Tuvin - 2011IBT-R (Bible) Non Drama

Tuvin - 2011 IBT-R (Bible) Drama

Адам бодунуң кадайы Ева-биле чоокшулашкан соонда, ол иштелип-саатталы берген. Ол оглу Каинни божупкаш: «Дээрги-Чаяакчыдан төлдү алдым» – дээн. Ооң соонда ол Каинниң дуңмазы Авелди божаан. Авел шээр мал кадарып турган, а Каин чер болбаазырадып турган.
Элээн үе эрткенде, Каин черниң сөңү чимистерни Дээрги-Чаяакчыга өргүл кылдыр эккеп берген. Авел база Бурганга өргүл кылдыр эң баштай төрүттүнген хураганнарның чагларын эккеп сөңнээн. Бурганга Авел болгаш ооң эккелген өргүлү онза таарышкан. А Каинни база ооң өргүлүн Ол херекке албаан. Каин дыка хорадаан, ооң арны хөлүе берген. «Чүге ажына бердиң? Арның канчап хөлүйүп калды? – деп, Дээрги-Чаяакчы Каинден айтырган. – Бир эвес эки чүве кылып турар болзуңза, бажың көдүр. А бир эвес эки чүве кылбайн турар болзуңза, эргин аксында бачыт кедеп чыдар. Ол сени бодунуң аайынче киириксеп турар-дыр, ынчалза-даа сен ону чагырар ужурлуг сен».
Каин дуңмазы Авелди: «Ховуже бараалам» – дээн. Ховуга баргаш, Каин дуңмазы Авелче халдай бергеш, ону өлүрүп каан.
«Дуңмаң Авел кайыл?» – деп, Дээрги-Чаяакчы Каинден айтырган.
«Билбес мен. Дуңмамны мен кадарып турар эвес мен» – деп, ол харыылаан.
«Чүнү кылып алганың ол? Сээң дуңмаңның черде төктүп калган ханы Мени кый деп тур – деп, Дээрги-Чаяакчы чугаалаан. – Сен каргыш алыр сен: дуңмаңның ханы-биле суггарганың чер сенден хая көрнү бээр. Черни чеже-даа болбаазырадырыңга, ол сеңээ моон соңгаар дүжүт бербес. Чер кырынга кагдырган тояанчы бооп чурттаар сен».
Каин Дээрги-Чаяакчыга мынча дээн: «Ол яла аар-дыр. Мен ону угбас мен. Сен мени черден сывырыптар сен. Сен менден хая көрнү бээр сен. Кагдырган тояанчы мени душкан-на кижи өлүрүп каар ыйнаан».
Дээрги-Чаяакчы: «Ындыг болза, Каинни кым өлүрер болдур, аңаа чеди дакпыр яла онаажыр» – дээш, таварышкан улус ону өлүреринче семевес кылдыр, Каинни онзагай демдек-биле демдеглеп каан. Каин Дээрги-Чаяакчыдан чоруткаш, Эдемниң чөөн талазында Нод деп чуртка турумчуп алган.

Каин кадайы-биле чоокшулашканының түңнелинде, кадайы иштелип-саатталгаш, аңаа Энох деп оол уруг божуп берген. Каин ол үеде хоорай тудуп турган; ол хоорайны Энох деп оглунуң ады-биле дөмей кылдыр адап алган. Энохтан Ирад деп оол төрүттүнген; Ирадтан – Мехиаел, Мехиаелден – Мафушаел, Мафушаелден – Ламех төрүттүнген.
Ламех ийи кадай алган: бирээзин – Адда, өскезин Цилла дээр. Адда Явал деп оол божаан. Майгыннарда чурттап, мал-маган кадарып, көжүп чоруур улустуң ажылының эгезин Явал салган. А хөгжүмчү улустуң салым-чаяанының эгезин Явалдың дуңмазы Ювал салган. Цилла Тувал-Каин деп оол божаан. Тувал-Каин хүлерден болгаш демирден ок-чепсек согар дарган болган. Тувал-Каинниң Наама деп кыс дуңмазы турган.
Ламех бодунуң кадайларынга мынча дээн:

«Адда биле Цилла! Мени дыңнаңар.
Чүнү чугаалаарымны дыңнаңар, кадайларым!
Бир эвес мени эр кижи балыглапса – өлүрүп каар мен!
Бир эвес бичии оол-даа мени шанчыпса – өлүрүп каар мен!
Бир эвес Каин дээш яла чеди дакпыр аар болза,
Ламех мен дээш – чеден чеди дакпыр аар болур!»

Адам база катап кадайы-биле чоокшулашкан. Кадайы аңаа оол божуп бергеш, ону Сиф деп адап каан. Ева: «Каинге өлүрткен Авелдиң орнунга Бурган меңээ чаа төл берген» – дээн. Сифтен база оол төрүттүнген, ону Энос деп адап каан.
Оон бээр кижилер Дээрги-Чаяакчыны мактап, Ооң адын адап кыйгырар апарганнар.

Escuchar Эге дөс 4