Génesis 1
1
Diospa unanchasqankunamanta
1Tukuy imapa qallariyninpiqa Diosmi unancharqa hanaq pachatawan kay pachata. 2Kay pacham mana imayuq hatun chaqwa karqa, tutayaypa pampasqan uku-uku lamar qocham karqa, Diospa Espiritunñataqmi yakukunapa hawanpi muyurqa.
3 # 2 Co 4.6. Diosmi nirqa: Achkiy kachun, nispa. Hinaptinmi achkiy karqa. 4Diosmi chay achkiyta allin kasqanta qawarqa hinaspam tutayaymanta chay achkiyta rakirqa, 5chay achkiytam “punchaw” nispa suticharqa, tutayaytañataq “tutawan”. Hinaptinmi tardeykuqmanta paqarinnintin tardeykuqkama punta kaq punchaw karqa.
6Chaymantam Dios nirqa:
“Yakukuna rakinaq vacío kachun, chaynapi yakukuna rakinasqa kananpaq”, nispa.
7Diosmi ruwarqa yaku rakinaq vaciota, hinaspam vaciopa ukunpi kaq yakuta rakirqa vaciopa hawanpi kaq yakukunamanta. Hinaptinmi chayna karqa. 8#2 Pe 3.5.Yakukuna rakinaq vaciotam Dios suticharqa cielowan. Hinaptinmi tardeykuqmanta paqarinnintin tardeykuqkama iskay kaq punchaw karqa.
9Chaymantam Dios nirqa:
Cielopa ukunpi yakukuna huk hawaqllaman huñunakuptin chaki allpa rikurichun, nispa.
Hinaptinmi chayna karqa. 10Diosmi chaki kaqta “allpa” nispa suticharqa, huñunasqa yakukunatañataqmi “lamar qochawan” suticharqa. Chaykuna allin kasqanta qawaspanmi 11Dios nirqa:
Allpamanta tukuy rikchaq plantakuna wiñamuchun: Qorakuna, tukuy rikchaq sachakuna, rurunpitaq murun kachun; sapakama muhunman chaynataq murunman hina, nispa.
Hinaptinmi chayna karqa. 12Allpamantam wiñamurqa tukuy rikchaq qorakuna sapakama rurunman hina muhuyuq, chaynataqmi ruruq sachakunapas sapakama rurunman hina muruyuq. Chaymi allin kasqanta Dios qawarqa. 13Hinaptinmi tardeykuqmanta paqarinnintin tardeykuqkama kimsa kaq punchaw karqa.
14Chaymantam Dios nirqa:
Cielopi rikurichun punchawtawan tutata rakinaq achkiqkuna, chaynapi watakuna, killakuna hinaspa punchawkuna kananpaq. 15Chaykunayá cielomanta kay pachata kanchamuchun, nispa.
Hinaptinmi chayna karqa. 16Hinaspanmi Dios iskay hatun achkiqkunata unancharqa: Hatun kaqtam punchawpi achkinanpaq, taksa kaqtañataq tutapi achkinanpaq. Unancharqataqmi chaskakunatapas.
17Chaykunatam Dios churarqa cielomanta kay pachata kanchamuspa 18punchawpipas tutapipas munaychakunankupaq hinaspa tutatapas punchawmanta rakinanpaq. Diosmi chaykuna allin kasqanta qawarqa. 19Hinaptinmi tardeykuqmanta paqarinnintin tardeykuqkama tawa kaq punchaw karqa.
20Chaymantam Dios nirqa:
Yakukunapi paqarichun tukuy rikchaq animalkuna, paqarimuchuntaq kay pachapi alton pawaq animalkunapas, nispa.
21Diosmi unancharqa yakupi kaq hatun animalkunata, chaynallataq castanman hina qasqonpa puriq tukuy rikchaq urukunatapas, unancharqataqmi alton pawaq animalkunatapas castanman hina. Chaykunatam Dios qawarqa allin kasqanta. 22Tukuy chaykunata bendecispanmi Dios nirqa:
Anchallataña miraspa lamar qochapi yakukunaman huntaychik, mirachuntaq kay pachapi alton pawaq animalkunapas, nispa.
23Hinaptinmi tardeykuqmanta paqarinnintin tardeykuqkama pichqa kaq punchaw karqa.
24Chaymantam Dios nirqa:
Allpamanta paqarimuchun castanman hina tukuy rikchaq animalkuna, uywa animalkuna, qasqonpa puriq urukuna, tukuy rikchaq purun animalkunapas, nispa. Hinaptinmi chayna karqa. 25Diosmi unancharqa castanman hina: Purun animalkunata, uywa animalkunata hinaspa qasqonpa puriq urukunatapas. Diosmi qawarqa chaykuna allin kasqanta.
26 # 1 Co 11.7. Chaymantam Dios nirqa:
Runata ruwasun ñoqanchikman rikchakuqta, ñoqanchik kaqllata; challwakunapi, alton pawaq animalkunapi, qasqonpa puriq urukunapi chaynallataq tukuy rikchaq animalkunapi munaychakunanpaq, nispa.
27 #
Mt 19.4; Mr 10.6. Diosmi runata unancharqa
kikinman rikchakuqta, qaritawan warmitam unancharqa.
28 #
Gn 5.1-2. Paykunata bendecispanmi Dios nirqa:
Anchata miraspa kay pachaman huntaychik,
hinaspa munaychakuychik challwakunapi,
alton pawaq animalkunapi,
qasqonpa puriq urukunapi,
tukuy rikchaq animalkunapipas, nispa.
29Chaymantam Dios nirqa:
Kay pachapi muhuyuq llapallan plantakunatawan muruyuq sachakunatam mikunaykichikpaq qoykichik. 30Alton pawaq animalkunaman, qasqonpa puriq urukunaman hinaspa tukuy rikchaq animalkunamanñataqmi mikunankupaq pastokunata qoni, nispa.
Hinaptinmi chayna karqa. 31Diosmi qawarqa unanchasqankunaqa llumpay allin kasqanta. Chaymi tardeykuqmanta paqarinnintin tardeykuqkama soqta kaq punchaw karqa.
Actualmente seleccionado:
Génesis 1: RCHQ2
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Chuya Qellqa Revisión @ Sociedad Bíblica Peruana, 2012