Bantawa Rai

खोन्‍किना पावल्‌आ एथेन्‍स सहरा छिरुदोकि कोरिन्‍थ सहराह्‍यात्‍नि खारा। मोदा खोसाआ पोन्‍तस्‌दा पुक्‍तान्‍चिन्‌ओ अकिलास अ़ऩङ मुवाङाओ अ़क्‍छा यहुदि धिरु। खो आइमित्‍साऱङ अ़खिम्‍हाङ्‌मा प्रिस्‍किलाएनान इतालियायाङ्‌का बानायुङ्‌साचिओ। देकिनालो रोम्‌दाओ तोक्‍पोहाङ क्‍लौदियस्‌आ झारा यहुदिचि रोम सहरादाङ्‌का लोन्‍माखान्‍माचिनि य़ङायुङ्‌सा। पावल मोचि तुप्‍सि खारा। मोचिओ अ़चुकाचि पावल्‌ओवात्‍निङा तित्‍खिम मुमाओसा पावल मोचिएनान्‍ङा युङाकि अ़क्‍नि काचि मुवा। झारा सावातोम्‍खा-लेन पावल यहुदिचिओ अ़चुयावायोक्‍खिम्‌दा खाराकि यहुदिचि खोन्‍कि ग्रिक्‌चिएनान दुम्‍तुसाङा, खोन्‍कि मोचि हाङ्‌पाएदा साकोङ्‌छ़ङ मुवानिन्‌नि लोङुचि।
खोन्‍किना सिलास खोन्‍कि तिमोथि माकेदोनिया धिखाहुप्‌दाङ्‌का तादिसाचि, खोन्‍कि पावल्‌आ यहुदिचि येसुङा ख्रिस्‍त म़मुयाङ्‌नि य़ङ्‌याङ्‌सा निनाम्‍हाङ य़ङ खाएत्‍मा काचिदा झारा अ़ग़रि पाउ। मेन यहुदिचिआ पावल ऩङाअ़छिरा, खोन्‍कि अ़सुङ्‌ता। खोसाआ अ़तित धाम्‍सुधान्‍तुकि मोचि लोचि, “निनाम्‍हाङ्‌एदाङ्‌का ताओ दन्‍दा खानानिन्‌ङा त़सिन्‍तिन! अ़ङ्‌का दित्‍छाङ अ़सिन्‍ऩङ! हान्‌दाङ्‌का अ़ङ्‌का निरावाचिएदा खात्‍ङा!”
खोन्‍किना पावल्‌आ यावायोक्‍खिम छिरुदोकि निरावा निनाम्‍हाङ काब़क तितस युस्‍तस अ़ऩङ मुवाङाओ म़नाओ अ़खिम्‌दा खारा। खोसोओ अ़खिम यावायोक्‍खिम च़क्‌दा छुक्‍ताङा। यावायोक्‍खिम्‌दाओ बुसुवा क्रिस्‍पस खोन्‍कि खोसोओ झारा अ़खिम्‌दाओचिआ हाङ्‌पाएदा साकोङ्‌छ़ङ म़मुवा। खोन्‍कि कोरिन्‍थिदाओचिआछाङ ब़द्‍धेसाआ पावल्‌ओ अ़य़ङ अ़एना खोन्‍कि साकोङ्‌छ़ङ म़मुवाकि बप्‍तिस्‍मा म़लोआ। खोन्‍कि अ़क खाखुत सेन्‍चिदा हाङ्‌पाआ पावल अ़लोवा, “मान्‍क़दा! मेन नुय़ङ्‌खान म़नाचि खाएत्‍तुयुङ्‌सुचि, खोन्‍कि वाइवेत मान्‌युङ्‌दा। देकिनालो अ़ङ्‌का खानाएदा याक्‍ङाङा, खोन्‍कि साङ्‌आछाङ खाना ऩझोम्‌कि देत्‍छाङ मुमा ऩऱनान, देकिनालो ओ सहरादा ब़द्‍धे अ़ङ्‌म़नाचि म़युङ्‌याङ।” खोन्‍किना पावल निनाम्‍हाङ्‌ओ अ़चुय़ङ चिन्‌याङ्‌सा अ़क दोङ खोन्‍कि छकादोङ्‌वात्‌तारि मोचिएनान कोरिन्‍थ सहरादा युङा।
मेन गलियोन अखैया धिखाहुप्‌दाओ हाङ्‌काचि कामु लिसाहिदा यहुदिचि म़तोङाकि पावल अ़लावा, खोन्‍कि खो छ़ङ्‌छेन्‍खादा अ़तारा। खोन्‍किना मोचि “ओ म़नाआ यहुदि य़ङ्‌हुप्‌ओ अ़देङ्‌सालाप्‍पादा म़नाचि निनाम्‍हाङ ब़क्‍मा चिन्‍तुङुचि”नि म़य़ङा।
मेन पावल रात्‍मान्‍चिन निकिना चेप्‍मा मुवाङाहिदा गलियोन्‌आ यहुदिचि लोचि, “यहुदिचि ओ, ओ फिमाय़ङ काचि माङ्‌लो अ़न्‍नुनु अ़त्‍लो च़माय़ङ्‌नि ओ दे, अ़ङ्‌का आम्‍नुओ तुवाऱक्‍मा एन्‍मादोराङाओ। मेन ओ दुम्‌चि, य़ङ्‌सिवाचिओ अ़चुतुक्‌वादा खोन्‍कि ऩङ्‌चिकिना आम्‍नुओ यहुदि य़ङ्‌हुप्‌ओ दुम तुमाय़ङ्‌ओसा खानानिन्‌आङा ओ य़ङ्‌चि तोङ्‌सानुम्‍च़म। अ़ङ्‌का ओ य़ङ्‌चिओ छ़ङ अ़छेन्‍ऩङ।” खोन्‍किना गलियोन्‌आ मोचि छ़ङ्‌छेन्‍खादाङ्‌का छुत्‍तुखाइसुचि। खोन्‌ओसा झारा यहुदिचिआ यावायोक्‍खिम्‌दाओ बुसुवा सोस्‍थेनेस अ़लावाकि छ़ङ छेन्‍खाओ अ़बुदा अ़ब़ङ्‌सा। मेन गलियोन्‌आ नेत्‍माइमान्‍नेत्‌दोचि।

पावल ब़द्‍धेकालेन्‌तारि साकोङ्‌छ़ङ कामुचिएनान कोरिन्‍थदाङा युङा। खोन्‍किना मोचिएनान हासान्‍चिन्‌कि खोसाआ प्रिस्‍किला खोन्‍कि अकिलास्‌छाङ खात्‍तुचिकि सिरियाह्‍यात्‍नि खारा। वाप्‍तेलादा वाङ्‌मा बुया पावल्‌आ निनाम्‍हाङ्‌ओ अ़चुहिप्‍माय़ङ तालाओ खाङ्‌मुमा निकिना यहुदिचिओ अ़चुच़माथाङ्‌मावा किङ्‌क्रियादा अ़ताङ्‌मुवा खोसु। मोचि एफिसस सहरादा म़तालाकिना पावल्‌आ प्रिस्‍किला खोन्‍कि अकिलास वाप्‍तेला नान्‍खादाङा छिरुदोचि। खोन्‍किना पावल यहुदिचिओ अ़चुयावायोक्‍खिम्‌दा वाङाकि मोचिएनान दुम्‍तुमा पुक्‍तु। यहुदिचिआ पावल ब़द्‍धेतारि युङिन्‍नेनि अ़लोवा, मेन खो छुन्‍ता। मेन पावल मोचिएनान हासान्‌यान्‍चिन्‌हिदा, “निनाम्‍हाङ्‌ओ अ़मिन्‍मा याक्‌याङ्‌नालो अ़ङ्‌का माय़ङ लाङाताङा”नि लोचि। खोन्‍किना खो वाप्‍तेलादा वाङाकि एफिसस सहरादाङ्‌का खारा।
पावल कैसरिया सहरादाओ वाप्‍तेला नान्‍खादा लोन्‍ता, खोन्‍कि खो यरुसलेम्‌दु लोन्‍ताकि मोदाओ साम्‍भुङ सेवा मेत्‍तु, खोन्‍किना एन्‍तिओखियाह्‍युत्‍नि धा।
खोन्‍कि खो मोदा अ़क्‍चित लेन्‌तारि युङा, खोन्‍किना मोदाङ्‌का एन्‍तिओखिया छिरुदोकि गलातिया खोन्‍कि फ्रिगिया धिखाहुप्‌दाओ नि-निदात्‍नि कोन्‌याङ्‌सा झारा काखेङ्‌चि राक प़चि।

अलेक्‍जेन्‍द्रिया सहरादा पुक्‍तान्‍चिन्‌ओ अपोल्‍लोस अ़ऩङ मुवाङाओ अ़क्‍छा यहुदि एफिसस्‌दा ता। खो अ़क्‍छा नुलोक काचेप खोन्‍कि साम्‍कालिन ब़द्‍धे लेसाङा। खो हाङ्‌पा येसुओ अ़तुक्‌वादा नुलोक चिन्‍तायुङ्‌सा, खोन्‍कि राक्‌एनान येसुओ अ़तुक्‌वादाओ य़ङ्‌चि तोङ्‌लो म़नाचि चिन्‍तुङुचि। खोन्‍नुछाङ खोसाआ युहन्‍नाओ अ़बप्‍तिस्‍मा ओन्‍ङा सिन्‍तुङु। अपोल्‍लोस यहुदिचिओ अ़चुयावायोक्‍खिम्‌दा राक्‌एनान चेप्‍मा पुङ्‌सु। प्रिस्‍किला खोन्‍कि अकिलास्‌आ खोसाआ खालुसुङुओ अ़एनाचुकि खो अ़चुखिम्‌दा अ़बुत्‍ताखात्‍ताचु, खोन्‍कि निनाम्‍हाङ्‌ओ अ़तुक्‌वादा च़लोक तोङालो खो खाअ़एत्‍ताचु।
खोन्‍कि खोसाआ अखैया धिखाहुप खात्‍मा अ़छ़ङ मु, खोन्‌ओसा एफिसस्‌दाओ हाङ्‌पाएदाओ काखेङ्‌चिआ खो राक अ़पुवा, खोन्‍कि “अखैयाया अपोल्‍लोस साऩङ्‌वा मेत्‍तानुम”निकि मोदाओ काखेङ्‌चि छाप्‍लावा म़छाप्‍तुछोक्‍तुचि। खो मोया तालाकि निनाम्‍हाङ्‌ओ अ़सोम्‍तुक्‍मालाम्‍पा साकोङ्‌छ़ङ कामुचि ब़द्‍धे फासुचि। देकिनालो खोसाआ साम्‍कालिन्‌दाओ य़ङ मोचि खाएत्‌याङ्‌सा, “खानानिन्‌आ त़हुङुम्‌योम्‌ओ येसुङा ख्रिस्‍तओ”नि लोयाङ्‌सा सावाएनान झारा म़नाचिओ अ़चुबुदा यहुदिचिओ अ़चुदो ह़सुप़चि।

Escuchar छाम्‍माय़ङ 18