Kushangumuka 43
43
Vandolome va Yosefa velukila ku Ingito amo na Mbenjemani
1Njala ya lyangengela anga yaamene manene mu Kanana, 2ngecivene, omo naanga ya Yakomba vamanesele kulya tiliku yoshe ije ivakashakele ku Ingito, Yakomba wendekele kuli vana vendi ngwendi, “Ilukileniko lalo mukatulandeleko vyakulya.”
3Oloni Yunda wendekele kuli ishe ngwendi, “Uje munalume nalisingile, natushikile ngwendi, ‘Kumukamono cihanga cange lalo kuvanga munaija amo na ndolome yeni.’ 4Nga utava kututuma amo na ndolome yetu, co tukaya nakumilandela vyakulya. 5Oloni nga yove shove, co kutwasa kuya, omwo uje munalume natulekele ngwendi, ‘Kumukamono cihanga cange lalo kuvanga munaija amo na ndolome yeni.’ ”
6Yakomba wendekele ngwendi, “Omwo vikajo mwanjikokela tuyando twangacije akuleka owo munalume ngweni muli na ndolome yeni mukwavo?”
7Vakevo vamukumbulwile ngwavo, “Uje munalume natukon̄ele nakutwihula a naanga yetu ngwendi, ‘Ishweni acili na kuyoya ndi? Muli na ndolome yeni mukwavo ndi?’ Co twamukumbulwile vihula vyendi. Yetu twazivukile ngwetu akatuleka kwija amo na ndolome yetu ndi?”
8Asinoni Yunda wendekele kuli ishe ngwendi, “Mwesele mwanike njiye nendi yange, co ano vene tukakatuka nakuya ngeci tuyoye, kesi tutse ku njala, netu nove, na vana vetu. 9Yange njipwa mukaleo ali ikeye, co yove ukamutondela kuli yange. Nga yange kunjikamwilwisa kuli yove na mwonyo wendi, co yange simbu yoshe njikakala na mulonga. 10Kenga, mwa vushunga nga kutweshwalele ngacije, ngwe tunelukilako laja luvali.”
11Asinoni ishavo wendekele kuli vakevo ngwendi, “Nga eci cinapu ngoconi, co mwamuvwa lingeni ngeci ambateleni owo munalume vushuka vwavuvwa vwa mu lifuti lino mu vinjeke vyeni ngeci mutwale vwana kuli mwata wakama. Ambateni kenya imo, na vuki vumo, na vyemba vyakunika lwengo lwaluvwa, na micuku-cuku. 12Co lalo ambateni vimbongo vyakupwa muvali, omwo munapande kwilwisa vije vimbongo mwezile navyo vije vyakele mu vinjeke vyeni. Amo capwile ngwe kwivala lika. 13Ngecivene, yeni na ndolome yeni Mbenjemani, co ilukenimo vwasi lalo. 14Njilomba Njambi Muka-nzili yoshe ngeci owo munalume akamizivileko mema ku mbunge, akamyane ndolome yeni mukwavo amo na Mbenjemani. Nga njijeneka vana vange, co nange njinavindama vene.”
15Ngecivene, vandolome va Yosefa vambatele vwana na vimbongo vyakupwa muvali, vaile ku Ingito amo na Mbenjemani, co vakalisholwele kuli Yosefa. 16Omo Yosefa wamwene ngeci vanaija na Mbenjemani, co wendekele kuli ngamba uje wakele na moko ku njuvo yendi ngwendi, “Twala ava vanu ku njuvo yange. Vakalya nange ku simbu ya mutanya, ngecivene, ya ukatsiye cimuna nakumuteleka mwamuvwa.” 17Co uje ngamba walingile ngwe muvamushikile, ngecivene, watwalele vaje vanu ku njuvo ya Yosefa.
18Omo vavanenele ku njuvo, vazivile lyova vayongwele ngwavo, “Vanatunena kuno omwo a vimbongo vije twelukile navyo mu vinjeke vyetu a simbu yakulivanga. Ngeconi ololo, vatulwisa ngeci vambate vimulu vetu nakutupwisa vinzinda.” 19Ngecivene, omo vetele ku cikolo ca njuvo, vendekele na uje ngamba wa mukulunu ngwavo, 20“Shukulu, yetu twezile kuno lumo akulivanga mukulanda vyakulya. 21Oloni omo twaketele a citulilo twazitwile ku vinjeke vyetu, munu na munu wawanene vimbongo vyendi vyoshe vineluka. Ngeci tunavilwisa kuli yove lalo. 22Co tunaija lalo na vimbongo vikwavo mukulandako vyakulya vikwavo. Kutuzivuka iya lalo waakele vije vimbongo mu vinjeke vyetu.”
23Uje ngamba wendekele kuli vakevo ngwendi, “Kesi mulinyenge. Nambe kuziva lyova. Njambi yeni, ikeye Njambi ya ishweni, waakele vimbongo mu vinjeke vyeni. Yange njatambwile vije vimbongo vyeni.” Asinoni wanenele Simyoni kuli vakevo.
24Co uje ngamba watwalele vandolome va Yosefa ku njuvo. Wavanene mema ngeci vajwele ku mendi avo, co waanene vyakulya vimulu vyavo. 25Co vakevo vavwaeselele cimweja vwana vwakwana kuli Yosefa ngeci omo aija a simbu ya mutanya vakumwane, omwo vavalekele ngwavo akulya navo a simbu ya mutanya. 26Omo Yosefa wetele ku njuvo, co vamwanene vuje vwana vatsikamene a mavuli ku mesho endi nakumulemesa. 27Ikeye wavehwile vati muvanendukila asinoni wavehwile ngwendi, “Vati kakulukazi uje imwatumbwile, ishweni nenduka ndi? Ikeye acili na kuyoya ndi?”
28Vamukumbulwile ngwavo, “Ngamba yove tatetu nenduka, na ololo acili nakuyoya.” Co vatsikamene a mavuli ku mesho endi nakumulemesa.
29Omo Yosefa wandwile mesho endi wamwene shongo yendi Mbenjemani, vaina vamolika, co wendekele ngwendi, “Ou ikeye mutinikila weni, uje imwanjilekele ndi?” Co wendekele kuli Mbenjemani ngwendi, “Njambi akuvezikise munange.” 30Vwasi-vwasi Yosefa wavasezele, waile ku mulili wendi nakukalililako omwo mbunge yendi yazeyele omwo vusiwa akumona ndolome yendi Mbenjemani. 31Asinoni wajwelele ku mesho, watuukile ku mulili wendi, wesekele kulikuta, co washikile ngeci vanene vyakulya. 32Yosefa watumbamene ku mesa endi lika, co vandolome vendi vatumbamene ku mesa ikwavo lalo. Vaje vaka-Ingito vakele kuje nakulya walitepesele navo, omwo vakevo vacimwene ngwe ca vunyengwe kulya amo na vaHevelu. 33Vandolome va Yosefa vavatumbikile ku mesa, nakukenga vihanga vyavo kuli Yosefa ngwe mu cilika cavo, kutunda ku wa mukulunu nakweta kuli wa shongo. Omo valimwene vati vanatumbama, co umo na umo walikomokelele. 34Vavaanene vyakulya vya ku mesa ya Yosefa, oloni vyakulya vya Mbenjemani vyatumine manene kutuvakana vakwavo voshe, ngwe vyakulya vanu vatanu. Ngeci valile nakunwa amo na Yosefa nakuvwaelela.
Actualmente seleccionado:
Kushangumuka 43: MBB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The Bible in Mbunda ©The Bible Society of Zambia, 2006