mulungu nu kunyatula amakaati ge gáamile mafinjile. Indajizyo izya Moose zitahitishilaga avhantu avhanji kulya amakaati igo, nkandi vhe vhapuuti vheeka, ileelo uDaavhudi ahalya, ahaavhapa na vhamwavho.” UYeesu ahavhavhuuzya havhili ahati, “Ne Mwana wa Aadamu indi na maha ni Sabaato.”


Isiku ilyamwavho ilya Sabaato, uYeesu ahinjila mwi isinagoogi, ahanda kuvhasambiilizya avhantu. Umwo, mwáli umuntu wumo we inyoovhe yaakwe iya kundiilo yáhataliiye. AVhafalisaayi vhamo na vhasambiilizi avha ndajizyo vhahalondolaga idala ilya kumulonjeelela uYeesu. Pe vhahenyaaga inga kuuti amuponie umuntu uyo isiku ilya Sabaato. Ileelo uYeesu ahazimanya insiivho zyavho. Pe ahamuvhuuzya umuntu uyo we inyoovhe yaakwe yáhataliiye ahati, “Vhuuha, yimiliila pahati ipa.” Pe umuntu uyo ahasogola, ahimiilila pahati yaavho. Pe uYeesu ahavhavhuziilizya ahati, “Vhuli, kulandatana ni ndajizyo izya Moose lili kwoshi lye likwitishilwa kuvhomba pi isiku ilya Sabaato? Kuvhomba inyinza, pamo imbiivhi? Kupoha uvhupuuma pamo kugoga?” UYeesu ahavhazyamila vhonti, ahamuvhuuzya we áhataliiye ahati, “Golosya inyoovhe yaaho.” Woope ahagolosya, inyoovhe yaakwe yihapona. AVhafalisaayi na vhasambiilizi avha ndajizyo vhahaviitwa nkaani, vhahapanzanya vhahati, “Tumuvhombe ishooni uYeesu uno?”


Lwe zyatuuha izyo, isiku limo uYeesu ahasogola pi igamba kumulaavha uMulungu, ukwo ahalaavha vhusiku vhwonti. Lwe kwasha, ahavhiita avhasundikwa vhaakwe. Muli ivho ahavhasevha 12, ahaavhapa izina ilya vhatumwa. Avhatumwa 12 ivho vhe vhano: uSiimoni (we uYeesu ámupiiye izina ilya Peeteli) nu Andeleeya umunine waakwe nu Yaakobu nu Yoohani nu Fiilipo nu Batolomaayo. Avhamwavho wu Mataayi nu Toomasi nu Yaakobu umwana wa Alufaayo nu Siimoni we ahayikungulaga kulwila insi yaakwe, nu Yuuda umwana wa Yaakobu, nu Yuuda uwa ku Kaalyoti, we pisinda ámwaniliiye uYeesu.


UYeesu ahiiha kufuma mwi igamba pooka na vhasundikwa vhaakwe. Lwe aafiha pa lutelama, ahimiilila. Ipo páamile ivhungaana ipiti ilya vhasundikwa vhaakwe, pooka ni mpuga impiti iya vhantu avhanji. Avhantu ivho, vháfumile imbazu izya mu Yelusaleemu na mu nkaaya izinji mu nsi iya Vhayuuda, na mu luvhazu mwa sumbi uwa mu nkaaya iya Tiilo ni ya Siidoni. Avhantu ivho vhínzile kumutejeelezya nu kuuti avhaponie impungo zyavho. Vhoope vhe vhahayimvilwaga ni mpepo inkandamanu, ahavhaponiaga. Avhantu vhonti vhahanzaga kumupalamansya uYeesu, mwe pe amaha gahafumaga mu muvhili waakwe nu kuvhaponia vhonti.


UYeesu ahavheenya avhasundikwa vhaakwe, ahavhavhuuzya ahati,
“Mulosiitwe imwe mwe vhapiina,
mwe pe uvhumwene uvhwa Mulungu vhwinyu.
Mulosiitwe imwe, mwe muli ni nzala ahavhaliilizyo iha,
mwe pe muliyiikuta.
Mulosiitwe imwe, mwe mukukuuta ahavhaliilizyo iha,
mwe pe muliseshela.
“Mulosiitwe imwe, inga avhantu vhakuvhaviitilwa nu kuvhazila nu kuvhaliga nu kuvhayanga havhiivhi, mwe pe mukuniitiha ine, ne Mwana wa Aadamu. Lwe zikuvhombeha izyo, museshelaje nu kudovhela, mwe pe uMulungu aliivhapa ishipeelwa ishipiti ku mwanya. Havhili vhwevhulo, vhoope avhataata vhaavho vwe vhahavhayimvwaga avhakuvhwi.
Ileelo mwasheela imwe vhadumbwe,
mwe pe muluposheleeye uluseshelo lwinyu nziila.
Mwasheela imwe, mwe mukwikuta ahavhaliilizyo iha,
mwe pe muliivha ni nzala.
Mwasheela imwe, mwe muli nu luseshelo ahavhaliilizyo iha,
mwe pe mulikuuta nu kuloosya.
Mwasheela imwe mwe avhantu vhonti vhakuvhatiima,
mwe pe avhataata vhaavho vhahavhavhombelaga vhwevhulo
avhakuvhwi avha ilenga.”


UYeesu ahajendeelela kuyanga kuuti, “Ishi, imwe mwe mukuntejeelezya nkuvhavhuuzya kuuti, muvhakundaje avhalugu vhiinyu, vhoope vhe vhakuvhaviitilwa, muvhavhombelaje inyinza. Muvhalavhilaje uvhuloote kwa Mulungu vhaala vhe vhakuvhatipa imwe. Vhoope vhe vhakuvhavhombela imbiivhi imwe, muvhalavhilaje kwa Mulungu. Inga umuntu akukanza uludili lwoka kukusuufwa, muleshe akukanze nu lwamwavho. Havhili inga umuntu akufwula ikooti lyaho, muleshele ni ilaaya vhweleele. Inga umuntu wonti akulaavha shimo ku kwaho, umupanje. Havhili inga umuntu wonti akufwula ivintu vwaho, utanzaje kuuti akugalusizye. Muvhavhombelaje avhanji inza vwe niimwe mukwanza kuuti vhavhavhombelaje.
“Inga mukuvhakunda vhe vhe vhakuvhakunda imwe, pe muliposheela lilonka vhuli? Avhatalamalandu vhoope vhakuvhakunda vhaala vhe vhakuvhakunda avheene! Havhili, inga mukuvhavhombela inyinza vhe vhe vhakuvhavhombela inyinza imwe, pe muliposheela lilonka vhuli? Yeenya, avhatalamalandu vhoope vhakuvhomba vhwevhulo. Inga mukuvhapavhila ivintu vhe vhe mukusuuvhila kuuti vhalivhagalusizya, pe muliposheela lilonka vhuli? Avhatalamalandu vhoope vhakuvhapavhila avhamwavho, mwe pe vhamanyile kuuti, ivho vhalivhagalusizya vwonti!
“Ileelo imwe, muvhakundaje avhalugu vhiinyu, muvhavhombelaje inyinza nu kuvhapavhila ishisita kusuuvhila kuuti vhalivhagalusizya. Inga mukuvhomba izyo, uMulungu alivhalipa ivwinji. Havhili muliivha mwe vhaana vha Mulungu uMupiti uwa ku Mwanya, mwe pe uweene mwinza poosye na ku vhe vhatakumusalifwa na vhavhiivhi. Muvhe nu vhwila inza uTaata wiitu uMulungu vwe ali nu vhwila.”


“Mutavhalongaje avhamwinyu, pe niimwe te muhalongwe. Mutavhakwinkwinaje avhanji, pe niimwe te muhakwinkwinwe. Muvhaswilaje avhamwinyu, pe niimwe muliswilwa. Muvhapanje avhantu ivintu, pe niimwe kwe mupelwaje mu shipimilo ishisindile havhili she shizuuye nu kulafuha, mwe pe ishipimilo she mukuvhapimila avhanji she niimwe mulipimilwa.”
UYeesu ahayanga ku miivhi ahati, “Untonko angamulongola untonko uwamwavho? Vhatangagwila vhonti mwi ilivha? Umusundikwa atangamuluusya umusambiilizi waakwe. Ileelo inga aamala kusambiilila insambiilizyo zyonti, pe akuvha inza umusambiilizi waakwe.
“Shooni she ukwenya ahababazula he hali mwi lyinso ilya wamwinyu, ileelo utakwenya ulupaliho lwe luli mwi lyinso lyaho? Havhili ungamuvhuuzya vhuli uwamwinyu kuuti, ‘Wamwitu, leha inkwefwe ahababazula he hali mwi lyinso lyaho,’ ileelo iwe weneewe utakwenya ulupaliho lwe luli mwi lyinso lyaho? We washifumbo iwe! Uyeefwe suuti ulupaliho lwe luli mwi lyinso lyaho, pe kwe ulole ahinza nu kwefwa ahababazula he hali mwi lyinso ilya wamwinyu.”


“Litaliipo ikwi ilyinza lye likuhoma amantonongwa amavhiivhi, poosye ikwi ivhiivhi lye likuhoma amantonongwa aminza. Ikwi likumanyiha vwe lili, kufumiilana na mantonongwa gaakwe. Avhantu vhatakutonola imvilo mu lwangwa poosye insongwa mwi ijijimvwa. Vwe zili, umuntu umwinza akuyanga nu kuvhomba inyinza, zye zikufuma mu mwoyo waakwe umwinza. Woope umuntu umuvhiivhi akuyanga nu kuvhomba imbiivhi, zye zikufuma mu mwoyo waakwe umuvhiivhi, mwe pe umuntu akuyanga zye zyizuuye mu mwoyo waakwe.”


“Shooni she mukuniita kuuti, ‘We Mwene,’ ileelo mutakuzivhomba zye nkuvhavhuuzya? Umuntu wonti we akwinza kuli ine, nu kugatejeelezya amazwi gaane nu kugalema, aholiine ni shiholanyo ishi: Ali inza umuntu we ázenzile inyumba, ileelo suuti ahabana nkaani kufishila pi iyalaawe. Pe ahazenga ulwalo ulwa nyumba yaakwe pi iyalaawe ilyo.
“Lwe imvula inyinji yatoonya, amajenje gahiizula nkaani, pe aminzi gahayiishila inyumba iyo ku maha, ileelo inyumba iyo yitahayingaana, mwe pe yázengwilwe ahinza. Ileelo umuntu we akutejeelezya amazwi gaane, ishisita kugalema, ali inza umuntu we ázenzile inyumba yaakwe pa lusenga ishisita ulwalo. Aminzi aga ijenje lwe gakwinza ku maha, gahayibunshila inyumba iyo, yoope yihagwa pansi nu kubongonkana yonti.”

Escuchar uLuuka 6