San Mateo 12
12
Batiaaꞌha raꞌ xpwiinn Jesuhs trihgu dxyih nin ruziꞌlaaꞌdzi raꞌ bwiinn Israel
(Mr. 2.23‑28; Lc. 6.1‑5)
1Ya dxyih nin ruziꞌlaaꞌdzi raꞌ bwiinn Israel, zeezah Jesuhs loh yuh raꞌ hasta naꞌ trihgu, pwihsi laꞌn dxyih chi bichiaꞌhn raꞌ xpwiinn Ñiꞌh, ya chiꞌchi guzoꞌbaloh bachywaꞌh raꞌ ba trihgu tin gulloꞌba raꞌ ba bwiiꞌdziꞌhn raꞌ chi gudahw raꞌ ban, 2ya chin bwaꞌha raꞌ nuhn bwiinn guidoꞌ nin laa fariseu niꞌchi chiꞌchi rahbi raꞌ ba loh Jesuhs:
―Bwaꞌha cayuhnn raꞌ xpwiinn luꞌh ziga nin ayi rusaaꞌn lehyi gaca dxyih nin ruziꞌlaaꞌdzi raꞌ bwiinn Israel.
3Ya chiꞌchi rahbi Jesuhs loh raꞌ ba:
―¿Ta nagahdxi guꞌlda tu loh Xchihtsi Dxiohs hasta rñiꞌ cuun nin bwiꞌhnn guehtu Davihd tuhbi dxyih nin bichiaꞌhn ba cun garaa raꞌ xpwiinn ba? 4Pwihsi guyuuꞌtii ba laꞌn xquidoꞌ Dxiohs tin gudahw ba pahn nin ayi nuu gahw raꞌ bwiinn ziga xpwiinn ba o ziga laꞌh za ba, laasii laꞌh dxiꞌh raꞌ bixohza rahca rahw pahn chi. 5O ¿nagahdxi guꞌlda tu loh xchihtsi lehyi Moisehs xa ruhnn raꞌ bixohza laꞌn guidoꞌ dxyih nin ruziꞌlaaꞌdzi raꞌ bwiinn Israel, ruhnn raꞌ ba xtsiꞌn raꞌ ba, per ayi xi xtuhlda raꞌ ba? 6Pwihsi rñiꞌn loh tu riiꞌ, zuu tuhbi nin lasahca ru loh ziga lasahca guidoꞌ rooꞌ. 7Pwihsi laꞌh tu ayi guhcabwaꞌ tu xi zee loh Xchiꞌdxyi Dxiohs riiꞌ: “Pwihsi nin xclaaꞌdzihn guunn tu galahsastoꞌ tu laꞌh raꞌ bwiinn lasaaꞌ tu xlawaaꞌha guniꞌhi tu guhn naꞌh.” Sidela ñahcabwaꞌ tun ayi ñudziiꞌba tu duhlda yihca bwiinn nin ayi xi xtuhlda ñiꞌh, 8laasii laꞌh Lliiꞌn Dxiohs nin naa ndxiꞌhw naa Daada loh dxyih nin ruziꞌlaaꞌdzi raꞌ bwiinn Israel.
Bwiinn nin gubihdzi naa ñiꞌh
(Mr. 3.1‑6; Lc. 6.6‑11)
9Ya chin babii Jesuhs riꞌchi, chiꞌchi guyuuꞌtii Ñiꞌh laꞌn tuhbi xquidoꞌ biꞌtuꞌhn raꞌ bwiinn Israel, 10ya laꞌn guidoꞌ chi zohba tuhbi ndxiꞌhw nin gubihdzi naa ñiꞌh, ya laasii riidxiꞌhyi bwiinn Israel raꞌ chi xa gucaꞌchiah dxixiꞌhw raꞌ ba laꞌh Ñiꞌh, niꞌchin nin rahbi raꞌ ba loh Ñiꞌh:
―¿Ta rusaaꞌn lehyi gusiaca luꞌh tuhbi bwiinn dxyih nin ruziꞌlaaꞌdzi raꞌ bwiinn Israel?
11Chiꞌchi rahbi Jesuhs loh raꞌ ba:
―Chyu tuhbi ndxiꞌhw nin dxaꞌga loh tu nahpa tuhbi lliꞌhyi ya sidela laꞌh ma dxiaaba ma laꞌn tuhbi bizee dxyih nin ruziꞌlaaꞌdzi tu, ¿tayi chiꞌh gabweꞌhe tu ma laꞌn bizee dxyih chi gahca nicala naa dxyih nin ruziꞌlaaꞌdzi tu? 12Pwihsi ziahan duxa ru lasahca tuhbi bwiinn loh tuhbi lliꞌhyi, pwihsi niꞌchin nin zusaaꞌn lehyi chyu guunn tuhbi bwen laꞌh stuhbi bwiinn dxyih nin rziꞌlaaꞌdzi bwiinn.
13Ya chiꞌchi rahbi Ñiꞌh loh ndxiꞌhw nin gubihdzi naa ñiꞌh chi:
―Batsiꞌyi naa luꞌh.
Ya batsiꞌyi naa ba ya lwehgu gahca biacan, 14per chin bariaꞌh raꞌ bwiinn fariseu raꞌ riꞌchi guzoꞌbaloh canaabadxyiꞌdxyi loh lasaaꞌ raꞌ ba xa guunn raꞌ ba tin chiinn raꞌ ba laꞌh Jesuhs.
Tuhbi dxyiꞌdxyi nin rñiꞌ xcweenta Jesuhs
15Ya chin guhcabwaꞌ Jesuhs cuun lligaaba nin riiyuhnn raꞌ bwiinn fariseu raꞌ chi, lwehgu bariaꞌh Ñiꞌh riꞌchi, ya gwanaꞌhla ziahan duxa raꞌ bwiinn laꞌh Ñiꞌh, ya basiaca za Ñiꞌh garaa gueldxyihdxyi nin rahca raꞌ bwiinn raꞌ chi, 16ya gunabwaꞌ Ñiꞌh ayi guzeꞌta raꞌ ba chyu naa Ñiꞌh 17tin guzohba dxyiꞌdxyi nin guñiꞌ guehtu profeta Isaías chin rahbi ba:
18Riiꞌ laꞌh bwiinn nin guliin zuu, nin riahxineꞌhn cun nin nuguꞌnasaa stoꞌn;
ya zudiꞌhihn Spírituhn laꞌh ba nee zuluuꞌyi ba xcweenta xquelguxchisi Dxiohs loh raꞌ bwiinn nin ayi naa raꞌ bwiinn Israel.
19Ayi dxiaala rwaaꞌ ba guiñiꞌ ba, ayi za cwidxyidxiah ba, ayi za chuu nin dxiindxiahga rsiaaꞌha ba loh neziuh raꞌ,
20ayi za chiꞌchi ba ñihta nin guhchii la, nin ayi za gusiuꞌyi ba mwehchi nin gueꞌdu rbweꞌhe guhxa, hastayi dxyih nin gwaꞌha ba gaca guelguxchisi loh guidxyiyuh.
21Laꞌh si ba chechiistoꞌ raꞌ bwiinn nin ayi naa bwiinn Israel tin gutaꞌh ba laꞌh raꞌ ba loh duhlda.
Bacaꞌchiah raꞌ bwiinn, bwiinndxaaba rahcanee laꞌh Jesuhs
(Mr. 3.19‑30; Lc. 11.14‑23; 12.10)
22Ya gwanee raꞌ bwiinn tuhbi lasaaꞌ raꞌ ba nin guyuuꞌ tuhbi bwiinndxaaba stoꞌ ñiꞌh loh Jesuhs, bwiinn chi ayi riin loh ba cun biaꞌhan goopa za ba, ya bwiꞌhnn Jesuhs gahn gubiaꞌgarii bwaꞌha ba cun bañiꞌ za ba ya ziꞌchi zi biaca ba, 23ya garaa raꞌ bwiinn nin rii riꞌchi guzoꞌbaloh canaabadxyiꞌdxyi loh lasaaꞌ gahca raꞌ ba rahbi raꞌ ba:
―¿Tayiga llahga dxiꞌh guehtu Davihd deeꞌ?
24Ya chin bihn raꞌ bwiinn fariseu dxyiꞌdxyi raꞌ riiꞌ, rahbi raꞌ ba:
―Ndxiꞌhw riiꞌ rabweꞌhe bwiinndxaaba stoꞌ raꞌ bwiinn laasii Belzebuu nin rnabwaꞌ laꞌh raꞌ bwiinndxaaba cayahcanee laꞌh ba.
25Ya chin guhcabwaꞌ Jesuhs xa naa lligaaba nin riiyuhnn raꞌ ba, chiꞌchi rahbi Ñiꞌh loh raꞌ ba:
―Garaa raꞌ bwiinn nin nuu loh tuhbi guelrnabwaꞌ nin rbahchi xchih tuhbi cwaꞌh bwiinn tin chindxinee lasaaꞌ raꞌ ba pwihsi nahpa ñichiloh guelrnabwaꞌ chi; ya tuhbi guihdxyi hasta rii raꞌ tuhbi jwamihyi bwiinn sidela rlaaꞌha lasaaꞌ raꞌ ba ziahan cwaꞌh tin chindxinee lasaaꞌ raꞌ ba nahpa ziñihchiloh raꞌ ba. 26Ya ziꞌchi gahca za sidela laꞌh bwiinndxaaba rabweꞌhe gahca ba laꞌh nin naa za bwiinndxaaba stoꞌ raꞌ bwiinn pwihsi zilaaꞌha lasaaꞌ raꞌ ba, ya pwihsi ¿xaalla cheezah chuu xquelrnabwaꞌ raꞌ ba? 27Ya laꞌh tu rahbi tu rabweꞌhehn bwiinndxaaba stoꞌ raꞌ bwiinn cun xquelrnabwaꞌ bwiinndxaaba, per sidela ziꞌchi ñahca, ¿cuun xchiꞌh nin rudiꞌhi guelrnabwaꞌ laꞌh raꞌ xpwiinn tu tin rabweꞌhe raꞌ ba bwiinndxaaba? Niꞌchin laꞌh gahca raꞌ ba zuluuꞌyi raꞌ ba billiꞌn loh xigaaba tu. 28Ya sidela naꞌh rabweꞌhehn bwiinndxaaba stoꞌ raꞌ bwiinn cun xquelrnabwaꞌ Spíritu Saantu xteenn Dxiohs, niꞌchi ruluuꞌyi laꞌh xquelrnabwaꞌ Dxiohs badzihn loh tu.
29’¿Xa guunn tuhbi bwiinn nin ruhnn gubaꞌn chuꞌtii yihdzi tuhbi ndxiꞌhw nin nahpa tuhbi bwiinn nin rulaloh yihdzi ba tin para ayi cweꞌhelluꞌhu ba nin nahpa ndxiꞌhw chi? Sola nin guunn gubaꞌn chi galoh guchiꞌbiduꞌh ba laꞌh bwiinn chi, ziꞌchi sihn zuhnn ba gahn cweꞌhelluꞌhu ba nin nahpa bwiinn chi.
30’Bwiinn raꞌ nin ayi xclaaꞌdzi naꞌh rdxyiꞌchinee ba naꞌh, ya bwiinn raꞌ nin ayi rahcanee naꞌh guidiaaꞌha raꞌ bwiinn laꞌlaꞌgaꞌh cabweꞌhecaa raꞌ ba bwiinn loon.
31’Pwihsi niꞌchin nin rñiꞌn loh tu gusiaꞌpitii Dxiohs xtuhlda raꞌ bwiinn cun garaa dxyiꞌdxyi dxaaba nin guiñiꞌ raꞌ ba loh Ñiꞌh, per sidela laꞌhraꞌ ba guiñiꞌyah raꞌ ba laꞌh Spíritu Saantu Dxiohs, ayi gusiaꞌpitii Ñiꞌh xtuhlda raꞌ ba. 32Dxiohs gusiaꞌpitii Ñiꞌh xtuhlda chyu chiꞌh zi nin guiñiꞌyah laꞌh Lliiꞌn Dxiohs nin naa ndxiꞌhw, per bwiinn nin guiñiꞌyah laꞌh Spíritu Saantu ayi dxiaꞌldatiiꞌ stoꞌ Dxiohs xtuhlda bwiinn chi nin loh guidxyiyuh riiꞌ nee nin loh guidxyiyuh nacuubi nin gueꞌdu dxiꞌ.
Riuuꞌnbwaꞌ bwiinn yahga pur nin rcah lohon
(Lc. 6:43‑45)
33Rahbi za Ñiꞌh:
―Gulgahpaabiñih zaꞌca tuhbi yahga ñinahxi, ya ziꞌchi zicah ñinahxi zaꞌca lohon; per sidela laꞌh tu ayi gaapaabiñih zaꞌca tu tuhbi yahga ñinahxi, pwihsi ziꞌchi za ñinahxi dxaaba guicah lohon. Ya ziꞌchi riuꞌnbwaꞌ bwiinn yahga pur nin rcah lohon. 34¡Laꞌh tu bwiinn nin naa raꞌ ziga zi bweꞌlda ñaꞌlaaꞌdzi! ¿Xa xclaaꞌdzi tu guiñiꞌ tu dxyiꞌdxyi zaꞌca sidela laꞌh gahca tu nadxaaba naa tu? Ya stoꞌ tu rdahla dxyiꞌdxyi dxaaba nin rñiꞌ rwaaꞌ tu. 35Bwiinn zaꞌca rñiꞌ ba dxyiꞌdxyi zaꞌca laasii dxyiꞌdxyi zaꞌca chi nuu stoꞌ ba, ya bwiinn nadxaaba rñiꞌ za ba dxyiꞌdxyi dxaaba laasii dxyiꞌdxyi dxaaba chi nuu stoꞌ ba, 36ya naꞌh rñiꞌn loh tu dxyih nin gaca jwisi loh guidxyiyuh garaa raꞌ bwiinn chixteeꞌ raꞌ ba loh Dxiohs gallee dxyiꞌdxyi dxaaba nin guñiꞌ raꞌ ba. 37Pwihsi pur dxyiꞌdxyi nin guiriaꞌh rwaaꞌ tu zuhnn guiñiꞌ Dxiohs bwiinn zaꞌca tu, o pur xchiꞌdxyi za tu chi zuhnn guñihchi tu nez loh Dxiohs.
Bwiinn raꞌ nin ayi riachiistoꞌ raꞌ ñiꞌh canaaba raꞌ ba guunn Jesuhs tuhbi dziꞌn roo ziga tuhbi sehn
(Mr. 8.12; Lc. 11‑29‑32)
38Ya chiꞌchi rahbi nuhn bwiinn fariseu raꞌ nee cun nuhn raꞌ mwehsu nin ruluuꞌyi xlehyi Moisehs loh Jesuhs:
―Mwehsu, xclaaꞌdzi nu guidiaꞌha nu guunn luꞌh tuhbi dziꞌn rooꞌ ziga tuhbi sehn.
39Chiꞌchi rahbi Jesuhs loh raꞌ ba:
―Laꞌh tu ayi nnaa tu guunn tu nin xclaaꞌdzi Dxiohs sino que sola nin xclaaꞌdzi tu, yannah rnaaba tu guꞌnnahn tuhbi dziꞌn rooꞌ tin gwaꞌha tun, per sola sehn xteenn guehtu Jonahs daada nin guñiꞌ xchiꞌdxyi Dxiohs ca chieempa rooꞌ guniꞌhihn laꞌh tu. 40Pwihsi ziga guyuuꞌ guehtu Jonahs stoꞌ bwehlda chohnna dxyih nee chohnna gueꞌla, pwihsi ziꞌchi za laꞌh Lliiꞌn Dxiohs nin naa ndxiꞌhw ziuuꞌ za ba chohnna dxyih cun chohnna za gueꞌla laꞌn loh yuh. 41Ya bwiinn chieempa raꞌ xteenn guihdxyi Nínive ziazuꞌnchii raꞌ ba chin gaca jwisi chin guunn Dxiohs guelguxchisi loh raꞌ bwiinn nin rii nabahan nnah tin gucaꞌchiah raꞌ ba laꞌh tu, laasii laꞌh raꞌ bwiinn guihdxyi Nínive chi biuꞌgarii raꞌ ba loh xquelñaꞌñih Dxiohs chin gwagaluuꞌyi guehtu Jonahs xchiꞌdxyi Dxiohs laꞌh raꞌ ba nee naꞌh nin nuuꞌhuhn lahda tu mahzi lasahcahn loh Jonahs per ayi ruzoꞌbadxiahga tu xchiꞌdxyiꞌhn. 42Neezaa tuhbi naaniꞌhn nin guhca rrehyna loh yuh raꞌ nez lahdu laꞌn gueeta chesuꞌnchii ba tin gucaꞌchiah ba laꞌh raꞌ bwiinn nin rii nabahan loh guidxyiyuh nnah laasii laꞌh ba biriaꞌh ba rwaaꞌ guihdxyiyuhyi tin bacaꞌdxiahga ba guelrahcabwaꞌ duxa xteenn guehtu Salomohn, yannah nuuꞌhuhn lahda tu naan nin mahzi lasahca xchiꞌdxyi ñiꞌh loh Salomohn per ayi ruzoꞌbadxiahga tu xchiꞌdxyiꞌhn.
Bwiinndxaaba nin rabiaꞌgarii stoꞌ bwiinn
(Lc. 11.24‑26)
43Rahbi za Ñiꞌh:
―Ya chin rariaꞌh tuhbi bwiinndxaaba stoꞌ tuhbi bwiinn, chiꞌchi rcaꞌnzaa ba loh dahan desierto tin rdxiꞌhyi ba canehza guziꞌlaaꞌdzi ba, per ayi rdxeelan, 44ya chiꞌchi ruhnn ba lligaaba: “Mas chaꞌyi gabiaꞌgariin rwaaꞌ yihdzihn hasta biriaꞌhn.” Ya chin radzihn ba riꞌchi, bwaꞌha ba stoꞌ bwiinn nin bariaꞌh ba galoh chuhla biahcan ziga zi tuhbi yuuꞌ nin biyoꞌba laꞌn ñiꞌh. 45Chiꞌchi riah bwiinndxaaba chi tin riagatiaaꞌha ba zagahdzi bwiinndxaaba nin mahzi rusaꞌcazii que ziga ruhnn bwiinn dxaaba chi, ya ziꞌchi tuhsi juunta riuuꞌtii raꞌ garaa raꞌ bwiinndxaaba raꞌ chi stoꞌ bwiinn chi, ya mahzi nalaasa ru guunnee raꞌ ba laꞌh bwiinn chi que ziga galoh, pwihsi ziꞌchi saca raꞌ bwiinn yaꞌdxi, nin rii nabahan loh guidxyiyuh nnah.
Xmaah Jesuhs cun bwihtsi raꞌ Ñiꞌh
(Mr. 3.31‑35; Lc. 8.19‑21)
46Loh zeezah gahca cañiꞌ Jesuhs loh raꞌ bwiinn chin badzihn xmaah Jesuhs cun bwihtsi raꞌ Ñiꞌh nez dihtsi jwehra, ya guclaaꞌdzi raꞌ ba ñiñiꞌ raꞌ ba loh Jesuhs per ayi guhcan cun rii raꞌ chiꞌh ba nez dihtsi jwehra, 47ya guyuuꞌ tuhbi bwiinn nin gwaguihtsi loh Jesuhs rahbi ba loh Ñiꞌh:
―Xmaah luꞌh cun bwihtsi raꞌ luꞌh rii raꞌ dihtsi jwehra riꞌchi, ya xclaaꞌdzi raꞌ ba guiñiꞌ raꞌ ba loh luꞌh.
48Ya sola squiiꞌ rahbi Jesuhs loh bwiinn nin gwagañiꞌ loh Ñiꞌh:
―¿Cuun nin naa xmaaꞌhn, nee cuun raꞌ za nin naa raꞌ bwihtsi raꞌn?
49Chin guyaꞌloh guñiꞌ Ñiꞌh squiiꞌ, chiꞌchi baluuꞌyi Ñiꞌh cun naa Ñiꞌh nez hasta rii raꞌ bwiinn nin naa raꞌ xpwiinn Ñiꞌh, ya chiꞌchi rahbi laꞌgaꞌh Ñiꞌh:
―Bwiinn raꞌ riiꞌ naa xmaaꞌn cun bwihtsi raꞌn, 50laasii garaa raꞌ nin ruhnn ziga xclaaꞌdzi Xtaaꞌdahn nin nuu dxibaaꞌ gaca, bwiinn raꞌ chi naa bwihtsi raꞌn cun bizaaꞌnahn, cun xmaaꞌn.
Actualmente seleccionado:
San Mateo 12: zpv
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1990, Wycliffe Bible Translators, Inc. All rights reserved.