LUKA 20
20
Matimba ya Yesu laha ma humaka kona.
1Hi siku rin'wana eka walawo, kakuloko a dyondzisa vanhu etempeleni a va byela Evhangeli, vaprista lavakulu ni vatsari va fika swin'we ni vakulu va tiko; va vulavula na yena, va ku: 2“Wa nga hi byela, matimba lawa u endlaka swilo leswi ha wona, ni leswaku la ku nyikeke matimba lawa i mani xana?” A va hlamula, a ku eka vona: 3“Na mina ndzi ta mi vutisa mhaka: 4Ndzi byeleni: Xana ku khuvula ka Yohane a ku huma etilweni kumbe a ku huma eka vanhu xana?” 5Kambe va vutisana, va ku: “Loko hi ku: ‘Ku hume etilweni,’ u ta ku: ‘A mi pfumelanga ha yini?’ 6Kutani loko hi ku: ‘Ku hume eka vanhu,’ tiko hinkwaro ri ta hi khandla hi maribye, hikuva hinkwavo va kholwa ngopfu leswaku Yohane a a ri muprofeta.” 7Kutani va hlamula, va ku: “A hi tivi laha ku humaka kona.” 8Kwalaho Yesu a ku eka vona: “Na mina a ndzi nga mi byeri matimba lawa ndzi endlaka swilo leswi ha wona.”
Xifaniso xa varimi.
9Kutani a sungula ku byela vanhu xifaniso lexi, a ku: “Munhu un'wana a a byarile nsimu ya vhinya, kutani a yi hirisela varimi, kavaloko a ya eku endzeni hi nkarhi lowukulwanyana. 10Hi nkarhi wa ku tshovela, a rhuma nandza wa yena eka varimi leswaku va n'wi nyika mihandzu ya vhinya. Kambe varimi va n'wi ba, va n'wi tlherisa va nga n'wi nyikanga nchumu. 11A engeta a rhuma nandza un'wana; na yena, va n'wi ba, va n'wi khomisa tingana, kutani va n'wi tlherisa ntsena. 12A engeta a rhuma wa vunharhu, yeloyi, kuteloko va n'wi boxe timbanga, va n'wi hlongola. 13Kutani n'wini wa nsimu a ku: ‘Ndzi ta endla yini? Ndzi ta rhuma n'wana wa mina, loyi ndzi n'wi rhandzaka, kumbe loko va n'wi vona, va ta n'wi chava.’ 14Kambe varimi, loko va n'wi vona, va byelana va ku: ‘Mudyandzhaka hi loyi; a hi n'wi dlayeni, leswaku ndzhaka yi va ya hina.’ 15Kutani va n'wi humesela ehandle ka nsimu, va n'wi dlaya. N'wini wa nsimu u ta endla yini xana? 16U ta ta, a dlaya varimi valavo, a va a nyika van'wana nsimu va vhinya.” Loko Vayuda va twa sweswo, va ku: “Swi nga tshuki swi va tano.” 17 Kutani a va languta, a ku: “I yini leswi tsariweke, loko va te: ‘Ribye leri tshikiweke hi vaaki hi rona leri endliweke ribye ra yinhla’? 18Un'wana ni un'wana la nga ta wela ehenhla ka ribye leri, u ta pyanyiwa; kambe ri ta pyanya loyi ri nga ta n'wi wela ehenhla.” 19Kutani vaprista lavakulu ni vatsari, va lava ku n'wi khoma enkarhini wolowo, kambe va chava vunyingi; hikuva va swi twile leswaku u ringanise vona hi xifaniso lexi.
Ta ndzuvo wa Khezari.
20Kutani va n'wi xiya, va rhuma tinhlori leti tiendlaka vanhu lavanene, leswaku va ta n'wi phasa hi marito ya yena, va ta n'wi nyiketa tihosi ni le matimbeni ya mufumi. 21Va n'wi vutisa, va ku: “Mufundhisi, ha swi tiva leswaku u vulavula u va u dyondzisa hi ku lulama: a ku languti nghohe ya munhu, kambe u dyondzisa ndlela ya Xikwembu hi ntiyiso. 22Xana swa hi lulamela ku humesela Khezari ndzuvo, kumbe a hi swona-ke?” Kuteloko a vona mano ya vona, a ku eka vona: 23“Mi ndzi ringela yini xana? Ndzi kombeni denari. Yi ni xifaniso xa mani, ni vito ra mani?” 24Va n'wi hlamula, va ku: “Swa Khezari.” 25A ku eka vona: “Tlheriselani swa Khezari eka Khezari, ni swa Xikwembu eka Xikwembu.” 26Kutani va hluleka ku n'wi phasa hi marito ya yena emahlweni ka vanhu, kambe va hlamala hi ku hlamula ka yena, kutani va miyela.
Ta ku kaneta ka Vasaduki.
27Kutani Vasaduki van'wana lava vulaka leswaku a ku na ku pfuka ka vafi, va ta eka Yesu ku n'wi vutisa, va ku: 28 “Mufundhisi, Muxe u hi tsalele, a ku: ‘Loko munhu a tekile nsati kutani a fa a nga ri na vana, makwavo u ta teka nsati wa yena a velekela makwavo vana.’ 29Kambe vana va munhu a va ri kona va ntlhanu na vambirhi; hosi ya vona, kuteloko a tekile nsati, a fa a nga ri na vana. 30Wa vumbirhi a teka nsati yeloyi, kutani na yena a fa a nga ri na vana. 31Wa vunharhu a n'wi teka, kutani swi va tano eka lava ntlhanu na vambirhi; va fa va nga siyanga vana. 32Endzhaku ka vona hinkwavo, na yena wansati a fa. 33Xana eku pfukeni ka vafi, u ta va nsati wa mani eka vona? Hikuva va n'wi tekile hinkwavo.” 34Yesu a va hlamula, a ku: “Vana va misava leyi va teka, va tekisa; 35kambe lava nga ta nyikiwa ku vona tinguva leti taka, ni ku pfuka ka vafi, va nga ka va nga teki na swona va nga ka va nga tekisi; 36hikuva va nga ka va nga ha fi, hikuva va ta fuma ni tintsumi, va va vana va Xikwembu, hi leswi va nga vana va ku pfuka. 37Loko ku ri ku pfuka ka vafi, Muxe na yena u ku kombisile siku leri a nga ekusuhi ni xihlahla, loko a vula Hosi, Xikwembu xa Abrahama, ni Xikwembu xa Isaka, ni Xikwembu xa Yakobo. 38Kasi a hi Xikwembu xa lava feke, kambe i xa lava hanyaka; hikuva hinkwavo vanhu va hanya ka xona.” 39Kutani vatsari van'wana, va hlamula, va ku: “Mufundhisi, u hlamule swinene.” 40Kutani a va ha tiyanga ku n'wi vutisa mhaka yin'wana.
Kriste, i n'wana mani?
41Kutani a ku eka vona: “Vanhu va ri Kriste i n'wana wa Davhida hi mukhuva wihi xana? 42Kasi yena Davhida u vurile ebukwini ya Tipisalema a ku: ‘Hosi yi byerile Hosi yanga yi ku: 43 Tshamisa evokweni ra mina ra xinene, ndzi kondza ndzi endla valala va wena vunavelo bya milenge ya wena.’ 44Sweswi, loko Davhida a n'wi vula Hosi ya yena, a nga va n'wana wa yena hi mukhuva wihi xana?”
Ta vatsari loko va soriwa hi Yesu.
45Kakuloko vunyingi hinkwabyo byi ri karhi byi n'wi yingisa, a ku eka vadyondzisiwa va yena: 46“Chavani vatsari lava rhandzaka ku tifambela hi tinguvu leto leha, ni ku xewetiwa emitsendzeleni, va rhandza switshamo leswo rhanga emasinagogeni, ni switshamo leswo rhanga emikhubyeni. 47Va dyelela tindlu ta tinoni hi ku ti endlela swikhongelo leswo leha. Valavo va ta avanyisiwa hi ku avanyisa loku hundzisaka.”
Actualmente seleccionado:
LUKA 20: TSO29
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.