Luk 19
19
Zozii ɩya Zasee
1Zozii ya Zelikoodua nɩkplaan ble 'nyɩ ɔ 'ŋatɩa 'mʋʋ. 2Nclɔɔ bhlo ‑kʋa 'yɛpɩ, ma laa 'mɔɔ Zasee, ɔ ‑glɩa ‑lapooclanyaa ma to 'nyɩ ɔ ‑lioa 'bhɛlɩ. 3Ɔ 'matɩa le ɔ 'kaa Zozii cibhlili, ‑ma ‑alawleea 'la gbʋ, 'ɔ mino 'taa, sa ɔ 'taa 'bhʋa na. 4Na, ɔ ya sɔmɩfa, ɔ ya ncɛlɩa 'kʋklʋʋn 'dɩlɩ, 'nyɩ ɔ ya sua ma la 'lɛ sikomɔlʋ na 'wlu ‑gblaa, le ɔ 'kɔɔ 'lɩ, sa dɩpɩa Zozii cɩ 'kaa 'lɛ 'plɩlɩ na.
5Na, daa Zozii ŋeni 'lɛ dɩpɩa na, ɔ ya 'ci 'kʋbho 'nyɩ ɔ yɔɔ 'cla lebhe: «Zasee, kwli 'faanfan, sa ‑yaka, ɩ ‑fata le n ble ‑naa 'slea nɩkplaan.» 6Zasee ya 'faanfan kwli 'nyɩ pɔlɛkʋmɛnɔɔn, ɔ ya Zozii 'sleen famʋ. 7Ncɛlɩa ‑tɛtɛa 'lɩa 'lɛ ɩmɩ ‑naa 'ciin na, ma gbaa wɔlɩ 'nyɩ ma claa lebhe: «Nyinyinʋnyɔ ɔ mʋ 'lɛ 'kʋplakan.» 8‑Ma Zasee ya 'kʋbho 'nyɩ ɔ ya ‑Kwlenyɔa 'cla lebhe: «‑Kwlenyɔ, n nyɩ ŋaazɩnya 'na 'nanɩa 'la 'kle. 'Nyɩ ka n ‑ka nclɔɔ ‑dufle li na, n calɔɔ ɔla 'dalaa 'la dɩpici ‑nmɔɔna.» 9Na, Zozii yɔɔ 'cla lebhe: «‑Yaka, gbʋʋnsalɩɛ ya 'sle ‑naa 'kʋ ŋeni, sa Zasee ‑ma, ɔ ‑glɩmʋ Ablaamʋ 'la 'cʋ. 10Ka Nclɔɔa 'Cʋa* ci 'lɛ le ɔ 'ka maa ‑ɔ ‑mlɔa 'lɛ na, 'matɩ ɩya ɔ 'kɩɩ gbʋʋn ‑sa.»
Nyɩbhɛlʋa ‑ɔ mʋa 'lɛ lowluun na 'la wɔlɩ
(Mat 25.14-30)
11Daa ncɛlɩa poa 'lɛ wɔɔnyɩtʋ ‑naa 'nyukwliin na, sa Zozii yaanɩa 'lɛ Zolizalɛmʋ cɩ mɛ na, ma gugua le Laagɔ 'la Nyɩbhɛlɩdua* cɩ 'kaa dɩpɩa bhlogbɩɩ cili. Na, ɔ ya ɔ ya ‑awlɛ ‑nyandla bhlo bu, 12'nyɩ maa 'cla lebhe: «Nclɔɔ bhlo, ‑ɔ 'wlʋ 'lɛ 'ŋlɩkalɩlɔlʋ nɩkplaan na, ɔ ya 'koonkoon bhlɩ 'kʋ lowluun mʋ le ma 'kɔɔ nyɩbhɛlɩkpo 'kʋ zʋ ɩya ɔ 'ka ɔ 'bhlɩ cɔlɔ. 13Ɔ ya ɔla lobhocuo 'kʋgba 'la, ɔ ya nclɔɔ nclɔɔ 'dala 'la ‑baagɩco bhlo 'nyɩ, 'nyɩ ɔ ya maa 'cla lebhe: A 'ma 'dala ‑naa ɩya a yla 'kɔsɛ ‑aan ɩya 'na ciclɩɩa 'ka ŋeni.
14‑Ma nclɔɔ ‑naa, ɔ 'bhlɩnyaa ‑zɔa 'mɔɔ. Na, ma yɔɔ ncɛlɩ bɩkʋlobhu le ma 'claa lebhe: ‑A 'ta ‑wa le ɔ ‑kwle ‑anyɩ.
15'Bhlɩmɔɔn, ma yɔɔ nyɩbhɛlɩkpoa 'kʋ zʋ 'nyɩ ɔ ya ɔ 'bhlɩ cɔlɔ. Na, ɔ ya ɔla lobhocuoa ɔ 'nyɩa 'lɛ 'dalaa na ɔcɩ ‑deliin la le ɔ 'ka nclɔɔ nclɔɔ 'la 'kɔsɛa ɔ yla 'lɛ na, cibhlili. 16‑Bɛkanaanɔa ya ci 'nyɩ ɔ ya 'cla lebhe: ‑A to, ‑naa 'dalaa 'la ‑baagɩ coa n 'nyɩɩn 'lɛ na, n ya 'dala 'la ‑baagɩ cʋ 'kʋgba 'lɩ, 'nyɩ n nyɩɩ 'kʋ ‑gbɛ. 17Ɔ yɔɔ 'cla lebhe: Ɩ nanɩ, ‑n ‑glɩ lobhoco 'nanɔ. ‑N ya 'lɛ lɩɩ pɛ 'la 'klʋlɩlɩɛ nɩkplaan pala le ma cɩɔ ‑delikʋtɛbhalɩ na, n nyɩɔ 'di 'kʋgba ‑kwleda. 18‑Mɔsɔ ‑naanɔa ya ci 'nyɩ ɔ ya 'cla lebhe: ‑A to, ‑naa 'dalaa 'la ‑baagɩ co, n ya 'dala ‑baagɩ cʋ ‑ngbi 'lɩ, n yɩɩ 'kʋ ‑gbɛ. 19Ɔ ya 'dɛ ‑naanɔa ‑ma 'cla lebhe: ‑Mɔɔ ‑ma, n nyɩɔ 'di ‑ngbi ‑kwleda. 20‑Da ‑naanɔ bhlo ‑ma, ɔ ya ci 'nyɩ ɔ ya 'cla lebhe: ‑A to, 'lɩka ‑naa 'dalaa. Ka n gʋa 'lɛ lokwipɛlʋ nɩkplaan 'nyɩ n yaa 'lɛ saazʋ. 21‑Naa ŋanɔ bhlaa ‑amʋa, ‑ofi lebhe ‑naa wɔlɩ 'tɛ. Lʋʋa ‑n 'ta 'lɛ nclɔɔ saazʋda 'nyɩ na, ʋmʋ ‑n clalɩɔ, 'nyɩ lʋʋa ‑n 'ta 'lɛ golo na, ʋmʋ ‑n dɩ. 22Nyɩbhɛlʋa yɔɔ 'cla lebhe: Lobhoco ‑nyunyo, ‑mɔ 'titi ‑naa niwɔlɩa 'kʋ, n cɩ 'kɔɔ 'lɛ 'tɩtɩplalɩ. ‑N ‑ci sɛɛ le 'na wɔlɩ 'tɛ, lʋʋa n 'ta 'lɛ nclɔɔ sazʋda 'nyɩ na, ʋmʋ n clalɩɔ, 'nyɩ lʋʋa n 'ta 'lɛ golo na, ʋmʋ n dɩ 'lɛ. 23Na 'lɩsaa 'la gbʋ ‑n 'ta 'lɛ 'na 'dalaa 'bhaklɔɔn fa bha? N cia 'lɛ ‑sa na, ka n cɩ 'kaa 'lɛ aya ala ‑nvʋsʋɛa 'ma. 24'Nyɩ ɔ ya maa ‑ɔ ‑kʋa 'lɛ 'dɛ na, 'cla lebhe: A ‑salɩɔ ɔla ‑baagɩ coa ɩya a 'nyɩnɩa ɔmɔa ‑ɔ ‑ka 'lɛ ‑baagɩ cʋa 'kʋgba na. 25Ma yɔɔ 'cla lebhe: ‑A to, ɔ ‑ka tooto ‑baagɩ 'kʋgba. 26‑Ma ɔ ya 'cla lebhe: N solu anyɩ lebhe: Nclɔɔa ‑ɔ ‑ka 'lɛ na, ma cɩɔ 'nyɩ. ‑Ma ɔmɔa ‑ɔ 'ta 'lɛ ‑ka na, 'pɛpɛ 'titi ɔ ‑ka ‑kao na, ma cɩɔ mɔ ‑salɩ. 27‑Ɔ ‑glɩ 'lɛ 'na ‑zɔbhɛlɩgbanyaa, ncɛlɩ ‑naa ‑ɔ 'taa 'lɛ wabha le n ‑kwle maa na, a ‑la maa ‑da 'na ɩya a 'bhla maa 'na 'ci 'kʋ.»
28Na, daa Zozii 'bhli 'lɛ ‑sa 'kʋ na, ɔ ya ‑alawleea 'kʋklʋʋn 'plɩ 'nyɩ ɔ mʋa Zolizalɛmʋ.
Zozii ble Zolizalɛmʋ
(Mat 21.1-9; Mak 11.1-10; Zan 12.12-16)
29Daa Zozii mɛ 'lɛ 'dia ma la 'lɛ Bɛtɩfazee ɩya Betanii cɩ na, Olivʋsikike ‑gbazɔa, ɔ ya gɩlɩnya* ‑mɔsɔ lobhu 30'nyɩ ɔ ya maa 'cla lebhe: «A mʋ 'kʋklʋʋndua 'kʋ. A ‑kʋʋ nɩkplaan ble na, a cɩ 'ka 'flumuco 'lɩ, ʋ ‑gʋɔ, nclɔɔ bhlogbɩɩ 'ta ka ‑azlʋʋ 'kʋ ‑to. A ‑bluluu ɩya a ‑lamʋʋ. 31'Nyɩ ka nclɔɔ ‑ka anyɩ neen 'cla lebhe 'lɩsaa 'la gbʋ a ‑bluluu 'lɛ bha? A 'clɔɔ le ‑Kwlenyɔa 'matɩʋ 'lɛ.»
32Gɩlɩnyaa ‑mɔsɔa ya mʋ 'nyɩ ma ya ɩmɩa ‑tɛtɛa 'lɩ, saa Zozii solua 'lɛ maa na. 33Na, ma ‑kʋa 'lɛ 'flumucoa ‑bluluda na, ʋ tocɩa ya maa neencla lebhe: «'Lɩsaa 'la gbʋ a blulua 'lɛ 'flumuco ‑naa bha?» 34Ma ya maa neenŋonu lebhe: «‑Kwlenyɔa 'matɩʋ 'lɛ.» 35Ma ya 'flumu coa Zozii ‑la, ma yʋʋ mala lokua 'kʋ ylʋ, 'nyɩ ma yʋʋ Zozii 'kʋ tʋa. 36Saa ɔ mʋa 'lɛ 'kʋklʋʋn na, sɛɛ ncɛlɩa ylʋa 'lɛ mala lokua ‑gugwiea 'kʋ. 37Daa ɔ ‑kʋanɩa 'lɛ ‑Olivʋsikikea ‑kwlida na, gɩlɩnyaa 'la 'kpaa, ‑pɔpʋɛ ‑yelia 'lɛ na, ya nikadieen Laagɔ ‑evli wolɩɛ bhɔ 'ciinzizielɩlobholia ‑tɛtɛa ma 'lɩa 'lɛ 'ciin na, 'la gbʋ. 38Ma claa lebhe: «'Nyupalɩɛ ŋenɩ nyɩbhɛlʋa ‑ɔ cili 'lɛ ‑Kwlenyɔ 'la 'ŋlɩa nɩkplaan na! Pupue ŋeni ‑laagɔɔn ɩya 'klʋagba ŋeni 'kʋzilo Laagɔ, 'yɛpɩ ‑laagɔɔn!» 39Na, Falizɩɛnnyaa* ‑zlʋsaasaa ‑ɔ ‑kʋmʋa 'lɛ ‑alawleea sidiin na, ya Zozii 'cla lebhe: «Canyɔ, solu ‑naa gɩlɩnyaa le ma mɛ mala nia!» 40‑Ma Zozii ya maa neenŋonu lebhe: «N solu anyɩ le: Ɩ ‑ka ‑kʋ le ma ‑ka mala nia mɛ na, cɔkʋa ‑ɩ cɩ 'ka 'lɛ 'kasɛ 'pa.»
Zozii bhʋtʋ Zolizalɛmʋdua
41Daa Zozii mɛ 'lɛ Zolizalɛmʋdua cɩ 'nyɩ ɔ 'lɩʋ 'lɛ na, ɔ yʋʋ 'wlu 'tulu. 42Ɔ claa lebhe: «Ɩ ‑ka ‑kʋ le ‑mɔɔ ‑masɛɛ, n ya ‑yaka saa ‑n cɩ 'kaa 'lɛ pupue 'lɩlɩlɩ na, cibhlilia na! ‑Ma 'ayɩ! Ɩmɩ ‑naa yɔɔ 'ciinzizieli! 43Clɩɩ bhlo cɩ 'ka ŋeni ɩya ‑naa ‑zɔbhɛlɩgbanya 'kɔɔ didio, ma 'ka ‑naa ‑gbidi ‑gblaalɩ ɩya ma 'kɔɔ ŋɔmʋ gleli. 44Ma cɩ 'kɔɔ gbɔlʋ ɩya ma 'ka ‑naa nɩkplaan 'la ncɛlɩa 'bhla. Maa cɩ 'tanɩɔ nɩkplaan ‑gbudu bhlogbɩɩ 'nylugoda 'lɩ ‑ofi lebhe ‑n 'ta clɩɩa 'kʋa n cio 'lɛ klalɩkan cibhlili.»
Zozii ya lɩɩpɛlɔzʋnyaa Laagɔpaakadiea ‑zɔn 'tli
(Mat 21.12-17; Mak 11.15-17; Zan 2.13-17)
45Na, Zozii ya Laagɔpaakadiea* ‑zɔn ble 'nyɩ ɔ ya maa ‑ɔ zʋlʋa 'lɛ 'yɛpɩ lɩɩ 'pɛlʋ na, 'tlilɩɛ bhɔ. 46Ɔ claa maa lebhe: «Ɩ ‑zieo lebhe: 'Na ‑palʋa, bhibhie ‑palʋ ʋ cɩ 'ka 'lɛ 'plɩ. ‑Ma anyɩ, a yʋʋ 'winya 'la zizieda ple.» 47Na Zozii ‑kʋa clɩɩa 'fɩan Laagɔpaakadiea ‑zɔn 'nyɩ ɔ caa. ‑Teyiyinya ‑kpasɩa, ‑jlɩmaazienyaa* ɩya 'dutocɩa ‑masɛ 'matɩa le ma kaa ‑mɔɔ 'bhlaa, 48‑ma maa 'lɩ 'taa saa ma 'kaa 'lɛ nʋnʋ na, ‑masa ncɛlɩa 'fɩan ‑waa 'mɔɔ 'nyukwliinpolɩɛ na.
Actualmente seleccionado:
Luk 19: NTLD13
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Dida New Testament © Bible Society of Côte d'Ivoire, 2013.