Luk 18
18
'Kuzluŋlɔa ɩya 'tɩtɩplanyɔa 'la ‑nyandla
1Zozii ya ‑nyandla bhlo bu 'nyɩ ɔ ya ɔla gɩlɩnyaa* solu le ɔ 'ka maa pala le ɩ ‑fata le ma bhibhie clɩɩa 'fɩan ɩya 'nyɛkɛ 'la 'kɔtɔa maa. 2Ɔ ya maa 'cla lebhe: «'Tɩtɩplanyɔ bhlo ‑kʋa 'du bhlo 'kʋ, 'ɔ 'gulu 'taa Laagɔ naa ɔ zʋ 'taa ncɛlɩ. 3Na, du ‑naa 'kʋ, 'kuzluŋlɔ bhlo ɔ ‑kʋa 'yɛpɩ. Ɔ cia ‑azla 'tɩtɩplanyɔa 'bhlɩ 'nyɩ ɔ clɔɔ lebhe ‑pla n ‑ya 'na ‑zɔbhɛlɩgbanyɔa 'la 'tɩtɩa ɩya ‑n 'nyɩ. 4Ɔ 'ta ŋonu ‑aan 'nyɩ ɩ ya ‑gwlɛlɩ. 'Nyɩ ɔ ya ɔcɩ 'cla lebhe ka n 'ta Laagɔ 'gulu 'titito 'nyɩ n 'ta ncɛlɩ zʋo na, 5sa 'kuzluŋlɔ ‑naa, ɔ gleliin 'lɛ nyɔmʋ na, n cɩ 'ka ɔla 'tɩtɩa ‑pla n 'kɔɔ 'nyɩ ɩya ɔ 'la kanɩɩn dlɛdlʋ neen zʋkan ci.»
6'Nyɩ ‑Kwlenyɔa ɔ ya 'cla lebhe: «A po wɔlɩa yooyo 'tɩtɩplanyɔ ‑naa nyɩtɛ 'lɛ na, 'nanɩ 'nyukwliin. 7Na, Laagɔ 'ɔ cɩ 'ta ɔla deslaslanyaa, ‑ɔ lɔɔ 'lɛ zezezeliin ɩya bhlibhliylʋʋn na, 'la 'tɩtɩa ‑pla ɩya ɔ 'ka maa 'nyɩ bha? Ɔ cɩ gba, ma cɩ ‑bɛ bha? 8N solu anyɩ: Ɔ cɩ maa 'tɩtɩa ‑pla 'faanfan 'titi 'nyɩ ɔ cɩ maa 'nyɩ. ‑Ma Nclɔɔa 'Cʋa*, daa ‑ɔ cɩ 'ka 'lɛ ci na, ɔ cɩkɩnɩ ‑dʋdʋa 'kʋ pɔɔtɛtɛ ŋeni bha?»
Falizɩɛnnyɔa ɩya ‑lapooclanyɔa 'la ‑nyandla
9Zozii ɔ ya ‑awlɛ ‑nyandla ‑naa, maa ‑anʋa ‑ɔ laa 'lɛ macɩ 'kʋnylugolunya 'nyɩ ‑ɔ bu 'ta 'lɛ ma 'ye na, 'la gbʋ bu. 10Ɔ nabhe: «Ncɛlɩ ‑mɔsɔ ya Laagɔpaakadiea* ‑zɔn mʋ, le ma 'ka bhibhie. Bhlo ‑glɩa Falizɩɛnnyɔ* 'nyɩ bhlo ‑glɩa 'lɛ ‑lapooclanyɔ. 11Falizɩɛnnyɔa 'nyulugo 'nyɩ ɔ bhibhiea ‑sa ɔcɩ nɩkplaan: 'Na Laagɔ, n bhɔlʋɔ, saa n 'ta 'lɛ ‑kʋ le ‑daa ncɛlɩa, ‑ɔ ‑glɩ 'lɛ 'winya, ‑ɔ 'ta 'lɛ 'kʋnylugolu, ‑ɔ ‑glɩ 'lɛ ŋlʋmatɩnya, ‑aana ‑ɔ 'kʋ 'lɛ le ‑lapooclanyɔ ‑naa 'bhisa na. 12N zlo ‑zeli dɩ ‑mɔsɔ nyamaclɩɩ nɩkplaan, 'nyɩ n nyɩɔ 'na lɩɩa n lɩ 'lɛ na, ɩla 'kʋgba cea.
13‑Ma ‑lapoclanyɔa 'nylugoa 'koonkoon, 'ɔ ŋonu 'taa ɩya ɔ 'kaa 'ci 'kʋbhli ɩya ɔ 'kaa ‑laagɔɔn kope, ‑ma ɔ ‑kʋa cɩɩnkalɔɔn, ɔ bhutia ɔcɩ dineen, 'nyɩ ɔ claa lebhe: 'Na Laagɔ, 'lɩ nyinyinʋnyɔa n ‑glɩ 'lɛ na ŋaazɩɩn. 14Na, n solu anyɩ: ‑Lapooclanyɔa, daa ɔ cɔlɔ 'lɛ 'sleen na, Laagɔ yɔɔ 'kʋnylugolunyɔ ple, ‑ma ‑n 'ta Falizɩɛnnyɔa*. Sa, nclɔɔa ‑ɔ to 'lɛ ɔcɩ 'kʋ na, ma cɩɔ ‑dʋdʋ 'kʋ ‑la, ‑ma ɔmɔa ‑ɔ la 'lɛ ɔcɩ ‑dʋdʋ 'kʋ na, ma cɩɔ 'kʋto.»
Zozii ya 'cuo 'nyupalɩ
(Mat 19.13-15; Mak 10.13-16)
15Ncɛlɩ ‑ya 'cisanpɔlɩ 'ma, ma ya maa Zozii ‑la le ɔ 'ka maa cɩkla. Na gɩlɩnyaa* 'lɩ 'lɛ ɩmɩ ‑naa na, ma zalalɩa maa 'ci. 16‑Ma Zozii ya gba, ma yɔɔ 'cuoa ‑la 'nyɩ ɔ ya 'cla lebhe: «A 'talɩ 'cuoa 'cin, ma ciin 'bhlɩ. A 'la 'nylugolua maa, sa Laagɔ 'la Nyɩbhɛlɩdua* ‑kʋ ʋ ‑nyɩɔ maa ‑ɔ ‑kʋ 'lɛ le maa 'bhisa na. 17N solu anyɩ ɩ ‑glɩ ‑nʋawlɛ: Ɔmɔa ‑ɔ cɩ 'ta 'lɛ Laagɔ 'la Nyɩbhɛlɩdua 'ma le 'cilee 'bhisa na, 'ɔ cɩ 'tʋʋ nɩkplaan ble ‑ylɛylɛ.»
Ncaanyɩbhɛlʋa 'la wɔlɩ
(Mat 19.16-30; Mak 10.17-31)
18Zifʋnyaa* 'la ncaakadie bhlo ya Zozii neencla lebhe: «Canyɔ 'nanɔ, 'lɩsaa n cɩ 'kaa 'lɛ nʋ ɩya n 'ka 'lɛ 'lʋkʋlʋkʋ 'la jabhʋa ‑aja 'kʋ lili bha?» 19Zozii yɔɔ neenŋonu lebhe: «'Lɩsaa 'la gbʋ ‑n laan 'lɛ ncaananɔ bha? Nclɔɔ bhlogbɩɩ 'ta nanɩ, ‑ma Laagɔ bhlogbɩɩ ‑tɛɛ. 20‑N ‑ci ‑jlɩmaa. ‑Naa 'matɩa ‑n 'yʋ 'la 'ŋlɔ, ‑naa 'bhlaa nclɔɔ, ‑naa ghlia 'wi, ‑naa lia ‑kplakpla ‑danʋfʋɛ, zʋ ‑n 'nɔ ɩya ‑n to.» 21Nclɔɔa yɔɔ 'cla lebhe: «‑Jlɩmaa ‑naa ‑tɛtɛa, 'na nyɩgbɛ 'kʋ tooto n 'plɩlɩa 'lɛ 'kʋ.» 22Na, Zozii 'nuo 'lɛ neen na, ɔ yɔɔ 'cla lebhe: «Lʋʋ bhlogbɩɩ ‑tɛɛ ‑ɔ ‑to ‑awlɛɔ 'lɛ ɩya n kanɩ nʋ. Lɩɩa ‑tɛtɛa ‑n ‑ka 'lɛ na, zʋɩ 'pɛlʋ, poli 'dalaa ŋaazɩnya ɩya ‑n ka ‑laagɔɔn 'bhɛlɩ li, ɩya ‑n ci ɩya ‑n gɩlɩɩn.» 23Daa ɔ 'nu 'lɛ wɔlɩ ‑naa na, 'ɔ ‑lɩɩbhuoa ya ‑cʋʋ 'plɩ, sa ɔ ‑lioa 'bhɛlɩ 'kadɩ na.
24Na, daa Zozii 'lɩ 'lɛ le ɔ ya ‑cʋʋ 'plɩ na, ɔ ya 'cla lebhe: «Maa ‑ɔ ‑lio 'lɛ 'bhɛlɩ na, ma 'ka 'lɛ Laagɔ 'la Nyɩbhɛlɩdua* nɩkplaan ble na, ɩ 'tɛ ɩ ‑nyɩɔ maa! 25‑Ghɛɛ, ‑samoo 'ka 'lɛ 'mɛsɛlʋ 'la kofo nɩkplaan bleli na, ɩ cɔlʋ 'nyɩ ɩ zi saa nyɩbhɛlʋ 'ka 'lɛ Laagɔ 'la Nyɩbhɛlɩdua nɩkplaan ble na 'kʋ.»
26Maa ‑ɔ poa 'lɛ Zozii 'nyukwliin na, yɔɔ 'cla lebhe: «Na, ncaasaa 'titi ‑ɔ cɩ kanɩ 'lɛ gbʋʋnsalɩɛ 'lɩ bha?» 27Zozii ya maa neenŋonu lebhe: «Ɩmɩa ncɛlɩ cɩ 'ta 'lɛ nʋlɩɛ mino na, Laagɔ cɩɩ mino.»
28Pɩɛlɩ ya Zozii 'cla lebhe: «‑Anyɩ, ‑a ya ‑ala 'nanɩa te 'nyɩ ‑a yɔɔ 'lɛ gɩlɩ.» 29Zozii ya maa 'cla lebhe: «N solu anyɩ ɩ ‑glɩ ‑nʋawlɛ, nclɔɔ bhlogbɩɩ 'ta ka ‑azla Laagɔ 'la Nyɩbhɛlɩdua 'la gbʋ, 'sle, 'ŋlɔ, bholiecɩ, valɩnya ‑aana 'cuo te, 30ɩya ɔ 'la ka ‑laagɔzɔn ‑naa, lɩɩ ‑bhutukpa 'lɩ ɩya ‑laagɔzɔan ‑ɩ ci 'lɛ 'yɛpɩ na, 'lʋkʋlʋkʋa jabhʋa.»
Zozii nyɩtɛ ‑awlɛ ɔla 'kwɩa ɩya ɔla 'kwɩɩnkʋbhuea 'la wɔlɩ
(Mat 20.17-19; Mak 10.32-34)
31Zozii ɔ ya gɩlɩnyaa* 'kʋgba ‑mɔsɔa ɔcɩ cɩ lalɩ 'nyɩ ɔ ya maa 'cla lebhe: «'Lɩka, ka ‑a ‑gblaa 'lɛ Zolizalɛmʋ ɩya ɩmɩa 'fɩan Laagɔnekʋnyɩtɛnyaa* zie 'lɛ Nclɔɔa 'Cʋa* 'la gbʋ na, ɩ 'ka 'kʋglalɩ. 32‑Zaagbʋsa, ma cɩ 'kɔɔ maa ‑ɔ 'ta 'lɛ Zifʋnya ‑glɩ na wlɩɩn 'pɛlʋzʋlʋ, ma 'kɔɔ nyanɩ, ma 'kɔɔ vla, ɩya ma 'kɔɔ ‑daadʋ 'kʋ 'pa. 33Ma cɩ 'kɔɔ ‑ngblieen bhutili ɩya ɩla leean, ma 'kɔɔ 'bhla, ɔ 'ka 'ku. Ɩya ɩla ‑mɔta ‑zelia, ɔ 'ka 'kwɩɩnkʋbho.» 34‑Ma gɩlɩnyaa 'taa wɔlɩ ‑naa 'la ‑zɔn 'nu ‑ylɛylɛ. Wɔɔnyɩtʋ ‑naa, bia maa 'wlu 'nyɩ ma 'taa ɩmɩa Zozii ɔ ‑waa 'lɛ le ɔ 'kaa nyɩtɛ na, cibhili.
Zozii ya Zelikoo 'citutunyɔ bhlo jabha
(Mat 20.29-34; Mak 10.46-52)
35Na, daa Zozii mɛ 'lɛ Zelikoodua cɩ na, 'citutunyɔ bhlo ‑kʋa ‑gugwiea cɩ sa 'nyɩ ɔ zlaa. 36Ɔ ya ‑alawlee 'la kplikplikpli 'nu 'nyɩ ɔ ya neencla. 37Ma yɔɔ 'cla lebhe: «Zozii, Nazalɛtɩnyɔa, ɔmɔ ‑ɔ plɩ 'lɛ.» 38Na, ɔ ya nɩkplaan ‑gaa 'nyɩ ɔ claa lebhe: «Zozii, Daviti 'la 'Cʋ, 'maa 'lɩɩn ŋaazɩɩn!» 39Maa ‑ɔ ‑kʋa 'lɛ 'kʋklʋʋn na, ma ‑gaalɩa 'mɔɔ 'wlu le ɔ 'kaa ɔla nea mɛ. ‑Ma ɔmɔ, ka ‑tɛɛ ɔ ‑gaanɩa 'lɛ nɩkplaan ‑gbɔɔn 'nyɩ ɔ claa 'lɛ lebhe: «Daviti 'la 'Cʋ, 'maa 'lɩɩn ŋaazɩɩn!»
40Zozii ya 'nylugo 'nyɩ ɔ ya 'cla le ma ‑lɔɔ mɔ. Daa 'citutunyɔa mɛɔ 'lɛ cɩ na, ɔ yɔɔ neencla lebhe: 41«'Lɩsaa ‑n ‑waa 'lɛ le n nʋ ɩya n 'nyɩɔ bha?» Ɔ nabhe: «‑Kwlenyɔ, 'naa n 'lɩ sa!» 42Na, Zozii yɔɔ 'cla lebhe: «'Maa 'lɩ sa. ‑Naa pɔɔtɛtɛa ɛ yɔɔ jabha.» 43'Kplookʋ ɔ ya salɩ 'nyɩ ɔ gɩlɩa Zozii 'nyɩ ɔ gbaa Laagɔ 'klʋ. Na, daa ncɛlɩa 'fɩan 'lɩ 'lɛ ɩmɩ ‑naa 'ciin na, ma woa Laagɔ ‑evli.
Actualmente seleccionado:
Luk 18: NTLD13
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Dida New Testament © Bible Society of Côte d'Ivoire, 2013.