San Juan 7
7
Xcweenta nin ayi gwachiistoꞌ raꞌ bwihtsi Jesuhs xchiꞌdxyi Ñiꞌh
1Ya chin guyaꞌloh raꞌ deeꞌ, gucaꞌnzaa Jesuhs loh guihdxyi Galilea; per nin ayi guclaaꞌdzi Ñiꞌh ñuuꞌ Ñiꞌh loh guihdxyi Judea laasii riꞌchi badxiꞌhyi raꞌ bwiinn Israel raꞌ laꞌh Jesuhs tin ñidxiinn raꞌ ba laꞌh Ñiꞌh, 2ya ziga badzihn gahxu dxyih lañih nin rahcachaꞌyi yuuꞌyiꞌhn nin riaꞌhan raꞌ bwiinn laꞌn ñiꞌh; lañih riiꞌ naa tuhbi xlañih raꞌ bwiinn Israel, 3chiꞌchi rahbi raꞌ nin naa raꞌ bwihtsi Jesuhs loh Ñiꞌh:
―Ayi dxiaꞌhan luꞌh riiꞌ; gwah para guihdxyi Judea tin riꞌchi neezaa raꞌ xpwiinn raꞌ luꞌh nin caꞌnzanee luꞌh gwaꞌha raꞌ ba garaa raꞌ dziꞌn raꞌ nin ruhnn luꞌh, 4laasii chin xclaaꞌdzi bwiinn guluuꞌyi zaꞌca ba laꞌh raꞌ bwiinn, ayi ruhnn ba xtsiꞌn ba ralaꞌn; niꞌchin sidela yiꞌh ruhnn luꞌh dziꞌn raꞌ riiꞌ, bwiꞌhnnan loh raꞌ garaatiiꞌ raꞌ bwiinn guidxyiyuh.
5Pwihsi nin bwiꞌhnn raꞌ bwihtsi Ñiꞌh nin laꞌh raꞌ ba ayi gwachiistoꞌ raꞌ ba xchiꞌdxyi Jesuhs, 6ya chiꞌchi rahbi Jesuhs loh raꞌ ba:
―Pwihsi naꞌh xohraꞌhn nagahdxi gadzihnan, per para laꞌh tu xohra chiꞌzi naa bwen para laꞌh tu. 7Bwiinn raꞌ nin naa raꞌ bwiinn guidxyiyuh raꞌ ayi nuu gwaꞌha dxaaba raꞌ ba loh tu, per naꞌh rwaꞌha dxaaba raꞌ ba loon laasii naꞌh ruluuꞌyiꞌhn loh dziꞌn dxaaba nin ruhnn raꞌ ba. 8Gulcheh lañih laꞌh tu, per naꞌh ayi chaaꞌhahn laasii nagahdxi guigaꞌha xohraꞌhn.
9Ya chin guyaꞌloh guñiꞌ Jesuhs dxyiꞌdxyi raꞌ riiꞌ loh raꞌ ba, biaꞌhan chiꞌh Ñiꞌh loh guihdxyi Galilea.
Jesuhs loh lañih nin laa “La Enramada”
10Ya loh nin zeeñiidxiuu raꞌ bwihtsi Jesuhs para lañih, neezaa Jesuhs gwah lañih chi nicala ayi nez ñihn raꞌ paꞌh bwiinn sino que ralaꞌn, 11ya laꞌh raꞌ bwiinn Israel raꞌ badxiꞌhyi raꞌ ba laꞌh Jesuhs loh lañih chi, squiiꞌ rahbi raꞌ ba:
―¿Cuun laꞌh ndxiꞌhw chi?
12Nez lahda raꞌ bwiinn riigazeꞌta duxa raꞌ ba laꞌh Jesuhs; nuu raꞌ bwiinn chi rahbi raꞌ ba:
―Jesuhs naa tuhbi ndxiꞌhw nin ruhnn dziꞌn zaꞌca.
Ya nuu raꞌ ba rahbi raꞌ ba:
―Ayi guinazaꞌca naa dziꞌn nin ruhnn ndxiꞌhw chi, rusaguiꞌhi ba laꞌh raꞌ bwiinn.
13Ya nin tuhbi bwiinn ayi biaalla ñuuꞌyidxyiꞌdxyipaꞌh nez loh raꞌ bwiinn xcweenta Jesuhs laasii rdxyihbi raꞌ ba laꞌh raꞌ bwiinn Israel raꞌ nin rnabwaꞌ, 14ya laꞌh lañih zeezah la mas garoolda la chin guyuuꞌtiiꞌ Jesuhs laꞌn guidoꞌ ya chiꞌchi guzoꞌbaloh cagaluuꞌyi Ñiꞌh xchiꞌdxyi Dxiohs laꞌh raꞌ bwiinn, 15ya laꞌh raꞌ bwiinn Israel raꞌ nin rnabwaꞌ chi badxyigaaꞌ duxa loh raꞌ ba ya rahbi raꞌ ba:
―¿Xaloh naann niꞌca ziahan raꞌ dxyiꞌdxyi nee nin ayi ca basiꞌdxi niꞌca?
16Chiꞌchi rahbi Jesuhs:
―Dxyiꞌdxyi raꞌ nin ruluꞌyiꞌhn laꞌh tu ayi naan pur naꞌh gahca sino que pur Dxiohs nin guluꞌnehza naꞌh. 17Sidela chyuulla tuhbi bwiinn xclaaꞌdzi guunn ziga nin xclaaꞌdzi Dxiohs gaca, zahcabwaꞌ ba sidela laꞌh dxyiꞌdxyi raꞌ nin ruluꞌyiꞌhn zeꞌ pur Dxiohs o naan xchiꞌdxyi gahcahn. 18Bwiinn nin rñiꞌ pur laꞌh gahca ba, rñiꞌ ba tin guiñiꞌ zaꞌca bwiinn laꞌh ba, per nin rdxiꞌhyi guiñiꞌ zaꞌca bwiinn pur nin guluꞌnehza laꞌh ba loh guidxyiyuh riiꞌ niꞌchi rñiꞌ dxyiꞌdxyi raꞌ nin guchii, nee ayi xi guelrusaguiꞌhi nuu laꞌn lastoꞌ ba. 19¿Tayi guchii dxiꞌhn, Moisehs baniꞌhi lehyi laꞌh tu?, nee nnah nin tuhbi tu ayi ruzoꞌbadxiahga tu lehyi chi. ¿Xixnaa xclaaꞌdzi tu chiinn tu naꞌh?
20Chiꞌchi rahbi raꞌ bwiinn raꞌ loh Ñiꞌh:
―¡Nuu tuhbi bwiinndxaaba stoꞌ luꞌh! ¿Chyu xclaaꞌdzi chiinn yiꞌh?
21Chiꞌchi rahbi Jesuhs:
―Pur tuhbi dziꞌn nin bwiꞌhnnaꞌhn dxyih nin ruziꞌlaaꞌdzi tu, niꞌchin nin garaa tu radxyigaaꞌ loh tu; 22pwihsi Moisehs guleꞌhe lehyi nin riuuꞌ bwaꞌ tihxi bwiinn ndxiꞌhw (nicala ayi laꞌh dxiꞌh Moisehs gudxiꞌnlaaꞌdzin sino que laꞌh raꞌ xtaada guldooꞌ raꞌ tu gudxiꞌnlaaꞌdzin) ya laꞌh tu rguꞌ tu bwaꞌ laꞌh tuhbi biñiꞌn nicala naan dxyih nin ruziꞌlaaꞌdzi tu. 23Pwihsi sidela rahca rguꞌ tu bwaꞌ tihxi tuhbi biñiꞌn nee nicala dxyih nin ruziꞌlaaꞌdzi tu tin ayi ñichi lehyi Moisehs, ¿xixnaa chiꞌh naꞌh ayi nnaa tu gusiaꞌcahn tuhbi bwiinn nin rahcalluꞌhu dxyih nin ruziꞌlaaꞌdzi tu lwehgu rdxyiꞌchinee tu naꞌh? 24Ayi ruhnn tu guelguxchisi pur nin rwaꞌha si tu, sino que chin ruhn tu guelguxchisi, gulguiꞌnnan per ziga naa xnehza.
Jesuhs guñiꞌ ca zeꞌ Ñiꞌh
25Ya chiꞌchi guzoꞌbaloh gunaabadxyiꞌdxyi raꞌ paaldaa raꞌ bwiinn guihdxyi Jerusalehn raꞌ rahbi raꞌ ba:
―¿Tayi niꞌca dxiꞌhn nin radxiꞌhyi raꞌ ba tin chiinn raꞌ ba? 26Nee nnah ¿tayi laꞌh dxiꞌh ba niꞌca nin cañiꞌ riꞌca loh raꞌ bwiinn?, nee nin tuhbi bwiinn ayi xi rñiꞌ loh ba, o ¿gu nee raꞌ za guxchisi riachiistoꞌ raꞌ ba laꞌh ndxiꞌhw ca naa Crixtu? 27Per dela nnah laꞌhnuꞌh naann nuꞌh canehza zeꞌ niꞌca; nee ziga chin dxiꞌ Crixtu nin ayi chyu gaann canehza dxiꞌ Ñiꞌh.
28Ya chin bihn Jesuhs dxyiꞌdxyi raꞌ riiꞌ chin cagaluuꞌyi Ñiꞌh laꞌn guidoꞌ, chiꞌchi jweersi rooꞌ guñiꞌ Ñiꞌh, rahbi Ñiꞌh loh raꞌ ba:
―¿Ta ruhnn chiꞌh tu lligaaba nuꞌnbwaꞌ tu naꞌh, nee naann za tu canehza zeꞌldahn? Per ayi zeꞌlda dxiꞌhn pur xcweenta gahcahn, sino que nuu chyu guluꞌnehza naꞌh nee laꞌh ba nanchii paꞌca nabahan ba; laꞌh tu ayi nuꞌnbwaꞌ tu laꞌh bwiinn chi, 29per naꞌh nuꞌnbwaꞌn laꞌh ba laasii naꞌh zeꞌldahn hasta nuu ba, nee laꞌh ba guluꞌnehza ba naꞌh.
30Ya chiꞌchi guclaaꞌdzi raꞌ bwiinn raꞌ chi ñinaꞌzu raꞌ ba laꞌh Ñiꞌh, per nin tuhbi raꞌ ba ayi biaalla ñinaꞌzu laꞌh Ñiꞌh laasii nagahdxi guigaꞌha xohra Ñiꞌh para gusaꞌcazii raꞌ bwiinn nadxaaba raꞌ chi laꞌh Ñiꞌh, 31per bwiinn ziahan duxa za gwachii stoꞌ raꞌ ñiꞌh laꞌh Jesuhs, ya rahbi raꞌ ba:
―Chin dxiꞌ Crixtu, ¿ta mahzi ru sehn roo ru chiꞌh guunn Crixtu chi ziga laꞌh bwiinn riiꞌ?
Guxeꞌhla raꞌ bwiinn fariseu raꞌ guixaꞌga raꞌ tin guinaꞌzu raꞌ ba laꞌh Jesuhs
32Ya bihn raꞌ bwiinn fariseu raꞌ nin bazeꞌta raꞌ bwiinn laꞌh Jesuhs, chiꞌchi bwiinn fariseu raꞌ chi cun nin rnabwaꞌ laꞌh raꞌ bixohza raꞌ guxeꞌhla raꞌ ba guixaꞌga raꞌ xteenn guidoꞌ tin chenee raꞌ ba laꞌh Jesuhs tin dxieꞌw Ñiꞌh, 33ya chiꞌchi rahbi Jesuhs:
―Spaaldaa si dxyih ziuuꞌhuhn lahda tu, chiꞌchi zabiaꞌgariin hasta nuu nin guluꞌnehza naꞌh loh guidxyiyuh riiꞌ; 34laꞌh tu gadxiꞌhyi tu naꞌh per ayi gadxeela tu naꞌh laasii ayi nuu chee tu hasta guzaaꞌhahn.
35Ya chiꞌchi guzoꞌbaloh canaabadxyiꞌdxyi loh lasaaꞌ raꞌ bwiinn Israel raꞌ chi, rahbi raꞌ ba:
―¿Canehza chee chiꞌh niꞌca? ¿Tayi chyu guunn gahn gadxeela niꞌca? o ¿gu guzee niꞌca hasta rii raꞌ bwiinn Israel raꞌ nin rii raꞌ nez lahdxyi raꞌ bwiinn griehgu raꞌ tin guluuꞌyi ba laꞌh raꞌ ba? 36¿Xi zee loh xchiꞌdxyi ba nin guñiꞌ ba loh nuꞌh: “Gadxiꞌhyi tu naꞌh per ayi gadxeela tu naꞌh laasii ayi nuu guzee tu hasta guzaaꞌhahn?”
Guiꞌw xteenn ñihsa nabahan
37Ya luulchima dxyih xteenn lañih chi naa dxyih lañihroo ru, ya dxyih chi guñiꞌ Jesuhs loh raꞌ bwiinn Israel raꞌ chi jweersirooꞌ, rahbi Ñiꞌh:
―¡Sidela chyuulla tuhbi bwiinn rdxahga ba ñihsa, dxiꞌ bwiinn chi nez loon tin guee ban! 38Ziga caa loh Xchihtsi Dxiohs, stoꞌ bwiinn nin riachiistoꞌ ñiꞌh naꞌh rtahn guiꞌw raꞌ xteenn ñihsa nabahan.
39Ya cun dxyiꞌdxyi raꞌ riiꞌ bazeꞌta Jesuhs bwiinn raꞌ nin chechiistoꞌ raꞌ ñiꞌh laꞌh Ñiꞌh zicaꞌha raꞌ ba Spíritu Saantu; pwihsi nagahdxi gaaldaa dxiꞌ Spíritu Saantu laasii nagahdxi gacah Jesuhs dxibaaꞌ.
Guhca nalaaꞌha raꞌ bwiinn
40Ya paaldaa raꞌ bwiinn nin rii riꞌchi, chin bihn raꞌ ba dxyiꞌdxyi raꞌ nin guñiꞌ Jesuhs, chiꞌchi rahbi raꞌ ba squiiꞌ:
―Guchiica ndxiꞌhw ca naa ba daada nin nahpa dxiꞌ ziga caa loh Xchihtsi Dxiohs.
41Ya snuhn raꞌ ba rahbi:
―Bwiinn ca naa Crixtu nin dxuleꞌza nuꞌh.
Per spaaldaa raꞌ ba rahbi:
―¿Xa gaca tuhbi bwiinn guihdxyi Galilea Crixtu? 42Laasii loh Xchihtsi Dxiohs rñiꞌ nahpa xtulbaaꞌ guehtu Davihd gaca Crixtu, nee dxiꞌ Ñiꞌh nez guihdxyi Belehn lahdxyi gahca guehtu rrehyi Davihd.
43Ya ziꞌchi gulaaꞌha loh lasaaꞌ raꞌ bwiinn pur Jesuhs. 44Nuu raꞌ bwiinn nin guclaaꞌdzi ñanee laꞌh Jesuhs tin ñieꞌw Ñiꞌh, per nin tuhbi za raꞌ ba ayi biaalla ñuhnn ziꞌchi.
Guxchiisi raꞌ ayi gwachiistoꞌ raꞌ ba laꞌh Jesuhs
45Ya gubiaꞌgarii raꞌ guixaꞌga raꞌ xteenn guidoꞌ hasta rii raꞌ bwiinn fariseu raꞌ cun nin rnabwaꞌ laꞌh raꞌ bixohza, ya rahbi raꞌ ba loh raꞌ guixaꞌga raꞌ chi:
―¿Xixnaa ayi gunaꞌzu tu laꞌh ndxiꞌhw chi?
46Ya chiꞌchi rahbi raꞌ guixaꞌga chi loh raꞌ ba:
―¡Ayi chyu gunaꞌzu laꞌh ba laasii ayi nin tuhbi bwiinn nin guiñiꞌ ziga rñiꞌ bwiinn chi!
47Ya chiꞌchi rahbi raꞌ bwiinn fariseu raꞌ chi:
―¿Ta nee laꞌh tu basaꞌn tu bisaguiꞌhi tu? 48Ayi nin tuhbi nin rnabwaꞌ laꞌh nuꞌh o tuhbi raꞌ bwiinn fariseu nin riachiistoꞌ ñiꞌh laꞌh ndxiꞌhw chi. 49¡Per laꞌh raꞌ bwiinn riiꞌ nin ayi gaann raꞌ ba lehyi, bwiinn dii raꞌ ba!
50Ya Nicodemu, nin gwah hasta nuu Jesuhs gueꞌla, naa ba tuhbi bwiinn fariseu; ya rahbi ba:
51―Ziga naa xlehyi nuꞌh, ayi nuu chyu gudziiꞌba duhlda yihca bwiinn galoh nin nagahdxi dxihn nuꞌh mwer galoh cuun nin bwiꞌhnn ba.
52Ya chiꞌchi rahbi raꞌ ba loh Nicodemu:
―¿Ta nee luꞌh naa luꞌh tuhbi bwiinn guihdxyi Galilea? Basiꞌdxi loh Xchihtsi Dxiohs tin gwaꞌha luꞌh xa rñiꞌ lohon: nin tuhbi daada nin rñiꞌ xchiꞌdxyi Dxiohs ayi naa bwiinn guihdxyi Galilea. 53Ya chiꞌchi tuhbigah raꞌ ba ziaa raꞌ ba yihdzi raꞌ ba.
Actualmente seleccionado:
San Juan 7: zpv
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1990, Wycliffe Bible Translators, Inc. All rights reserved.