These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᓂᔅᑎᒻ ᒋᓴᒪᓂᑐᐤ ᒋ ᐅᓯᑕᐤ ᒋᒋᒋᓯᑯᔪᐤ ᑭᔭ ᐊᔅᒋᔪᐤ᙮ ᓇᔅᒡ ᒋ ᐱᓯᒂᐤ ᐊᔅᒋᔾ ᑭᔭ ᓇᒪ ᒐᒂᓐ ᐅᒋ ᐃᓯᓇᑯᓐ, ᓂᐱᔾ ᒥᒄ ᒋ ᑎᑯᓐ ᑭᔭ ᓇᔅᒡ ᒋ ᐅᑲᔅᑕᔭᐤ᙮ ᒋᓴᒪᓂᑐᐤ ᐅᑦ ᐊᒐᒂ ᒋ ᑕᔪᐛ᙮
ᒋᓴᒪᓂᑐᐤ ᒂ ᐃᔅᒋᔄᑦ, “ᓂᑐᐛᔨᑕᓐ ᒐᒋ ᒋᐧᑲᔭᔅᑐᐛᒡ ᐛᔅᑕᐅᓐ !” ᒂ ᒋᐧᑲᔭᔅᑐᐛᒡ ᐛᔅᑕᐅᓐ᙮ ᒋᓴᒪᓂᑐᐤ ᒋ ᒋᑕᐸᑎᒻ ᐛᔅᑕᐅᓂᔪᐤ ᐊᒋ ᒥᔽᔨᒡ, ᑭᔭ ᒋ ᑎᐸᓂᒻ ᐛᔅᑕᐅᓂᔪᐤ ᑭᔭ ᐊ ᐅᑲᔅᑕᔭᔨᒡ᙮ ᒋᓴᒪᓂᑐᐤ ᒋ ᐃᓯᓂᐧᑲᑎᒻ ᐛᔅᑕᐅᓂᔪᐤ, “ᒋᓯᑲᐤ,” ᑭᔭ ᒋ ᐃᓯᓂᐧᑲᑎᒻ ᐊ ᐅᑲᔅᑕᔭᔨᒡ, “ᑎᐱᔅᑲᐤ᙮” ᒂ ᐅᑕᑯᓯᒡ ᑭᔭ ᒂ ᒐᒋᓴᐸᔭᒡ, ᐊᐅᑯᓐ ᓂᔅᑎᒻ ᐊ ᒋᓯᑲᒡ᙮
ᒋᓴᒪᓂᑐᐤ ᒂ ᐃᔅᒋᔄᑦ, “ᓂᑐᐛᔨᑕᓐ ᒋᓯᑯᔭᓐ ᒐᒋ ᐸᒋ ᒧᔅᒋᐱᔨᒡ ᐊᓐᑕ ᓂᐱᒡ ᒐᒋ ᑎᐸᓇᑭᓄᐅᒡ ᐃᔅᐱᒥᒡ ᓂᐱᔾ ᑭᔭ ᓂᑕᒡ ᓂᐱᔾ᙮” ᐊᐅᑯᓐ ᒂ ᐃᓯᓇᑯᓂᔨᒡ᙮ ᒋᓴᒪᓂᑐᐤ ᒂ ᐅᓯᐊᑦ ᒋᓯᑯᔭᓇ, ᑭᔭ “ᒋᓯᒄ” ᒂ ᐃᓯᓂᐧᑲᑕᐧᒄ᙮ ᒂ ᐅᑕᑯᓯᒡ ᑭᔭ ᒂ ᒐᒋᓴᐸᔭᒡ, ᐊᐅᑯᓐ ᓂᔄᐤ ᐊ ᒋᓯᑲᒡ᙮
ᒋᓴᒪᓂᑐᐤ ᒂ ᐃᔅᒋᔄᑦ, “ᓂᑐᐛᔨᑕᓐ ᓂᐱᔾ ᓯᐸ ᒋᓯᑯᒡ ᒐᒋ ᒪᒧᐱᔨᒡ, ᐊᑯ ᒐᒋ ᑎᒂᒡ ᐊ ᐸᒂᔅᑭᒥᑲᒡ᙮” ᐊᐅᑯᓐ ᒂ ᐃᓯᓇᑯᓂᔨᒡ᙮ “ᐊᔅᒋᔾ” ᒋ ᐃᓯᓂᐧᑲᑎᒻ ᒋᓴᒪᓂᑐᐤ ᐊ ᐸᒂᔅᑭᒥᑲᔨᒡ, ᑭᔭ “ᐎᓂᐸᒄ” ᒋ ᐃᓯᓂᐧᑲᑎᒻ ᓂᐱᔪᐤ᙮ ᒋᓴᒪᓂᑐᐤ ᒋ ᒋᑕᐸᑎᒻ ᐊᓂᔭ ᒐᒂᔪᐤ ᑲ ᐃᑐᑕᐧᒃ, ᑭᔭ ᒋ ᒥᔽᔪᐤ᙮ ᐊᑯ ᒋᓴᒪᓂᑐᐤ ᒂ ᐃᔅᒋᔄᑦ, “ᓂᑐᐛᔨᑕᓐ ᒐᒋ ᓂᑕᐅᒋᒋ ᒥᓯᐛ ᑕᑐᐎᒡ ᐊ ᐃᓯᓇᒂᒋ ᓂᑕᐅᒋᑕᑭᓇ, ᐊᓂᔭ ᓇᑕᐅᒋᑕᒥᑲᒋ ᐸᒂᓯᑭᓂᒥᓇ ᑭᔭ ᐊᓂᔭ ᓇᑕᐅᒋᑕᒥᑲᒋ ᒥᓂᓴ᙮” ᐊᐅᑯᓐ ᒂ ᐃᓯᓇᑯᓂᔨᒡ᙮ ᒥᓯᐛ ᑕᑐᐎᒡ ᐊ ᐃᓯᓇᒂᒋ ᓂᑕᐅᒋᑕᑭᓇ ᒋ ᓂᑕᐅᒋᓇ ᐅᑕ ᐊᔅᒋᒡ᙮ ᒋᓴᒪᓂᑐᐤ ᒋ ᒋᑕᐸᑎᒻ ᐊᓂᔭ ᒐᒂᔪᐤ ᑲ ᐃᑐᑕᐧᒃ ᑭᔭ ᒋ ᒥᔽᔪᐤ᙮ ᒂ ᐅᑕᑯᓯᒡ ᑭᔭ ᒂ ᒐᒋᓴᐸᔭᒡ, ᐊᐅᑯᓐ ᓂᔍᐤ ᐊ ᒋᓯᑲᒡ᙮
ᒋᓴᒪᓂᑐᐤ ᒂ ᐃᔅᒋᔄᑦ, “ᓂᑐᐛᔨᑕᓐ ᐛᔅᑕᐅᓇ ᐊᓐᑕ ᒋᓯᑯᒡ ᒐ ᑎᐸᓇᐱᔨᒡ ᐊ ᒋᓯᑲᒡ ᑭᔭ ᐊ ᑎᐱᔅᑲᒡ ᒐᒋ ᒋᔅᒐᔨᑕᒂᒋ ᒋᓯᒂ ᑭᔭ ᐱᐳᓇ᙮ ᓂᑐᐛᔨᑕᓐ ᒐᒋ ᐛᔅᑕᒋ ᐊᓐᑕ ᐊᔅᒋᒡ᙮” ᐊᐅᑯᓐ ᒂ ᐃᓯᓇᑯᓂᔨᒡ᙮ ᒪᒃ ᒋᓴᒪᓂᑐᐤ ᒋ ᐅᓯᐊᐤ ᒋᓯᑲᐤ ᐱᓯᒺ ᑭᔭ ᑎᐱᔅᑲᐤ ᐱᓯᒺ᙮ ᒋ ᐅᓯᐊᐤ ᒋᓯᑲᐤ ᐱᓯᒺ, ᐊᑎᑐᐤ ᒥᓯᑐᐤ ᐃᔅᐱᔅ ᑎᐱᔅᑲᐤ ᐱᓯᒺ, ᒐᒋ ᐛᔅᑐᐛᑦ ᒐᓯᑲᔨᒋ, ᒋ ᐅᓯᐊᐤ ᐃᔭᐱᒡ ᑎᐱᔅᑲᐤ ᐱᓯᒺ᙮ ᐊᑎᑐᐤ ᐊᐱᓯᓯᓱᐤ ᐃᔅᐱᔅ ᒋᓯᑲᐤ ᐱᓯᒺ, ᒐᒋ ᐛᔅᑐᐛᑦ ᑕᐱᔅᑲᔨᒋ᙮ ᐅᒐᑭᑕᒂ ᐃᔭᐱᒡ ᒋ ᐅᓯᐊᐤ᙮ ᐊᑯ ᒋᓴᒪᓂᑐᐤ ᒂ ᑎᔭᑦ ᐅᔭ ᐛᔅᑕᐅᓇ ᐊᓐᑕ ᒋᓯᑯᒡ ᒐᒋ ᒋᐧᑲᔭᔅᑕᔨᒡ ᐊᔅᒋᔪᐤ᙮ ᒋ ᐃᑐᑐᐛᐤ ᒋᓯᑲᐤ ᐱᓯᒺ ᒐ ᒋᐧᑲᔭᔅᑐᐛᔨᒋ ᒐᓯᑲᔨᒋ ᑭᔭ ᑎᐱᔅᑲᐤ ᐱᓯᒺ ᒐ ᒋᐧᑲᔭᔅᑐᐛᔨᒋ ᑕᐱᔅᑲᔨᒋ ᑭᔭ ᒐᒋ ᑎᐸᓇᑭᓄᐅᒡ ᐛᔅᑕᐅᓐ ᑭᔭ ᐅᑲᔅᑕᔭᐅᓐ᙮ ᒋᓴᒪᓂᑐᐤ ᒋ ᒋᑕᐸᑎᒻ ᐊᓂᔭ ᒐᒂᔪᐤ ᑲ ᐃᑐᑕᐧᒃ, ᑭᔭ ᒋ ᒥᔽᔪᐤ᙮ ᒂ ᐅᑕᑯᓯᒡ ᑭᔭ ᒂ ᒐᒋᓴᐸᔭᒡ, ᐊᐅᑯᓐ ᓇᐛᐤ ᐊ ᒋᓯᑲᒡ᙮
ᒋᓴᒪᓂᑐᐤ ᒂ ᐃᔅᒋᔄᑦ, “ᓂᑐᐛᔨᑕᓐ ᐎᓂᐸᑯᒡ ᒐᒋ ᓴᑭᔅᒋᓇᒡ ᐱᒪᑎᓯᐤ ᐊᐛᓯᓯᒡ, ᓂᑐᐛᔨᒪᐅᒡ ᑭᔭ ᐱᔭᓱᐅᒡ ᒐᒋ ᐱᐸᒥᔭᒡ ᐊᓐᑕ ᒋᓯᑯᒡ᙮” ᒋᓴᒪᓂᑐᐤ ᒋ ᐅᓯᐊᐤ ᐊ ᒥᓯᑎᔨᒋ ᐊᐛᓯᓴ ᒐ ᑕᔨᒋ ᐊᓐᑕ ᓂᐱᒡ, ᓂᒪᓴ ᒋ ᐅᓯᐊᐤ ᑭᔭ ᒥᓯᐛ ᑕᑐᐎᒡ ᐊ ᐃᓯᓇᑯᓂᔨᒡ ᒐᒂᔪᐤ ᒐᒋ ᑎᑯᓂᔨᒡ ᐊᓐᑕ ᓂᐱᒡ, ᒋ ᐅᓯᐊᐤ ᐃᔭᐱᒡ ᒥᓯᐛ ᑕᑐᐎᒡ ᐊᓯᓇᑯᓯᔨᒋ ᐱᔭᓱᐛ᙮ ᒋᓴᒪᓂᑐᐤ ᒋ ᒋᑕᐸᑎᒻ ᐊᓂᔭ ᒐᒂᔪᐤ ᑲ ᐃᑐᑕᐧᒃ, ᑭᔭ ᒋ ᒥᔽᔪᐤ᙮ ᐊᑯ ᒋᓴᒪᓂᑐᐤ ᒂ ᒥᔭᑦ ᐱᒪᑎᓯᐤ ᐊᐛᓯᓴ ᐅᓱᐛᔨᒋᒐᐅᓐ, ᒂ ᐃᑕᑦ ᐎᓂᐸᑯᒡ ᐊᐛᓯᓴ ᒐᒋ ᑕᔨᒋ ᐊᓐᑕ ᒥᓯᐛ ᐊᔅᐱᓴᔨᒡ ᐎᓂᐸᑯᔪᐤ ᑭᔭ ᐱᔭᓱᐛ ᒐᒋ ᑕᔨᒋ ᐊᓐᑕ ᒥᓯᐛ ᐊᔅᐱᑎᔅᑭᒥᑲᔨᒡ ᐊᔅᒋᒡ᙮ ᒂ ᐅᑕᑯᓯᒡ ᑭᔭ ᒂ ᒐᒋᓴᐸᔭᒡ, ᐊᐅᑯᓐ ᐱᑕᑕᒡ ᑕᑥᐤ ᐊ ᒋᓯᑲᒡ᙮
ᒋᓴᒪᓂᑐᐤ ᒂ ᐃᔅᒋᔄᑦ, “ᓂᑐᐛᔨᒪᐅᒡ ᒥᓯᐛ ᑕᑐᐎᒡ ᐊ ᐃᓯᓇᑯᓯᒡ ᐊᐛᓯᓯᒡ ᒐᒋ ᑕᒡ ᐅᑕ ᐊᔅᒋᒡ᙮” ᑭᔭ ᐊᐅᑯᓐ ᒂ ᐃᔅᐱᔨᒡ᙮ ᒋᓴᒪᓂᑐᐤ ᒥᓯᐛ ᒋ ᐅᓯᐊᐤ ᐊᐛᓯᓴ᙮ ᐊᑯ ᑲ ᒋᑕᐸᑕᐧᒃ ᐊᓂᔭ ᒐᒂᔪᐤ ᑲ ᐃᑐᑕᐧᒃ, ᑭᔭ ᒋ ᒥᔽᔪᐤ᙮ ᒋᓴᒪᓂᑐᐤ ᒂ ᐃᔅᒋᔄᑦ, “ᐊᓄᒡ ᐃᔪᒡ ᒋᑭ ᐅᓴᓄᐅᒡ, ᑭᔭ ᒧᔭᒻ ᐊᓯᓇᑯᓱᐛᐧᒄ ᒋᑭ ᐃᓯᓇᑯᓱᐅᒡ᙮ ᒋᑭ ᒥᔭᓄᐅᒡ ᒐᒋ ᑎᐸᔨᒪᒡ ᓂᒪᓴ, ᐱᔭᓱᐛ, ᑭᔭ ᒥᓯᐛ ᐊᐛᓯᓴ᙮”
ᐊᑯ ᒋᓴᒪᓂᑐᐤ ᒂ ᐅᓯᐊᑦ ᓇᐸᐛ ᑭᔭ ᐃᔎᐛ ᒐᒋ ᐃᓯᓇᑯᓯᔨᒋ ᒧᔭᒻ ᐎᔾ ᐊᓯᓇᑯᔅᑦ᙮
ᒋᓴᒪᓂᑐᐤ ᒋ ᒥᔭᐤ ᐅᓱᐛᔨᒋᒐᐅᓐ ᑭᔭ ᒂ ᐃᑕᑦ, “ᒐ ᒥᒐᑥᐊᑯᒡ ᐊᐛᓯᒡ, ᒐᒋ ᒥᒐᑎᑦ ᐃᔪᐤ ᐅᑕ ᐊᔅᐱᑎᔅᑭᒥᑲᒡ ᐊᔅᒋᒡ ᑭᔭ ᒋᔨᐛᐤ ᒐ ᑭᓄᐛᔨᑎᒪᒄ᙮ ᒋᔨᐛᐤ ᒋᑭ ᐅᒋᒪᐅᓇᐛᐤ ᐊᓐᒡ ᓂᒪᓯᒡ ᐊᓐᑕ ᓂᐱᒡ, ᐱᔭᓱᐅᒡ ᐊᓐᑕ ᒋᓯᑯᒡ ᑭᔭ ᒥᓯᐛ ᐊᐛᓯᓯᒡ ᐅᑕ ᐊᔅᒋᒡ᙮
ᐛᐸᑎᒧᒄ, ᒋ ᒥᔨᑎᓇᐛᐤ ᓂᑕᐅᒋᑕᑭᓐ ᒥᓯᐛ ᐅᑕ ᐊᔅᒋᒡ, ᑭᔭ ᒥᓯᐛ ᑕᑐᐤ ᒥᔅᑎᑯᒡ ᑲ ᓂᑕᐅᒋᑕᑦ ᒥᓂᓴ ᒐ ᐅᒥᒋᒥᔭᒄ, ᑭᔭ ᓂᒋ ᒥᔭᐅᒡ ᐊᐛᓯᓯᒡ ᑭᔭ ᐱᔭᓱᐅᒡ ᒥᓯᐛ ᒥᔅᑯᓱᐛ ᑭᔭ ᓂᑕᐅᒋᑕᑭᓇ ᒐ ᐅᒥᒋᒥᑕᒡ᙮” ᐊᐅᑯᓐ ᑲ ᐃᔅᐱᔨᒡ᙮
ᒋᓴᒪᓂᑐᐤ ᒋ ᒋᑕᐸᑎᒻ ᐊᓂᔭ ᒐᒂᔪᐤ ᑲ ᐃᑐᑕᐧᒃ, ᒥᓯᐛ ᓇᔅᒡ ᒋ ᒥᔽᓯᔪᐤ᙮ ᒂ ᐅᑕᑯᓯᒡ ᑭᔭ ᒂ ᒐᒋᓴᐸᔭᒡ, ᐊᐅᑯᓐ ᐊᓱᑕᒡ ᑕᑥᐤ ᐊ ᒋᓯᑲᒡ᙮

Escuchar ᒐᓂᓯᔅ 1