Samz 45
45
Pou chèf mizisyen-an. Sé pou yo chantéʼy èk menm mizik chanté-a ki di, “Bèl Ti Flè Blan-an”
An chanté sé désandan Kora-a
An chanté lanmou
An Chanté Pou Mawiyaj Wa-a
1Mwen ni an chay bèl pawòl ka vini an lidé mwen,
kon mwen ka konpozé chanté sala bay wa-a.
Menm kon an moun ki ka ékwi byen,
lanng mwen pawé pou chanté.
2Sé ou ki pli bèl anpami tout nonm ki an latè-a.
Bèl pawòl ka sòti an bouch ou.
Bondyé ja benniʼw pou tout tan.
3Bouklé sab ou an wenʼw, gwan wa.
Ou ni pouvwa èk moun ka onnowéʼw.
4Mouté kawòs ou, gwan wa. Alé goumen
pou fè défans tout sa ki vwé èk dwèt.
Lanmen dwèt ou ni asé pouvwa pou sa genyen tout ladjè.
5Sé flèch-la ou ka voyé-a filé an pil,
yo ka pèsé tjè lèlmiʼw,
èk sé nasyon-an kay tonbé an pyéʼw.
6Gouvèdman-an Bondyé ja ba ou-a kay doubout pou tout tan èk pou tout tan.
Ou ka sèvi baton wa-a pou kondwi sé moun ou-an san pwéféwans.
7Ou enmen sa ki dwèt épi ou hayi sa ki mové.
Sé pou sa Bondyé ki Bondyéʼw-la ja chwaziʼw
épi i ja baʼw tjè kontan
pasé pyès lòt wa.
8Had ou ni lòdè losyon ki fèt èk lanmi#45:8 Lanmi sé an lèt bwa ki ka santi bon., lalwé èk kas.
Yo ka jwé mizik baʼw pou fè tjèʼw djé,
an bèl kay ou-a ki dékowé èk pik léfan-an.
9Anpami sé madanm-lan ki an kay ou-a la ni ich lòt wa.
Épi wenn-an doubout an plas lonnè-a asou lanmen dwèt ou
épi an pil lò anlèʼy ki sòti an péyi Ofir.
10Ou ki ni pou mayé èk wa-a, kouté sa mwen ka di-a.
Sé pouʼw obliyé moun péyiʼw èk tout fanmiʼw ki lakay papaʼw.
11Bèltéʼw ki kay fè wa-a plézi.
Sé li ki mèt ou, kon sa ou ni pou obéyiʼy.
12Jan péyi Taya kay mennen an pil kado baʼw.
Moun ki wich kay vini flatéʼw pou favèʼw.
13Pwennsès-la abiyé an chanm li — pa dé bèl i bèl!
Had li fèt épi fil ki fèt an lò.
14Yo té mennenʼy byen abiyé an tout bèl had li èk yo pwézantéʼy bay wa-a,
èk sé jenn fi-a ki ka édéʼy-la té ka swiv li.
15Yo ka antwé an kay wa-a
èvèk lajwa èk kontantman an tjè yo.
16Wa mwen, ou kay ni an pil gason
pou pwan plas ou,
èk ou kay mété yo kondwi tout latè-a.
17Chanté sala kay fè moun chonjé nonʼw pou tout tan,
èk tout moun kay glowifyéʼw pou tout tan èk pou tout tan.
Actualmente seleccionado:
Samz 45: acfDBL
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1999, Wycliffe Bible Translators, Inc. All rights reserved.