Zan 1
1
Wɔɔnyɩtʋa ya nclɔɔ 'plɩ
1Bhɔdaa tooto, Wɔɔnyɩtʋa ‑kʋa.
'Nyɩ Wɔɔnyɩtʋa ‑ya Laagɔ ‑kʋa,
'nyɩ Wɔɔnyɩtʋa ‑glɩa Laagɔ.
2Bhɔdaa, ʋya Laagɔ ‑kʋa.
3Ʋmʋ ‑ʋ nʋ 'lɛ ‑tɛtɛa 'fɩan,
'nyɩ lʋʋa ʋ 'ta 'lɛ nʋ na, ʋ 'ta ‑kʋ.
4Ʋmʋ nɩkplaan jabhʋa ‑kʋa 'lɛ
'nyɩ jabhʋa ‑glɩa 'lɛ ncɛlɩ 'la zezezeli.
5'Nyɩ zezezelia leli 'tutua nɩkplaan, ‑ma 'tutua 'ta ŋonu ɩya ʋya zezezelia 'ka dabhlo kʋ.
6Na, Laagɔ ya nclɔɔ bhlo lobhu, ma lɔɔ Zaan. 7Ɔ ya ci le ɔ 'ka zezezelia 'la ‑danʋfʋɛ li, ɩya ncɛlɩa 'fɩan 'ka ɔla ‑danʋfʋɛliliea 'kʋ 'plɩlɩ ɩya ma 'ka pɔɔtɛtɛ 'lɩ. 8‑N 'ta ɔmɔ ‑ɔ 'taa 'lɛ zezezelia ‑glɩ, ‑ma ka ɔ ci 'lɛ ɩya ɔ 'ka zezezelia 'la ‑danʋfʋɛ li.
9Wɔɔnyɩtʋa ‑glɩa 'lɛ zezezelia 'titi, ‑ɩ ci 'lɛ ‑laagɔzɔan 'nyɩ ‑ɩ leli 'lɛ ncɛlɩa 'fɩan 'kʋ na. 10Ɔmɔa ‑ɔ ‑glɩa 'lɛ Wɔɔnyɩtʋa na, ɔ ‑kʋa ‑laagɔzɔan, 'nyɩ ɔmɔ ‑ɔ nʋ 'lɛ ‑laagɔzɔan, ‑ma ‑laagɔzɔan 'tɔɔ cibhlili. 11Ɔ ya ɔ 'bhlɩ ci, ‑ma ɔ 'bhlɩnyaa 'tɔɔ kla. 12'Bhlɩmɔɔn, maa ‑anʋa ‑ɔ klɔɔ 'lɛ, 'nyɩ ‑ɔ ‑ka 'lɛ ɔla 'ŋlɩa 'la pɔɔtɛtɛ na, ɔ ya maa ‑jioli 'nyɩ le ma 'plɩ Laagɔ 'la 'cuo. 13'Nyɩ maa ‑naa, ‑n 'ta ‑dolu, 'nyɛkɛ, ‑aana nclɔɔ 'la ‑pɔɔsanʋlɩɛ nɩkplaan ma 'ta 'lɛ ‑valɩlɩlɩɔ, ‑ma Laagɔ nɩkplaan.
14Na, ɔmɔa ‑ɔ ‑glɩa 'lɛ Wɔɔnyɩtʋa na, ɔ ya nclɔɔ 'plɩ, 'nyɩ ɔ ya ‑anyɩ sidiin kʋkan ci. ‑A ya ɔla 'klʋagbaa 'ciinlɩ. 'Klʋagba ‑naa Toa 'nyɩ 'lɛ ɔla 'ciŋodicoa bhloa dananɔ ɩya ‑nʋawlɛ ‑yelio 'lɛ na.
15Zaan lia ɔla ‑danʋfʋɛ, ɔ ‑gaa nɩkplaaan 'nyɩ ɔ claa lebhe: «'Lɩka ɔmɔa 'la wɔlɩa n nyɩtɛ 'lɛ lebhe: 'Na leen nclɔɔ bhlo ci 'yɛpɩ, ‑ma ɔ yaan 'kʋklʋʋnpʋ, ‑ofi lebhe 'fɩɔn n ka 'lɛ ci na, ɔ ‑kʋa tooto.» 16Ɔla 'nanɩ 'kadɩa nɩkplaan, ɔla 'nyupalɩɛa ya ‑anyɩa 'fɩan 'kʋ 'kɔsɔ 'ci 'ci. 17Sa, Moyizi ya ‑jlɩmaa ‑lamʋ, ‑ma Zozi Klisi ‑lamʋ 'lɛ dananɔ ɩya ‑nʋawlɛ. 18Nclɔɔ bhlogbɩɩ 'ta ka ‑azla Laagɔ 'ciinlɩ. ‑Ma 'Cʋa bhloa ‑ɔ ‑glɩ 'lɛ Laagɔ 'nyɩ ɔ ‑kʋ 'lɛ Toa cɩ na, ɔmɔ ‑ɔ palɔɔ 'lɛ ‑anyɩ.
'Nyuwluzʋnyɔ Zaan 'la ‑danʋfʋɛlilie
(Mat 3.1-6; Mak 1.2-8; Luk 3.1-6)
19Daa Zifʋnyaa* tocɩa ‑ɔ ‑kʋ 'lɛ Zolizalɛmʋ na, lobhu 'lɛ ‑teyiyinyaa ɩya mala klalɩnyaa Zaan 'bhlɩ, le ma 'clɔɔ neen nclɔɔa ɔ ‑glɩa 'lɛ na, 'lɩka ‑danʋfʋɛa ɔ li 'lɛ na. 20Ɔ ya maa ‑nʋawlɛ solu 'kpataa 'nyɩ ɔ ya 'cla lebhe: «‑N 'ta ‑amʋ ‑ɔ 'ta 'lɛ Laagɔ 'la ‑Sasanyɔa* ‑glɩ.» 21'Nyɩ ma yɔɔ neencla lebhe: «Na, ncaasaa ‑n ‑glɩnɩ 'lɛ bha? Elii bha?» Ɔ ya maa 'cla lebhe: «N 'ta Elii ‑glɩ.» Ma ya ‑awlɛɔ neencla lebhe: «Laagɔnekʋnyɩtɛnyɔa* ‑ɔ -cɩ kaa 'lɛ ci na, ɔmɔ ‑n ‑glɩ 'lɛ bha?» Ɔ ya maa neenŋonu lebhe: «‑Wɔɔ, n 'tɔɔ ‑glɩ.» 22Na, ma yanɩɔ 'cla lebhe: «Ncaasaa ‑n ‑glɩa 'lɛ bha? Ɩya ‑a ka maa ‑ɔ lobhu 'lɛ ‑anyɩ na, neenŋonusa cibhlili! ‑Mɔɔ 'titi ncaasaa ‑n laa 'lɛ ncɩ bha?» 23Ɔ ya maa 'cla lebhe:
«‑Amʋ ‑ɔ ‑glɩ 'lɛ ‑blɩɩzɔan ‑ʋ gaan 'lɛ 'pʋpʋa nɩkplaan
'nyɩ ‑ʋ cla 'lɛ lebhe:
A 'nylugolu ‑Kwlenyɔ 'la ‑gugwiea 'kʋ,
saa Laagɔnekʋnyɩtɛnyɔ Izayii 'bhlia 'lɛ 'kʋ na.» 24Maa ma lobhua 'lɛ na ‑glɩa Falizɩɛnnya*. 25Na, ma ya ‑awlɛɔ neencla lebhe: «N 'ta 'lɛ Laagɔ 'la ‑Sasanyɔa ‑glɩ, n 'ta 'lɛ Elii ‑glɩ, 'nyɩ ‑n 'ta 'lɛ Laagɔnekʋnyɩtɛnyɔa ‑glɩ na, 'lɩsaa 'la gbʋ ‑n zʋnɩ 'lɛ ncɛlɩ 'nyu 'wlu bha?» 26Zaan ya maa neenŋonu lebhe: «‑Amʋ, 'nyu nɩkplaan n zʋlʋ 'lɛ ncɛlɩ 'nyu 'wlu. ‑Ma ɔmɔa a 'ta 'lɛ ‑ci na ‑kʋ anyɩ sidiin. 27Ɔmɔ ‑ɔ ciin 'lɛ leen 'nyɩ n 'ta 'kʋŋwa le n ‑blulu ɔla ‑gbanbʋa 'la 'bhlua.» 28Betaniidua 'kʋ, Zludɛɛnnyidɔlʋa leen, gbazɩa Zaan zʋlʋa 'lɛ ncɛlɩa 'nyu 'wlu na, 'yɛpɩ ɩmɩ ‑naa 'plɩlɩa 'lɛ.
Laagɔ 'la 'bhlabhlɩcoa
(Mat 3.13-17; Mak 1.9-11; Luk 3.21-22)
29Na, daa ‑zeli ze 'lɛ na, Zaan ya Zozii 'lɩ, ɔ cilia 'mɔɔ 'bɩɩn 'nyɩ ɔ ya 'cla lebhe: «'Lɩka Laagɔ 'la 'bhlabhlɩcoa ‑ɔ sa 'lɛ ‑laagɔzɔan ɩla nyinyia cɩ na. 30Ɔla wɔlɩ n nyɩtɛ 'lɛ lebhe: 'Na leen nclɔɔ bhlo ci 'yɛpɩ, ‑ma, ɔ ‑pʋʋn 'kʋklʋʋn sa 'fɩɔn n 'ka 'lɛ ci na, ɔ ‑kʋa. 31‑Amʋ 'titi n 'taa 'mɔɔ ‑ci, ‑ma Izlayɛlɩlɔlʋa* 'kɔɔ 'lɛ cibhlili na, ɩla gbʋ dɛ n ci 'lɛ ncɛlɩ 'nyu nɩkplaan 'nyuwluzʋkan.» 32Zaan ya ‑danʋfʋɛ li 'nyɩ ɔ ya 'cla lebhe: «N ya ‑Kplɔkplɔ ‑Wugoa* 'lɩ 'dablee 'bhisa, ʋ ya ‑laagɔɔn 'wlʋ, ʋ yɔɔ 'kʋ kwlili 'nyɩ ʋ ‑kʋa 'mɔɔ 'kʋ. 33'N 'taa 'mɔɔ ‑ci, ‑ma ɔmɔa ‑ɔ lobhuun 'lɛ le n 'ma 'nyu ɩya n zʋ ncɛlɩ 'wlu na, ɔ yaan 'cla lebhe: Ɔmɔa -n -cɩ ka 'lɛ 'lɩ ɩya 'Wugoa 'ka 'lɛ 'kʋ kwlili ɩya ʋ 'ka 'kʋ kʋ na, ɔmɔ ‑ɔ zʋ 'lɛ ncɛlɩ ‑Kplɔkplɔ ‑Wugoa nɩkplaan. 34Na, ‑amʋ n yɔɔ 'lɩ 'nyɩ n li ‑danʋfʋɛ lebhe ɔmɔ ‑ɔ ‑glɩ 'lɛ Laagɔ 'la 'Cʋa.»
Zozii 'la ‑bɛka ‑gɩlɩnyaa
(Mat 4.18-22; Mak 1.16-20; Luk 5.1-11)
35Daa ‑zeli ze 'lɛ na, Zaan ‑kʋa ‑awlɛ dɩpɩa bhlogbɩɩ, ɔya ɔla gɩlɩnya* ‑mɔsɔ. 36Ɔ ya Zozii 'plɩda 'lɩ, ɔ yɔɔ 'ciin kope 'cɩɩ 'nyɩ ɔ ya 'cla lebhe: «'Lɩka Laagɔ 'la 'bhlabhlɩcoa.» 37Gɩlɩnyaa ‑mɔsɔa 'nuo 'lɛ wɔlɩ ‑naa neen na, ma ya Zozii gɩlɩ. 38Zozii ya kwlacala 'nyɩ ɔ 'lɩ 'lɛ lebhe ma gɩlɩa 'mɔɔ na, ɔ ya maa neencla lebhe: «'Lɩsaa a 'matɩa 'lɛ bha?» Ma yɔɔ 'cla lebhe: «‑Ghlabii, 'ndagbazɩ ‑n 'bhisleen ‑kʋa 'lɛ bha?» ‑Ghlabiia, ɩ sa ‑zɔn lebhe Canyɔ. 39Ɔ ya maa 'cla lebhe: «‑A ci ɩya a 'ka 'lɩ.» Na, ma ya mʋ 'nyɩ ma ya daa ɔ ‑kʋa 'lɛ na 'lɩ, 'nyɩ 'dɛ 'la clɩɩa 'kʋ, ma yɔɔ cɩ -to. Ɩ ‑glɩanɩa 'plɩplɩylʋʋn 'la 'ŋwacɩ ‑nmɔɔna 'la 'klia nɩkplaan.
40Simɔɔn Pɩɛlɩ bholi Andlee ‑glɩa gɩlɩnyaa ‑naa ‑mɔsɔa ‑ɔ 'nua 'lɛ Zaan 'la wɔɔnyɩtʋa 'nyɩ ‑ɔ gɩlɩ 'lɛ Zozii na, 'la nɩkplaan bhlo. 41‑Bɛɛ, ɔ ya mʋ, ɔ ya ɔmɔ 'titi ɔ bholi Simɔɔn ŋeni 'nyɩ ɔ yɔɔ 'cla lebhe: «‑A ya Laagɔ 'la ‑Sasanyɔa* ma la ‑awlɛ 'lɛ Klisi na 'lɩ.» 42Ɔ yɔɔ Zozii ‑la. Zozii yɔɔ 'ciinkope ‑aan 'nyɩ ɔ yɔɔ 'cla lebhe: «‑Mɔ ‑ɔ ‑glɩ 'lɛ Simɔɔn, Zaan ‑yowli. ‑Mɔ ma cɩ 'kanɩ 'lɛ Sefasɩ la, ɩ sa ‑zɔn le cokwie.»
Zozii ya Filipʋ ɩya Natanayɛlɩ la
43Daa ‑zeli ze 'lɛ na, Zozii ya wɔlɩ kpo 'kʋ zʋ le ɔ 'ka Galileebhlɩa 'kʋ mʋ. Ɔ ya Filipʋ 'lɩ 'nyɩ ɔ yɔɔ 'cla lebhe: «Gɩlɩɩn!» 44Filipʋ 'wlʋlʋa Bɛsayida, 'dua 'kʋa Andlee ɩya Pɩɛlɩ 'wlʋlʋa 'lɛ na. 45Filipʋ ya mʋ, ɔ ya Natanayɛlɩ ŋeni 'nyɩ ɔ yɔɔ 'cla lebhe: «Ɔmɔa 'la wɔlɩa ma nyɩtɛ 'lɛ Moyizi ɩya Laagɔnekʋnyɩtɛnyaa* 'la ‑afluwia nɩkplaan na, ‑a yɔɔ 'lɩ. Ɔmɔ ‑ɔ ‑glɩ 'lɛ Nazalɛtɩnyɔ Zozii, Zozɛfʋ ‑yowlia.» 46Natanayɛlɩ yɔɔ neencla lebhe: «‑Lʋʋ 'nanʋ cɩ Nazalɛtɩ 'wlʋlʋmʋ bha?» ‑Ma Filipʋ yɔɔ 'cla lebhe: «Ci ɩya ‑na 'ci 'ka 'lɩ.» 47Daa Zozii 'lɩ 'lɛ Natanayɛlɩ 'nyɩ ɔ ‑kʋa 'mɔɔ 'lɛ 'bɩɩncilida na, ɔ ya ɔla cɩ 'la wɔlɩ nyɩtɛ 'nyɩ ɔ ya 'cla lebhe: «'Lɩka Izlayɛlɩnyɔ* 'titi, ‑kplakpla ‑ylɛylɛ 'ta 'lɛ nɩkplaan ‑kʋ na.» 48'Nyɩ Natanayɛlɩ yɔɔ neencla lebhe: «'Nda ‑n ‑ciliin 'lɛ bha?» Zozii yɔɔ neenŋonu lebhe: «'Fɩɔn ɩya Filipʋ 'kɔɔ 'lɛ la na, daa ‑n ‑kʋa 'lɛ 'figisua ‑zɔn na, n yɔɔ 'lɩ.» 49Natanayɛlɩ yɔɔ 'cla lebhe: «Canyɔ, ‑mɔɔ ‑glɩ 'lɛ Laagɔ 'la 'Cʋa, ‑mɔɔ ‑glɩ 'lɛ Izlayɛlɩlɔlʋ 'la nyɩbhɛlʋa.» 50Na, Zozii yɔɔ neenŋonu lebhe: «Sa n yɔɔ 'lɛ 'cla lebhe, n yɔɔ 'figisua ‑zɔn 'lɩ na, dɛ ‑n ‑kanɩ 'lɛ 'na pɔɔtɛtɛ ‑na. ‑N ‑cɩ ka nʋnʋgbɩ 'ciinlɩ ɩya ɩ 'ka ‑da 'kʋ zi!» 51'Nyɩ ɔ ya ‑awlɛ 'cla lebhe: «N solu anyɩ, ɩ ‑glɩ ‑nʋawlɛ, a cɩ 'ka ‑laagɔɔn 'lɩ, ɩ 'ka 'gbokalɩ, ɩya Laagɔ 'la 'bhlaandleecɩa* 'ka Nclɔɔa 'Cʋa* 'kʋ 'plɩlɩ, ma 'ka ‑gblaa ɩya ma 'ka kwli.»
Actualmente seleccionado:
Zan 1: NTLD13
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Dida New Testament © Bible Society of Côte d'Ivoire, 2013.