Gén 2
2
1Kere' k'a toq xk'achoj kibanik ri kaj y ri ruwach'ulew y ronojel ri ek'o chila' chikaj y ronojel ri k'o chuwech re ruwach'ulew. 2Toq xapon ri ruwuq q'ij, ri Dios k'achojineq chik k'a chubanik ronojel. Y rija' xuxlan k'a chire re samaj re'. 3Ri Dios kan xrurtisaj k'a ri ruwuq q'ij y xuben chi re q'ij re' man junan ta k'a rik'in ri ch'aqa' chik q'ij; y kan xuch'er k'a richin uxlanenri'il, roma chupan ri q'ij ri' xtane' chire ri samaj ri xuben. 4Kere' k'a xbanatej toq xk'oje' ri kaj y ri ruwach'ulew.
Ri qejoj ri kan nik'ases rupan
Ri q'ij toq ri Dios xuben ri kaj y ri ruwach'ulew, 5k'a man jun tiko'n k'o chuwech, roma rija' man jani tuya-pe ri job pa ruwi' re ruwach'ulew y chuqa' man jun nisamajin. 6Xaxe ri ruxla' ri ya' ri niyakatej-q'anej chuwech ri ruwach'ulew, jari' ri niya'an richin. 7Ri Dios xuben ri achin rik'in ri ulew y k'ari' xuxupuj pa rutza'n richin xuya' ruk'aslen y Adán ri rubi' ri xuya'. Y keri' k'a xbanatej toq xya'ox ruk'aslen ri achin.
8Y ri Dios xutik-qa ruwech ri jun qejoj, ri akuchi kan rayixel ronojel ri k'o, ri k'o pa relebel-q'ij chire ri ruwach'ulew. Y chiri' xuya-wi ri achin ri xuben. 9Y xuben richin xewachin-pe chuwech re qejoj re' ronojel ruwech che' ri kan e rayixel y kan e tijel y pa runik'ajal k'a ri qejoj ri' ek'o ka'i' che', ri jun nuya' k'aslen y ri jun chik nuya' etamabel chirij ri rukojol ri utz rik'in ri itzel.
10Y chupan ri qejoj ri', nalex k'a jun raqen-ya' y re raqen-ya' re' jare' ri kan achi'el nuya'aj kan ri qejoj y nuch'er k'a ri' pa kaji' ruq'a'. 11Ri jun ruq'a' ri raqen-ya' rubini'an Pisón; re' rusutin rij ri ruwach'ulew ri rubini'an Havilá re wakami, akuchi janila q'anapueq k'o; 12Ri q'anapueq ri k'o chiri' chupan ri ruwach'ulew ri' janila jebel; y chuqa' ri chiri' k'o jun ruwech abej ri jebel ok rubini'an ónike y ri jun ruwech che' ri k'o ruq'olil y kan jubul-wi. 13Ri ruka'n ruq'a' ri raqen-ya' rubini'an Gihón; re' rusutin rij ri ruwach'ulew ri rubini'an Cus re wakami. 14Ri rox ruq'a' ri raqen-ya' ri', rubini'an Tigris; jare' ri niq'ax pa relebel-q'ij chire ri Asiria. Y ri rukaj ruq'a' ri raqen-ya' jari' ri Éufrates.
15Ri Dios xuya' k'a ri achin pa qejoj ri kan nik'ases,*f1* richin tusamajij y tuchajij. 16Y xubij chire ri achin: Ronojel ruwech ri che' ri k'o pa qejoj utz natej ri kiwech. 17Xaxe ri che' ri niya'on etamabel richin ri utz y ri itzel man tatej, roma ri q'ij toq xtatej, kan xkaken, xcha'.
Toq ri Dios xutz'uk ri ixoq
18Y ri Dios xuch'ob-qa: Xtinben k'a jun to'onel richin ri achin ri kan ruk'amon chire, roma man utz ta chi ruyon nik'oje', xcha'. 19Keri' k'a xuben ri Dios toq xerutz'uk-pe chuwech re ruwach'ulew ronojel kiwech chikopi' richin pa k'echelaj y ronojel kiwech aj-xik' taq chikopi'. Y xeruk'en k'a pe chuwech ri achin richin tuya' kibi'; y ri kibi' ri xtuya' rija' jari' ri kibi' ri xtik'oje' kan. 20Ri achin xuya' k'a kibi' ri chikopi' kan achi'el ri kibanik. Y xuya' k'a kibi' ri aj-xik' taq chikopi' y ri chikopi' richin k'echelaj, y xuya' chuqa' kibi' ri chikopi' ri ye'awajix. Jak'a ri Adán xa ruyon ok roma man jun ri achi'el ta rubanik rija'. 21K'ari' ri Dios xuwarisaj ri Adán y rokik niwer, ri Dios xrelesaj jun chike ri rubaqil chuxe' ri ruk'alk'a'x y k'ari' xutz'apej chik kan ri ruch'akul. 22Y rik'in ri rubaqil ri Adán, ri Dios xuben k'a jun ixoq y xujech k'a chire. 23Y jari' toq ri Adán rik'in kikoten xubij: Re' kan junan rubanikil wik'in yin. Kan nubaqil-nuboch'il wi yin, rija' xtubini'aj k'a Ixoq,*f2* roma rik'in ri achin xelesex-wi, xcha' ri Adán.
24Xa roma ri' ri achin nuch'er-pe-ri' kik'in ri rute-rutata', y rik'in chik ri rixjayil xtuk'uaj-wi-ri', richin chi kan xtikich'akulaj-ki' chi e ka'i'.
25Y ri Adán y ri rixjayil kan e ch'anel k'a chi e ka'i' y man jun k'a k'ix chikiwech.
Actualmente seleccionado:
Gén 2: KQC
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Kaqchikel Bible © Bible Society in Guatemala, 2003.