Kushangumuka 40
40
Yosefa anungulula vinjozi vya vinzinda
1Munima yeni, mwata wakwana vinyu kuli mwene wa Ingito na mwata wa vaka-kwoca makende a mwene vakele na mulonga kuli mwene. 2Co mwene waluvalele na ava vamyata vavali 3vaavakele mu kamenga mu njuvo ya uje mukulunu wakunyunga vinzinda, mu kamenga muje muvanyungilile Yosefa. 4Vakele simbu yakama mu kamenga, co uje mukulunu wakunyunga vinzinda wavakundikile kuli Yosefa ngeci avapangele.
5Co a vutsiki vumo muje mu kamenga uje mwata wakwana vinyu kuli mwene na uje mwata wa vaka-kwoca makende a mwene, valotele vinjozi, oloni vije vinjozi kuvyalifwile. 6Omo Yosefa wezile kuli vakevo mutondo, wavawanene vanombwa. 7Co wavehwile ngwendi, “Omwo vikajo munombwa ngacije lelo?”
8Vamukumbulwile ngwavo, “Tunaloto oloni naumo wai asa kutunungulwila evi vinjozi.”
Yosefa wavalekele ngwendi, “Njambi lika ikeye asa kunungulula vinjozi. Njilekeni vinjozi vyeni.”
9Co mwata wakwana vinyu kuli mwene walekele Yosefa ngwendi, “Mu njozi yange, njamwene mukolovozi wa vushuka vwa vinyu 10wakele na minango itatu. Co vwasi-vwasi omo watotomokele maputa, vishani vyatemene, co vushuka vwahile. 11Ngecivene, nganja ya mwene yakele mu livoko lyange, co njanonele vushuka nakuvukamwina mu nganja, asinoni njaanene nganja mu livoko lya mwene.”
12Ngecivene, Yosefa wamulekele ngwendi, “Eyi njozi yove inanunguluka ngeci minango itatu inapu matangwa atatu. 13Kukaita matangwa atatu, mwene akakwecela nakukwana lisesa lyakukwilwisila mu mwela wove. Co ukamwana nganja yendi ngwe muwalingile laja omo wapwile u mwata wakwana vinyu vyendi. 14Oloni ukanjanuke omo ukakala mwamuvwa, ukapwe muka-kunjitetela, co ukambulule vyange kuli mwene. Unjikwase ngeci nange njakutunde muno mu kamenga 15omwo mwa vushunga vene, yange vanjivile mu lifuti lya vaHevelu, nameme muno mu Ingito yange kunjalingile cuma nacimo cai civananjakela muno mu kamenga.”
16Co mwata wa vaka-kwoca makende a mwene omo wazivile vuvwa vwakununguluka kwa njozi ya uje mwata wakwana vinyu kuli mwene, nendi walekele Yosefa njozi yendi ngwendi, “Nange lalo njinaloto njozi, njinambatele vingalo vitatu vya makende a mutwe wange, 17ngeci mu ngalo yaakamwa mwakele miyati yoshe ya makende amavwa aje vocelele mwene, co tuzila vakele nakuwalya.”
18Yosefa wamukumbulwile ngwendi, “Kununguluka kwayo kunapu ngeci, vije vingalo vitatu vya makende vinapu matangwa atatu. 19Kukaita matangwa atatu mwene akakutuwisa mu kamenga, co akatapa mutwe wove! Asinoni akashukika muvila wove a manda, co tuzila vakalya situ yove.”
20A litangwa lyamucitatu, lyapwile litangwa lyakwanuka kusemuka kwa mwene, mwene walingilile vangamba vendi ciwano cakulya. Co watuwisile mwata wakumwana vinyu na uje mwata wa vaka-kwoca makende, vavanenele ku mesho a vamyata vendi. 21Co mwene welwisilile uje mwata wakumwana vinyu ku vipangi vyendi, 22oloni uje mwata wa vaka-kwoca makende vamutapele mutwe. Co vyoshe vyalingiwile ngwe muje mwavinungulwile Yosefa.
23Oloni uje mwata wakwana vinyu kuli mwene kanukile Yosefa, wamwivalele ivya.
Actualmente seleccionado:
Kushangumuka 40: MBB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
The Bible in Mbunda ©The Bible Society of Zambia, 2006